21 Ŵati aja kamanavi kufika ku Yerusalemu, angufika ku Betifage pa Phiri la Maolivi, ndipu Yesu wangutuma akusambira ŵaŵi.+ 2 Iyu wanguŵakambiya kuti: “Lutani mumuzi wo uwoneka po, ndipu mwamusaniya bulu yo amumangiriya limoza ndi mwana waki. Mukaŵafwatuwi ndi kuza nawu kwaku ini. 3 Asani munthu munyaki wachikufumbani, mukakambi kuti, ‘Ambuya atiŵakhumba.’ Asani mwachikamba ŵaka viyo, wakukupaskani nyengu yeniyo.”

29 Ndipu wati wafika pafupi ndi Betifage kweniso Betaniya, mizi yo ye paphiri lo lidanika kuti Phiri la Maolivi,+ wangutuma akusambira ŵaŵi.+ 30 Iyu wanguŵakambiya kuti: “Lutani mumuzi wo uwoneka po, ndipu asani mwachisere mwamusaniya mwana wa bulu yo amumangiriya, mweniyo chijaliyi munthu wechendakwerepu. Mukamufwatuwi ndi kuza nayu kunu. 31 Ndipu asani munthu munyaki wachikufumbani kuti: ‘Mutimufwatuliyanji?’ mukakambi kuti: ‘Ambuya atimukhumba.’” 32 Mwaviyo, ŵanthu wo anguluta ndipu anguchimusaniya nge mo wanguŵakambiya.+ 33 Kweni achifwatuwa mwana wa bulu, mweneku wanguŵafumba kuti: “Mutimufwatuliyanji?” 34 Yiwu angumuka kuti: “Ambuya atimukhumba.”