Masalimo
Kwaku yo walongozga sumu. Sumu yaku Davidi.
64 Vwani mazu ngangu yimwi Chiuta, po ndiŵeyere.+
Vikiliyani umoyu wangu kuti uleki kopa murwani.
2 Ndivikiliyeni ku viŵembu vo ŵanthu aheni anozga mwachisisi,+
Ndivikiliyeni ku chigulu cha ŵanthu wo achita vinthu viheni.
3 Yiwu anora malilimi ngawu nge lipanga;
Aponya mazu ngawu ngankhaza nge mo aponye mivi,
4 Kuti alasi munthu wambula kunanga kutuliya mumalu ngo abisama;
Atimulasa mwamabuchibuchi, kwambula mantha.
5 Akaniriya pa vilatu vawu viheni;*
Akambiskana mo angabisiya viŵana vawu.
Yiwu atiti: “Ndiyani waviwonengi?”+
6 Afufuza nthowa zasonu zakuchitiya vinthu viheni;
Mwakuchenje, anozga mapulanu ngawu mwachisisi;+
Vo weyosi waŵanaŵana mumtima mwaki, vakusuzga kuvivwisa.
7 Kweni Chiuta waŵalasengi;+
Mwamabuchibuchi, yiwu apwetekekengi ndi muvu.
8 Malilimi ngawu ndingu ngaŵawisengi;+
Ŵanthu wosi wo aŵawonengi apukunyengi mitu yawu.
9 Pavuli paki, ŵanthu wosi awopengi,
Ndipu apharazgengi vo Chiuta wachita,
Kweniso aziŵengi ntchitu zaki.+