So ángel Gabriel namaqtega aso María

Aso María qañole maye lmaʼ ye ciudad Nazaret huaña ye Galilea, taq lauoʼlashe aso Elisabet. Aso María mashe huotaique huarone so ʼepaq loʼo lʼenaxat José. Coʼollaq aso Elisabet mashe iviʼi soua seis caʼagoxoiqa ra hualaxai, so ángel Gabriel nachaxana aso María taq ʼenapega: «María ñi Jehová ỹataqta ʼam ỹaỹamaxareta». Aso maye saq ỹaỹateeteguet so nasaxauec so Gabriel, nache so maye raʼaqtaxanem: «ʼAm hualaxai taq huoʼo ca aỹalec. Ca maye lʼenaxat Jesús. Ca maye qomchiye ntaʼa, ca Lʼonataxanaxac chochaq taeec».

Aso María ʼenapec: «Qalaxaye saxanaxa ra seueguet ca ỹale. ¿ʼEetec ra huoʼo ca ỹalec?». So Gabriel ỹasateguet: «Ñi Jehová qaica ca iqalanapec. Ca espíritu santo ʼam nataỹaña nache huoʼo ca aỹalec. Aca arhuoʼlashe Elisabet taqaʼen hualaxai». Nache aso María ỹasateguet: «Aỹem nlata ñi Jehová. Ipacchigui qome so anasaxauec».

Aso María namaqtega aso Elisabet ye ciudad netaña so qoỹoqocheguemec ʼalhua. Qaq coʼollaq aso maye riquinaxan nache aso Elisabet nanomtaʼa ra raỹapec so nogotolec netaigui aso lcoogoxoqui. Aso Maye nlaqchigui ra espíritu santo taq ʼenapec: «María ñi Jehová ʼam ỹanem ra achiquiaxac. Négueʼt aỹem ra aỹem anamaqtega maye ʼam lateʼe ca Mesías». Aso María ỹasateguet: «Aỹem shioxoren ñi Jehová ʼenauac ra iquiyaqteỹaxac». Nache noʼonaguet aso Elisabet queuoigui soua tres caʼagoxoiqa taq lcopague iguelaxa ye lmaʼ Nazaret.

Coʼollaq so José laxaỹaxac ra hualaxai aso María, nache saishet ra huotaique huaronguet aso maye. Qalaxaye so ángel nachaxana rogoxona so lchoxonaxac taq ʼenapega: «Saishet ra ayiʼi aso maye qaica ca ỹoʼot qauem. Ishet ra ahuaronguet aca maye». Nache so José huaronguet aso María.