So angelpi iaʼaxatec ra ñiguiñi so Jesús

So nataxala César Augusto ye Imperio romano, ramaxasoxolec ʼenauac so judiopi ra taỹaʼa ye lañoqoʼ ra nanereuo. So lauolecpi so José netaña coʼollaxa ye Belén, ỹoqoʼoye so José taq aso María taỹaʼa yeʼeye. Mashe yaqtaʼa ra ñiguiñe so llalec aso María.

Coʼollaq iviraʼa ye Belén nache qaica ca ỹanata ra huetaña. Souaxat reʼera nache ndotec ỹanata so lmaʼ na nlo animalpi nache huaña ra ñiguiñi so Jesús. Aso María lpataxangui so hualoq laỹi taq ỹachangui aso lquiaʼaxaqui na animalpi.

So mashe pe, saqaỹapeque ye Belén huoʼo so qagueta loʼopi huetaʼa ye campo ra ilotegue aso lalopi. Nache nachaxana so ángel taq ilaʼa ra lloxoyec ñi Jehová ra iqoỹaralec so mayepi. So qagueta loʼopi ỹataqta ñiʼi, qalaxaye so ángel ʼenapega: «Saishet ra qayiʼi chaʼaye ñachetac ra noʼon naxaỹaxac. Ca Mesías mashe ñiguiñi huaña ye Belén». Huaña nache nachaxana so qalota angelpi huaña na piguem, taq ʼenapec so mayepi: «Lloxoyec ñi Dios na piguem taq nlagaxayec ana ʼalhua». Nache so angelpi qaʼai so mayepi. ¿Négueʼt ca ỹoʼot so qagueta loʼopi?

So qagueta loʼopi retaqtegat: «Seuenac ra saxaỹa ye Belén nagui». Nache ỹalapigui ra jec, taq qailaʼa so José, aso María taq so llalec chetague ñiguiñi huaña so lmaʼ na nlo animalpi.

So shiỹaxauapi naxaỹaxatega so qagueta loʼopi huoʼo ra laʼalaxa. Aso María recuennataxateguelec so lʼaqtac so ángel taq saishet ra icouai. So qagueta loʼopi ỹateqot ra nachiquiaxac ñi Jehová souagat so ilaʼa taq naxaỹaxatega, so mayepi iguelac taỹaʼa so lalopi.