¿Yoqta ʼanaỹamaxatta ʼam yaqtoʼ ʼanachel?

Qanaʼachec na ʼanapaxagueetega ana la Biblia, ʼam mashe ye ỹaguec na ʼauaỹaten naua lataxaco ñi Jehová. Taqaʼen petaʼa huoʼo ca ʼanaralaxat ra ʼanachaalataxac yaqtoʼ ʼaualaxaguet na ʼanapaxagueetega. Qalaxaye petaʼa huoʼo ca ʼam naxatapeguet ra ʼanañanot ñi Jehová taq ʼanachel. Neʼena paxaguenaxat ʼanapaxaguena ʼeetec na qalota napaxaguetacpi ỹañoxot ra napacalec na nqalanaxacpi yaqtoʼ nachel taq cam ishet ra ʼauʼot ʼam yaqtoʼ ʼauañoxot taqaʼen reʼera.

1. Ra saxanaxa ra ʼanachel ¿lcata ca iuen ra tachiguiña ca ʼauaỹaten aye la Biblia?

Yaqtoʼ ra ʼanachel, ʼam iuen ra ʼauaỹateeta «da lataxac mayi ỹataqta ʼeesa» (1 Timoteo 2:4, TBSNT). Reʼera saishet ra naigui ra huaʼauñe ra ʼanachel nache iuen ra ʼauaỹaten na lasataxacpi ʼenauac na renataxanec na shiỹaxauapi souaxat aye la Biblia. Ivirauga na cristianopi mashe qalota viʼiyel ra nachel iuen ra queta ra napaxaguetac (Colosenses 1:9, 10, NWT). Qalaxaye huoʼo na iuen ra ʼauaỹateeteguet na ʼamaqtaqaicpi napaxaguenataxanaxac aye la Biblia. Na ancianopi añi congregación ʼam itauan yaqtoʼ ananomta ra huoʼo ca ʼarauattonaxanaxac aye la Biblia.

2. Ra saxanaxa ra ʼanachel ¿négueʼt ca huaʼauñe iuen ra ʼauʼotpi?

Aye la Biblia ʼenapec: «Qaualacheʼ nagui naua qanoʼonataxacolliʼ, nache qaualaqaiguet Ñim Loʼonatac ʼEnauacna» (ʼautaxaỹaxan Hechos 3:19). Qaq reʼera, ʼam iuen ra ʼauʼot huaʼauñe ra ʼanachel. Qalaxaye ¿négueʼt ca naigui? Naigui ra ʼananomta ra ʼanquiʼic souaxat camachaqca ʼarasouaxashet coʼollaxa, qataq ʼaỹaxanot ñi Jehová ra ʼam ichoxoren. Taqaʼen naigui ra saq ʼanashenguet camachaqca qauem nataxac qataq itchiguiñi ra na ʼanachaalataxac ỹaỹamaxareeta ñi Dios. Taqaʼen naigui ra ʼam chigoqchigui ra ʼaualegueuʼa saxaỹet añi congregación ra ʼauʼa na naponaxacpi taq ʼam nʼaqtaxanaxanec saxanaxa ra nachel ra ʼauʼaxat ra nʼaqtac.

3. ¿Táʼaencoʼ ra iuen ra saishet ra ʼaxaanec ra na ñiʼiỹaxa ʼam naxateguet ra ʼanachel?

Huoʼo na ñiʼiỹa ra repeʼenaxan taq saishet ra ipaquejlec ca ỹachaxanapeguem ñi Jehová. Ajá, petaʼa huoʼo ca huaña ʼam huoʼo ca ʼarpeʼenaxacpi ʼenaʼam so ỹallepi taq ʼalpi npeʼetpi iʼaxat aye la Biblia. Qalaxaye ʼacuennate ra ñi Jehová saishet ra iuattaʼa ra na lʼonataxanaxanecpi nalochiguiñi ra lataxac (ʼautaxaỹaxan Salmo 103:13, 14). Ñimaye machiguiñi ra ʼam ʼauʼot ca ʼanalotauʼa. Taqaʼen ñi Jehová ʼam itauan qome. Ỹoqoʼoye itchiguiñi ra qomiʼ ʼenapega ra qaica «ca ishet da ỹañoxot da qomiʼ nqateeguesopa da lauotaxanaqtaic Ñim Loʼonatac ʼEnauacna» (ʼautaxaỹaxan Romanos 8:38, 39).

ÑIMITAQ RA PAXAGUENAXAT

4. Nquiguec ra ʼauauatton ñi Jehová

¿Ca lcata ca ʼauen ra ʼauauatton ra lataxac ñi Jehová huaʼauñe ra ʼanachel? ʼAm ʼauen ra ʼauauatton ñi Jehová iviraʼa ra ʼauauotec qataq huoʼo ca ʼaryaxa ra ʼaualaxaguet ñimaye. Qaumichiñi na VIDEO yaqtoʼ ʼauanata ʼeetec ra ỹañoxot ra ỹoʼot reʼera so napaxaguenatacpi aye la Biblia huetaʼa na paʼaiguelo ana ʼalhua. Ime nache qaumalligui neʼena:

VIDEO: Ra ñiquiaxac iviraʼa ra achelaxac (3:56)

• Nateeteguet na video, ¿négueʼt ca itauan so napaxaguenatacpi yaqtoʼ naỹamaxatta ra nachel?

Qautaxaỹaxañi Romanos 12:2 qataq qaumalligui neʼena:

• ¿Huoʼo ca ʼaqolguet na lapaxaguenataxanaxacpi aye la Biblia? ¿ʼAuʼamaqten ra na testigopi de Jehová rapaxaguenataxanec ra ʼeesa?

• Ra huoʼo ca ʼaqolguet, ¿négueʼt ca ishet ra ʼauʼot?

5. ʼAnapacalec camachaqca nqalanaxac ʼauataỹaʼaguet

ʼEnauac qomiʼ sataỹaqaʼaguet na nqalanaxacpi ra llicaʼaxauʼa ra ñañanqot ñi Jehová taq ñachelaq. Yaqtoʼ sauattonaq ca ʼoonolec nʼaqtaguec, qaumichiñi na VIDEO. Ime nache qaumalligui neʼena:

VIDEO: Ra nauotaxanaqtaic ñi Jehová napacalec na nqalanaxacpi (5:22)

• ¿Négueʼt ca nqalanaxacpi iuen ra napacalec aso Narangerel yaqtoʼ roʼonataxanot ñi Jehová?

• ¿ʼEetec ra itauan ra lauotaxanaqtaic ñi Jehová yaqtoʼ napacalec seʼeso nqalanaxacpi?

Qautaxaỹaxañi Proverbios 29:25 taq 2 Timoteo 1:7, qataq qaumalligui neʼena:

• ¿ʼEetec ishet ra sanataxa ca nʼañaxac seuenaq yaqtoʼ ñapaxasaqalec na nqalanaxacpi?

6. ʼAupiʼiỹaʼa ra ñi Jehová ʼam itauan qome

Ñi Jehová ʼam itauan qome ra ʼauʼot ca iuattaʼa ñimaye ra ʼauʼot. Qaumichiñi na VIDEO qataq qaumalligui neʼena:

VIDEO: Ñi Jehová ʼam itauan qome (2:50)

• ¿Táʼaencoʼ ra nqolguet ra nachel seʼeso napaxagueetac neʼena video?

• ¿Négueʼt so itauan yaqtoʼ nquiguec ra piʼiỹaʼa ñi Jehová?

Qautaxaỹaxañi Isaías 41:10, 13 qataq qaumalligui neʼena:

• ¿Táʼaencoʼ ra ishet ʼam ra itchiguiñi ra ʼauañoxot ra ʼapaquejlec ca ʼauachaxanapec ra ʼanañan?

7. ʼAnquigaxatec ra ʼanaʼachec ra lauotaxanaqtaic ñi Jehová

Ra nquiguec ra ʼacuennate ra ñi Jehová ỹaguec ra ʼam ỹauotec, nquiguec ra ʼauanem ra ʼanaʼachec ñimaye qataq nquiguec ra ʼauʼonataxanot ra chochaq tateec ñimaye. Qautaxaỹaxañi Salmo 40:5 qataq qaumalligui neʼena:

• ¿Négueʼt ca lachetaqtaxanaxatpi ñi Jehová ỹataqta ʼauʼot ra naigui?

Qautaxaỹaxañi Daniel 9:19 qataq qaumalligui neʼena:

• ¿Táʼaencoʼ ra ỹataqta qaica ca ʼenaʼam ra ca shiỹaxaua testigo de Jehová?

• ¿ʼAuotaique ʼam ra ʼanachel yaqtoʼ ʼam testigo de Jehová?

• ¿Huoʼo ca ʼam naxatapeguet?

• ¿Négueʼt ca ishet ra ʼauʼot yaqtoʼ ʼanalotauʼa ra achelaxac?

NA ʼAMAQTAQAIC

Ra ʼauaconguet ra ltaunaxanaxac ñi Jehová, nache ʼam ishet ra ʼanapacalec camachaqca nqalanaxacpi naxatapeguet ra ʼanachel.

ʼAntoueetaʼac

• Ra saxanaxa ra ʼanachel, ¿lcata ca iuen ra tachiguiña ca ʼauaỹaten aye la Biblia?

• Ra saxanaxa ra ʼanachel, ¿négueʼt ca huaʼauñe iuen ra ʼauʼotpi?

• ¿Táʼaencoʼ ra iuen ra saishet ra ʼaxaneec ra na niʼiỹaxa ʼam naxateguet ra ʼanachel?

ʼAUANATA CA LỸA

ʼAnmit négueʼt ca iuen ra chigoqchigui ra ʼalcaʼauʼa ra ʼanachel.

«¿Ỹoqta ʼam ʼanaỹamaxatta yaqtoʼ ʼanachel?» (La Atalaya, marzo de 2020)

ʼAuanata ʼeetec ra ʼanapacalec caua nqalanaxacpi petaʼa ʼam naxatapeguet.

«¿Negueʼtoʼ ca iqalaatac da saishet da aỹem ʼanachelaxan?» (La Atalaya, marzo de 2019)

ʼAmeten ʼeetec so ỹale ỹañoxot ra napacalec na ltaʼaraic nqalanaxacpi yaqtoʼ nachel.

«¿Táʼaencoʼ ra qaỹaloqta ra ʼanachel?» (1:10)

So chetaʼague so ỹale lʼenaxat Ataa ỹoqolguet ra nachel. ʼAnmit négueʼt ca itauan yaqtoʼ ỹoʼot reʼera.

Saq saỹaten ra saiguet reʼera (7:21)