PAXAGUENAXAT 37
Ra ʼenapec aye la Biblia ra nʼonataxanaxac qataq aca anom
¿Huoʼo so huaña ʼananomtaʼa ra ỹataqta ʼarhuogoxo souaxat ra nʼonataxanaxac qoʼ aca anom? Petaʼa qalaqaic ra ñipaxatalec ra qarhuenaxanaxapi taq ra sanaxam ñi Jehová ra ñoʼoxonataxanaxac maye taỹoʼot. Aye la Biblia qomiʼ ỹanem ra noʼon nqataxacpi maye ishet ra qomiʼ itauan ra sañoxotaq reʼera.
1. ¿Négueʼt ca ʼenapec aye la Biblia ra nʼonataxanaxac?
Ñi Dios huotaique ra ñitonaqtapeguec ca qarʼonataxanaxac. Ỹoqoʼoye aye la Biblia ʼenapec «dam ỹaỹamaqchiguiñi maye ishet ra ỹoʼot cam ỹale [...] nqueʼetaxaachigui da alaỹaxac da loʼonataxanaxac» (Eclesiastés 2:24). Ñi Jehová ỹataqta ʼonataxanaxaic. Ra sheʼenaxataq qataq ra qomiʼ ʼonataxanaxaiqa soʼotaqtac na ỹaỹamaxareeta ñimaye qataq ñanomaqteguet ra samaxasoqchiguiñi.
Ra nʼonataxanaxac ʼamaqtaqaic, qalaxaye huanna ra saxanaxauec ra napacalec ra qaryoʼoxonnataxanaxac ñi Jehová (Juan 6:27). Ñimaye ỹachaxanapec ra qomiʼ ỹanema ca seuenaqtaique, ra sauaxanaxañi ñimaye ra qanachaalataxac.
2. ¿Négueʼt ca nmejnaxanaxac ra qanaloqteeta aca anom?
Naiʼctaxa ra aye la Biblia ʼenapec ra «aca anom, ʼeetaʼam aca npaqtaxanaqte», taqaʼen qomiʼ iquiyeguen ra saishet ra ndotec aca anom ra nqaʼen qomiʼ machiguiñi (Eclesiastés 7:12). Ỹoqoʼoye aye la Biblia qomiʼ ʼenapegalo ra saishet ra ñocopitaxa aca anom, qataq qomiʼ ỹanem neʼena nqataxac: «nachaqrata da qantoñiitapeguec cam qamiʼ huetoʼoto» (ʼautaxaỹaxan Hebreos 13:5). Ra ñitonaqtapeguec cam qomiʼ huetoʼot, qomiʼ isoueguesop ra saxaỹet ra huoʼo ca ñimittaqaique yaqtoʼ nquiguec na qarhuenecpi. Taqaʼen ỹoʼot ra saishet ra llapoqtashiguem ca qaravigaxaiste maye saishet ra seuenaq (Proverbios 22:7). Qataq sevitaqaʼaguet na aloic ra sashoxogui ana anom yaqtoʼ pasaʼaguet ra qomiʼ sallaxanqa.
3. ¿ʼEetec ra soʼogoxonaxa ana anom yaqtoʼ qomiʼ chetaqtaxanaxaiqa?
Ñi Jehová chetaqtaxanaxaic, qaq ishet ra sheʼenaxataq ñimaye ra qomiʼ chetaqtaxanaxaiqa qataq qomiʼ shiỹaxauʼ «da qaica ca ỹectega da ỹan da detaunaxanot nam huetoʼotpi» (1 Timoteo 6:18). Ishet ra soʼogoxonaxa aca qorom ra setauanaq ra qaisheeten cam iuen añi la congregación qataq ca laỹipi maye huoʼo ra lhuenaxanaxa, taq ʼamaqtaqaic ra setauanaq na qarqaỹañecpi. Ra ỹataqta huoʼo naq naigui nqaʼen ñi Jehová saishet ra lcata ca sanaxauec, ndaʼ ra táʼaencoʼ ra sanaxauec. Ra qomiʼ chetaqtaxanaxaiqa qataq ra ca sanaxauec chigoqchigui añi qarquiyaqte, qomiʼ machiguiñi qataq ñaqaʼenaq machiguiñi ñi Jehová (ʼautaxaỹaxan Hechos 20:35).
ÑIMITAQ RA PAXAGUENAXAT
Semetenaq na ʼachiquiaxacpi ra sachoqtaʼa ye lmaʼ ra nʼonataxanaxac qataq ra ñitonaqtapeguec cam qomiʼ huetoʼot.
4. ʼAuʼot ra lliʼoxoyec ñi Jehová ra ʼam noʼon ʼonataxanaxaic
Ra qanauochaxac ñi Jehová iuen ra iʼotec ra qomiʼ itauan ra ʼeetec ca qarmejnaxanaxac ca nʼonataxanaxac. Qaumichiñi na VIDEO qataq qaumalligui neʼena:
¿Négueʼt ca ỹataqta ʼauʼaalac ra lataxac so Jason huaña ye lʼonataxanqaʼ?
¿Négueʼt so ỹoʼot yaqtoʼ saq ishet ra ỹapaqauec so lʼonatac?
Qautaxaỹaxañi Romanos 12:11 qataq qaumalligui neʼena:
¿Táʼaencoʼ ra seuenaq ra soʼonataxanaxaq «ỹataqta imauec» ra qarquiyaqteỹaxac?
Ra nʼonataxanaxac ʼamaqtaqaic. Qalaxaye huanna iuen ra saxanaxauec ra napacalec ra ñiʼoxonataxanaxac ñi Jehová.
5. Na ʼachiquiaxacpi saconaxaguet ra ñitonaqtapeguec cam qomiʼ huetoʼot
Qalota na shiỹaxauapi huotaique ra lapootashiguem nam qalota anom. Qalaxaye ana la Biblia lỹa ra lqataxac qomiʼ ỹanem. Qautaxaỹaxañi 1 Timoteo 6:6-8 [TBSNT], qataq qaumalligui neʼena:
¿Négueʼt ca lqataxac qomiʼ ỹanema ana la Biblia?
Ishet ra samaxasoqchiguiñi naiʼctaxa ra saq ʼamaqtaq nam qomiʼ huetoʼot. Qaumichiñi na VIDEO qataq qaumalligui neʼena:
¿Táʼaencoʼ ra machiguiñi som nhuoʼ lʼecpi naiʼctaxa ra saq ʼamaqtaq ana alom?
¿Qaq ra mashe ỹaguec nam qomiʼ huetoʼot qalaq sauoqtaique ra nquictasheguem? So Jesús ỹan so naloqnaxanaxat yaqtoʼ iʼaxatchiguiñi ra reʼera nataxac chaqaic. Qautaxaỹaxañi Lucas 12:15-21 qataq qaumalligui neʼena:
¿Négueʼt ca ʼam ỹapaxaguenec so laloqnaxanaxat so Jesús? (Qaumichiñi ye versículo 15).
Qautaxaỹaxañi Proverbios 10:22 qataq qaualoqnaxañiguet ye 1 Timoteo 6:10. Ime nache qaumalligui neʼena:
¿Négueʼt ca ʼauʼamaqten ra ʼamaqtaqaic: ra auochaxac ñi Jehová, qoʼ ra ỹaguec ca anom? ¿Táʼaencoʼ?
¿Négueʼt ca ishet ra seviraxaguet ra selooquenaq ana anom?
6. Ñi Jehová npaxajlec na qarhuenaxanaxapi
Na nqalanaxacpi na nʼonataxanaxac taq ra qaca aca anom ishet ra qomiʼ itauan ra saỹatenaq lcata ra qarpiʼiỹaxac ñi Jehová. Qaumichiñi na VIDEO yaqtoʼ qauaỹachiñi ʼeetec ra qaỹataỹaʼaguet neʼena ñiʼiguenataguecpi ra npiʼiỹaxac, ime nache qaumalligui neʼena:
So video, ¿négueʼt so nqalanaxacpi iuen ra ratayaʼaguet so qarqaỹa?
¿Négueʼt so iuen ra ỹoʼot yaqtoʼ queta ra nʼañaxatac?
Qautaxaỹaxañi Mateo 6:25-34 [TBSNT], qataq qaumalligui neʼena:
¿Négueʼt ca ỹachaxanapeguem ñi Jehová nam iʼauaxaañi ñimaye ra nachaalataxac?
HUOʼO NA NASAXAUEC RA: «Iuen ra ỹaguec na iʼonataxanaxac yaqtoʼ sequiʼaxan na ihuoʼ lʼecpi. Saq ishet ra sauaʼa na naponaxacpi ʼenauac na la semana».
¿Négueʼt ca texto aye la Biblia ʼam itauan ra ʼaupiʼiỹaʼa ra ʼauʼauaxaañi ra ñiʼoxonataxanaxac ñi Jehová saxaỹet ra ʼonaxaic?
NA ʼAMAQTAQAIC
Ra nʼonataxanaxac taq na anom qaiuen, qalaxaye huanna iuen ra qomiʼ ỹashaxanguet ra shiʼoxorenaq ñi Jehová.
ʼAntoueetaʼac
¿Négueʼt ca ʼam itauan yaqtoʼ ʼanaloqteeta ra ʼarmejnaxanaxac ca nʼonataxanaxac?
¿Négueʼt ca ʼachiquiaxacpi ʼauaconguet ra ʼantootapeguec nam ʼam huetoʼot?
Ra ñi Jehová ỹachaxanapec ra ỹanem cam iuen na lʼonataxanaxanecpi, ¿ʼeetec ishet ra ʼauachaxan ra ʼaupiʼiỹaʼa ñimaye?
ʼAUANATA CA LỸA
ʼAuanata ra aye la Biblia iʼaxat petaʼa ra qauem na anom.
«¿Lasouaxashet ana anom ʼenauac na qauemsat?» (Paxaguenaxat ye jw.org)
ʼAmeten ra lataxac ca qoỹan maye nqaʼen machiguiñi ñi Jehová.
«¿Négueʼt ca ʼenapec aye la Biblia ca qoỹan?» (Paxaguenaxat ye jw.org)
¿Qauem ra sashoxogui ana anom?
«Ra lmejnaxanaxac aye la Biblia: Ra qaỹashigui ana anom» (¡Despertad!, marzo de 2015)
ʼAutaxaỹaxan négueʼt ca iraxan so shiỹaxaua maye raʼaistapigui ana anom taq recachetac ra naralaxat ra nachaalataxac.
«Yataqta selooquen na qomitaxac na caaỹo» (La Atalaya, 1 de noviembre de 2011)