Ñi Jehová mpaxajlec so Jesús

Coʼollaq huoʼo so ʼalhua qaỹoqtaʼa ye Israel na shiỹaxauapi lmaʼ yeʼeye ỹamaqten na huaqajñepi ishet ra ỹachaxana na nqaʼaic. Huoʼo so pe soua ỹalleppi chegoqtrague ra yoʼoxoñi ilaʼa aso icoʼ huaqajñe ỹataqta qashelec, jecta taq qategue aso maye. Aso «huaqajñe» ỹachaxana na nqaʼaic iviraʼa ye Jerusalén. Soua ỹalleppi innatape so shiỹaxauapi: «¿Chaq huetaʼague ca nogotolec maye ntaʼa qomchiye na judiopi? Sauoqtaique ra saʼaroqoto naua qarllecte ca maye».

So ntaʼa ye Jerusalén, Herodes huaʼaqteguelec seʼeso ralaxaic ntaʼa. Nache ỹaguec ra lhuogoxo taq inat so lataxalapi so ntaxaỹaxanecpi: «¿Chaq huetaʼague ca nogotolec maye qomchiye ntaʼa?». So mayepi ỹasateguet: «So nʼaqtaxanaxanecpi ʼenapec ra huaña ra lañoqoʼ ye Belén». So Herodes iỹaxanauega soua ỹalleppi chegoqtrague ra yoʼoxoñi taq ʼenapegalo: «Qanqoʼoñia ye Belén taq qanmichiỹaique ca nogotolec. Lcopague qanñiguelaqai taq aỹem qauaxachim ca huetague chaʼaye taqaʼen sauotaique saʼalroto naua illectel». Qalaxaye reʼera saishet ʼeesa.

Aso «huaqajñe» ỹoltaxa nraxan nache soua ỹalleppi qategue iviraʼa ye Belén. Nache aso «huaqajñe» iviraʼa viʼiguet napasheguem so nmaʼ, soua ỹalleppi pareuoʼo taq qailaʼa so Jesús taq aso lateʼe María. Soua maye ỹalroqoto naua l-llecte so nogotolec taq qaỹanem na lachetaqtaxanaxac: oro, nchenaxanaxat taq mirra. Qalaxaye, ¿petaʼa ʼeesa ñi Jehová ỹamaq soua ỹalleppi so huetaña so Jesús? Saishet.

Seʼeso pe ñi Jehová ʼenapega so José rogoxona so lchoxonaxac: «So Herodes huotaique ỹalauat ca Jesús. Anqona ye Egipto ʼam, arhua taq ca ayalec. Nache qoñitaña yeʼeye iviraʼa ca laloqoʼ ra ʼam shenapega». Nache so José taq so lauolecpi taỹaʼa ye Egipto.

Ñi Jehová ʼenapegalo soua ỹalleppi chegoqtrague ra yoʼoxoñi, ra saishet ra iguelaxa so Herodes. Coʼollaq so Herodes nanomtaʼa ra saishet ra ñiguelac nache ỹataqta ralemata. Coʼollaq saq ỹanata so Jesús, nache ramaxasoxolec ra qaỹalauat ʼenauac na nogotolecpi ʼenaʼam na lañaxataxa so Jesús huetaʼa ye Belén. Qalaxaye so Jesús qoỹotaʼa, huetaña ye Egipto.

Qaq lcopague so Herodes ileu. Nache ñi Jehová ʼenapega so José: «Ishet ra qauguilqai mashe qaica ca huotaique ra ỹalauat na nogotolec». So José, aso María taq so Jesús iguelaxa ye Israel, nache huetaña ra lmaʼ ye Nazaret.