Aso Elisabet huoʼo ca llalec

Coʼollaq so ntaxaỹaxanec lʼenaxat Zacarías taq aso lhua Elisabet, so lmaʼ saqaỹapeque ye Jerusalén. Masheye lcopague soua 400 viʼiyel coʼollaq ỹoltaxa qanoxosheguem so lpataxanaxacpi ye Jerusalén. So Zacarías taq aso Elisabet qalota viʼiyel ra mashe huaronaʼt qalaxaye qaica ca llalacpi. Huoʼo so naʼaq so Zacarías ỹavigaxat so nchenaxanaxat huaña so lauel quiʼita aso templo, nache nachaxana so ángel Gabriel. So Zacarías ỹataqta ñiʼi, qalaxaye so Gabriel ʼenapega: «Saishet ra huoʼo ra ayiỹaxa. Ñachetac na noʼon naxaỹaxac chigoqoʼot ñi Jehová. Aca arhua Elisabet huoʼo ca llalec taq auanagui ra lʼenaxat Juan. Ñi Jehová lcaʼaua ca Juan yaqtoʼ ỹoʼot ca noʼonatac ʼamaqtaqaic». So Zacarías inat so maye: «¿ʼEetec ra saỹaten na anasaxauec ỹataqta ʼeesa? Aca ihua taq aỹem mashe qomiʼ ỹaxaiquiolqa ra huoʼo ca qayalec». So Gabriel ỹasateguet: «Ñi Dios aỹem namac ra yaqtoʼ ʼam sanem neʼena noʼon naxaỹaxac. Qalaxaye saishet ra aỹem aumaqten nache saq ishet ra amalle lcopague ñiguiñi ca nogotolec».

So shiỹaxauapi patauec huotaique ỹaỹaten táʼaencoʼ ra qaỹaloqteguet so Zacarías, chaʼaye huanna ra nache ʼeetec reʼera. Qaq coʼollaq mpauec so Zacarías saq ishet ra remalle ndotec ra rogoxona naua lhuaq. Ỹoqoʼoye so shiỹaxauapi nanomtaʼa ra so maye ỹaqonguet so naxaỹaxac chigoqoʼot ñi Dios.

Lcopague ipacchigui so lʼaqtac so ángel, aso Elisabet hualaxai taq ñiguiñi so llalec. So nauochaxauapi taq so luolecpi aso Elisabet taỹa ra ỹahuaton so bebé taq ntotapeguec lỹa aso maye. Aso Elisabet ʼenapec: «Lʼenaxat Juan». So mayepi ỹasateguet: «Qaica ca nache ʼeetec ra lʼenaxat na arhuolecpi. ʼOnaxaic taxa ra qaỹanagui Zacarías ʼenaʼam ra ltaʼa». Qalaxaye so Zacarías ỹiriñe: «Ra lʼenaxat Juan». Nache chigoqchiguiña so Zacarías ỹoltaxa ishet ra remalle. ʼEnauac so shiỹaxauapi ye Judea laxaỹaxac reʼera taq nataxateguelapi: «¿Négueʼt ca ỹoʼot neʼena nogotolec qom ỹe?».

Nache so Zacarías nlaqchigui na espíritu santo taq nasaxauec so profecía: «¡Qaỹioʼoxoren ñi Jehová! Ñi maye ỹachaxanapeguem so Abrahán ra namac ca ncalaxaqui, ca Mesías ra qomiʼ ncaʼalaxateguesop. Qomchiye ca Juan nʼaqtaxanaxanec yaqtoʼ ỹapaxaguen na shiỹaxauapi ra yaqtaʼa nviʼ ca Mesías».

Aso María, lauoʼlashe aso Elisabet, taqaʼen huoʼo so huaigui ỹataqta ʼamaqtaqaic. Reʼera semetemac ca lỹa paxaguenaxat.