Yobu
32 Mwaviyo, anthulumi atatu yaŵa anguleka kumumuka Yobu, chifukwa iyu wangukhorwa kuti ndi murunji.*+ 2 Kweni Elihu mwana waku Barakeli wa mu fuku laku Bazi+ wa mu banja laku Ramu, wangukwiya ukongwa. Iyu wangumukwiyiya ukongwa Yobu pakuti wakambanga kuti ndi murunji kuluska Chiuta.+ 3 Iyu wangukwiyiya so ukongwa abwezi atatu aku Yobu chifukwa angutondeka kumuka, mumalu mwaki akambanga kuti Chiuta ndi muheni.+ 4 Elihu wangulindizga kuti wamumuki Yobu, chifukwa anyaki wosi ŵenga arara kuluska iyu.+ 5 Elihu wati wawona kuti anthulumi atatu ŵenaŵa alivi chakumuka, wangukwiya ukongwa. 6 Sonu Elihu mwana waku Barakeli wa mu fuku laku Bazi, wangwamba kukamba kuti:
Mwaviyo, ndinguwuko dankha mtima mwaulemu,+
Ndipu ndinguja cheti kwambula kukukambiyani vo ndiziŵa.
7 Ndinguŵanaŵana kuti, ‘Vyaka vilongoro* dankha,
Ndipu vyaka vinandi vikonkhoski zeru.’
8 Kweni mzimu wo we mu ŵanthu,
Mvuchi wa Wanthazizosi, ndiwu utiŵawovya kuti aje akuvwisa vinthu.+
9 Ndi vyaka pe cha vo vichitiska* kuti munthu waje ndi zeru,
Kweniso mbakukota pe cha wo aziŵa cho ntchakwenere.+
10 Sonu ndititi, ‘Vwisiyani,
Ndipu nani ndikukambiyeningi vo ndiziŵa.’
11 Awonani! Ini ndangalindizga mazu nginu;
Ndipuso ndavwisiyanga fundu zinu+
Muchifufuza vakuti mukambi.+
12 Ndakuvwisiyaningi mwakuphwere,
Kweni palivi yo wamususkapu Yobu kuti ngwakunanga*
Pamwenga kumumuka vo wakambanga.
13 Sonu mungakambanga cha kuti, ‘Tasaniya zeru;
Pakuti Chiuta ndiyu watimususka, munthu cha.’
14 Vo wakambanga vazanga kwaku ini cha,
Sonu nani ndimumukengi mwakukoliyana ndi mazu nginu cha.
15 Yiwu achita mantha, ndipu alivi so mazu;
Alivi chechosi chakuti angakamba.
16 Ini ndalindizga, kweni aleka kulongoro;
Yiwu ama ŵaka jo, ndipu alivi chakumuka.
17 Sonu nani ndimukengi;
Nani ndikambengi vo ndiziŵa,
18 Pakuti nde ndi mazu nganandi;
Mzimu wo we mwaku ini utindichichizga.
19 Mukati mwangu, mwe nge vinyu yo walivi pakutuliya,
Nge mathumba ngafya nga vinyu ngo ngaja kamanavi kuphumuka.+
20 Sonu ndilekeni ndilongoro kuti mtima wangu utuni!
Ndijulengi milomu yangu ndipu ndimukengi.