Yobu
11 Zofari+ Mnamati wangumuka kuti:
2 “Kumbi mazu ngosi yanga ngamukikengi cha,
Pamwenga kumbi kulongoro ukongwa ndiku kungachitiska kuti munthu* waje wambula mulandu?
3 Kumbi ŵanthu ajengi cheti chifukwa cha mazu ngaku ngambula zeru?
Kumbi palivi munthu yo wakuchenyengi chifukwa cha mazu ngaku ngakunyoza?+
5 Asani Chiuta wangulongoro
Ndi kukujuliya mulomu waki,+
6 Watingi wakusumuliyengi chisisi cha zeru,
Pakuti zeru zakovya ze ndi vigaŵa vinandi.
Ndipu watingi uziŵengi kuti Chiuta wazomereza kuti maubudi ngaku nganyaki ngaluwiki.
7 Kumbi ungaviziŵa vinthu vandimba vaku Chiuta,
Pamwenga kumbi ungaziŵa chechosi chakukwaskana ndi* Wanthazizosi?
8 Pakuti vitali kuluska kuchanya. Kumbi yiwi ungafiskanji?
Vandimba kuluska Dindi.* Kumbi yiwi ungaziŵanji?
9 Vitali kuluska charu chapasi
Ndipuso visani kuluska nyanja.
10 Asani iyu wajumpha ndipu wako munthu munyaki ndi kumumba mulandu,
Ndiyani yo wangamukaniza?
11 Pakuti iyu waziŵa asani ŵanthu ayamba uryarya.
Asani wawona vinthu viheni, kumbi wangachitapu kanthu cha?
12 Kweni munthu wambula zeru wangavwisa
Pijapija asani bulu wamudondu wangabala munthu.*
13 Asani unganozga mtima waku
Ndi kutambasuliya manja ngaku kwaku iyu.
14 Asani janja laku lichita vinthu viheni, uviŵiki kutali,
Ndipu ungazomerezanga cha kuti vinthu vambula urunji vije muhema laku.
15 Asani wachita venivi, ungayunuska chisku chaku kwambula kalema;
Uŵengi wakukho ndipuso wambula mantha.
16 Kweniso ungaluwengi masuzgu ngaku;
Ungakumbukengi nge maji ngo ngakujumpha kali.
17 Umoyu waku uŵalengi kuluska msana pakati;
Ndipu chinanga ndi mdima waki, ujengi nge mlenji.
18 Ujengi ndi chigomezgu pakuti uŵengi ndi chilindizga,
Ndipu ulereskengi uku ndi uku kweniso ugonengi mwambula mantha.
19 Ugonengi pasi, ndipu paŵengevi weyosi wakuti wakuwofyi,
Ndipu ŵanthu anandi azakukupempha kuti uŵachitiyi lisungu.