Yesaya
30 Yehova wakamba kuti: “Soka ŵana amtafu,+
Wo achita vo akhumba mumalu mwakuchita khumbu langu,+
Wo achita mapanganu,* kweni kwambula kulongozgeka ndi mzimu wangu,
Kuti asazgiyepu ubudi pa ubudi.
2 Yiwu asikiya ku Ijipiti+ kwambula kundifumba,+
Kuti akavikiliriki ndi Farawo*
Ndipuso kuti akabisami mu mduzi wa ku Ijipiti!
3 Kuvikilirika ndi Farawo kwazamusambuka chilengesu kwaku yimwi,
Ndipu mwazamulengeseka chifukwa chakubisama mu mduzi wa ku Ijipiti.+
4 Pakuti alongozgi ŵaki akuzirwa ŵe ku Zowani,+
Ndipuso nthumi zaki zafika ku Hanesi.
5 Wosi azamulengeseka
Ndi ŵanthu wo angaŵawovya cha,
Ŵanthu ambula chovyu kweniso ambula phindu,
Soni pe ndi chilengesu.”+
6 Uthenga wacheruzgu wakukwaskana ndi vinyama vakofya va kumwera:
Kujumpha mucharu cha masuzgu ndi kuŵaŵa,
Cha nkharamu, nkharamu yakukoroma,
Cha chipi ndipuso njoka ya motu yakuphululuka,
Yiwu apinga chuma chawu pamisana ya abulu
Ndipuso vinthu vawu pamagonyu nga ngamila.
Kweni vinthu ivi vazakuŵawovya cha ŵanthu yaŵa.
7 Pakuti chovyu chaku Ijipiti ntchambula phindu.+
Mwaviyo ndamudana kuti: “Rahabi,+ yo waja ŵaka kwambula kuchita kanthu.”
8 “Sonu luta, ukalembi mazu ngo pachakulembapu yiwu achiwona,
Ukangalembi mubuku,+
Kuti ngazigwiriskikiyi ntchitu kunthazi
Nge ukaboni wambula kumala.+
10 Yiwu akambiya akuwona* kuti, ‘Lekani kuwona,’
Ndipuso akambiya akuwona viwona kuti, ‘Lekani kutikambiya viwona vauneneska.+
Mutikambiyengi vinthu vakukondwesa; muwonengi viwona vakupusisa.+
11 Tuwanipu panthowa; petukani panthowa.
Lekani kuŵika Mtuŵa waku Isirayeli pa masu pidu.’”+
12 Mwaviyo, Mtuŵa waku Isirayeli wakamba kuti:
“Pakuti mwakana mazu yanga+
Ndipu mugomezga ukhuluku ndi uryarya
Kweniso muthemba vinthu venivi,+
13 Mwaviyo, kunanga uku kwazamuja nge chimati chakusweka kwaku yimwi,
Nge chimati chitali cho che ndi lumwa likulu ndipu che pafupi kuwa.
Chazamudilizika mwamabuchibuchi, mu kanyengu kamanavi.
14 Chazamusweka nge msuku ukulu,
Chazamuvikitikiya limu mwakuti pazamuŵavi dinga lakujaku
Kuti apaliyengi motu pachipa
Pamwenga kuti akapiyengi maji mo ngateka.”*
15 Pakuti Yehova, Ambuya Fumu Yikulu, Mtuŵa waku Isirayeli, wakamba kuti:
“Asani mwawere kwaku ini ndi kupumuwa, mwazamutaskika;
Mwazamusaniya nthazi chifukwa chakuja mwakufwasa kweniso kundithemba.”+
Kweni mwakhumbanga cha.+
16 Mumalu mwaki, mungukamba kuti: “Awa, tazamukwera pamahachi ndi kuthaŵa!
Mwazamuthaŵa nadi.
“Ndipu tazamukwera pamahachi ngakutchimbiya ukongwa!”+
Mwaviyo, ŵanthu wo azakukuskerani azamutchimbiya ukongwa.+
17 Ŵanthu 1,000 azamumbwambwanthiya chifukwa chakuwofyeka ndi munthu yumoza;+
Mwazamuthaŵa chifukwa chakuwofyeka ndi ŵanthu ankhondi
Mpaka po ŵanthu wo azamujaku pakati pinu azijaliya nge mlongoti pachanya pa phiri,
Nge polu lachiziŵisu pamtunthu.+
18 Kweni Yehova walindizga mwakuzikira kuti wakulongoni wezi,+
Ndipu wazamuyuka kuti wakulongoni lisungu.+
Pakuti Yehova ndi Chiuta waurunji.+
Mbakukondwa ŵanthu wosi wo atimulindizga.*+
19 Asani ŵanthu azija mu Ziyoni, mu Yerusalemu,+ yiwi wazamuliyapu cha.+ Iyu wazakukulongo wezi asani wamupempha kuti wakuwovyi; wazakukumuka asani wavwa ŵaka pemphu laku.+ 20 Chinanga kuti Yehova wazakukupaskani masuzgu kuti ngaje chakurya chinu ndipuso kukandirizgika kuti kuje maji nginu,+ Msambizi waku Mura+ wazakujibisa so cha, ndipu yiwi wazamuwona Msambizi waku Mura ndi masu ngaku. 21 Ndipu makutu ngaku ngazamukuvwa mazu kuvuli kwaku, ngakuti, “Nthowa ndi iyi.+ Yendani mwenumu,” kuti muleki kulandiya kumaryi pamwenga kumazge.+
22 Mwazamufipiska siliva yo wakumatika kuvikozgu vinu vakujoba ndipuso golidi yo wakumatika kuvikozgu vinu vachisulu.*+ Mwazakuvitaya kutali nge kasalu ko munthukazi yo we ku mwezi wavwala ndipu mwazakuvikambiya kuti, “Tiyeni ko!”*+ 23 Iyu wazamupereka vuwa pa mbewu zo mwazamupanda padongu,+ ndipu chiŵandi cho dongu lazakukupaskani chazamuja chinandi kweniso chamampha.*+ Mu zuŵa lenilo, malu ngakuliskaku viŵetu vinu ngazamuja ngasani.+ 24 Ndipu ng’ombi kweniso abulu vo vilima mumunda vazamukurya vakurya vakusazgaku vimani vakuŵaŵa, vo vikuwulusika ndi focholu kweniso chifoloku. 25 Ndipu mu zuŵa lo ŵanthu anandi azamubayikiya, pa nyengu yo tinyumba takuthopoka tazamukuwa, paphiri lelosi litali ndipuso pamtunthu wewosi utali, pazamuja timisinji ndi ngalandi.+ 26 Ndipu ukweru wa mwezi wamphumphu, wazamuja nge ukweru wa lumwi; ukweru wa lumwi wazamusazgikiyaku maulendu 7,+ nge ukweru wa mazuŵa 7, mu zuŵa lo Yehova wazamumanga mtundu waki wakupwetekeka*+ kweniso kupozga chilonda chikulu cho wakuwulanga nachu.+
27 Awonani! Zina laku Yehova lituza kutuliya kutali,
Likore ndi ukali waki kweniso ndi mitambu yakofya.
Milomu yaki yazaza ndi ukali,
Ndipuso lilimi laki le nge motu wakupiriza.+
28 Mzimu* waki we nge msinji wakututuma wo wafika mukhosi,
Kuti usukunyisi mitundu yosi musefa yapharanyiku;
Ndipu mitundu ya ŵanthu yazamumangika vingwi kumilomu yawu,*+ vo vitiŵalandizga.
29 Kweni sumu yinu yazamuja nge sumu yo yimbika usiku,
Pa nyengu yo munozgeke phwandu,*+
Ndipu mitima yinu yazamukondwa nge munthu
Yo watenda ndi fyoliru
Wachiluta kuphiri laku Yehova, ku Jalawi laku Isirayeli.+
30 Yehova wazamuchitiska kuti mazu ngaki ngakukwezeka+ ngavwiki
Ndipu wazamuvumbuwa janja laki+ lichisika mu kotcha kwa ukali waki,+
Ndi mulipu wa motu wakupiriza,+
31 Chifukwa cha mazu ngaku Yehova, charu cha Asiriya chazamuchita mantha;+
Iyu wazakuchipuma ndi nthonga.+
32 Ndipu ulendu wewosi wo wazakumupuma ndi nthonga yaki yakulangiya
Yo Yehova wazamusisiya pa charu cha Asiriya
Kwazamuvwika kuliya kwa ting’oma kweniso mabangu*+
Wachisoska janja laki pakuchita nayu nkhondu.+
Iyu wapanga ndundu ya nkhuni yitali kweniso yisani,
Ndi motu unandi kweniso nkhuni.
Mvuchi waku Yehova, nge msinji wa sulufule,
Wazakumuwotcha.