PAXAGUENAXAT 38
Sanaq ra qanaʼachec souaxat ra nachetaqtaxanaxat achaalataxac
Ishet ra qalota na ʼonaxaic soʼotaq chaʼaye ñicaʼalaqtauec. Naiʼctaxa ra souaqaigui na nqalanaxacpi, ishet ra queta ra ñitonaqtapeguec na ʼonaxaicpi huetaigui ca achaalataxac. ¿ʼEetec ishet ra sanqot ñi Jehová ra qanaʼachec souaxat neʼena lachetaqtaxanaxat? ¿Qataq táʼaencoʼ ra ỹataqta huoʼo ra naigui ra soʼotaq reʼera?
1. ¿Táʼaencoʼ ra iuen ra huoʼo naq naigui ñaqaʼenaq ra achaalataxac?
Seuenaq ra huoʼo naq naigui ra achaalataxac chaʼaye lachetaqtaxanaxat ñi Qartaʼa huotaxanaqtaqaic, Jehová. Ñimaye «huetoʼot da ncaʼalaxa», chaʼaye ỹoʼot ʼenauac na ncaʼaltauecpi (Salmo 36:9). «Ñimaye nacheñi Ñim chegoqoʼot ʼenauac da qarcaʼalaxa, qataq naua qaraʼaʼche, qataq ʼenauac nam ishet da iuen ca shiỹaxaua» (Hechos 17:25, 28). Ỹoqoʼoye ñi Jehová nacheñi ñi qomiʼ ỹanem cam seuenaqtaique yaqtoʼ queta ra ñicaʼalaqtauec. Taqaʼen ỹoʼot ra ishet ra ñitonaqtapeguec ra achaalataxac (ʼautaxaỹaxan Hechos 14:17).
2. ¿ʼEetec ishet ra sachaxanqot ñi Jehová ra qanaʼachec souaxat ra lachetaqtaxanaxat achaalataxac?
So chigoqchigui ra qonetaigui añi lcoʼoxoqui aso ʼarateʼe, ñi Jehová lʼena ra ʼam ilaʼa. So atamnaxac ỹaxanec ñi Jehová ra huetalec ye lʼaqtac, so lʼaqtaxanaxanec lʼenaxat David, ʼenapega: «Naua ʼaraʼaiʼte ỹauaachiguilo da ỹoʼocỹaxac coʼollaq noʼoxootac» (Salmo 139:16). Ñi Jehová ỹataqta huoʼo naq naigui nqaʼen ra ʼanachaalataxac (ʼautaxaỹaxan Mateo 10:29-31). Ñimaye ỹataqta huoʼo ra nquiʼic ra ca shiỹaxaua maiche enʼac ra ỹalauat ca lỹa, qoʼ ra nalaajlaʼt (Éxodo 20:13)a. Taqaʼen ñimaye iuet ra naiʼctaxa ra saỹatenaq ca lchec qalaq soʼotaq, qoʼ ra saishet ra ñitelaqaʼa ra nachaalataxac na laỹipi. Ra seloxogue ra maiche qanachaalataxac qataq ra huoʼo ra ʼenec ñaqaʼenaq ra nachaalataxac na laỹipi, nache sachaxanaq ra huoʼo naq naigui ñaqaʼenaq ra lachetaqtaxanaxat ra achaalataxac.
ÑIMITAQ RA PAXAGUENAXAT
Semetenaq négueʼt ca soʼotaq yaqtoʼ sachaxanaq ra qanaʼachec ra nachetaqtaxanaxat achaalataxac.
3. ʼAuloʼogue ra ʼanachaalataxac
Na cristianopi saxaỹet roʼogoxona ra nachaalataxac yaqtoʼ ỹoʼot cam ʼeetapeguec ñi Jehová taq ca lataxac ra ỹaỹamaxareeta ñimaye ra qaỹoʼogoxona ra achaalataxac. Ỹanot ñi Dios ra lʼoquiaxac ʼenaʼam ca nachetaqtaxanaxat quiʼitta, ỹoqoʼoye iuen ra iloʼogue. Qautaxaỹaxañi Romanos 12:1, 2 [TBSNT], qataq qaumalligui neʼena:
¿Táʼaencoʼ ra ʼauen ra ʼauloʼogue ra ʼanachaalataxac?
¿ʼEetec ra ʼauʼot reʼera?
4. ʼAntelaʼaguet cam ishet ra iquemaqchet ra ʼanachaalataxac taq na laỹipi
Aye la Biblia qomiʼ ʼenapega ra sevitaqaʼaguet ra soʼotaq camachaqca huoʼo ra lchec. Qaumichiñi na VIDEO qataq qaumichiñi négueʼt ca ishet ra soʼotaq yaqtoʼ sañoxotaq ra qaica ca ngueʼ camachaqca qonactaña.
Qautaxaỹaxañi Proverbios 22:3 qataq qaumalligui négueʼt ca ishet ra ỹoʼot ca shiỹaxaua yaqtoʼ qaica ca ngueʼ huaña...
... ye lmaʼ.
... ra lʼonataxananqaʼ.
... ra ỹoʼot na naʼashaxacpi.
... ra ramaicnaxan qoʼ ra qaỹachetac.
5. ʼAuʼot ra ʼenec ra nachaalataxac ca ʼoshaic maye saxanaxa ra ñiguiñi
So David iʼaxattaʼa ra lqochoxo nomteguet ñi Jehová ra nachaalataxac taq noʼoxoonaxac ca ʼoshaic maye ñaq huetaigui añi lcoʼoxoqui aca lateʼe. Qautaxaỹaxañi Salmo 139:13-17 qataq qaumalligui neʼena:
Ra lmejnaxanaxac ñi Jehová, ¿lágui ra chigoqchigui ra nachaalataxac ca shiỹaxaua: ra ñiguiñi, qoʼ ra chetaʼague huetaigui añi lcoʼoxoqui aca lateʼe?
Na lamaxasoxonaxacpi ỹanem ñi Jehová so israelitapi coʼollaxa npaxajlec ana alpi hualaxaipi taq na ʼoshaic huetaigui añi lcoʼoxoqui. Qautaxaỹaxañi Éxodo 21:22, 23 [NWT], qataq qaumalligui neʼena:
¿ʼEetec ra lmejnaxanaxac ñi Jehová ra ca shiỹaxaua ilamqalec ra ỹalauat ca ʼoshaic maye saxanaxa ra ñiguiñi?
Nache, ¿ʼeetec ra nanomaxa ra ca shiỹaxaua maiche enʼac ra ỹoʼot reʼera?b
Qaq ʼam, ¿ʼeetec ca ʼarmejnaxanaxac ra lcuennataxac ñi Dios?
Aca ʼalo ỹoʼot ra ʼenec ra achaalataxac ishet ra ivirauga ra lcuennataxac ra ʼoonolec llec ra nsollaxajñi ca llalec. Qautaxaỹaxañi Isaías 41:10 qataq qaumalligui neʼena:
Ra aca ʼalo qaỹamaqtalec yaqtoʼ nsollaxajñi ca llalec, ¿négueʼt ca iuen ra ỹaxanot ca ntaunaxanaxac? ¿Táʼaencoʼ?
HUOʼO NA NASAXAUEC RA: «Añi ʼoonole ʼalo maiche taỹoʼot ra lcaʼauʼa ra huotaique ra nsollaxajñi ca llalec qoʼ saishet. Maiche lalamaxat ra lʼoquiaxac».
¿Négueʼt ca ʼam itauan ra ʼaupiʼiỹaʼa ra ñi Jehová huoʼo naq ʼenec nqaʼen ra nachaalataxac aca ʼalo hualaxai taq ca ʼoshaic huetaigui añi lcoʼoxoqui?
NA ʼAMAQTAQAIC
Ra achaalataxac lachetaqtaxanaxat ñi Jehová. Aye la Biblia qomiʼ ỹapaxaguenec ra sauoqoʼo naq ʼenec, ñipaxataxalec taq sauotaxac ra maiche qanachaalataxac taq na laỹipi.
ʼAntoueetaʼac
¿ʼEetec ra saỹatenaq ra ñi Jehová huoʼo naq naigui ra nachaalataxac na shiỹaxauapi?
¿ʼEetec ra nanomaxa ñi Jehová ra ca shiỹaxaua maiche ʼenʼac ra nalaajlaʼt qoʼ ra ỹalauat ca shiỹaxaua?
¿Négueʼt ca ỹactec ra ʼarauela ra lachetaqtaxanaxat achaalataxac?
ʼAUANATA CA LỸA
¿ʼEetec ishet ra sanqot ñi Jehová ra qanaʼachec souaxat ra lachetaqtaxanaxat achaalataxac?
Ra ʼonaxaic lachetaqtaxanaxat achaalataxac (nʼonec 141) (2:41)
¿Ishet ñi Dios ra ichoxoren aca ʼalo ra coʼollaxa mashe nsollaxajñi ca llalec?
«¿Négueʼt ca ʼenapec aye la Biblia ra nsollaxac?» (Paxaguenaxat ye jw.org)
ʼAmeten ʼeetec ra nhuoteetaʼt ra lmejnaxanaxac ñi Dios ra achaalataxac taq na qaraʼashaxacpi.
¿Qaq ra ca shiỹaxaua lcuennataxac ra nalaajlaʼt? ʼAuanata na lqataxacpi ỹan aye la Biblia.
a Ñi Jehová ỹataqta ỹoqochaʼa nam qaica ca lʼañaxac ra lquiyaqteỹaxac (Salmo 34:18). Ñimaye ỹaỹateeteguet ye qauem ncuennataxacpi maye ishet ra ỹauega ca ʼoonolec ra icuennate ra nalaajlaʼt, qataq huotaique ra itauan nam nache ʼeetec ra nanomaxapi. ʼAuanata ra noʼon ntaunaxanaxacpi ra lqataxacpi ñimaye, ra ʼautaxaỹaxan ye paxaguenaxat «¿Ishet ra aỹem itauan aye la Biblia ra mashe qaica ca iyaxa ra ñicaʼaltauec qataq ra secuennataxanaxa ra ñalaajlaʼt?», huetaigui ye laỹi «ʼAuanata ca lỹa» neʼena paxaguenaxat.
b Nam lcaʼauʼapi ra nsollaxajñi ca llalec coʼollaxa, saishet ra queta ra ỹachetac ra nquiʼic souaxat seʼeso lasouaxashet; ñi Jehová lhuotta ra ichoxoren namayepi. ʼAuanata ca laỹipi naʼaqtacpi reʼera ye paxaguenaxat «¿Négueʼt ca ʼenapec aye la Biblia ra nsollaxac?», huetaigui ye laỹi «ʼAuanata ca lỹa» neʼena paxaguenaxat.