So nsoqolec Jesús

So José, aso María taq so Jesús lmaʼ ye Nazaret taq so laỹi llalacpi. So José loʼonataxanaxac ra ʼepaq loʼo yaqtoʼ ishet ra ỹanem na iuenaique so lauolecpi. Taqaʼen ỹapaxaguenque ñi Jehová taq na Lamaxasoxonaxacpi. So nhuolecpi saxaỹet taỹa ra yaqtoʼ ỹioʼoxoren ñi Jehová taq napaxaguena ñi maye, so laponqaʼ lʼenaxat sinagoga. Taqaʼen taỹa ye Jerusalén ʼenauac na viʼiyel yaqtoʼ qaỹoʼot na Pascua.

Coʼollaq so Jesús 12 viʼiyel ra lañaxataxa, so lauolecpi taregue ra Jerusalén, chaʼaye saxaỹet ỹoʼot reʼera. So ciudad nlaxalec na shiỹaxauapi chaʼaye taqaʼen taỹa ra ỹoʼot na Pascua. So ime so nashaxac, so José taq aso María ỹaqolec ra iguelaxa ye lmaʼ, soua maye ipitaxategalo so Jesús ỹalectaigui so laỹi nhuolecpi. Qalaxaye so qanmitaique nache saishet ra qaỹanata.

Nache ỹoltaxa iguelaxa ye Jerusalén ivitrec soua tres naʼaxaʼte ra nmitaique so llalec. ¡Qaq qaỹanata huetaña aso templo! Nache netaiye so Jesús ỹaleqtaigui so napaxaguenataxanaqpi, naxaỹaxategalo taq ỹoʼoteq na nnataxacpi. So mayepi ỹataqta huoʼo ra laʼalaxa na nasaxauec so Jesús nache qainat so maye. Ỹataqta huoʼo ra laʼalaxa souaxat na lasataxacpi. So napaxaguenataxanaqpi ilaʼa so maye ỹataqta ỹaỹateeteguet na Lamaxasoxonaxacpi ñi Jehová.

So José taq aso María ỹataqta huoʼo ra lhuogoxo. Aso María ʼenapec: «ʼAm ỹalqolec, ỹataqta ʼam ñimitaqtaique. ¿Ca qonetague?». So Jesús ỹasateguet: «¿Saq qauaỹachiñi ra iuen ra sotaña na lmaʼ ñi Itaʼa?».

So Jesús taq soua ltaʼal iguelaxa ye Nazaret. Huaña yeʼeye, so José ỹapaxaguenec na ỹaỹaten so Jesús ra roʼonataxanaxa na ʼepaq. ¿Ca ʼeetec ca arcuennataxac? ¿ʼEetec na lataxac so ñaq nsoqolec so Jesús? So Jesús nquiqtashiguem ra ỹe taq nquiqtauec ra laỹajnec. Ỹoqoʼoye ñi Dios taq na shiỹaxauapi nquiqtauec ra ỹauotec so maye.