Na ʼamaqtaqaic napaxaguenataxanaxac ana la Biblia nachena na Lʼonataxanaxac ñi Dios. Ñi Jehová roʼogoxona queʼeca Lʼonataxanaxac ñimaye yaqtoʼ ipacchigui ra huaʼauchiguiñe ʼeetapeguec ana ʼalhua. ¿Négueʼt queʼeca Lʼonataxanaxac? ¿ʼEetec saỹatenaq ra masheye ra ramaxasoxootac? ¿Négueʼt ca ỹañoxot ivitaʼa nagui? ¿Qataq négueʼt ca ỹoʼot qomchiye? Neʼena paxaguenaxat qataq caua lỹat dos ỹasateguet neʼenaua nnataxaco.

1. ¿Négueʼt ca Lʼonataxanaxac ñi Dios, qataq négueʼt ca Ntaʼa?

Ra Lʼonataxanaxac ñi Dios nachena na gobierno maye lapaxañi ñi Jehová. Ca Ntaʼa nacheñi ñi Jesucristo, qataq chigoqchigui ra piguem ra roʼonataxan (Mateo 4:17, TBSNT; Juan 18:36). Aye la Biblia iʼaxatec so Jesús: «Camaye choche tatec qome da ilotagueʼ» ra Lʼonataxanaxac (Lucas 1:32, 33). Souaxat ra Ntaʼa ra Lʼonataxanaxac ñi Dios, qome ilotalec ʼenauac na huetalec ana ʼalhua.

2. ¿Négueʼt ca ntaʼalpi lʼonataxanaxauapi ñi Jesús?

Ñi Jesús saishet ra ʼoonolec ra roʼonataxan. «Na ỹottaʼaʼt shiỹaxauapi, maye ỹottaʼaʼt naua laʼaqtaqa [...] namayepi iloʼogue ʼenauac na shiỹaxauapi» (Apocalipsis 5:9, 10). ¿Lcata ca ntaʼalpi lʼonataxanaxauapi ñi Cristo? Chigoqchigui so huetalec ana ʼalhua, qalota na shiỹaxauapi lcaʼauʼa ra quegue so Cristo, nache ñigui ra cristianopi. Qalaxaye ndotec na 144.000 namayepi taigue ra piguem yaqtoʼ ntaʼalpi lʼonataxanaxauapi ñi Jesús (ʼautaxaỹaxan Apocalipsis 14:1-4). ʼEnauac ca laỹipi cristianopi ỹalaxaguet queʼeca gobierno ana ʼalhua (Salmo 37:29).

3. ¿Táʼaencoʼ ra Lʼonataxanaxac ñi Dios napacalec na ntaʼalpi na shiỹaxauapi?

Naiʼctaxa ra huoʼo na ntaʼalpi huotaique ra ỹoʼot cam noʼon, qaica ca lʼañaxac ra ỹañoxot ʼenauac nam ʼeetapeguecpi. Qataq queuoigui na viʼiyel qanmenaxanaxanguet ca laỹipi maye petaʼa saisheto ra ỹoqochaʼa na shiỹaxauapi. Qalaxaye so Jesús Ntaʼa ra Lʼonataxanaxac ñi Dios, huanna ra ishet ra huoʼo ca nmenguet. Ñi Dios «nauaxaỹaxaasheguem qome ca noʼonataxanaxac maye saishet qome da nlaguiñi» (Daniel 2:44). Ñi Jesús ramaxasoxon qome ʼenauac ana ʼalhua qataq saishet ra lcaʼatagui na shiỹaxauapi. Ñimaye huotaxanaqtaqaic, soxoraic qataq nalochiguiñi ra lataxac, nache ỹapaxaguenec na shiỹaxauapi ra nache ʼeetec ra lataxac: huotaxanaqtaqaicpi, soxoraicpi qataq nalochiguiñi ra lataxacpi (ʼautaxaỹaxan Isaías 11:9).

4. Ra Lʼonataxanaxac ñi Dios ramaxasoxootac qome ʼenauac ana ʼalhua

So Jesucristo huoʼo ra lʼañaxac ra ramaxasoxon napacalec ʼenauac na lataxalaʼpi na viʼiyel. Qautaxaỹaxañi Mateo 28:18 qataq qaumalligui neʼena:

• ¿Táʼaencoʼ ra lʼañaxac so Jesús ra ramaxasoxon napacalec ca camachaqca ntaʼalpi na shiỹaxauapi?

Na ntaʼalpi na shiỹaxauapi ndotec ra lʼañaxac ra ramaxasoxoolec ca laỹi ana ʼalhua, qataq huoʼo ra laloqoʼ. ¿Nache ʼenaʼam ra Lʼonataxanaxac ñi Dios? Qautaxaỹaxañi Daniel 7:14 qataq qaumalligui neʼena:

• ¿Táʼaencoʼ ra noʼon ra Lʼonataxanaxac ñi Dios saishet ra nlaguiñi?

• ¿Táʼaencoʼ ra noʼon ra ramaxasoxoolec ʼenauac ana ʼalhua?

5. Na ntaʼalpi na shiỹaxauapi iuen ra qanqatec

¿Táʼaencoʼ iuen ra Lʼonataxanaxac ñi Dios nmenguet na ntaʼalpi na shiỹaxauapi? Qaumichiñi na VIDEO qataq qaumalligui neʼena:

VIDEO: ¿Négueʼt ra Lʼonataxanaxac ñi Dios? (fragmento) (1:41)

• ¿Négueʼt ca nqalanaxacpi ỹoʼot na ntaʼalpi na shiỹaxauapi?

Qautaxaỹaxañi Eclesiastés 8:9 qataq qaumalligui neʼena:

• ʼAm, ¿ʼauʼamaqten ra Lʼonataxanaxac ñi Dios iuen ra nmenguet na ntaʼalpi na shiỹaxauapi? ¿Táʼaencoʼ?

6. Ca ntaʼalpi lʼonataxanaxauapi ra Lʼonataxanaxac ñi Dios qomiʼ ỹaỹateeteguet

Ñi qaralamaxat Ntaʼa Jesús coʼollaxa huetalec ana ʼalhua ʼenaʼam ca shiỹaxaua, nache ishet ra «ỹataqta huoʼo da lchoxonnataxanaxa da shinaqta souaxat da qaica ca qadʼañaxac» (Hebreos 4:15, TBSNT). Ñi Jehová lcaʼauʼa na 144.000 ỹallepi qataq ana ʼalpi lpeʼetpi yaqtoʼ ntaʼalpi lʼonataxanaxauapi ñi Jesús, namayepi «ỹottaʼaʼt shiỹaxauapi, maye ỹottaʼaʼt naua laʼaqtaqa» (Apocalipsis 5:9).

• ¿ʼAm iʼañaqchet ra ʼacuennataxana ra ñi Jesús qataq ʼenauac ca ntaʼalpi lʼonataxanaxauapi ỹataqta ỹaỹateeteguet na lmariaxac na shiỹaxauapi? ¿Táʼaencoʼ?

7. Na lamaxasoxonaxacpi ra Lʼonataxanaxac ñi Dios napacalec na ỹoʼot na shiỹaxauapi

Na ntaʼalpi ỹoʼot na namaxasoxonaxacpi yaqtoʼ itauan qataq ntelaʼa nam ilotagueʼpi. Ra Lʼonataxanaxac ñi Dios taqaʼen huoʼo na lamaxasoxonaxacpi qataq nam ilotagueʼpi iuen ra ỹalaxaguet. Qautaxaỹaxañi 1 Corintios 6:9-11 qataq qaumalligui neʼena:

• Négueʼt ca ʼarcuennataxac: ¿ʼeetec ra lataxac na shiỹaxauapi qom ʼenauac ỹalaxaguet na lamaxasoxonaxacpi ñi Dios?a

• ¿ʼAnqaʼen ỹaỹamaqchiguiñi ra ñi Jehová huotaique nam ilotagueʼpi ra Lʼonataxanaxac ñi Dios ỹalaxaguet neʼena namaxasoxonaxacpi? ¿Táʼaencoʼ ra nache ʼeetec ca ʼarasataxac?

• ¿ʼEetec ra saỹatenaq ra na shiỹaxauapi maye saishet ra ỹalaxaguet neʼena namaxasoxonaxacpi ishet ra nqochen ra lataxac? (Qaumichiñi ye versículo 11).

NA ʼAMAQTAQAIC

Ra Lʼonataxanaxac ñi Dios nachena na gobierno maye ỹataqta ʼeesa huetaʼague ra piguem qataq ramaxasoxoolec qome ʼenauac ana ʼalhua.

ʼAntoueetaʼac

• ¿Négueʼt ca ntaʼalpi ra Lʼonataxanaxac ñi Dios?

• ¿Táʼaencoʼ ra Lʼonataxanaxac ñi Dios napacalec ʼenauac na ntaʼalpi na shiỹaxauapi?

• ¿Négueʼt ca huotaique ñi Jehová ra ỹoʼot nam ilotagueʼpi ra Lʼonataxanaxac ñi Dios?

ʼAUANATA CA LỸA

ʼAutaxaỹaxan so ỹapaxaguenec so Jesús ra huáʼague ca netaʼague ra Lʼonataxanaxac ñi Dios.

«¿Ndaʼ huetaigui añi nquiyaqte ra Lʼonataxanaxac ñi Dios?» (Paxaguenaxat ye jw.org)

¿Táʼaencoʼ na testigopi de Jehová lcaʼauʼa ra saq ỹaxanec ra Lʼonataxanaxac ñi Dios, saishet na ntaʼalpi na shiỹaxauapi?

Imattalec ra quetagueʼ ra Lʼonataxanaxac ñi Dios (1:43)

Ñi Jehová lcaʼauʼa 144.000 shiỹaxauapi yaqtoʼ lʼonataxanaxauapi ntaʼalpi so Jesús. ʼAnapaxaguena na ʼenapec aye la Biblia.

«¿Négueʼt caʼapi taigue ra piguem?» (Paxaguenaxat ye jw.org)

¿Négueʼt ca iraxan aso ncoñiteguishe yaqtoʼ iʼamaqten ra ndotec ñi Dios ishet ra ỹañoxot ca ỹaỹamaqchiguiñi ana ʼalhua?

«Saỹaten ʼeetec ra qaỹaỹamaxajñe na saỹaỹamaxañisat» (¡Despertad!, noviembre de 2011)

Ra Lʼonataxanaxac ñi Dios chigoqchigui ra roʼonataxan huetaʼague ra piguem so viʼi 1914. Seʼeso viʼi chigoqtoʼot naua paʼatrec naʼaxaʼte na ntaʼalpi na shiỹaxauapi. ¿ʼEetec ra saỹatenaq? Nagui ʼameten huaʼauñe so iʼaxattaʼaguet aye la Biblia taq ime na aloicpi ana ʼalhua qataq ra lataxac na shiỹaxauapi chigoqchigui so viʼi 1914.

1. ¿Négueʼt so iʼaxattaʼaguet aye la Biblia?

Ye lere so Daniel, huetalec aye la Biblia, mashe ye ra iʼaxattaʼa ra Lʼonataxanaxac ñi Dios chigoqtoʼot ra roʼonataxan ra ime so laloqoʼ qaiʼiỹaxanalo «siete viʼiye» (Daniel 4:16, 17). Queuoigui so qalota viʼiyel, so Jesús iʼaxat seʼeso laloqoʼ ra nachena «ca laloqoʼ da nataqaʼen queʼeca shiỹaxauapi qailaxachigui», qataq rapaxaguenataxanec ra seʼeso laloqoʼ saxanaxa ra ime (Lucas 21:24). Semetenaq ra seʼeso siete viʼiye iviric so 1914.

2. ¿Négueʼt na aloicpi ana ʼalhua qataq ra lataxac na shiỹaxauapi chigoqchigui so viʼi 1914?

Soua ndiscipulopi so Jesús inat somaye ʼeeta: «¿Chaq négueʼt qome ca lʼanaxat ca ʼayiʼiguelaxasoxoc qataq cam logaʼt ana ʼalhua?» (Mateo 24:3, TBSNT). So Jesús ỹasateguet ra iʼaxattaʼaguet ca qalota huaigui ana ʼalhua qom chigoqtoʼot ra roʼonataxan ra Ntaʼa ra Lʼonataxanaxac ñi Dios huáʼague ra piguem. Qaỹaloqnaxana iʼaxat na alaataxacpi, nqouaxa qataq nacholaxanaxa ana ʼalhua (ʼautaxaỹaxan Mateo 24:7). Aye la Biblia taqaʼen iʼaxattaʼaguet ra lataxac na shiỹaxauapi ra «mashe nayeetaʼa ca logaʼtna» maye ỹoʼot «caua naʼaxaʼte ỹoqta huoʼo da lqalaiʼc» (2 Timoteo 3:1-5). Chigoqchigui so viʼi 1914 ỹataqta qailotaʼa neʼena aloicpi qataq nataxacpi.

3. ¿Táʼaencoʼ ra nquictashiguem na aloicpi ana ʼalhua chigoqchigui ra roʼonataxan ra Lʼonataxanaxac ñi Dios?

So chetaʼague ra chigoqchigui ra Ntaʼa so Jesús ra Lʼonataxanaxac ñi Dios, huoʼo so alaataxac ra piguem taq ñimaye reloguiʼ so Satanás qataq so demoniopi. So Satanás qanauec qaq ʼenapec aye la Biblia ra «somaye qataq so lamaxashecpi qaỹamaqauec da yaqtoʼ talec ana ʼalhua» (Apocalipsis 12:9, 10, 12). So Satanás ỹataqta reno chaʼaye ỹaỹaten ra yaqtaʼa ra qanlaxajñe. Ỹoqoʼoye ỹoʼotac na nquiʼic qataq nqueʼejnaxac ʼenauac ana ʼalhua. ¡Souaxat reʼera saỹatenaqteguet táʼaencoʼ ra ỹataqta qauem ra huaigui ana ʼalhua! Qalaxaye ra Lʼonataxanaxac ñi Dios ỹapalaxat ʼenauac neʼena nqalanaxacpi.

ÑIMITAQ RA PAXAGUENAXAT

4. Na profecíapi aye la Biblia qomiʼ ỹauega so viʼi 1914

VIDEO: Ra Lʼonataxanaxac ñi Dios chigoqchigui ra ramaxasoxon so viʼi 1914 (5:02)

Ñi Dios ỹoʼot ra so Nabucodonosor, so ntaʼa ye togoshec Babilonia, huoʼo so lchoxonaxac chigoqoʼot ñimaye. Seʼeso lchoxonaxac qataq cam naigui iʼaxat so Daniel ỹachaxan ra seʼeso profecía nateeteguet so ngobierno so Nabucodonosor qataq ra Lʼonataxanaxac ñi Dios (qautaxaỹaxañi Daniel 4:17).a

Qautaxaỹaxañi Daniel 4:20-26. Ime nache qauoʼogoxoñiỹa ye recuadro yaqtoʼ qauasachiʼiguet neʼenaua nnataxaco:

• A) ¿Négueʼt so ilaʼa so Nabucodonosor seʼeso lchoxonaxac? (Qaumichiñi ye versículos 20 taq 21).

• B) ¿Négueʼt ca qaỹoʼotec asa aso ʼepaq? (Qaumichiñi ye versículo 23).

• C) ¿Négueʼt ca ipacchigui so ime seʼesoua «siete viʼiye»? (Qaumichiñi ye versículo 26).

Aso ʼepaq so nchoxonaxac qataq ra Lʼonataxanaxac ñi Dios

NA PROFECÍA (Daniel 4:20-36)

Nʼonataxanaxac

A) Aso ʼepaq logorai

Viʼiguet ra nʼonataxanaxac

B) «Qauaʼaxasoxoñiiñi ʼaraʼara qoʼoipaq» qataq qaxañiiuec ra choche ivittrec caua «siete viʼiye»

Ỹoltaxa ỹeʼeguelaxa ra roʼonataxan

C) «ʼAm qaỹeʼeguelaxatot da ʼaroʼonataxanaxac»

Ra huaʼauñe ipacchigui:

• D) ¿Négueʼt ca tachigui ra naigui aso ʼepaq? (Qaumichiñi ye versículo 22).

• E) ¿Lágui ra ỹaxanec ra ramaxasoxon? (Qautaxaỹaxañi Daniel 4:29-33).

• F) ¿Négueʼt so huaigui so ivittrec caua «siete viʼiye»? (Qautaxaỹaxañi Daniel 4:34-36).

RA HUAʼAUÑE IPACCHIGUI

Nʼonataxanaxac

D) So Nabucodonosor ntaʼa so Babilonia

Viʼiguet ra nʼonataxanaxac

E) So Nabucodonosor huoʼo ra aloic so ivirec so viʼi 606, saxanaxa ra ñiguiñi so Jesús. Taq nache saq ishet ra roʼonataxan queuoigui soua siete viʼiye

Ỹoltaxa ỹeʼeguelaxa ra roʼonataxan

F) So Nabucodonosor ỹoltaxa ntouen, nache chigoqchigui ra ỹoltaxa roʼonataxan

Ca lỹa ipacchigui:

• G) ¿Négueʼt som tachiguipi ra naigui aso ʼepaq? (Qautaxaỹaxañi 1 Crónicas 29:23).

• H) ¿Lágui ra ỹaxanec ra ramaxasoxotacpi? ¿ʼEetec ra saỹatenaq ra saishet ra roʼonataxatacpi so huetalec ana ʼalhua so Jesús? (Qautaxaỹaxañi Lucas 21:24).

• I) ¿Lágui taq huáʼague ra ỹoltaxa ỹeʼeguelaxa ra roʼonataxan neʼena gobierno?

CA LỸA IPACCHIGUI

Nʼonataxanaxac

G) So ntaʼalpi so israelitapi maye nsoʼongui aso soʼonaxaqui lalamaqte ra lʼonataxanaxac ñi Dios

Viʼiguet ra nʼonataxanaxac

H) So Jerusalén qanlaxajñe so viʼi 607 saxanaxa ra ñiguiñi so Jesús, nache qaica ca lỹa ntaʼa so nhuoʼ lʼecpi israelitapi queuoigui 2.520 viʼiyelpi

Ỹoltaxa ỹeʼeguelaxa ra roʼonataxan

I) Ñi Jesús chigoqchigui ra roʼonataxan ra Ntaʼa ra Lʼonataxanaxac ñi Dios huáʼague ra piguem so viʼi 1914

5. So viʼi 1914 nqochen ra taỹaʼague ana ʼalhua qataq na shiỹaxauapi

Qaumichiñi na VIDEO.

VIDEO: So viʼi 1914 nqochen ra taỹaʼague ana ʼalhua qataq na shiỹaxauapi (1:10)

So Jesús iʼaxattaʼaguet na aloic huaigui ana ʼalhua so ime ra chigoqtoʼot ra roʼonataxan. Qautaxaỹaxañi Lucas 21:9-11 qataq qaumalligui neʼena:

• Na aloicpi qaiʼaxatac neʼena profecía, ¿négueʼt ca ʼaulotaʼa qoʼ négueʼt ca ʼauʼaqtega ra qaiʼaxatac?

So apóstol Pablo iʼaxat ʼeetec ra lataxac na shiỹaxauapi queuoigui naua paʼatrec naʼaxaʼte na ntaʼalpi na shiỹaxauapi. Qautaxaỹaxañi 2 Timoteo 3:1-5 qataq qaumalligui neʼena:

• Neʼena nataxacpi iʼaxat neʼenaua versículos, ¿négueʼt ca ʼaulotaʼa ʼam?

6. ¿Négueʼt ca iuen ra soʼotaq ra saỹajnaq ra Lʼonataxanaxac ñi Dios mashe ye ra roʼonataxatac?

Qautaxaỹaxañi Mateo 24:3, 14 qataq qaumalligui neʼena:

• ¿Négueʼt ca ʼamaqtaqaic nʼonataxanaxac ỹachaxan ra Lʼonataxanaxac ñi Dios mashe ye ra roʼonataxatac?

• ¿ʼEetec ishet ra ʼaualectauaʼa ʼam neʼena nʼonataxanaxac?

Ra Lʼonataxanaxac ñi Dios mashe ye ra roʼonataxatac, qataq yaqtaʼa ra ỹacoolec ra ramaxasoxon ʼenauac ana ʼalhua. Qautaxaỹaxañi Hebreos 10:24, 25 qataq qaumalligui neʼena:

• ¿Négueʼt ca iuen ra soʼotaq ʼenauac qomiʼ «da selaqaʼa da mashe saqaỹapeque queʼeca naʼaʼq»?

NA ʼAMAQTAQAIC

Na profecíapi aye la Biblia qataq na huaigui ʼenauac ana ʼalhua ỹachaxan ra Lʼonataxanaxac ñi Dios mashe ye ra roʼonataxatac. Qataq qomiʼ sachaxanaq ra saʼamaqtenaq reʼera ra saʼaxataqtac neʼena Lʼonataxanaxac qataq ra saxauaʼa na naponaxacpi añi la congregación.

ʼAntoueetaʼac

• ¿Négueʼt so ipacchigui so ime soua siete viʼiye ra iʼaxattaʼaguet ye lere so Daniel?

• ¿Négueʼt ca nqaʼen ʼauʼamaqten ʼam ra Lʼonataxanaxac ñi Dios chigoqchigui ra roʼonataxan so viʼi 1914?

• ¿ʼEetec ishet ra ʼauachaxan ʼam ra ʼaupiʼiỹaʼa ra Lʼonataxanaxac ñi Dios mashe ye ra ramaxasoxotac?

ʼAUANATA CA LỸA

ʼAutaxaỹaxan na nasaxauec na historiadorpi qataq na laỹipi ra ʼeetec ra nqochen ana ʼalhua qataq na shiỹaxauapi chigoqchigui so viʼi 1914.

«So laloqoʼ maye qaỹalat na noʼon nqataxacpi maye ilotagueʼ na lataxac na shiỹaxauapi» (¡Despertad!, abril de 2007)

ʼAmeten ʼeetec ra itauan ra nachaalataxac so ỹale na profecía huetalec ye Mateo 24:14.

«¡Quesom ỹauela na béisbol!» (La Atalaya núm. 3 2017)

¿ʼEetec ra saỹatenaq na profecía ye capítulo 4 ye Daniel nateeteguet ra Lʼonataxanaxac ñi Dios?

«¿Lágui so chigoqchigui roʼonataxan ra Lʼonataxanaxac ñi Dios? (Huaʼauñe laỹi)» (La Atalaya, 1 de octubre de 2014)

¿Négueʼt ca ỹachaxan seʼeso «siete viʼiye» ye capítulo 4 ye Daniel iviric so 1914?

«¿Lágui so chigoqchigui roʼonataxan ra Lʼonataxanaxac ñi Dios? (Ca lỹa laỹi)» (La Atalaya, 1 de noviembre de 2014)

Ra Lʼonataxanaxac ñi Dios mashe ye ra roʼonataxan. Yaqtaʼa ra ỹoʼot ltaʼaraic cam nqochenaxat ana ʼalhua. Semetenaq caua ʼonaxaiqa ỹañoxot qome neʼena gobierno maye ʼam ishet ra ʼantonatan ra ʼauataʼaguet.

1. ¿Négueʼt ca ỹoʼot ra Lʼonataxanaxac ñi Dios yaqtoʼ ỹoltaxa huoʼo ra nlaxagayec qataq ra ỹaỹamaqchiguiñisat ana ʼalhua?

Ca alaataxac Armagedón so Jesús, ñi Ltaʼa ra Lʼonataxanaxac ñi Dios, nlaxajñe na shiỹaxauapi yiloxoicpi qataq na gobiernopi (Apocalipsis 16:14, 16). Ra ime reʼera, ipacchigui ʼenauac neʼena promesa aye la Biblia: «mashe sa qaỹaloq da imeuo neʼena qauemaicpi» (Salmo 37:10). So Jesús roʼogoxona neʼena gobierno yaqtoʼ ʼenauac ana ʼalhua huoʼo ra nlagaxayec qataq ra ỹaỹamaqchiguiñisat (ʼautaxaỹaxan Isaías 11:4).

2. ¿Ca ʼeetec ca achaalataxac qomchiye ra ipacchigui ra ʼeetapeguec ñi Dios ana ʼalhua?

Ra lamaxasoxonaxac ra Lʼonataxanaxac ñi Dios, «na shiỹaxauapi maye noʼon da lataxac namayepi taỹot na ʼalhua, qataq nache ʼeetaiʼ qome da netalec namaye» (Salmo 37:29). ʼAcuennataxanaxalec ʼeetec ca achaalataxac qomchiye ra ʼenauac na shiỹaxauapi soxoraicpi ỹauotec ñi Jehová qataq ỹataqta nauotaʼt namayepi. Qaica ca sa noʼon qome, qataq ʼenauac na shiỹaxauapi chochaq tateec ra ncaʼalaxa.

3. Qomchiye ra mashe ime ra nlaxajñe na yiloxoicpi, ¿négueʼt ca ỹañoxot ra Lʼonataxanaxac ñi Dios?

Ra ime ra qanlaxajñe na yiloxoicpi, ñi Jesús Ntaʼa queuoigui 1.000 viʼiyel. Huaña queʼecaua naʼaxaʼte, ñi Jesús qataq na 144.000 maye ltauapi ra ramaxasoxon itauan na shiỹaxauapi ra isoueguesop ra nasouaxashet yaqtoʼ iviraʼa ra nalochiguiñi na lʼoquiaxac qataq ra lataxac. Qom ime queʼecaua naʼaxaʼte, ana ʼalhua masheye ca ʼonaxaic mataqaʼ, na shiỹaxauapi ỹataqta machiguiñi chaʼaye ỹalaxaguet na lamaxasoxonaxacpi ñi Jehová. Nache so Jesús ỹeʼeguelaxatem reʼera nʼonataxanaxac Ñi Ltaʼa, Jehová. Huaña, nache ra lʼenaxat ñi Jehová quiʼitta chochaq tateec (Ezequiel 36:23; Mateo 6:9, 10, TBSNT). Ỹataqta itchiguiñi ra ñi Jehová noʼon ntaʼa qataq iloʼogue na npueblo. Ime nache ñi Jehová nlaxajñe so Satanás qataq na demoniopi qataq ca camachaqca ra lcaʼauʼa ra mpaʼagueneʼ ca ngobierno ñimaye (Apocalipsis 20:7-10, TBSNT). ʼEnauac neʼenaua ỹataqta ʼonaxaic ỹañoxot ra Lʼonataxanaxac ñi Dios chochaq tateec.

ÑIMITAQ RA PAXAGUENAXAT

4. Ra Lʼonataxanaxac ñi Dios nlaxajñe na ntaʼalpi na shiỹaxauapi

«Da naʼañaxac maye huetoʼot ca ỹale da ỹoʼotec ca qauem ca lỹa» (Eclesiastés 8:9). Ñi Jehová roʼogoxona ra Lʼonataxanaxac ñimaye yaqtoʼ ỹaỹamaxajñe ʼenauac reʼera sa ỹaỹamaqchiguiñisat.

Qautaxaỹaxañi Daniel 2:44 taq 2 Tesalonicenses 1:6-8 [TBSNT], qataq qaumalligui neʼena:

• Ñi Jehová taq so Llalec, Jesús, ¿négueʼt ca ỹoʼotec na ntaʼalpi na shiỹaxauapi qataq nam itauan namayepi?

• ¿Ca ʼeetec ra itchiguiñi na mashe ʼauaỹaten ra ñi Jehová taq so Jesús ra saxaỹet ra ỹoʼotac ca ỹayamaqchiguiñisat?

5. So Jesús ỹataqta noʼon ra Ntaʼa

Ñi Jesús Ntaʼa ra Lʼonataxanaxac ñi Dios, ỹataqta itauan ʼenauac na shiỹaxauapi huetalec ana ʼalhua. Qaumichiñi na VIDEO nache ʼameten ʼeetec so Jesús coʼollaxa ỹachaxan ra huoʼo ra lyaxa ra itauan na shiỹaxauapi qataq ñi Dios ỹanem ra lʼañaxac yaqtoʼ ỹañoxot.

VIDEO: So Jesús ỹachaxanapec ra ỹañoxot ra Lʼonataxanaxac ñi Dios qomchiye (1:13)

So ỹoʼotpi so Jesús so huetalec ana ʼalhua, ỹachaxan na ỹañoxot ra Lʼonataxanaxac ñi Dios qomchiye. Na ỹachaxanapecpi huetalec ye paʼaguiñe, ¿négueʼt ca ỹataqta ʼaryaxa ra ʼaulaʼa ra ipacchigui? Qautaxaỹaxañi ʼenauac na textopi maye huetalec neʼenapi qaỹachaxanapecpi.

6. Ra Lʼonataxanaxac ñi Dios ndoiʼ ca qomchiye ỹataqta noʼon

VIDEO: Ra nmejnaxanaxac ca qomchiye ỹataqta ʼonaxaic (4:38)

Qautaxaỹaxañi Salmo 34:9, 10, qataq qaumalligui neʼena:

• ¿ʼEetec ca ʼananomaxa ra ʼauaỹaten ra nam nmittaique ñi Jehová «qaica ca iueetac»?

NA ʼAMAQTAQAIC

Ra Lʼonataxanaxac ñi Dios ỹoʼot ra ʼeetapeguec ñimaye. Naralaxat ʼenauac ana ʼalhua ca mataqaʼ qataq huetalec na shiỹaxauapi soxoraic maye tateec ra ỹiʼoxoren ñi Jehová.

ʼAntoueetaʼac

• ¿Négueʼt ca ỹoʼot ra Lʼonataxanaxac ñi Dios yaqtoʼ quiʼitta ra lʼenaxat ñi Jehová?

• ¿Táʼaencoʼ ỹataqta sepiʼiỹaqaʼa ra Lʼonataxanaxac ñi Dios ipacchigui na ỹachaxanapecpi aye la Biblia?

• ʼEnauac ra ỹoʼot ra Lʼonataxanaxac ñi Dios qomchiye, ¿négueʼt ca ỹataqta ʼaryaxa ra ʼaulaʼa ra ipacchigui?

ʼAUANATA CA LỸA

ʼAuanata négueʼt ca naigui ca Armagedón.

«¿Négueʼt ca naigui ca Armagedón?» (Paxaguenaxat ye jw.org)

ʼAnapaxaguena négueʼt ca huaigui qomchiye queuoigui so iỹaxana so Jesús ra «ỹataqta qalota qome da queʼejnaxac» (Mateo 24:21, TBSNT)

«¿Négueʼt ca naigui ra ỹataqta qalota qome da queʼejnaxac?» (Paxaguenaxat ye jw.org)

Na nhuoʼ lʼecpi, ¿ʼeetec ishet ra icuennate ca qomchiye ntonatan ra ỹaconguet na nʼachiquiaxacpi maye ỹanem ra Lʼonataxanaxac ñi Dios?

ʼAcuennate ra qonetaña ca mataqaʼ ana ʼalhua qome (1:50)

ʼAutaxaỹaxan ra nʼaqtaguec «Qalota na ñinataxateguelaʼt», yaqtoʼ ʼauauatton so ỹale ỹalectaigui na política, ʼeetec ra ỹaỹaten ra qaỹaỹamaxajñi na nqalanaxacpi.

«Aye la Biblia naralaxat ra achaalataxac» (La Atalaya, 1 de enero de 2012)