PAXAGUENAXAT 30
¡Na ʼarauotaxat ʼarhuoʼ lʼecpi qataq ʼanauochaxauapi ishet ra ỹoltaxa ncaʼalec!
Ra nleuaxa ỹoʼot na ltaʼaraic naquicoxo qataq nquiʼic. Ỹoqoʼoye aye la Biblia ʼenapec ra na nleuaxa paʼaguenaxaua (1 Corintios 15:26, TBSNT). So paxaguenaxat 27, ʼam mashe ʼanapaxagueetega ra ñi Jehová nlaxajñi qome neʼena paʼaguenaxaua. ¿Qaq na shiỹaxauapi masheye ra ileu? Neʼena paxaguenaxat ỹactec ra ʼauaỹaten na lỹa ʼonaxaic ỹachaxanapec ñi Jehová: ñimaye ncaʼalaxatec na ỹataqta qalota shiỹaxauapi yaqtoʼ ntonatan ca achaalataxac chochaq tateec. ¡Ỹoltaxa ncaʼalec! ¿Ishet ra ʼeesa reʼera? ¿Qaq qancaʼalaxatec huáʼague, ra piguem qoʼ ana ʼalhua?
1. ¿Négueʼt ca huotaique ra ỹoʼot ñi Jehová souaxat na qarauotaxatpi qarhuoʼ lʼecpi qataq qanauochaxauapi ra mashe ileu?
Ñi Jehová lyaxa ra ỹiʼiguelaxatem ra ncaʼalaxa na shiỹaxauapi mashe ileu. So Job, so ỹale maye huoʼo ra ltaʼaraic ra lpiʼiỹaxac, ỹataqta ỹaỹateeta ra ñi Dios saishet ra icouaʼai somaye naiʼctaxa ra ileu qataq netaña «ca lmaʼ na leuaxaicpi». Somaye ʼenapega ñi Dios: «da aỹem ʼaỹaxana, nache ʼAm sasateguet qome» (ʼautaxaỹaxan Job 14:13-15).
2. ¿ʼEetec ra saỹatenaq ra na leuaxaicpi ishet ra ỹoltaxa ncaʼalec?
Coʼollaxa ra netalec ana ʼalhua, ñi Dios ỹanem so Jesús ra lʼañaxac yaqtoʼ ishet ra ncaʼalaxatec na leuaxaicpi. Ỹoqoʼoye so Jesús ncaʼalaxatec aso nogotole mashe iviʼ naua 12 viʼiye qataq so llalec aso paʼai (Marcos 5:41, 42; Lucas 7:12-15). Lcopaʼague, so nauochaxaua Lázaro ileu. Qaq naiʼctaxa mashe iviʼ naua cuatro naʼaxaʼte ra ileu qataq qailareñi, so Jesús ncaʼalaxatec somaye. Ra ime ra natamnot ñi Dios, nache so Jesús ʼenapega: «¡Lázaro, ʼampaʼauec!». «Nache som leuaxaic mpaʼauec», ¡somaye ncaʼaltauec! (Juan 11:43, 44). ¿ʼAuennataxan ra ntonaxac so lauoʼ lʼecpi qataq so nauochaxauapi so Lázaro?
3. ¿Ishet ra ỹoltaxa ncaʼalec na ʼanauochaxauapi qataq na ʼarhuoʼ lʼecpi ra mashe ileu?
Ana la Biblia ỹachaxanapec: «da na leuaxaicpi ishet da qaltaq ncaʼalec naqaʼen» (Hechos 24:15). Coʼollaxa so Jesús ncaʼalaxatec na shiỹaxauapi, qalaq somayepi saishet ra taigue ra piguem (Juan 3:13). ʼEnauac somayepi huoʼo ra ntonaxac ra ỹoltaxa ncaʼalec huetalec ana ʼalhua. ʼEnaʼam coʼollaxa, so Jesús qomele ncaʼalaxatec ra ỹataqta qalota na shiỹaxauapi yaqtoʼ ishet ra ntonatan ra ncaʼalaxa chochaq tateec ana ʼalhua ca mataqaʼ. Somaye ʼenapec ra ỹoltaxa ncaʼalec ʼenauac nam huetaigui ra lcuennataxac ñi Dios, naiʼctaxa na shiỹaxauapi saq ntoʼonec ra ileu (Juan 5:28, 29, TBSNT).
ÑIMITAQ RA PAXAGUENAXAT
Ñapaxaguenaxa ana la Biblia ra táʼaencoʼ ra saỹatenaqta ra so Jesús huoʼo ra lʼañaxac ra ncaʼalaxatec na shiỹaxauapi mashe ileu qataq ca qomchiye ỹoʼot reʼera. Qataq semetenaq ʼeetec ra ʼam iʼañaqchet ra qancaʼalaxatec na leuaxaicpi qataq ʼam ỹanem ra ʼanaquitaxac.
4. So Jesús coʼollaxa ỹachaxan ra ishet ra ncaʼalaxatec na leuaxaicpi
Nquiguec ra ʼauauatton coʼollaxa so ỹoʼot so Jesús souaxat so nauochaxaua Lázaro. Qautaxaỹaxañi Juan 11:14 taq 38-44, qataq qaumalligui neʼena:
¿ʼEetec ra saỹatenaq ra yoqta ileu so Lázaro? (Qaumichiñi ye versículo 39).
Ra so Lázaro taigue ra piguem, ¿ỹaỹamaqchiguiñi ra so Jesús ỹoltaxa nauega ana ʼalhua?
5. ¡Ỹataqta qalota na shiỹaxauapi ỹoltaxa ncaʼalec!
Qautaxaỹaxañi Salmo 37:29 qataq qaumalligui neʼena:
¿Huáʼague ca netaña qome na ỹataqta qalota shiỹaxauapi ra qancaʼalaxatec?
Qomchiye so Jesús ncaʼalaxatec ca laỹipi shiỹaxauapi, saishet ra ndotec nam ỹiʼoxoren ñi Jehová. Qautaxaỹaxañi Hechos 24:15 qataq qaumalligui neʼena:
Qomchiye ra ỹoltaxa ncaʼalec na leuaxaicpi, ¿négueʼt ca ʼauotaique ra ʼalaʼa?
ʼAcuennate neʼena: so Jesús saq alaq ra ncaʼalaxatec na shiỹaxauapi, enaʼam ca ntaʼa ishet ra nqueʼetoxon ca llalec.
6. Ra qancaʼalaxatec na leuaxaicpi ishet ra ʼam iʼañaqchet qataq ỹanem ra ʼanaquitaxac
So nʼaqtaguec huetalec aye la Biblia aso llale so Jairo, iʼañaqchet na qalota shiỹaxauapi maye huasotac. Qautaxaỹaxañi seʼeso nʼaqtaguec ỹataqta ʼeesa ye Lucas 8:40-42 taq 49-56 [TBSNT].
So huaʼauñe ra ncaʼalaxatec aso llale, so Jesús ʼenapega so Jairo ʼeeta: «Sa ishit qome da ʼayiʼi. Chaqdata da ʼauʼamqajnataxan» (Qaumichiñi ye versículo 50). ¿ʼEetec ishet ra ʼam itauan ra naquitaxac ra qancaʼalaxatec na leuaxaicpi...
... ra ileu ca ʼarauotaxat ʼarhuoʼ lʼecpi qataq ʼanauochaxaua?
... ra na maiche ʼanachaalataxac rataỹaʼaguet ca chaqaic?
Qaumichiñi na VIDEO qataq qaumalligui neʼena:
¿ʼEetec ra ỹanem ra lʼañaxac qataq ra iʼañaqchet soua ltaʼal aso Phelicity ra aquitaxac ra qancaʼalaxatec na leuaxaicpi?
HUOʼO NA NASAXAUEC RA: «Seqalan ra saʼamaqten ra na leuaxaicpi ỹoltaxa ncaʼalec ana ʼalhua».
¿Négueʼt ca ʼarcuennataxac?
¿Négueʼt ca texto aye la Biblia ʼauʼogoxona yaqtoʼ ʼauachaxan ra ipacchigui ra qancaʼalaxatec na leuaxaicpi ana ʼalhua?
NA ʼAMAQTAQAIC
Aye la Biblia ỹachaxanapec ra ỹataqta qalota na shiỹaxauapi ncaʼalec. Ñi Jehová lyaxa ra ỹoltaxa ncaʼalec na leuaxaicpi, qataq ỹanem so Jesús ra nʼañaxac yaqtoʼ ncaʼalaxatec namayepi.
ʼAntoueetaʼac
¿ʼEetec ra saỹatenaq ra ñi Jehová qataq so Jesús huoʼo ra lyaxa ra ỹiʼiguelaxatem ra nachaalataxac nam mashe ileu?
¿Huáʼague ca lmaʼ na ỹataqta qalota shiỹaxauapi ra ỹoltaxa ncaʼalec: ra piguem qoʼ ana ʼalhua? ¿Táʼaencoʼ ra nache ʼeetec ra ʼarcuennataxac?
¿Táʼaencoʼ ra ʼauʼamaqten ra na ʼarauotaxat ʼarhuoʼ lʼecpi taq ʼanauochaxauapi mashe ileu ishet ra ỹoltaxa ncaʼalec?
ʼAUANATA CA LỸA
ʼAutaxaỹaxan naua ʼonaxaiqa nqataxaco yaqtoʼ ñaʼañaxataxaguet ra nquiʼic.
«Ntaunaxanaxac tachigui na huasotacpi» (¡Despertad! núm. 3 2018)
¿Ishet ra itauan aye la Biblia ca huasotac?
ʼAmeten ʼeetec ishet ra ʼatauan ca nogotolec maye ileu ra lauotaxat lhuoʼ lʼec qoʼ nauochaxaua
¿Huoʼo ca ncaʼalec huáʼague ra piguem? ¿Huoʼo ca saishet ra ncaʼalec?
«¿Négueʼt ca naigui ra qancaʼalaxatec na leuaxaicpi?» (Paxaguenaxat ye jw.org)