¿ʼEetec ra qaiʼaxat ra noʼon nʼaxaỹaxac ra nʼaqtac?

Saqaỹapeque ñi Jehová roʼogoxona ra Lʼonataxanaxac ñimaye yaqtoʼ ỹapalaxat ʼenauac na qanqalanaxacpi. ¡Táʼaencoʼ taxa ra saq saʼaqtaxanemaq na laỹipi shiỹaxauapi reʼera ỹataqta noʼon nʼaxaỹaxac! So Jesús huotaique ra na lʼonataxanaxanecpi somaye iʼaxatec reʼera lʼaqtaxanaxac ʼenauac ana ʼalhua (Mateo 28:19, 20). ¿Négueʼt ca ỹoʼot na testigopi de Jehová yaqtoʼ ỹalaxaguet reʼera lamaxasoxonaxac so Jesús?

1. ¿ʼEetec ra ipacchigui nagui ye Mateo 24:14?

So Jesús iʼaxattaʼa ʼeeta: «Deʼera noʼon naʼaxaỹaxac maye ỹaʼaxat da loʼonataxanaxac Ñim Loʼonatac ʼEnauacna mashe qaỹaʼaqtaxanem ʼenauac na huetalec ana ʼalhua» (Mateo 24:14). Qomiʼ na testigopi de Jehová ñoqopitaxa ra soʼotaq reʼera ʼamaqtaqaic lʼonataxanaxac. ¡Saʼaxataq ra noʼon nʼaxaỹaxac ra nʼaqtac ʼenauac ana ʼalhua iviʼ ye 1.000 nʼaqtacpi! Qaiuen ra ỹaguec ra nʼañaxataxac qataq ra naỹamaxataxac yaqtoʼ qaỹoʼot reʼera ỹataqta ltaʼaraic nʼonataxanaxac. Ra qaica ca ltaunaxanaxac ñi Jehová nache saq ishet ra qaỹoʼot reʼera nʼonataxanaxac.

2. ¿Négueʼt ca soʼotaq yaqtoʼ saʼaqtaxanaxam na shiỹaxauapi ra nʼaqtac?

Saʼaxataq ra nʼaqtac huaña ca camachaqca netaña na shiỹaxauapi. Qataq ʼenaʼam so cristianopi so huaʼauñe siglo, qolaqtapiguiʼ «naua nmaʼate» (Hechos 5:42). Reʼera nalochiguiñi lataxac ra soʼotaq ra qarʼonataxanaxac qomiʼ itauan ra seviraqaʼa ʼenauac na viʼiyel na ỹataqta qalota shiỹaxauapi. Qalaq huoʼo ye huaña na shiỹaxauapi saishet ra netaña na lmaʼ, ỹoqoʼoye taqaʼen saʼaxataq ra nʼaqtac huaña ca netaña na shiỹaxauapi. Saxaỹet ra ñimitaqtaique ra ishet ra saʼaqtaxanaxam na laỹipi ra lataxac ñi Jehová qataq ca huotaique ỹoʼot ñimaye.

3. ¿Négueʼt ca iuen ra iʼaxatec ra noʼon nʼaxaỹaxac?

ʼEnauac na ʼeesa cristianopi iuen ra iʼaxatec ra noʼon nʼaxaỹaxac. Qomiʼ ñaqaʼenaq huoʼo ra naigui reʼera nʼonataxanaxac. Semataqalec ʼenauac ra qarʼañaxac ra saʼaxataq ra nʼaqtac chaʼaye saỹatenaq ra ishet ra qancaʼalaxatec cam qomiʼ nʼaxaỹaxaatega (ʼautaxaỹaxan 1 Timoteo 4:16). Qaica ca qomiʼ isheeten ra soʼotaq reʼera nʼonataxanaxac, chaʼaye aye la Biblia ʼenapec: «Saishet da qauỹaxañiỹaique aca lasheue nam qauoʼoche» (Mateo 10:7, 8). Qaq naiʼctaxa ra saishet ra ʼenauac na shiỹaxauapi qomiʼ nʼaxaỹaxana, queta ra saʼaxataqtac ra nʼaqtac chaʼaye huetaigui ra qaryoʼoxonnataxanaxac ñi Jehová qataq ỹoʼot ra machiguiñi ñimaye.

ÑIMITAQ RA PAXAGUENAXAT

4. Ñaʼañaxataq yaqtoʼ seviraqaʼa ʼenauac na shiỹaxauapi

VIDEO: Saʼaxataq ra nʼaqtac iviraʼa «ca ỹataqta paʼatec ana ʼalhua» (7:33)

• ¿Négueʼt ca ʼauʼaalac na soʼotaq na testigopi de Jehová yaqtoʼ saʼaxataq ra nʼaqtac?

Qautaxaỹaxañi Mateo 22:39 taq Romanos 10:13-15, qataq qaumalligui neʼena:

• ¿ʼEetec ra ỹachaxan reʼera qarʼonataxanaxac ra sauotaxac ca qarỹa?

• ¿ʼEetec ra lmejnaxanaxac ñi Jehová ra ỹalletaʼa nam iʼaxatac ra noʼon nʼaxaỹaxac? (Qaumichiñi ye versículo 15).

5. Qomiʼ lʼonataxanaxauapi ñi Dios

Qalota na nʼaqtaguec ỹachaxan ra ñi Jehová ilotalec ra qarʼonataxanaxac. Saloqnaxanaxa ye Nueva Zelanda. Huoʼo so avit, so testigo lʼenaxat Paul iʼaxat ra nʼaqtac na nmaʼte nache ỹanata aso ʼalo. Seʼeso nteʼeta, asomaye natamenot ñi Dios roʼogoxona ra lʼenaxat Jehová, qaq iỹaxanot ra huoʼo ca itauan ra ỹauatton ñimaye. So Paul ʼenapec: «Queuogui tres horas aỹem sootaña ye lmaʼ asomaye».

Qautaxaỹaxañi 1 Corintios 3:9 qataq qaumalligui neʼena:

• ¿ʼEetec ra ỹachaxan reʼera nʼaqtaguec ra ñi Jehová ilotalec ra qarʼonataxanaxac?

Qautaxaỹaxañi Hechos 1:8 qataq qaumalligui neʼena:

• ¿Táʼaencoʼ seuenaq ra ñi Jehová qomiʼ itauan ra ishet ra saʼaxataq ra nʼaqtac?

ʼAmeten ra

Queuoigui ca la semana huoʼo na qaraponaxac maye saxaỹet ra qomiʼ qaỹapaxaguenec ʼeetec ra saʼaxataq ra nʼaqtac. Ra mashe ʼaualectauo neʼena qaraponaxac, ¿ʼeetec ca ʼarmejnaxanaxac ra qomiʼ qaỹapaxaguenec reʼera?

6. Salaxasoxoguet ra namaxasoxonaxac ñi Dios ra saʼaxataq ra nʼaqtac

So siglo primero so mpaʼaguenaxauapi som quetagueʼ so Jesús, huotaique ra ỹaxanguet ra iʼaxat ra nʼaqtac. Seʼeso huaʼauñe cristianopi «qaỹataxaatoʼot ca nmit ca nasouaxashetpi» yaqtoʼ detaqlec ra iuen ra iʼaxat ra nʼaqtac «dam noʼon naʼaxaỹaxac» (Filipenses 1:7). Nagui naua naʼaxaʼte qomiʼ na testigopi de Jehová sheʼenaxataq somayepi.a

VIDEO: Ñachaataxauʼa ca nmit na nasouaxashetpi yaqtoʼ setaxasoxolec ra noʼon nʼaxaỹaxac (2:28)

Qautaxaỹaxañi Hechos 5:27-42 qataq qaumalligui neʼena:

• ¿Táʼaencoʼ ra saishet ra saxanaxauec ra saʼaxataq ra nʼaqtac? (Qaumichiñi na versículos 29, 38 taq 39.

NA ʼAMAQTAQAIC

So Jesús ỹamaxalec na lʼonataxanaxanecpi ra iʼaxatec ra noʼon nʼaxaỹaxac ʼenauac ana ʼalhua. Nagui ñi Jehová itauaatac na npueblo ra ỹoʼot reʼera nʼonataxanaxac.

ʼAntoueetaʼac

• ¿ʼEetec ra qaiʼaxat ra noʼon nʼaxaỹaxac ra nʼaqtac ʼenauac ana ʼalhua?

• ¿ʼEetec ra ỹachaxan reʼera qarʼonataxanaxac ra sauotaxac ca qarỹa?

• ¿ʼAm ʼauʼamaqten reʼera qarʼonataxanaxac ra nʼaqtac qomiʼ ỹoʼot ra machiguiñi? ¿Táʼaencoʼ?

ʼAUANATA CA LỸA

ʼAmeten ʼeetec na testigopi de Jehová iʼaxat ra nʼaqtac huaña na ltaʼaraic ciudadpi.

Qaiʼaxat ra nʼaqtac cam huetaña na shiỹaxauapi na ltaʼaraic ciudadpi huaña ye París (5:11)

Na testigopi de Jehová, ¿ʼeetec ra itauan nam ỹalat ye lmaʼ?

Setauanaq nam ỹalat ye lmaʼ ra ỹauatton ñi Dios (5:59)

ʼAnaxaỹaxana aso ʼalo ra iʼaxatec táʼaencoʼ ỹoʼot ra machiguiñi ra iʼaxatac ra nʼaqtac imauec ra lraqaʼ.

Ra lliquiaxac qaica ca ʼenaʼam (6:29)

ʼAuauatton ca ỹacoolec ra ỹoʼot nam nmit na nasouaxashetpi yaqtoʼ itauan ra queta ra qaiʼaxatac ra noʼon nʼaxaỹaxac.

«Ra lʼonataxanaxanecpi na Lʼonataxanaxac ñi Dios nachaateuʼa ca nmit na nasouaxashetpi» (El Reino de Dios ya está gobernando, paxaguenaxat 13)