Kalata Yakuluta kwa Aefeso
2 Kweniso Chiuta wakukusambusani amoyu chinanga kuti mwenga akufwa chifukwa cha kunanga kwinu ndipuso maubudi nginu,+ 2 vo nyengu yinyaki mwayendangamu mwakukoliyana ndi vakuchitika va mu nyengu yinu,*+ mwakukoliyana ndi yo walamuliya mphepu iyi+ yo ye ndi mazaza pa ŵanthu, ndipu mphepu yeniyi pamwenga kuti kuŵanaŵana kwenuku+ ndiku sonu kugwira ntchitu mu ŵana ambula kuvwiya. 3 Kukamba uneneska, pa nyengu yinyaki, tosi po tenga pakati pawu, tachitanga vinthu mwakukoliyana ndi makhumbiru nga liŵavu,+ tachitanga vo liŵavu lidu likhumba kweniso vo maŵanaŵanu ngidu ngakhumba.+ Ndipu mwakawi, tenga ŵana akwenere kulonde ukali waku Chiuta+ nge ŵanthu anyaki wosi. 4 Kweni Chiuta pakuŵa walisungu ukongwa,+ chifukwa cha chanju chaki chikulu cho wakutilongo,+ 5 wakutisambusa kuja amoyu limoza ndi Khristu chinanga kuti tenga akufwa chifukwa cha maubudi ngidu,+ ndipu chifukwa cha wezi ukulu mwataskika. 6 Kweniso tosi pamoza watitiyuska ndipuso tosi pamoza watitijalika mumalu ngakuchanya mwakukoliyana ndi Khristu Yesu,+ 7 kuti mu nyengu yo yituza* Chiuta wazilongo wezi waki ukulu wakuzaza ndi vinthu vinandi ukongwa vamampha. Iyu wazamuchita venivi mwakutilongo lisungu* isi te akukoliyana ndi Khristu Yesu.
8 Mwakugwiriskiya ntchitu wezi ukulu wenuwu, mwataskika chifukwa cha chivwanu,+ ndipu venivi vachitika chifukwa cha vakuchita vinu cha, pakuti yeniyi ndi mphasu yaku Chiuta. 9 Kukamba uneneska, vachitika chifukwa cha ntchitu cha,+ kuti paŵevi wakuja ndi chifukwa chakumalikiya. 10 Isi te ntchitu ya manja ngaku Chiuta ndipu tingulengeka+ mwakukoliyana ndi Khristu Yesu+ kuti tichiti ntchitu zamampha zo Chiuta wakunozge limu kuti isi tiyendemu.
11 Mwaviyo, kumbukani kuti pa nyengu yinyaki yimwi mwaŵanthu akuwiya mu mitundu yinyaki, mwadanikanga kuti “ambula kudumulika” ndi ŵanthu wo adanika kuti “akudumulika,” wo adumulika ku liŵavu ndi manja nga ŵanthu. 12 Pa nyengu yeniyo, mwenga ambula Khristu, mwenga kutali ndi mtundu wa Isirayeli, mwenga alendu ku mapanganu ngakulayizgika;+ mwengavi chilindizga ndipu mwenga ambula Chiuta mucharu.+ 13 Kweni sonu mwakukoliyana ndi Khristu Yesu, yimwi kali mwenga kutali mwaza kufupi chifukwa cha ndopa zaku Khristu. 14 Pakuti iyu ntchimangu chidu,+ wakupanga magulu ngaŵi kuja gulu limoza,+ ndipu wakubwanganduwa chimati chakupatuwa cho chenga pakati pawu.+ 15 Mwakugwiriskiya ntchitu liŵavu laki, wakutuzgapu urwani, Dangu* lo lenga ndi marangu, kuti mwakukoliyana ndi iyu magulu ngaŵi ngaje munthu yumoza mufya+ ndipuso kuti wajalikiski chimangu, 16 kweniso kuti wayanjanisiyi limu magulu ngosi ngaŵi kuja liŵavu limoza kwaku Chiuta kuporote mu chimiti chakutombozgekiyapu,*+ chifukwa wakubaya urwani+ kuziya mwaku iyu mweneku. 17 Ndipu wanguza kuzipharazga uthenga wamampha wachimangu kwaku yimwi mwenga kutali, ndipuso chimangu ku ŵanthu apafupi. 18 Chifukwa kuporote mwaku iyu, isi magulu ngosi ngaŵi, te ndi wanangwa wakufika kwa Ada mwa mzimu umoza.
19 Mwaviyo mwe alendu cha pamwenga akuza,+ kweni mwe ŵeneku+ limoza ndi akupaturika ndipu mwe a munyumba yaku Chiuta.+ 20 Ndipuso mwazengeka pafawundeshoni ya akutumika kweniso achimi,+ penipo mweneku Khristu Yesu ndi mwa wapakona pa fawundeshoni.+ 21 Mwakukoliyana ndi iyu, nyumba yosi yilungana pamoza,+ yilutirizga kukuwa kuti yije nyumba yakusopiyamu yakupaturika yaku Yehova.*+ 22 Mwakukoliyana ndi iyu, yimwi namwi muzengeka pamoza mwakugwiriskiya ntchitu mzimu waki kuti muje malu ngakujamu ngaku Chiuta.+