Yobu
27 Yobu wangulutirizga* kukamba kuti:
2 Ndilapizga mu zina laku Chiuta wamoyu, yo wandinola urunji,+
Ndilapizga mu zina la Wanthazizosi, yo wachitiska kuti umoyu wangu uje wakuŵaŵa,+
3 Pa nyengu yosi yo mvuchi weche mwaku ini
Kweniso mzimu wakutuliya kwaku Chiuta weche mumphunu mwangu,+
4 Milomu yangu yilongorongepu cha vinthu vambula urunji;
Ndipu lilimi langu likambengepu cha vinthu vachinyengu!
5 Ini ndingachita cha kukamba kuti mwaŵanthu yimwi mwe arunji!
Ndipu mpaka po ndifwiyengi, ndilekengi cha* kuja wakugomezgeka!+
6 Ndiwukolesengi urunji wangu; ndiwutayengi cha;+
Pa nyengu yosi yo ndijaliyengi ndi umoyu,* mtima wangu undisuskengepu* cha.
7 Murwani wangu, waje nge munthu muheni,
Ndipu ŵanthu wo atindiyukiya aje nge ŵanthu ambula urunji.
8 Kumbi munthu wambula kopa Chiuta* waja ndi chilindizga wuli asani wabayika,+
Asani Chiuta watuzgapu umoyu waki?
9 Kumbi Chiuta wavwengi kuliya kwaki
Asani iyu wakumana ndi masuzgu?+
10 Pamwenga kumbi Wanthazizosi wakondwengi nayu?
Kumbi wadanengi Chiuta nyengu zosi?
11 Ndikusambizeningi vakukwaskana ndi nthazi zaku* Chiuta;
Ndibisengepu chechosi cha chakukwaskana ndi Wanthazizosi.
12 Awonani! Asani mosi mwawona viwona,
Ntchifukwa wuli mulongoro vinthu vambula fundu?
13 Ichi ndichu chigaŵa cha munthu muheni chakutuliya kwaku Chiuta,+
Chihara cho alongozgi ankhaza alonde kutuliya kwa Wanthazizosi.
14 Asani ŵana ŵaki aŵa anandi, azamubayika ndi lipanga,+
Ndipu mphapu yaki yazamuŵavi chakurya chakukwana.
15 Ŵanthu ŵaki wo azamupona, azamubayika ndi mulili,
Ndipu vyoko vawu vazakuŵaliya cha.
16 Chinanga wangawunjika siliva munandi nge fuvu
Kweniso wangasunga vakuvwala vamampha vinandi nge dongu,
17 Chinanga wangaviwunjika,
Munthu murunji ndiyu wazamuvwala,+
Ndipu ŵanthu wo alivi mulandu ndiwu azamugaŵana siliva waki.
18 Nyumba yo wazenga njambula kulama nge nyumba ya bulawufwa,
Kweniso nge chisakasa+ cho chapangika ndi mulonda.
19 Iyu wagonengi we ndi chuma kweni wawunganisengi chechosi cha;
Wachibenuwa masu ngaki, paŵengevi chechosi.
20 Mantha ngatimuko nge maji ngakusapaliya;
Chimphepu chitimutole kutali ndi usiku.+