Yesaya
46 Belo wajikama,+ Nebo wasindama.
Angoza ŵawu aŵapinga pavinyama, pavinyama vakunyamuwa katundu,+
Nge katundu yo wafyo nyama zakuvuka.
3 “Ndivwisiyeni, yimwi a munyumba yaku Yakobe, ndipuso yimwi mosi mwajaku a munyumba yaku Isirayeli,+
Ndakuwovyani kutuliya po mukuwiya kweniso kukupingani kwambiya po mukutuliya mumoyu.+
4 Mpaka po mukotiyengi ini ndisinthengi cha;+
Mpaka po sisi linu lachitiya nyivu* ndilekengi cha kukupingani.
Nge mo ndachitiya, ndikunyamuweningi, ndikupingeningi kweniso ndikutaskeningi.+
5 Kumbi mungandiyananiska ndi yani pamwenga kundichitiska kuti ndikozgani nayu, pamwenga kumbi mungandiyeruzgiya ndi yani,+
Kuti tiyanani?+
6 Pe ŵanthu anyaki wo asakaza golidi wa muvikwama vawu;
Yiwu apima siliva pasikelu.
Alembera munthu wakusula visulu, ndipu wapanga chiuta ndi siliva yo.+
Pavuli paki yiwu asindama mpaka visku vawu pasi, ndipu atimusopa.+
7 Yiwu atimunyamuliya pamapewa ngawu;+
Atimupinga ndi kumuŵika pamalu ngaki ndipu waja penipo.
Watuwapu cha pamalu ngaki.+
Atimuliriya kweni wamuka cha;
Wangataska munthu weyosi cha mu masuzgu.+
8 Kumbukani venivi, ndipu khwimani mtima.
Muvisungi mumtima, yimwi ŵanthu akunanga.
9 Kumbukani vinthu vakwamba va mu nyengu yakali,
Kuti ini ndini Chiuta, ndipu palivi munyaki.
Ndini Chiuta, ndipu palivi so munyaki wakuyanana nani.+
10 Kutuliya pakwamba ndikambiya limu vo vichitikengi,
Ndipuso kutuliya mu nyengu yakali ndikambiya limu vinthu vo vechendachitiki.+
11 Ndidana chiyuni chakurya nyama kutuliya kwakutuliya lumwi,*+
Ndidana munthu kutuliya kucharu chakutali kuti wachiti vo ndasankha.*+
Ndakamba, ndipu ndivu ndichitengi.
Ndanozga, ndipu ndifiskengi.+
12 Ndivwisiyeni, yimwi ŵanthu akumira mtima,
Yimwi mwe kutali ndi urunji.
Ndiperekengi utaski mu Ziyoni, kweniso ndiperekengi unkhankhu wangu kwaku Isirayeli.”+