Ezekiyeli
9 Pavuli paki, iyu wangudaniriza mwakukweza ini ndichivwa ndipu wangukamba kuti: “Dana ŵanthu wo alangengi tawuni iyi, weyosi wapingi chidya chakubwanganduliya mujanja laki!”
2 Ndinguwona anthulumi 6 wo atuliyanga kugeti lakunena+ lo lilereska kunkhondi,* weyosi wangupinga chidya chakuswiya mujanja laki. Pakati pawu penga munthu munyaki yo wanguvwala chakuvwala cha salu yamampha, iyu wenga ndi kachikwama ka mlembi* muchiwunu chaki, ndipu yiwu angusere ndi kuma pafupi ndi guŵa la sembi lamkuŵa.+
3 Pavuli paki, unkhankhu waku Chiuta waku Isirayeli,+ ungutuwapu pachanya pa akerubi po wenga, ndipu unguluta pakhomu la nyumba yakusopiyamu.+ Iyu wangwamba kudana munthu yo wanguvwala chakuvwala cha salu yamampha, mweniyo muchiwunu chaki mwenga kachikwama ka mlembi. 4 Yehova wangumukambiya kuti: “Sere mutawuni, jumpha mu Yerusalemu, ndipu uŵiki chisimikizu pavisku va ŵanthu wo akuta ndi kutamantha+ chifukwa cha vinthu vosi vakuseruska vo vichitika mutawuni iyi.”+
5 Ndipu wangukambiya ŵanthu anyaki ini ndichivwa kuti: “Sereni mutawuni iyi ndipu mulondoni ndi kubaya ŵanthu. Jisu linu lingaŵachitiyanga chitima cha, ndipu mungalengiyanga lisungu munthu weyosi cha.+ 6 Bayani weyosi, kwali ndi munthu wakukota, mnyamata, mwali, litema kweniso anthukazi.+ Kweni munthu weyosi yo we ndi chisimikizu mungamubayanga cha.+ Muyambiyi mumalu ngangu ngakupaturika.”+ Mwaviyo, yiwu angwamba kubaya ŵara wo ŵenga panthazi pa nyumba yakusopiyamu.+ 7 Pavuli paki, wanguŵakambiya kuti: “Fipiskani nyumba yakusopiyamu ndipu muzazi mabalaza ngaki ndi ŵanthu akubayika.+ Lutani!” Mwaviyo, anguluta ndipu angubaya ŵanthu mutawuni yo.
8 Yiwu achibaya ŵanthu wo, ini pe ndini ndingujaku, ndipu ndingujikama ndi kusindama mpaka chisku changu pasi. Ndinguliya kuti: “Kotu ama, Yehova, Ambuya Fumu Yikulu! Kumbi munangengi Ayisirayeli wosi akujaku muchipunguliya ukali winu paku Yerusalemu?”+
9 Sonu wangundikambiya kuti: “Kunanga kwa nyumba yaku Isirayeli kweniso Yuda nkhukulu ukongwa.+ Charu chazaza ndi kudira ndopa,+ ndipu tawuni yazaza ndi vinyeda.+ Pakuti yiwu akamba kuti, ‘Yehova watuwamu mucharu ichi. Yehova watitiwona cha.’+ 10 Kweni ini, jisu langu liŵachitiyengi chitima cha, ndipu ndiŵalongongi lisungu cha.+ Ndiŵaweziyengi mwakukoliyana ndi nthowa zawu.”
11 Pavuli paki, ndinguwona munthu yo wanguvwala chakuvwala cha salu yamampha, yo wenga ndi kachikwama ka mlembi muchiwunu chaki wachimuka kuti: “Ndachita mwakukoliyana ndi mo mwandilamuliya.”