Sumu Yaku Solomoni
5 “Ndasere mumunda wangu,+
Yiwi mzichi wangu, mwali wangu.
Ndapontho mure wangu ndipuso vinthu vangu vakununkhira.+
Ndarya chisa changu cha uchi ndipuso uchi wangu;
Ndamwa vinyu wangu ndipuso mkaka wangu.”+
“Ryani yimwi abwezi akwanjiwa!
Mwani ndi kuloŵe ndi chanju!”+
2 “Ndagona, kweni mtima wangu we masu.+
Ndituvwa wakwanjiwa wangu wagong’oska pachisasa!
‘Ndijuliyeku yiwi mzichi wangu, wakwanjiwa wangu,
Njiŵa yangu, yiwi wakwanjiwa wangu wambula kalema!
Pakuti mutu wangu wazumbwa ndi dungwi,
Sisi langu lakuluka lazumbwa ndi mzizi wa usiku.’+
3 Ndazuwa kali mkhanju wangu.
Kumbi ndiwuvwali so?
Maphazi ngangu ndangasuka.
Kumbi ndinganatisi so?
4 Wakwanjiwa wangu wangutuzgapu janja laki pachimphowu cha chisasa,
Ndipu mtima wangu ungukhabuka chifukwa chaku iyu.
5 Ndinguyuka kuti nkhamujuliyeku wakwanjiwa wangu;
Manja ngangu ngangunthonya mure,
Vikumbu vangu vingunthonyeze mure wamaji,
Pavikoleru va chisasa.
6 Ndingumujuliyaku wakwanjiwa wangu,
Kweni ndingusaniya kuti wakwanjiwa wangu watuwapu, waluta.
Ndingudandawula ukongwa wati waluta.*
Ndingumupenja kweni ndingumusaniya cha.+
Ndingumudana kweni wangundimuka cha.
7 Alonda wo ayenderiyanga tawuni angundisaniya.
Yiwu angundipuma, ndipu angundipweteka.
Alonda wo awoneriyanga mipanda angundiphanga chakudika changu.*
8 Yimwi ŵana anthukazi a ku Yerusalemu, nditikuchitiskani kuti mulapizgi:
Asani mwamusaniya wakwanjiwa wangu,
Mumukambiyi kuti ndatama chifukwa cha chanju.”
9 “Kumbi yo wakwanjiwa waku waphara wuli akwanjiwa anyaki wosi,
Yiwi wamunthukazi wakutowa ukongwa pa anthukazi wosi?
Kumbi yo wakwanjiwa waku waphara wuli akwanjiwa anyaki wosi,
Kuti utichitiski kuti tilapizgi viyo?”
10 “Wakwanjiwa wangu ngwakutowa kweniso ndi muyera;
Pa anthulumi 10,000, iyu wasoŵa cha.
11 Mutu waki ndi golidi wamampha ukongwa.
Sisi laki lakuluka le nge mani nga kantchindi ngo ngaputaputa,*
Ndipu ndifipa nge chaholi.
12 Masu ngaki nge nge njiŵa zo ze mumphepeti mwa timisinji tamaji,
Zo zisamba mumkaka,
Zaja pafupi ndi damu lakuzaza.*
13 Matakama ngaki nge nge mdandu wa vakununkhira,+
Matusi nga vakume vakununkhira.
Milomu yaki ndi maluŵa, yinthonya mure.+
14 Manja ngaki nge nge misuku yagolidi, yo yapakika kurusolito.
Lufu laki ndi munyanga wa njovu wakutowa wo wapakika safiro.
15 Malundi ngaki ndi vipilala vakuzengeka ndi mabo vo vajinthika pa golidi wamampha ukongwa.
Iyu wawoneka nge Lebanoni, ngwakutowa ukongwa nge vimiti va sidara.*+
Mwenuyu ndiyu wakwanjiwa wangu, mwenuyu ndiyu nditimuyanja ukongwa, yimwi ŵana anthukazi a ku Yerusalemu.”