Yobu
13 “Hinya, jisu langu laviwona vosi ivi,
Ndipu gutu langu lavwa ndi kuvivwisa.
2 Vo yimwi muziŵa, nani so nditiviziŵa;
Nde munamana cha kwaku yimwi.
3 Kwaku ini, nkhanthu ndilongoro ndi Wanthazizosi;
Beteli kuti nkhani yangu ndisuskani ndi Chiuta.+
4 Kweni mutindikuluŵa ndi maboza;
Mosi yimwi ndimwi madokotala ngaŵakaŵaka.+
5 Asani munguja ŵaka cheti,
Mwatingi mulongongi kuti mwe ndi zeru.+
6 Chondi, vwisiyani madandawulu ngangu,
Ndipuso vwisiyani kuŵeyere kwa milomu yangu.
7 Kumbi mulongorongi vinthu vambula urunji mumalu mwaku Chiuta,
Ndipuso mulongorongi mwauryarya mumalu mwaku iyu?
8 Kumbi mujengi kuchigaŵa chaki?*
Ndipuso kumbi yimwi ndimwi mumiyengi Chiuta wauneneska pa mulandu waki?
9 Kumbi vingakuyendiyani umampha asani iyu wangakufufuzani?+
Kumbi mungamupusisa nge mo mungapusisiya munthu?
10 Iyu wakuchenyeningi nadi
Asani mulongo kwanjiya mwachisisi.+
11 Kumbi ukulu waki utikuwofyani cha
Ndipuso muchita mantha cha chifukwa chaku iyu?
12 Mazu nginu ngazeru* nge nge nthanthi za vyotu;
Mazu nginu ngakujivikiliya ngambula kukho* nge vishangu vadongu.
13 Jani cheti pa masu pangu, kuti ndilongoro.
Pavuli paki, chechosi cho chingaza paku ini, chizi ŵaka!
14 Ntchifukwa wuli nditijiŵika pangozi*
Ndipuso ndipinga umoyu wangu mu manja mwangu?
15 Chinanga kuti wangandibaya, ndilindizgengi mbwenu;+
Ndikambiskanengi nayu mulandu wangu pa masu ndi pa masu.*
16 Pavuli paki, iyu wajengi mtaski wangu;+
Pakuti munthu wambula kopa Chiuta* wangaza cha pa masu paki.+
17 Vwisiyani mwakuphwere mazu ngangu;
Ŵikanipu maŵanaŵanu nginu pa vo ndikamba.
18 Sonu wonani, ndanozgeke mulandu wangu;
Ndiziŵa kuti nde wakunanga cha.
19 Ndiyani yo wasuskanengi nani?
Ndifwengi asani ndingaja ŵaka cheti!*
20 Chiuta wangu, nditikupemphani ŵaka vinthu viŵi,*
Kuti ndileki kujibisa pa masu pinu:
21 Tuzganipu janja linu lizitu ndipu muliŵiki kutali ndi ini,
Kweniso mungazomerezanga cha kuti kofya kwinu kundichitiski mantha.+
22 Danani ndipu ndikumukeningi,
Pamwenga ndizomerezeni kuti ndilongoro, ndipu yimwi mundimuki.
23 Kumbi ndi vinthu wuli vo ndananga ndipuso vo ndabuda?
Ndivumbuliyeni mphulupulu yangu kweniso ubudi wangu.
25 Kumbi mukhumba kuwofyeza jani lo liputa ndi mphepu
Pamwenga mutchimbiza phesi lakumira?
26 Pakuti mulutirizga kulemba vinthu vakuŵaŵa vakulimbana ndi ini,
Ndipu mutindichitiska kuti ndisuzgiki chifukwa cha maubudi ngo ndinguchita ndeche mnyamata.
27 Mwaŵika maphazi ngangu mumatangaza,
Mulereseska nthowa zangu zosi,
Ndipu muwonesesa mosi mo ndikanda.