Na lpaqtaxanaxatpi ye Jerusalén

Nagui shiguelaxasoxo coʼollaq so saxanaxa ra ỹoltaxa qanogoxosheguem so lpaqtaxanaxatpi ye Jerusalén. Huoʼo so israelita lʼenaxat Nehemías lmaʼ ye ciudad Susa huaña ye Persia. So maye lamaxashec so ntaʼa Artajerjes. Huoʼo so naʼaq so lqaỹa so Nehemías chegoqtague ye Judá nachetac ra qauem naxaỹaxac: «So israelitapi coʼollaq iguelaxa ye Jerusalén qaica ca mpaxatalec. Na lpaqtaxanaxatpi taq so lasompi ye ciudad coʼollaq so babiloniopi nlaxajñe, saxanaxa ra ỹoltaxa qanogoxosheguem». So Nehemías ỹataqta itoxoñe. Huotaique retaunaxan nache natamenot ñi Dios yaqtoʼ so ntaʼa ishet ra ỹashetec ra taỹa ye Jerusalén.

Lcopague so ntaʼa ilaʼa so Nehemías ỹataqta itoxoñe. ʼEnapega: «Ye ʼecoʼ saishet ra ʼam sa noʼon. ¿Chaq táʼaencoʼ ra ʼauaquicota?». So Nehemías ỹasateguet: «Ye ciudad sachegoqchiguiña Jerusalén, ỹataqta nlachiguiñi, ỹoqoʼoye ỹataqta setoxoñi». So ntaʼa inat: «¿Négueʼt ca ishet ra ʼam setaunec?». So Nehemías ỹahuotaʼa paỹauo so natamnaxac. Lcopague ʼenapec: «Ishet ra aỹem anqouaguec ra ishet ra saỹa ye Jerusalén ra yaqtoʼ ỹoltaxa ñogoxosheguem ca lpaqtaxanaxatpi». So ntaʼa Artajerjes ʼenapega ra ishet ra taỹaʼa. Taqaʼen ỹamaq so nalleppi yaqtoʼ qaica qamachaqca reʼera qaỹaloqtec lliquiaxac. Ỹanagui ra nataxala ilotegue ye Judá taq ỹanem so ʼepaqpi ra yaqtoʼ ỹoʼot so lasompi ye ciudad.

Coʼollaq so Nehemías iviraʼa ye Jerusalén nache imeten so lpaqtaxanaxatpi. Lcopague laỹonaʼt so ntaxaỹaxanaxanecpi taq so nataxalapi, ʼenapega so mayepi: «Qomiʼ huoʼo ra qarqalaic. Iuen ra soʼonataxanac». So pueblo ỹaỹamaxareeta nache iguelaxalec ra ỹoltaxa nogoxosheguem so lpaqtaxanaxatpi.

Huoʼo so mpaxaguenaxauapi isheuetape so mayepi taq ʼenapec: «Ra huenosheguemec na qauoʼochitac aca huaxaỹaxa nache huaʼaxauec». Qaq so mayepi saishet ra ỹalaxaguet, taq queʼeta ra roʼonataxatacpi. Queʼeta ra nogoxosheguem iviraʼa ra logoraic taq qaramtaʼ.

Nache huoʼo so qalota mpaxaguenaxauapi, ỹottaʼaʼt ʼalhuapi, ra huotaique iloquiaxan ye Jerusalén. So judiopi laxaỹaxac reʼera nache huoʼo ra l-lliaxa. Qalaxaye so Nehemías ʼenapegalo: «Saishet ra qayiʼitac. Ñi Jehová qomiʼ itauan». Taq ỹachaña soua alleppi yaqtoʼ nauatalec so ʼonataxanaxaicpi. Yaqtoʼ so mpaxaguenaxauapi saishet ra huoʼo ca ỹoʼoteq qauem.

So lpaqtaxanaxat taq so lasompi ime ra qaỹoʼot queuoigui so 52 naʼaxaʼte. So Nehemías ỹoʼot ra qaỹeʼeguenauga so levitapi ra yaqtoʼ qoỹaneuo so qaỹoʼotaq noʼonatac mashe ime. Ỹoʼot soua dos grupos so ʼonaxanaxaicpi. Huenosheguemec so npaqtaxanaxat taq quetalec, so ʼoonolec tateuga so paʼaỹaʼague ra neʼemaq. So mayepi ỹonaxatoʼot ñi Jehová taq ivitapigui ỹahuotaʼa so nviquepi címbalopi, arpapi taq nasheerepi. So Esdras qategue so laỹipi taq so Nehemías qategue so lỹa laỹipi iviraʼa añi templo ra laponat. ʼEnauac so ỹallepi, ʼalpi taq ñaqpiolecpi qoỹanem ñi Jehová ra nachetaqtaxanaxat. Ỹataqta ltaʼaraic seʼeso tonaxac ye Jerusalén, ỹoqoʼoye iviraʼa ra huaʼaqtac so qaỹoqta.