EKISODO

1 Pa nyengu yo Yakobe, yo wadanika so kuti Isirayeli wangulutiya ku Ijipiti limoza ndi ŵana ŵaki, mwana waki weyosi munthulumi wanguluta ndi a munyumba yaki.+ Mazina nga ŵana aku Yakobe ndi yanga: 2 Rubeni, Simiyoni, Levi ndi Yuda;+ 3 Isakara, Zebuloni ndi Benjamini; 4 Dani ndi Nafutali; Gadi ndi Ashere.+ 5 Ŵanthu wosi a mphapu yaku Yakobe* ŵengapu 70, kweni Yosefi wenga kali ku Ijipiti.+ 6 Pati pajumpha nyengu, Yosefi, abali ŵaki wosi ndipuso mugonezi wosi weniwo, angufwa.+ 7 Sonu Ayisirayeli* angubalana ndipu angwamba kuyandana ukongwa. Yiwu angulutirizga kuyandana ndi kuja anthazi ukongwa mwakuti anguzaza mucharu cho.+

8 Pati pajumpha nyengu, fumu yinyaki yo yamuziŵanga cha Yosefi yingwamba kulamuliya charu cha Ijipiti. 9 Sonu fumu yo, yingukambiya ŵanthu ŵaki kuti: “Awonani! Ayisirayeli mbanandi ukongwa ndipuso mbanthazi kuphara isi.+ 10 Tiyeni tiŵachenjere. Asani tingaleka kuchitapu kanthu, alutirizgengi kuyandana. Ndipu asani kwabuka nkhondu, yiwu akoliyanengi ndi arwani ŵidu ndi kutiyukiya, pavuli paki atuwengemu mucharu chinu.”

11 Mwaviyo, angusankha ŵanthu kuti awoneriyengi Ayisirayeli achigwira ntchitu ya ukapolu.+ Ndipu Ayisirayeli anguzenge Farawo matawuni ngakusungamu vinthu nga Pitomu ndi Ramusesi.+ 12 Kweni asani atiŵasuzga ukongwa, Ayisirayeli ayandananga ukongwa ndipuso alutirizganga kuzaza mucharu cho, mwaviyo ŵanthu a ku Ijipiti anguchita mantha ukongwa chifukwa cha Ayisirayeli.+ 13 Sonu Ayijipiti achichizganga Ayisirayeli kugwira ntchitu yakufyo ya ukapolu.+ 14 Yiwu anguchitiska kuti umoyu wa Ayisirayeli uje wakusuzga ukongwa mwakuŵagwiriska ntchitu yakusuzga yakukanda dongu ndi kuwumba njerwa ndipuso aŵagwiriskanga ntchitu zaukapolu za mtundu wewosi zakumunda. Aŵasuzganga ukongwa mwakuŵagwiriska ntchitu zaukapolu za mtundu wewosi.+

15 Pavuli paki, fumu ya ku Ijipiti yingukambiskana ndi Sifira ndi Puwa, wo ŵenga azamba Achiheberi, 16 ndipu yinguŵakambiya kuti: “Asani mubalisa anthukazi Achiheberi,+ muwonengi mwana yo abala.* Asani abala mwana munthulumi, mumubayengi, kweni asani abala mwana munthukazi, mungamubayanga cha.” 17 Kweni azamba wo awopanga Chiuta wauneneska ndipu achitanga cha vo fumu ya ku Ijipiti yinguŵakambiya. Yiwu aŵabayanga cha ŵana anthulumi.+ 18 Pati pajumpha nyengu, fumu ya ku Ijipiti yingudana azamba wo ndipu yinguŵafumba kuti: “Ntchifukwa wuli mutiŵabaya cha ŵana anthulumi?” 19 Azamba wo angumuka Farawo kuti: “Anthukazi Achiheberi apambana ndi anthukazi a ku Ijipiti. Yiwu mbanthazi ndipu azamba ŵechendazi kuziŵawovya, aja kuti abala kali.”

20 Mwaviyo, Chiuta wangutumbika azamba wo ndipu Ayisirayeli angulutirizga kuyandana ndi kuja anthazi ukongwa. 21 Chifukwa chakuti azamba wo awopanga Chiuta wauneneska, pati pajumpha nyengu iyu wanguŵapaska mabanja. 22 Pakumaliya paki, Farawo wangulamula ŵanthu ŵaki wosi kuti: “Mwana munthulumi weyosi Wachiheberi yo wawaku sonu, mumutayengi mu Msinji wa Nayelu, kweni mwana munthukazi weyosi mumusungengi wamoyu.”+

2 Mu nyengu yeniyi, munthulumi munyaki wa munyumba yaku Levi, wanguto mwana munthukazi waku Levi+ kuja muwolu waki. 2 Munthukazi yo, wangume nthumbu ndipu wangubala mwana munthulumi. Wati wawona kuti mwana yo ngwakutowa, wangumubisa kwa myezi yitatu.+ 3 Munthukazi yo wati wawona kuti wangalutirizga cha kumubisa,+ wanguto basiketi yagumbwa,* wanguyimata ndi phula ndi kuŵikamu mwana yo. Ndipu wanguchiyiŵika mumateti mumphepeti mwa Msinji wa Nayelu. 4 Kweni mzichi wa mwana yo+ wanguma chapataliku kuti wawoni vo vimuchitikiyengi.

5 Sonu mwana munthukazi waku Farawo wanguza ku Msinji wa Nayelu kuzisamba ndipu ateŵeti ŵaki anthukazi ayendanga mumphepeti mwa Msinji wa Nayelu. Iyu wanguwona basiketi mumateti. Nyengu yeniyo, wangutuma kapolu waki msungwana kuti wakayito.+ 6 Wati wayijula wanguwona kuti mwe mwana munthulumi ndipu mwana yo waliyanga. Iyu wangumulenge lisungu ndipu wangukamba kuti: “Uyu ndi mwana wa Aheberi.” 7 Pavuli paki, mzichi wa mwana yo wangukambiya mwana munthukazi waku Farawo kuti: “Kumbi nkhakudaniyeni mlezi wachiheberi kuti wakuleriyeni mwana uyu?” 8 Mwana munthukazi waku Farawo wangumukambiya kuti: “Luta!” Nyengu yeniyo, msungwana yo wanguluta ndipu wanguchidana anyina a mwana yo.+ 9 Pavuli paki, mwana munthukazi waku Farawo wangukambiya munthukazi yo kuti: “To mwana uyu, ukandilere ndipu ndazakukulipira.” Mwaviyo, munthukazi yo wanguto mwana yo ndipu wangumulera. 10 Mwana yo wati wakuwa, munthukazi yo wanguza nayu kwa mwana munthukazi waku Farawo, ndipu wanguja mwana waki.+ Wangumudana zina lakuti Mozesi,* ndipu wangukamba kuti: “Ntchifukwa chakuti ndingumuzuwuwa mumaji.”+

11 Mozesi wati wakuwa,* zuŵa linyaki wanguluta kwa abali ŵaki kuti wakawoni mo asuzgikiyanga+ ndipu wanguwona mubali waki Mheberi, wachipumika ndi Myijipiti. 12 Sonu wangulereska uku ndi uku, ndipu wati wawona kuti kulivi munthu weyosi, wangubaya Myijipiti ndipu wangumubisa mumchenga.+

13 Wati waluta so zuŵa linyaki, wanguwona Aheberi ŵaŵi achipumana. Mwaviyo wangufumba yo wangunanga kuti: “Ntchifukwa wuli upuma munyaku?”+ 14 Munthu yo wanguti: “Ndiyani yo wakukusankha kuti uje mulongozgi widu ndipuso kuti utiyeruzgengi? Kumbi ukhumba kundibaya nge mo ukubayiya Myijipiti yuwa?”+ Sonu Mozesi wanguchita mantha ndipu wangukamba kuti: “Nkhani iyi yaziŵika!”

15 Pavuli paki, Farawo wanguvwa nkhani yo ndipu wakhumbanga kubaya Mozesi, kweni Mozesi wanguthaŵa kwaku Farawo. Iyu wanguluta mucharu cha Midiyani kuti wakajengi kweniko,+ ndipu wati wafika, wanguja pasi pafupi ndi chisimi. 16 Sonu wasembi wa ku Midiyani+ wenga ndi ŵana anthukazi 7, ndipu ŵana wo anguza kuzineŵe maji muvakumwisiyamu viŵetu kuti amwisi mbereri za awusewu. 17 Kweni kunguza aliska ndipu anguŵadikisa nge mo achitiyanga nyengu zosi. Mozesi wati wawona viyo, wangusoka ndipu wanguwovya anthukazi wo kweniso wangumwisa maji viŵetu vawu. 18 Ŵana anthukazi wo ŵati aluta kwa awusewu a Rewuweli,*+ awusewu anguzizwa ndipu angufumba kuti: “Mwaweriyanji liŵi msanawale?” 19 Yiwu angumuka kuti: “Munthu munyaki wa ku Ijipiti+ watitaska kwa aliska ndipu watineŵe maji kweniso watimwese viŵetu vidu.” 20 Rewuweli wangukambiya ŵana ŵaki anthukazi kuti: “We pani munthu mweniyo? Ntchifukwa wuli mwamusiya kweniko? Kamudaneni kuti waziryi nasi chakurya.” 21 Pavuli paki, Mozesi wanguzomera kuja ndi Rewuweli. Ndipu Rewuweli wangupereka mwana waki munthukazi zina laki Zipora+ kwaku Mozesi kuti waje muwolu waki. 22 Pavuli paki, Zipora wangubala mwana munthulumi ndipu Mozesi wangumudana zina lakuti Gerisomu,*+ pakuti wangukamba kuti, “Ndaja mulendu mucharu chaŵeni.”+

23 Pati pajumpha nyengu yitali,* fumu ya ku Ijipiti yingufwa,+ kweni Ayisirayeli angulutirizga kukuta kweniso kudandawula chifukwa cha ukapolu, ndipu yiwu aliriyanga Chiuta wauneneska kuti waŵawovyi.+ 24 Pati pajumpha nyengu, Chiuta wanguvwa kukuta kwawu,+ ndipu wangukumbuka phanganu lo wanguchita ndi Abrahamu, Isaki ndi Yakobe.+ 25 Mwaviyo, Chiuta wangulereska Ayisirayeli ndipu wanguwona masuzgu ngawu.

3 Mozesi wanguja mliska wa mbereri za asibweni* ŵaki a Yeteru,+ wasembi wa ku Midiyani. Zuŵa linyaki Mozesi wachikhweme mbereri kuzambwi* muchipululu, wangufika kuphiri laku Chiuta wauneneska ku Horebu.+ 2 Ndipu mungelu waku Yehova wangumuwoneke pakati pa chivwati cha minga cho chakoliyanga motu.+ Mozesi wachilereseska, wanguwona kuti chivwati cho, chakoliyanga motu kweni chafyanga cha. 3 Mwaviyo, Mozesi wangukamba kuti: “Ndilutengi penipa kuti nkhawoni chakuziziswa chenichi, kuti ndiziŵi chifukwa cho chivwati chileke kufyiya.” 4 Yehova wati wawona kuti Mozesi walazga ku chivwati cho kuti wakachiwoni, wangumudana kutuliya muchivwati cha minga ndipu wangukamba kuti: “Mozesi! Mozesi!” Iyu wangumuka kuti: “Nde panu.” 5 Sonu Chiuta wangumukambiya kuti: “Ungazanga kufupi cha. Zuwa sapatu zaku kumaphazi ngaku chifukwa wama pamalu ngakupaturika.”

6 Chiuta wangulutirizga kukamba kuti: “Ndini Chiuta wa awusu, Chiuta waku Abrahamu,+ Chiuta waku Isaki+ ndipuso Chiuta waku Yakobe.”+ Pavuli paki, Mozesi wangubisa chisku chaki chifukwa wangopa kulereska Chiuta wauneneska. 7 Yehova wangukamba so kuti: “Ndawona nadi masuzgu ngo ŵanthu ŵangu wo ŵe ku Ijipiti akumana nangu ndipu ndavwa kuliya kwawu chifukwa cha ŵanthu wo atiŵagwiriska ntchitu ya ukapolu. Ndiziŵa umampha mo apwetekeke.+ 8 Ndisikiyengi kweniko kuti nkhaŵataski mu manja mwa ŵanthu a ku Ijipiti+ ndipuso ndakuŵatuzgamu mucharu cho ndi kuluta nawu kucharu chamampha kweniso chisani, charu chakwenda mkaka ndi uchi,+ cho ntchigaŵa cha Akanani, Ahiti, Aamori, Aperezi, Ahivi ndi Ayebusi.+ 9 Sonu awona! Ndavwa kuliya kwa ŵanthu ŵangu Ayisirayeli ndipuso ndawona nkhaza zo ŵanthu a ku Ijipiti atiŵachitiya.+ 10 Sonu iza kunu, ndikutumengi kwaku Farawo ndipu wamutuzga ŵanthu ŵangu Ayisirayeli mucharu cha Ijipiti.”+

11 Kweni Mozesi wangukambiya Chiuta wauneneska kuti: “Ndini yani ini kuti ndiluti kwaku Farawo ndi kuchituzga Ayisirayeli mucharu cha Ijipiti?” 12 Chiuta wangumukambiya kuti: “Ndiŵengi nawi,+ ndipu chisimikizu chakuti ini ndini ndakutuma ndi ichi: Asani wazituzga ŵanthu ŵangu mucharu cha Ijipiti, mwaŵanthu yimwi mwazamuteŵete* Chiuta wauneneska paphiri ili.”+

13 Kweni Mozesi wangukambiya Chiuta wauneneska kuti: “Sonu asani ndaluta kwa Ayisirayeli ndipu ndachiŵakambiya kuti, ‘Chiuta wa apapi ŵinu wandituma kwaku yimwi,’ ndipu yiwu achindifumba kuti, ‘Zina laki ndiyani?’+ Nkhaŵamuki kuti wuli?” 14 Sonu Chiuta wangukambiya Mozesi kuti: “Ndazamuja Cho Ndasankha Kuja.”*+ Ndipu Chiuta wangulutirizga kukamba kuti: “Ukakambiyi Ayisirayeli kuti, ‘Ndazamuja, ndiyu wandituma kwaku yimwi.’”+ 15 Pavuli paki, Chiuta wangukambiya so Mozesi kuti:

“Ukakambiyi Ayisirayeli kuti, ‘Yehova Chiuta wa apapi ŵinu, Chiuta waku Abrahamu,+ Chiuta waku Isaki+ ndipuso Chiuta waku Yakobe+ wandituma kwaku yimwi.’ Lenili ndilu zina langu mpaka muyaya,+ ndipu ŵanthu andikumbukengi ndi zina lenili mu migonezi yosi. 16 Sonu luta, ukawunganisi ŵara ŵa Ayisirayeli ndi kuŵakambiya kuti, ‘Yehova Chiuta wa apapi ŵinu, Chiuta waku Abrahamu, Isaki ndi Yakobe wandiwoneke ndipu wandikambiya kuti: “Ndawona vo vitikuchitikiyani+ mucharu cha Ijipiti. 17 Mwaviyo ndikamba kuti, ndazakukutuzganimu mu manja mwa Ayijipiti wo atikusuzgani+ ndipu ndazakukuserezani mucharu cha Akanani, Ahiti, Aamori,+ Aperezi, Ahivi ndi Ayebusi,+ charu chakwenda mkaka ndi uchi.”’+

18 “Yiwu amukuvwa mazu ngaku,+ ndipu yiwi ndi ŵara ŵa Ayisirayeli muziluti kwa fumu ya ku Ijipiti ndipu mukayikambiyi kuti: ‘Yehova Chiuta wa Aheberi+ walongoro nasi. Mwaviyo, chondi tizomerezeni kuti tiyendi ulendu wa mazuŵa ngatatu kuluta kuchipululu, kuti tikapereki sembi kwaku Yehova Chiuta widu.’+ 19 Kweni ini ndiziŵa umampha kuti fumu ya ku Ijipiti yakukuzomerezani cha kuti muluti mpaka po janja lanthazi lachiyichichizgiya.+ 20 Mwaviyo, ndazamutambasuwa janja langu ndi kulanga Ijipiti ndipu ndazamuchita vinthu vakuziziswa mucharu cho. Pavuli paki fumu ya ku Ijipiti yazakukuzomerezani kuluta.+ 21 Ndazamuchitiska kuti musaniyi wezi pa masu pa Ayijipiti ndipu muchituwa mucharu cho, mwazamutuwamu ndi manja ngaŵaka cha.+ 22 Munthukazi weyosi wazipemphi munthukazi yo waja nayu pafupi ndipuso munthukazi yo waja munyumba yaki kuti wazimupaski vinthu vasiliva, vagolidi ndi vakuvwala. Ndipu vinthu venivo, mwazamuvwalika ŵana ŵinu anthulumi ndi ŵana ŵinu anthukazi; ndipu mwazamuto vinthu va ŵanthu a ku Ijipiti.”+

4 Kweni Mozesi wangumuka kuti: “Kumbi ndamuchita wuli asani achindigomezga cha ndipuso achivwiya cha mazu ngangu?+ Pakuti amukamba kuti: ‘Yehova wakukuwoneke cha.’” 2 Pavuli paki, Yehova wangumukambiya kuti: “Ntchinthu wuli cho che mujanja laku?” Iyu wangumuka kuti: “Nthonga.” 3 Chiuta wangukamba kuti: “Yiponyi pasi.” Mozesi wati wayiponya pasi, yingusambuka njoka,+ ndipu wanguyithaŵa. 4 Sonu Yehova wangukambiya Mozesi kuti: “Tambasuwa janja laku ndipu yiko kumuchiya.” Mwaviyo, wangutambasuwa janja laki ndi kuyiko ndipu yingusambuka so nthonga mujanja laki. 5 Pavuli paki, Chiuta wangukamba kuti: “Ukachiti venivi kuti akagomezgi kuti Yehova Chiuta wa apapi ŵawu, Chiuta waku Abrahamu, Chiuta waku Isaki ndipuso Chiuta waku Yakobe,+ wakuwoneke.”+

6 Yehova wangumukambiya so kuti: “Ŵika janja laku mulaya laku pachifuŵa.” Mwaviyo, wanguŵika janja laki mulaya laki pachifuŵa. Wati walituzgamu, janja laki linguchita makhati ndipu lingusambuka lituŵa!+ 7 Vati vaŵa viyo, Chiuta wangukamba kuti: “Weze janja laku mulaya laku pachifuŵa.” Mwaviyo, wanguweze janja mulaya laki. Wati walituzga, linguja so nge mo lenge pakwamba! 8 Chiuta wangukamba kuti: “Asani amuleka kukugomezga pamwenga kutoliyaku kanthu pa chakuziziswa chakwamba, mbwenu amugomezga chakuziziswa chachiŵi.+ 9 Kweniso, chinanga akaleki kugomezga vakuziziswa viŵi venivi ndipuso asani amukana kuvwiya mazu ngaku, ukato maji mu Msinji wa Nayelu ndipu ukangadiri pamalu ngakumira, ndipu maji ngo wamuto mu Msinji wa Nayelu ngamusambuka ndopa pamalu ngakumira.”+

10 Sonu Mozesi wangukambiya Yehova kuti: “Pepani Yehova, ndikuziŵa cha kulongoro kwamba kali ndipuso po mwayambiya kulongoro ndi ini mteŵeti winu, pakuti ndilongoro chizituzitu ndipu lilimi langu ndizitu.”+ 11 Yehova wangumukambiya kuti: “Ndiyani yo wakupanga mulomu wa munthu, pamwenga ndiyani yo wachitiska munthu kuja wambula kulongoro, wambuwu, wakuwona umampha pamwenga wachibulumutiya? Asi ndini, Yehova? 12 Sonu luta, ndamukuŵa nawi uchilongoro* ndipu ndakukulunguchizga vakuti ukakambi.”+ 13 Kweni Mozesi wangukamba kuti: “Pepani Yehova, chondi tumani munthu munyaki yo mungatuma.” 14 Pavuli paki, Yehova wangukwiyiya Mozesi ndipu wangukamba kuti: “Asi mku waku Aroni,+ Mlevi walipu? Ndiziŵa kuti walongoro umampha. Ndipu sonu viyo we munthowa, watuza kuzikumana nawi. Asani wazikuwona, mtima waki wazamukondwa.+ 15 Sonu uzilongoro nayu, uziŵiki mazu mumulomu mwaki+ ndipu ini ndazamukuŵa namwi muchilongoro+ kweniso ndazakukulunguchizgani vakuti mukachiti. 16 Iyu wazamulongoro ndi ŵanthu mumalu mwaku, kweniso wazamuja mulomu waku ndipu yiwi wazamuja nge Chiuta kwaku iyu.*+ 17 Uzipingi nthonga iyi mujanja laku ndipu wazakuyigwiriskiya ntchitu pakuchita vakuziziswa.”+

18 Mwaviyo, Mozesi wanguluta kwa asibweni ŵaki a Yeteru+ ndipu wanguŵakambiya kuti: “Ndikhumba kuwere kwa abali ŵangu wo ŵe ku Ijipiti kuti nkhawoni asani ŵeche amoyu.” Yeteru wangumuka Mozesi kuti: “Luta mu chimangu.” 19 Pavuli paki, Yehova wangukambiya Mozesi ku Midiyani kuti: “Luta, were ku Ijipiti pakuti ŵanthu wosi wo akhumbanga kukubaya* akufwa.”+

20 Pavuli paki, Mozesi wanguto muwolu waki ndi ŵana ŵaki ndipu wanguŵakweza pabulu. Iyu wangwamba ulendu wakuwere ku Ijipiti. Kweniso Mozesi wangupinga nthonga yaku Chiuta wauneneska mujanja laki. 21 Ndipu Yehova wangukambiya Mozesi kuti: “Asani wawere ku Ijipiti, ukachiti vakuziziswa vosi vo ndakuzomereza* kuti ukachiti pa masu paku Farawo.+ Kweni ndazamuzomereza kuti mtima waki unonopi+ ndipu wazamuzomera cha kuti ŵanthu ŵangu aluti.+ 22 Ukakambiyi Farawo kuti: ‘Yehova wakamba kuti: “Isirayeli ndi mwana wangu munthulumi, mwana wangu wakwamba.+ 23 Nditikukambiya kuti: Zomereza mwana wangu munthulumi kuti waluti ndi chilatu chakuti wakanditeŵete. Kweni asani wakana kumuzomereza kuti waluti, ndazamubaya mwana waku munthulumi, mwana waku wakwamba.”’”+

24 Sonu panthowa, pamalu ngakugona, Yehova+ wangukumana nayu ndipu wakhumbanga kumubaya.+ 25 Pakumaliya paki, Zipora+ wanguto mwa wakuthwa ndipu wangudumuwa khungu lakusongu* la mwana waki. Pavuli paki, wanguliponya* pamaphazi ngaki* ndipu wangukamba kuti: “Ntchifukwa chakuti ndimwi mulumu wangu wa ndopa.” 26 Sonu Chiuta wangumuleka mwana yo kuti walutengi. Pa nyengu yo, Zipora wangukamba kuti, “mulumu wangu wa ndopa,” chifukwa cha kudumulika ko.

27 Pavuli paki, Yehova wangukambiya Aroni kuti: “Luta muchipululu kuti ukakumani ndi Mozesi.”+ Mwaviyo, wanguluta ndipu wangukumana nayu paphiri laku Chiuta wauneneska,+ wangumutawuzga ndi kumufyofyontha. 28 Ndipu Mozesi wangukambiya Aroni mazu ngosi ngaku Yehova, yo wangumutuma,+ ndipuso vakuziziswa vosi vo Iyu wangumulamula kuti wakachiti.+ 29 Pavuli paki, Mozesi ndi Aroni anguluta ndipu anguwunganisa ŵara wosi ŵa Ayisirayeli.+ 30 Aroni wanguŵakambiya mazu ngosi ngo Yehova wangukambiya Mozesi ndipu wanguchita vakuziziswa+ pa masu pa ŵanthu wo. 31 Mwaviyo, ŵanthu wo angugomezga.+ Ŵati avwa kuti Yehova wakumbuka Ayisirayeli+ ndipuso kuti wawona masuzgu ngawu,+ angujikama ndi kusindama mpaka visku vawu pasi.

5 Pavuli paki, Mozesi ndi Aroni anguluta kwaku Farawo ndipu angumukambiya kuti: “Yehova Chiuta waku Isirayeli wakamba kuti, ‘Zomereza ŵanthu ŵangu kuti aluti kuchipululu kuchindichitiya phwandu.’” 2 Kweni Farawo wangukamba kuti: “Yehova+ ndiyani kuti ndivwiyi mazu ngaki ndi kuzomereza Ayisirayeli kuti aluti?+ Nditimuziŵa cha Yehova chinanga nkhamanavi, ndipuso ndiŵazomerezengi cha Ayisirayeli kuti aluti.”+ 3 Kweni Mozesi ndi Aroni angukamba kuti: “Chiuta wa Aheberi walongoro nasi. Tikhumba kuti tiyendi ulendu wa mazuŵa ngatatu kuluta kuchipululu, kuti tikapereki sembi kwaku Yehova Chiuta widu.+ Asani tingaleka kuchita viyo, watilangengi ndi matenda pamwenga lipanga.” 4 Fumu ya ku Ijipiti yinguŵamuka kuti: “Ntchifukwa wuli, yiwi Mozesi ndi Aroni mukhumba kuti ŵanthu aleki kugwira ntchitu yawu? Weriyani ku ntchitu yinu!”+ 5 Farawo wangukamba so kuti: “Awonani, ŵanthu yaŵa mbanandi ukongwa mucharu ichi, mbwenu mukhumba kuti aleki kugwira ntchitu yawu!”

6 Pa zuŵa lenilo, Farawo wangulamula akuwonere akapolu ndipuso akapitawu kuti: 7 “Ŵanthu yaŵa mungaŵapaskanga so cha uteka wakuwumbiya njerwa.+ Akajipenjiyengi ŵija uteka. 8 Kweni unandi wa njerwa zo mukhumbika kuŵawumbisa ungasinthanga cha. Mungaŵatuzgiyangaku cha chifukwa anyenya.* Ndichu chifukwa chaki aliya kuti, ‘Tikhumba kuluta, tikhumba kuchipereka sembi kwaku Chiuta widu!’ 9 Agwiriskeni ukongwa ntchitu, ndipu angapumuwanga cha kuti aleki kuvwisiya maboza.”

10 Mwaviyo, akuwonere akapolu+ ndipuso akapitawu anguluta ku ŵanthu wo ndipu anguŵakambiya kuti: “Farawo wakamba kuti, ‘Ndikupaskeningi so cha uteka. 11 Mukajipenjiyengi mwija uteka, kwekosi ko mungachiwusaniya, kweni tituzgiyengeku cha ntchitu yinu chinanga nkhamanavi.’” 12 Pavuli paki, ŵanthu wo angumbininikiya mucharu chosi cha Ijipiti kuchipenja mapesi kuti ndingu ngaje nge uteka. 13 Akuwonere akapolu aŵachichizganga ndipu aŵakambiyanga kuti: “Mutenere kumaliza ntchitu yinu zuŵa lelosi, nge mo mwachitiyanga kali po mwapaskikanga uteka.” 14 Ndipuso akapitawu ŵa Ayisirayeli, wo angusankhika ndi akuwonere akapolu aku Farawo kuti alongozgengi Ayisirayeli, angupumika.+ Ndipu anguŵafumba kuti: “Ntchifukwa wuli mwatondeka kufiska unandi wa njerwa zo mukhumbika kuwumba? Ndipu mwachita venivi zana ndi msanawale.”

15 Mwaviyo, akapitawu ŵa Ayisirayeli anguluta kwaku Farawo ndipu angumudandawuliya kuti: “Ntchifukwa wuli mutiŵachitiya viyo ateŵeti ŵinu? 16 Ateŵeti ŵinu apaskika cha uteka kweni ŵanthu wo mukusankha kuti atiwoneriyengi atitikambiya kuti, ‘Wumbaningi njerwa!’ Ateŵeti ŵinu apumika kweni ŵanthu ŵinu ndiwu mbakunanga.” 17 Kweni Farawo wangukamba kuti: “Munyenya,* munyenya!*+ Ndichu chifukwa chaki mukamba kuti, ‘Tikhumba kuluta, tikhumba kuchipereka sembi kwaku Yehova.’+ 18 Sonu tuwanipu yapa, weriyani ku ntchitu! Mupaskikengi cha uteka, kweni unandi wa njerwa zo mutenere kuwumba usinthengi cha.”

19 Sonu akapitawu ŵa Ayisirayeli anguwona kuti ŵe mu suzgu yikulu chifukwa cha dangu lo linguperekeka lakuti: “Mungaŵatuzgiyangaku cha unandi wa njerwa zo atenere kuwumba chinanga nkhamanavi.” 20 Pavuli paki, angukumana ndi Mozesi kweniso Aroni wo aŵalindizganga kuti akumani nawu achituwa kwaku Farawo. 21 Nyengu yeniyo akapitawu wo, angukambiya Mozesi ndi Aroni kuti: “Yehova wawoni vo mwachita ndi kukuyeruzgani chifukwa mwachitiska kuti Farawo ndi ateŵeti ŵaki atiwoni kuti te aheni* ndipu mwaŵika lipanga mujanja lawu kuti atibayi.”+ 22 Sonu Mozesi wangung’anamukiya kwaku Yehova ndipu wangukamba kuti: “Yehova, ntchifukwa wuli mwaŵasuzga viyo ŵanthu yaŵa? Ntchifukwa wuli mwandituma? 23 Kutuliya pa nyengu yo ndingulutiya kwaku Farawo kuchilongoro mu zina linu,+ iyu watiŵasuzga ukongwa ŵanthu yaŵa+ ndipu yimwi mwaŵataska cha ŵanthu ŵinu.”+

6 Sonu Yehova wangukambiya Mozesi kuti: “Uwonengi vo ndichitiyengi Farawo.+ Janja lanthazi limuchichizgengi kuti waŵazomerezi kuluta, ndipuso janja lanthazi limuchichizgengi kuti waŵadikisi mucharu chaki.”+

2 Pavuli paki, Chiuta wangukambiya Mozesi kuti: “Ini ndini Yehova. 3 Ndawonekiyanga kwaku Abrahamu, Isaki ndi Yakobe nge Chiuta Wanthazizosi,+ kweni ndinguŵaziŵisa cha+ va zina langu lakuti Yehova.+ 4 Ndipuso ndinguchita nawu phanganu kuti ndiŵapaskengi charu cha Kanani, charu cho angujamu nge alendu.+ 5 Sonu ndajivwiya ndija kukuta kwa Ayisirayeli, wo Ayijipiti atiŵagwiriska ntchitu ya ukapolu, ndipu ndikumbuka phanganu langu.+

6 “Mwaviyo, kambiya Ayisirayeli kuti: ‘Ini ndini Yehova, ndikutaskeningi ku ntchitu yakufyo yo Ayijipiti atikugwiriskani kweniso ndikufwatuweningi ku ukapolu+ mu Ijipiti. Ndikutaskeningi ndi janja lakutambasuka* kweniso ndi vyeruzgu vikulu.+ 7 Mwazamuja ŵanthu ŵangu ndipu ini ndazamuja Chiuta winu.+ Mwazamuziŵa kuti ini ndini Yehova Chiuta winu, yo watikufwatuwani ku ntchitu yakufyo yo atikugwiriskani mu Ijipiti. 8 Ndipu ndazakukutoliyani kucharu cho ndikulapizga* kuti ndichiperekengi kwaku Abrahamu, Isaki ndi Yakobe. Ndazakukupaskani kuti chije chinu.+ Ini ndini Yehova.’”+

9 Pavuli paki, Mozesi wangukambiya Ayisirayeli uthenga wenuwu, kweni yiwu angumuvwiya cha chifukwa chakuti angugongowa ndipuso chifukwa cha ntchitu yakufyo ya ukapolu yo agwiranga.+

10 Pavuli paki, Yehova wangulongoro ndi Mozesi ndipu wangumukambiya kuti: 11 “Luta kwaku Farawo, fumu ya ku Ijipiti ndipu ukamukambiyi kuti wazomerezi Ayisirayeli kuti atuwemu mucharu chaki.” 12 Kweni Mozesi wangumuka Yehova kuti: “Ayisirayeli andivwiya cha,+ sonu Farawo wangachindivwiya wuli pakuti ndilongoro mwakusuzgikiya?”*+ 13 Kweni Yehova wangukambiya so Mozesi ndi Aroni marangu ngakuti wakakambiyi Ayisirayeli ndipuso Farawo, fumu ya ku Ijipiti, kuti Ayisirayeli atuwi mucharu cha Ijipiti.

14 Mazina nga alongozgi a nyumba za awusewu ndi yanga: Ŵana anthulumi aku Rubeni, mwana wakwamba waku Isirayeli,+ ŵenga Hanoki, Palu, Hezironi ndi Karimi.+ Yanga ndi mabanja ngo ngangutuliya mwaku Rubeni.

15 Ŵana anthulumi aku Simiyoni, ŵenga Yemuweli, Yamini, Ohadi, Yakini, Zohari ndi Shawuli, yo Simiyoni wangubaliya pa munthukazi wa ku Kanani.+ Yanga ndi mabanja ngo ngangutuliya mwaku Simiyoni.

16 Mazina nga ŵana anthulumi aku Levi+ mwakukoliyana ndi mabanja ngawu ndi yanga: Gerisoni, Kohati ndi Merari.+ Levi wanguja ndi umoyu vyaka 137.

17 Ŵana anthulumi aku Gerisoni mwakukoliyana ndi mabanja ngawu, ŵenga Libini ndi Shimeyi.+

18 Ŵana anthulumi aku Kohati ŵenga Amuramu, Iziha, Heburoni ndi Uziyeli.+ Kohati wanguja ndi umoyu vyaka 133.

19 Ŵana anthulumi aku Merari ŵenga Mahili ndi Mushi.

Yanga ngenga mabanja nga Alevi mwakukoliyana ndi mabanja ngawu.+

20 Amuramu wanguto Yokibedi, mzichi wa awisi kuja muwolu waki.+ Yokibedi wangumubaliya Aroni ndi Mozesi.+ Ndipu Amuramu wanguja ndi umoyu vyaka 137.

21 Ŵana anthulumi aku Iziha ŵenga Kora,+ Nefegi ndi Zikiri.

22 Ŵana anthulumi aku Uziyeli ŵenga Mishayele, Elizafani+ ndi Sitiri.

23 Sonu Aroni wanguto Elisheba, mwana munthukazi waku Aminadabu, mzichi waku Nashoni+ kuja muwolu waki. Elisheba wangumubaliya Nadabu, Abihu, Eliyazara ndi Itamara.+

24 Ŵana anthulumi aku Kora ŵenga Asiri, Elikana ndi Abiyasafu.+ Yanga ngenga mabanja ngakutuliya mwaku Kora.+

25 Eliyazara,+ mwana munthulumi waku Aroni wanguto yumoza mwa ŵana anthukazi aku Putiyeli, kuja muwolu waki. Ndipu wangumubaliya Finihasi.+

Yaŵa mbalongozgi a nyumba za awusewu za Alevi, mwakukoliyana ndi mabanja ngawu.+

26 Ŵanthu yaŵa, Aroni kweniso Mozesi, ndiwu Yehova wanguŵakambiya kuti: “Tuzgani Ayisirayeli mucharu cha Ijipiti, mwakukoliyana ndi magulu ngawu.”+ 27 Yiwu ŵenaŵa, Mozesi ndi Aroni+ ndiwu angulongoro ndi Farawo, fumu ya ku Ijipiti, kuti Ayisirayeli atuwi mucharu cha Ijipiti.

28 Pa zuŵa lo Yehova wangulongoro ndi Mozesi mucharu cha Ijipiti, 29 Yehova wangukambiya Mozesi kuti: “Ini ndini Yehova. Kakambiyi Farawo, fumu ya ku Ijipiti vinthu vosi vo nditikukambiya.” 30 Pavuli paki, Mozesi wangukambiya Yehova kuti: “Awonani! Ndilongoro mwakusuzgikiya,* sonu Farawo wangachindivwiya wuli?”+

7 Pavuli paki, Yehova wangukambiya Mozesi kuti: “Awona, ndakuŵika kuti uje nge Chiuta* kwaku Farawo, ndipu mku waku Aroni wajengi nge mchimi kwaku yiwi.+ 2 Yiwi wamukambiya mku waku Aroni vosi vo ndikulamulengi, ndipu iyu ndiyu wamukambiya Farawo. Mwaviyo, Farawo wamuzomereza kuti Ayisirayeli atuwemu mucharu chaki. 3 Kweni ini ndazamuzomereza kuti mtima waku Farawo unonopi,+ ndipu ndazamuchita visimikizu ndipuso vakuziziswa vinandi mucharu cha Ijipiti.+ 4 Kweni Farawo wazakukuvwiyani cha, ini ndazamuŵika janja langu pacharu cha Ijipiti ndi kutuzga magulu ngangu,* ŵanthu ŵangu, Ayisirayeli, mucharu cha Ijipiti ndi vyeruzgu vikulu.+ 5 Ndipu asani ndazitambasuliya janja langu pacharu cha Ijipiti ndi kutuzga Ayisirayeli pakati pawu, Ayijipiti azamuziŵa kuti ini ndini Yehova.”+ 6 Mozesi ndi Aroni anguchita vo Yehova wanguŵalamula; anguchita nadi viyo. 7 Mozesi wenga ndi vyaka 80 ndipu Aroni wenga ndi vyaka 83, pa nyengu yo angulongoro ndi Farawo.+

8 Sonu Yehova wangukambiya Mozesi ndi Aroni kuti: 9 “Asani Farawo wachikukambiyani kuti, ‘Chitani chakuziziswa,’ yiwi ukakambiyi Aroni kuti, ‘To nthonga yaku ndipu yiponyi pasi pa masu paku Farawo.’ Nthonga yo yamusambuka njoka yikulu.”+ 10 Mwaviyo, Mozesi ndi Aroni anguluta kwaku Farawo, ndipu anguchita nge mo Yehova wanguŵalamuliya. Aroni wanguponya nthonga yaki pasi pa masu paku Farawo ndi ateŵeti ŵaki, ndipu yingusambuka njoka yikulu. 11 Kweni Farawo wangudana ŵanthu azeru ndi akuwombeza, ndipu asembi akuchita masenga a ku Ijipiti ŵenaŵa+ nawu so anguchita venivi ndi masenga ngawu.+ 12 Wosi anguponya pasi nthonga zawu ndipu zingusambuka njoka zikuluzikulu kweni nthonga yaku Aroni yingumeza nthonga zawu. 13 Chinanga kuti venga viyo, mtima waku Farawo ungunonopa+ ndipu wanguŵavwiya cha, nge mo Yehova wangukambiya.

14 Pavuli paki, Yehova wangukambiya Mozesi kuti: “Mtima waku Farawo ngunononu.+ Iyu wakana kuzomereza Ayisirayeli kuti aluti. 15 Ndi mlenji uziluti kwaku Farawo. Awona! Iyu wazamuluta kumsinji! Yiwi uzimi mumphepeti mwa Msinji wa Nayelu kuti ukakumani nayu. Uzipingi nthonga mujanja laku, yo yingusambuka njoka.+ 16 Ukamukambiyi kuti, ‘Yehova Chiuta wa Aheberi wandituma kwaku yiwi,+ ndipu wakamba kuti: “Zomereza ŵanthu ŵangu kuti aluti kuchipululu kuchinditeŵete,” kweni yiwi uvwiya cha mpaka sonu. 17 Yehova wakamba kuti: “Uziŵengi kuti ini ndini Yehova+ chifukwa cha vo ndichitengi. Ndipumengi maji nga mu Msinji wa Nayelu ndi nthonga yangu, ndipu ngasambukengi ndopa. 18 Somba za mu Msinji wa Nayelu zifwengi, Msinji wa Nayelu ununkhengi ndipu Ayijipiti atondekengi kumwa maji nga mu Msinji wa Nayelu.”’”

19 Pavuli paki, Yehova wangukambiya Mozesi kuti: “Kambiya Aroni kuti, ‘To nthonga yaku ndipu tambasuliya janja laku pamaji nga mucharu cha Ijipiti,+ pamisinji yaki, pamigelu yaki,* pamathaŵali ngaki+ ndipuso paviziŵi vaki, kuti ngasambuki ndopa.’ Mucharu chosi cha Ijipiti mwazamuja ndopa, chinanga ndi muviyaŵi vachimiti kweniso vamya.” 20 Nyengu yeniyo, Mozesi ndi Aroni anguchita nge mo Yehova wanguŵalamuliya. Aroni wangusoska nthonga yaki ndi kupuma maji nga mu Msinji wa Nayelu pa masu paku Farawo ndi ateŵeti ŵaki ndipu maji ngosi nga mu Msinji wa Nayelu ngangusambuka ndopa.+ 21 Somba za mu Msinji wa Nayelu zingufwa,+ msinji wo ungwamba kununkha, Ayijipiti atondekanga kumwa maji nga mu Msinji wa Nayelu+ ndipu mucharu chosi cha Ijipiti mwenga ndopa pe.

22 Kweni asembi akuchita masenga a ku Ijipiti nawu anguchita venivi ndi masenga ngawu.+ Mwaviyo, mtima waku Farawo ungulutirizga kuja wakunonopa ndipu wanguŵavwiya cha, nge mo Yehova wangukambiya.+ 23 Pavuli paki, Farawo wanguwere kunyumba kwaki ndipu wanguchitoliyaku kanthu cha chakuziziswa ichi. 24 Sonu Ayijipiti wosi akumbanga mumphepeti mwa Msinji wa Nayelu kuti asaniyi maji ngakumwa, chifukwa chakuti atondekanga kumwa maji nga mu Msinji wa Nayelu. 25 Ndipu kutuliya po Yehova wangusambusiya maji nga mu Msinji wa Nayelu kuja ndopa, pangujumpha mazuŵa 7.

8 Pavuli paki, Yehova wangukambiya Mozesi kuti: “Luta kwaku Farawo ndipu ukamukambiyi kuti, ‘Yehova wakamba kuti: “Zomereza ŵanthu ŵangu kuti aluti kuchinditeŵete.+ 2 Asani ulutirizga kukana kuŵazomereza, ndilangengi charu chaku chosi ndi mulili wa amuchuwa.+ 3 Mu Msinji wa Nayelu mwazamuzaza amuchuwa ndipu azamutuwa mumsinji ndi kuza munyumba yaku, muchipinda chaku, pabedi laku, munyumba za ateŵeti ŵaku ndipuso pa ŵanthu ŵaku wosi, mumauvunu ngaku kweniso muviyaŵi vaku vakukasiyamu* fulawu.+ 4 Amuchuwa azamukuza kwaku yiwi, ku ŵanthu ŵaku ndipuso kwa ateŵeti ŵaku wosi.”’”

5 Pavuli paki, Yehova wangukambiya Mozesi kuti: “Kambiya Aroni kuti, ‘Tambasuliya janja laku ndi nthonga yaku pamisinji, pamigelu ya Msinji wa Nayelu ndipuso pamathaŵali, ndipu uchitiski kuti amuchuwa azi mucharu cha Ijipiti.’” 6 Mwaviyo, Aroni wangutambasuliya janja laki pamaji nga mucharu cha Ijipiti, amuchuwa angwamba kutuwa ndipu anguzaza mucharu cho. 7 Kweni asembi akuchita masenga nawu so anguchita venivi ndi masenga ngawu, ndipu anguchitiska kuti amuchuwa azi mucharu cha Ijipiti.+ 8 Pavuli paki, Farawo wangudana Mozesi ndi Aroni ndipu wanguŵakambiya kuti: “Katiŵeyere kwaku Yehova kuti watuzgeku amuchuwa kwaku ini ndi ku ŵanthu ŵangu,+ pakuti ndikhumba kuzomereza Ayisirayeli kuti aluti kuchipereka sembi kwaku Yehova.” 9 Sonu Mozesi wangukambiya Farawo kuti: “Mundikambiyi ndimwi nyengu yakuti nkhaŵeyere Chiuta kuti watuzgeku amuchuwa kwaku yimwi, kwa ateŵeti ŵinu, ku ŵanthu ŵinu kweniso munyumba zinu. Kweni azamuja mu Msinji wa Nayelu pe.” 10 Farawo wangumuka kuti: “Mawa.” Mwaviyo, Mozesi wangukamba kuti: “Vazamuchitika mwakukoliyana ndi mazu nginu kuti muziziŵi kuti palivi yo wayanana ndi Yehova, Chiuta widu.+ 11 Amuchuwa azamutuwaku kwaku yimwi, kunyumba zinu, kwa ateŵeti ŵinu ndi ku ŵanthu ŵinu. Kweni azamuja mu Msinji wa Nayelu pe.”+

12 Sonu Mozesi ndi Aroni angutuwaku kwaku Farawo, ndipu Mozesi wanguluta kuchiŵeyere Yehova kuti watuzgeku amuchuwa wo wanguchitiska kuti azi kwaku Farawo.+ 13 Ndipu Yehova wanguchita mwakukoliyana ndi vo Mozesi wangupempha, ndipu amuchuwa angwamba kufwa munyumba, mumabalaza ndi muminda. 14 Aŵawunjikanga mundundu zambula kuŵerengeka, ndipu charu cha Ijipiti chingwamba kununkha. 15 Farawo wati wawona kuti amuchuwa wo amala, wangunonopesa mtima waki+ ndipu wangukana kuvwiya Mozesi ndi Aroni, nge mo Yehova wangukambiya.

16 Sonu Yehova wangukambiya Mozesi kuti: “Kambiya Aroni kuti, ‘Tambasuwa nthonga yaku ndi kupuma fuvu la pacharu chapasi, ndipu lisambukengi nyezi zakuluma mucharu chosi cha Ijipiti.’” 17 Yiwu anguchita nadi venivi. Aroni wangutambasuwa janja laki kweniso nthonga yaki ndi kupuma fuvu la pacharu chapasi, ndipu nyezi zakuluma zinguwumbiliya ŵanthu ndipuso nyama. Fuvu losi lapacharu chapasi lingusambuka nyezi zakuluma mucharu chosi cha Ijipiti.+ 18 Asembi akuchita masenga nawu anguyesa kuchita venivi ndi masenga ngawu kuti apangi nyezi zakuluma,+ kweni angutondeka. Ndipu nyezi zakuluma zingulutirizga kuwumbiliya ŵanthu ndi nyama. 19 Sonu asembi akuchita masenga angukambiya Farawo kuti: “Ntchikumbu chaku Chiuta!”+ Kweni mtima waku Farawo ungunonopa mbwenu, ndipu wangukana kuvwiya Mozesi ndi Aroni, nge mo Yehova wangukambiya.

20 Pavuli paki, Yehova wangukambiya Mozesi kuti: “Uziyuki ndi mlenjilenji ndipu ukami pa masu paku Farawo. Awona! Iyu wazamuluta kumsinji! Ndipu ukamukambiyi kuti, ‘Yehova wakamba kuti: “Zomereza ŵanthu ŵangu kuti aluti kuchinditeŵete. 21 Kweni asani ulekengi kuzomereza ŵanthu ŵangu kuti aluti, nditumizengi viphanga kwaku yiwi, kwa ateŵeti ŵaku, ku ŵanthu ŵaku ndipuso munyumba zinu, ndipu munyumba za Ayijipiti muzazengi viphanga. Ndipuso vazamuzaza peposi po ŵanthu a ku Ijipiti akanda. 22 Pa zuŵa lo, ndazamupatuwa charu cha Gosheni ko kuja ŵanthu ŵangu. Viphanga vazamusanirikaku cha kwenuku,+ ndipu wazamuziŵa kuti ini Yehova, nde munu mucharu.+ 23 Ndipu ndazamuŵika mphaka pakati pa ŵanthu ŵangu ndi ŵanthu ŵaku. Chisimikizu chenichi chichitikengi mawa.”’”

24 Yehova wanguchita nadi venivi, ndipu viphanga vinandi vingwamba kusere munyumba yaku Farawo ndi munyumba za ateŵeti ŵaki, kweniso venga mucharu chosi cha Ijipiti.+ Charu cho chingunangika ndi viphanga.+ 25 Pakumaliya, Farawo wangudana Mozesi ndi Aroni ndipu wangukamba kuti: “Lutani, kaperekeni sembi kwaku Chiuta winu mucharu chenichinu.” 26 Kweni Mozesi wangukamba kuti: “Mphakwenere cha kuchita viyo, chifukwa sembi zo tiperekengi kwaku Yehova Chiuta widu, mbukazuzi kwa Ayijipiti.+ Asani Ayijipiti atiwonengi kuti tipereka sembi zo mbukazuzi kwaku yiwu, kumbi atiponyengi ndi mya cha? 27 Tiyendengi ulendu wa mazuŵa ngatatu kuluta kuchipululu, ndipu kweniko tamupereka sembi kwaku Yehova Chiuta widu, nge mo watikambiya.”+

28 Sonu Farawo wangukamba kuti: “Ndikuzomerezeningi kuti muluti kuchipereka sembi kwaku Yehova Chiuta winu muchipululu. Kweni mungalutanga kutali cha. Ndiŵeyeriyeni kwaku Chiuta winu.”+ 29 Pavuli paki, Mozesi wangukamba kuti: “Sonu ndituwaku kwaku yiwi, ndiluta kuti nkhaŵeyere kwaku Yehova, ndipu mawa viphanga vituwengeku kwaku Farawo, kwa ateŵeti ŵaki ndipuso ku ŵanthu ŵaki. Kweni Farawo waleki kutiseŵelesa* mwakukana kuzomereza Ayisirayeli kuti aluti kuchipereka sembi kwaku Yehova.”+ 30 Sonu Mozesi wangutuwaku kwaku Farawo ndipu wanguchiŵeyere kwaku Yehova.+ 31 Mwaviyo, Yehova wanguchita mwakukoliyana ndi mazu ngaku Mozesi ndipu viphanga vingutuwaku kwaku Farawo, kwa ateŵeti ŵaki ndipuso ku ŵanthu ŵaki. Palivi chiphanga cho chingujaku. 32 Kweni Farawo wangunonopesa so mtima waki ndipu wanguzomereza cha kuti Ayisirayeli aluti.

9 Sonu Yehova wangukambiya Mozesi kuti: “Luta kwaku Farawo ndipu ukamukambiyi kuti, ‘Yehova Chiuta wa Aheberi wakamba kuti: “Zomereza ŵanthu ŵangu kuti aluti kuchinditeŵete.+ 2 Kweni asani ukanengi kuŵazomereza ndipuso ulutirizgengi kuŵakole pasi, 3 janja+ laku Yehova liŵengi pa viŵetu vaku. Mulili wakofya+ uwiyengi mahachi, abulu, ngamila, ng’ombi ndi mbereri. 4 Yehova wazamuŵika mphaka pakati pa viŵetu va Ayisirayeli ndi viŵetu va Ayijipiti, ndipu palivi chiŵetu cha Ayisirayeli cho chazamukufwa.”’”+ 5 Kweniso Yehova waŵika nyengu, ndipu wakamba kuti: “Ini Yehova ndazamuchita venivi mucharu ichi mawa.”

6 Yehova wanguchita venivi zuŵa lamawa laki, ndipu viŵetu vosi va Ayijipiti vingwamba kufwa+ kweni viŵetu va Ayisirayeli vafwanga cha. 7 Farawo wati wafufuza, wangusaniya kuti viŵetu va Ayisirayeli vingufwa cha. Chinanga kuti venga viyo, mtima waku Farawo ungulutirizga kunonopa ndipu wangukana kuti Ayisirayeli aluti.+

8 Pavuli paki, Yehova wangukambiya Mozesi ndi Aroni kuti: “Zazani manja nginu ndi mwayi wa mu uvunu ndipu Mozesi wawutchupusiyi muchanya pa masu paku Farawo. 9 Ndipu mwayi wo, usambukengi fuvu mucharu chosi cha Ijipiti. Fuvu lo, lichitiskengi kuti mucharu chosi cha Ijipiti, ŵanthu ndipuso nyama atupi vitufya vo vazamutulukanga.”

10 Mwaviyo anguto mwayi wa mu uvunu ndipu anguma pa masu paku Farawo. Mozesi wangutchupusiya mwayi wo muchanya. Mwayi wo, unguyambisa vitufya pa ŵanthu ndi nyama ndipu vingutuluka. 11 Asembi akuchita masenga angutondeka kuma pa masu paku Mozesi chifukwa cha vitufya vo, pakuti asembi akuchita masenga ndipuso ŵanthu wosi a ku Ijipiti angutupa vitufya.+ 12 Kweni Yehova wanguzomereza kuti mtima waku Farawo unonopi, ndipu wangumuvwiya cha Mozesi ndi Aroni, nge mo Yehova wangukambiya Mozesi.+

13 Pavuli paki, Yehova wangukambiya Mozesi kuti: “Yuka ndi mlenjilenji uluti kuchikumana ndi Farawo, ndipu ukamukambiyi kuti, ‘Yehova Chiuta wa Aheberi wakamba kuti: “Zomereza ŵanthu ŵangu kuti aluti kuchinditeŵete. 14 Pakuti sonu nditumizengi milili yangu yosi kwaku yiwi, kwa ateŵeti ŵaku ndi ŵanthu ŵaku kuti uziŵi kuti palivi wakuyanana ndi ini pacharu chosi chapasi.+ 15 Pakuti kufika sonu panu mphanyi ndatambasuwa kali janja langu ndi kulanga yiwi kweniso ŵanthu ŵaku ndi mulili wakofya. Ndipuso mphanyi yiwi watuzgikiyapu limu pacharu chapasi. 16 Kweni ndakusunga wamoyu pa chifukwa ichi: kuti ndikulongo nthazi zangu ndipuso kuti zina langu lipharazgiki pacharu chosi chapasi.+ 17 Kumbi weche kujikuzga pa ŵanthu ŵangu mwakukana kuŵazomereza kuti akengi? 18 Sonu mawa pa nyengu nge yeniyi ndiwisengi vuwa yikulu ya matalala, yo yechendawepu mucharu cha Ijipiti kutuliya po chikwambiya mpaka sonu. 19 Mwaviyo, tuma ateŵeti ŵaku kuti azi ndi viŵetu vaku vosi ndipuso vinthu vaku vosi kumalu ngakuvikilirika. Munthu weyosi yo wazamusanirika kuti we munyumba cha ndipuso nyama yeyosi yo yazamusanirika kuti ye kubwalu, vuwa ya matalala yazakuŵawiya ndipu azamukufwa.”’”

20 Munthu weyosi pakati pa ateŵeti aku Farawo yo wanguvwiya mazu ngaku Yehova, wanguza mwaliŵi ndi ateŵeti ŵaki kweniso viŵetu vaki munyumba, 21 kweni munthu yo wangukana kuvwiya mazu ngaku Yehova wanguleka ateŵeti ŵaki kweniso viŵetu vaki kudondu.

22 Sonu Yehova wangukambiya Mozesi kuti: “Tambasuliya janja laku kuchanya, kuti matalala ngawi mucharu chosi cha Ijipiti,+ pa munthu, pa nyama ndi pa vakume vosi mucharu cha Ijipiti.”+ 23 Sonu Mozesi wangutambasuliya nthonga yaki kuchanya, ndipu Yehova wangutumiza malimphezi ndi matalala, ndipu motu* unguwa pacharu chapasi. Yehova wangulutirizga kuwisa vuwa ya matalala mucharu cha Ijipiti. 24 Kunguwa matalala ndipu mumatalala ngo mwang’animanga motu. Yenga vuwa yakofya ukongwa ndipu pengavi vuwa yo yinguwapu yakuyanana ndi yeniyi mucharu cha Ijipiti, kutuliya po chikwambiya.+ 25 Matalala ngo, ngangusakaza vinthu vosi mucharu cha Ijipiti kwambiya ŵanthu mpaka nyama. Ndipu ngangusakaza vakume vosi kweniso ngangunanga vimiti vosi.+ 26 Ku Gosheni pe, ko kwenga Ayisirayeli ndiku kunguleka kuwa matalala.+

27 Mwaviyo, Farawo wangudana Mozesi ndi Aroni ndipu wanguŵakambiya kuti: “Yapa sonu ndabuda. Yehova ndi murunji ndipu ini ndi ŵanthu ŵangu tananga. 28 Kaŵeyere kwaku Yehova kuti watuzgepu malimphezi ndi matalala ngaki. Pavuli paki ndizomerezengi kuti muluti ndipu mujengi so kunu cha.” 29 Sonu Mozesi wangumukambiya kuti: “Asani ndatuwa ŵaka mutawuni yinu, nditambasuwengi manja ngangu pa masu paku Yehova. Malimphezi ngalekengi ndipu matalala ngalutirizgengi so cha, kuti muziŵi kuti charu chapasi ntchaku Yehova.+ 30 Kweni ndiziŵa kuti chinanga vingaŵa viyo, yimwi ndi ateŵeti ŵinu mumuwopengi cha Yehova Chiuta.”

31 Sonu fulakisi* ndi balire vingunangika, chifukwa balire wenga pafupi kucha ndipu fulakisi wenga ndi maluŵa. 32 Kweni tirigu ndi sipeloti* vingunangika cha chifukwa vasweranga kucha. 33 Sonu Mozesi wangutuwaku kwaku Farawo mutawuni yo. Wangutambasuwa manja ngaki pa masu paku Yehova, malimphezi ndi matalala vinguleka ndipu vuwa yinguleka kuwa pacharu chapasi.+ 34 Farawo wati wawona kuti vuwa, matalala ndi malimphezi valeka, wangubuda so ndipu wangunonopesa mtima waki,+ iyu kweniso ateŵeti ŵaki. 35 Ndipu Farawo wangulutirizga kunonopesa mtima waki ndipu wanguzomereza cha kuti Ayisirayeli aluti, nge mo Yehova wangukambiya kuporote mwaku Mozesi.+

10 Pavuli paki, Yehova wangukambiya Mozesi kuti: “Luta kwaku Farawo pakuti ndazomereza mtima waki ndipuso mitima ya ateŵeti ŵaki kunonopa+ kuti ndilongo vakuziziswa vangu pa masu paki,+ 2 kweniso kuti uzikambiyi ŵana ŵaku ndi azuku ŵaku mo ndingulangiya ŵanthu a ku Ijipiti ndipuso vakuziziswa vo ndinguchita pakati pawu.+ Ndipu mwazamuziŵa kuti ini ndini Yehova.”

3 Mwaviyo, Mozesi ndi Aroni anguluta kwaku Farawo ndipu angumukambiya kuti: “Yehova Chiuta wa Aheberi wakamba kuti, ‘Kumbi ulutirizgengi kukana kujithereska kwaku ini mpaka zuŵanji?+ Zomereza ŵanthu ŵangu kuti aluti kuchinditeŵete. 4 Pakuti asani ulutirizga kukana kuzomereza ŵanthu ŵangu kuti aluti, mawa nditumizengi azombi mucharu chaku. 5 Azombi wo, azamubulumutizga charu chosi ndipu ŵanthu azamutondeka kuwona pasi. Azamukurya vinthu vosi vo vingukujaliyaniku, vo vinguleka kunangika ndi matalala, ndipu azamukurya vimiti vosi vo vime.+ 6 Azamuzaza munyumba zaku, munyumba za ateŵeti ŵaku wosi ndipuso munyumba za ŵanthu wosi a ku Ijipiti. Azamuja azombi akuti awusemwi ndipuso ambuyamwi akuŵawonapu cha kutuliya pa nyengu yo akujaliya mucharu ichi mpaka msanawale.’”+ Wati wakamba venivi, wangutuwaku kwaku Farawo.

7 Pavuli paki, ateŵeti aku Farawo angumukambiya kuti: “Kumbi munthu uyu walutirizgengi kutisuzga* mpaka zuŵanji? Zomerezani ŵanthu yaŵa kuti aluti kuchiteŵete Yehova Chiuta wawu. Kumbi muwona cha kuti charu cha Ijipiti chanangika?” 8 Sonu Mozesi ndi Aroni anguŵatole so kwaku Farawo ndipu wanguŵakambiya kuti: “Lutani, kateŵetiyeni Yehova Chiuta winu. Kweni kumbi mbayani ndi ayani wo alutengi?” 9 Mozesi wangumuka kuti: “Tilutengi ndi anyamata kweniso asungwana ŵidu, makhongwi ngidu, ŵana ŵidu anthulumi, ŵana ŵidu anthukazi, mbereri zidu ndi ng’ombi zidu,+ chifukwa tamuchitiya phwandu Yehova.”+ 10 Farawo wanguŵakambiya kuti: “Asani ndikuzomerezeningi kuluta ndi ŵana ŵinu, mbwenu Yehova we namwi nadi!+ Vakuziŵikiya limu kuti mukhumba kuchita chinthu chiheni. 11 Ndingachita cha venivo! Anthulumi pe ndiwu alutengi kuchiteŵete Yehova, pakuti ndivu mungupempha.” Wati wakamba viyo, anguŵadikisa pa masu paku Farawo.

12 Sonu Yehova wangukambiya Mozesi kuti: “Tambasuliya janja laku pacharu cha Ijipiti, kuti azombi azi pacharu cha Ijipiti ndi kurya vakume vosi va mucharu cho, vakume vosi vo vinguleka kunangika ndi matalala.” 13 Nyengu yeniyo, Mozesi wangutambasuliya nthonga yaki pacharu cha Ijipiti ndipu Yehova wanguchitiska kuti mphepu yakutuliya kuvuma* yiputi pacharu cho msana wosi ndipuso usiku wosi. Kwati kwacha, mphepu yakutuliya kuvuma* yo, yinguza ndi azombi. 14 Ndipu azombi anguza mucharu chosi cha Ijipiti ndipu angubota muchigaŵa chosi cha Ijipiti.+ Azombi wo ŵenga anandi ukongwa+ ndipu ŵenga akuti ŵechendawepu ndipu azamuwapu so cha azombi anandi viyo. 15 Azombi wo, angubulumutizga charu chosi, ndipu charu chinguchita mdima, angurya vakume vosi va mucharu cho kweniso vipasu vosi va muvimiti vo vinguleka kunangika ndi matalala. Mucharu chosi cha Ijipiti mwengavi kanthu kakubiriŵira ko kangujaku muvimiti pamwenga muvakume.

16 Mwaviyo, Farawo wangudana Mozesi ndi Aroni mwaliŵiliŵi ndipu wangukamba kuti: “Ndabudiya Yehova Chiuta winu ndipuso yimwi. 17 Chondi ndigowokiyeni ubudi wangu ulendu wunu pe, ndipu ŵeyeriyani kwaku Yehova Chiuta winu kuti watuzgeku kwaku ini mulili wakofya uwu.” 18 Mwaviyo, iyu* wangutuwaku kwaku Farawo ndipu wanguchiŵeyere kwaku Yehova.+ 19 Pavuli paki, Yehova wangusintha kaputiru ka mphepu, ndipu yinguja mphepu yikulu ukongwa yakutuliya kuzambwi.* Mphepu yeniyi yingupinga azombi wo ndi kuŵaputisiya mu Nyanja Yiyera. Pengavi chinanga ndi zombi yumoza yo wangujaliya muchigaŵa chosi cha charu cha Ijipiti. 20 Kweni Yehova wanguzomereza kuti mtima waku Farawo unonopi,+ ndipu Farawo wanguzomereza cha kuti Ayisirayeli aluti.

21 Pavuli paki, Yehova wangukambiya Mozesi kuti: “Tambasuliya janja laku kuchanya kuti mucharu cha Ijipiti muŵi mdima, mdima ukulu ukongwa wakuti bii.” 22 Nyengu yeniyo, Mozesi wangutambasuliya janja laki kuchanya, ndipu kwa mazuŵa ngatatu mucharu chosi cha Ijipiti mwenga mdima ukulu ukongwa.+ 23 Ayijipiti awonananga cha ndipu pengavi munthu yo wangutuwapu po wenga kwa mazuŵa ngatatu. Kweni kuchigaŵa cho kwajanga Ayisirayeli wosi kwenga ukweru.+ 24 Pavuli paki, Farawo wangudana Mozesi ndipu wangumukambiya kuti: “Lutani, kateŵetiyeni Yehova.+ Kunu kujengi mbereri ndi ng’ombi zinu pe. Ŵana ŵinu nawu angaluta namwi.” 25 Kweni Mozesi wangukamba kuti: “Ndipuso mutipaskengi* nyama zakuti tikapereki sembi zakupiriza kweniso sembi zinyaki, ndipu takuzipereka kwaku Yehova Chiuta widu.+ 26 Tilutiyengi limoza ndi viŵetu vidu. Palivi chiŵetu cho tizomerezengi kuti chije chifukwa vinyaki mwa viŵetu vo, takuvigwiriskiya ntchitu pakusopa Yehova Chiuta widu, ndipu tiziŵa cha kuti tamuperekanji kwaku Yehova pakumusopa, mpaka po tachifikiya kweniko.” 27 Mwaviyo, Yehova wanguzomereza mtima waku Farawo kuti unonopi ndipu Farawo wanguzomereza cha kuti Ayisirayeli aluti.+ 28 Farawo wangukambiya Mozesi kuti: “Tuwapu pa masu pangu! Ungaziyesanga so cha kuwona chisku changu, chifukwa zuŵa lo wazamuwone chisku changu wazamukufwa.” 29 Mozesi wangumuka kuti: “Nge mo mwakambiya, ndazamuyesa so cha kuwona chisku chinu.”

11 Sonu Yehova wangukambiya Mozesi kuti: “Kwaja mulili umoza wakuti ndilangiyi Farawo ndi ŵanthu a ku Ijipiti. Pavuli paki, wazakukuzomerezani kuti mutuweku kunu.+ Asani wazikuzomerezani kuti mulutengi, wazamuchita kukudikisani.+ 2 Sonu kambiya Ayisirayeli kuti, anthulumi ndi anthukazi wosi apemphi vinthu vasiliva ndi vagolidi+ ku ŵanthu wo aja nawu pafupi.” 3 Ndipu Yehova wanguchitiska kuti Ayisirayeli asaniyi wezi pa masu pa Ayijipiti. Kweniso ateŵeti aku Farawo ndi ŵanthu a ku Ijipiti amutumbikanga ukongwa Mozesi.

4 Pavuli paki, Mozesi wangukamba kuti: “Yehova wakamba kuti, ‘Usiku pakati, ndiserengi pakati pa Ayijipiti,+ 5 ndipu mwana wakwamba weyosi mucharu cha Ijipiti wafwengi,+ kwamba mwana wakwamba waku Farawo, yo waja pampandu waki waufumu mpaka mwana wakwamba wa kapolu munthukazi yo wagwira ntchitu pachakuperiyapu, ndipuso chiŵetu chechosi chakwamba kuwaku.+ 6 Mucharu chosi cha Ijipiti mwazamuja chilirizi chikulu cho chikuchitikapu cha ndipu chazamuchitikapu so cha.+ 7 Kweni palivi chinanga ndi galu yo wazamubwenthe Ayisirayeli, kwali nkhubwenthe munthu pamwenga viŵetu vawu, kuti muziŵi kuti Yehova wapambanisa pakati pa Ayijipiti ndi Ayisirayeli.’+ 8 Ndipu ateŵeti ŵinu wosi azamukuza kwaku ini ndi kundisindamiya mpaka visku vawu pasi, ndipu azamukamba kuti, ‘Lutanga, yiwi ndi ŵanthu wosi wo atikulondo.’+ Pavuli paki, ndazamuluta.” Wati wakamba viyo, Mozesi wangutuwaku kwaku Farawo wakwiya ukongwa.

9 Sonu Yehova wangukambiya Mozesi kuti: “Farawo wakuvwiyengi cha+ ndi chilatu chakuti ndichiti vakuziziswa vinandi mucharu cha Ijipiti.”+ 10 Mozesi ndi Aroni anguchita vakuziziswa vosi ivi pa masu paku Farawo+ kweni Yehova wanguzomereza kuti mtima waku Farawo unonopi, mwakuti Farawo wanguzomereza cha kuti Ayisirayeli atuwemu mucharu chaki.+

12 Sonu Yehova wangukambiya Mozesi ndi Aroni mucharu cha Ijipiti kuti: 2 “Mwezi wunu ndiwu uŵengi mwezi winu wakwamba. Uŵengi mwezi wakwamba wa chaka kwaku yimwi.+ 3 Longoro ndi Ayisirayeli wosi* ndipu uŵakambiyi kuti, ‘Pa zuŵa la 10 la mwezi wenuwu, weyosi wato mbereri+ yimoza ya banja laki, mbereri yimoza banja lelosi. 4 Kweni asani banja lo ndimana ukongwa mwakuti lingamaliza cha kurya mbereri yo, yiwu agaŵani mbereri yo ndi banja lo aja nalu pafupi mwakukoliyana ndi unandi wa ŵanthu kweniso unandi wa nyama yo weyosi waryengi. 5 Mutenere kuto mbereri yamampha,+ yije mbereri yinthulumi ya chaka chimoza. Mungato mwana wa mbereri pamwenga wa mbuzi. 6 Mutenere kuyiphwere mpaka pa zuŵa la 14 la mwezi wenuwu,+ ndipu banja lelosi la Ayisirayeli litenere kuyibaya ndi mazulu mdima wechendayambi.*+ 7 Atenere kuto zinyaki mwa ndopa ndi kuziwaza kuchanya ndipuso mumphepeti mwa fulemu ya khomu la nyumba zo aryiyengemu mbereri yo.+

8 “‘Atenere kurya nyama yo usiku weniwunu.+ Ayiwotchi pamotu ndipu aryiyi limoza ndi chiŵandi chambula chakutupisa+ kweniso mphangwi yakuŵaŵa.+ 9 Nyama yo mungayiryanga yiŵisi cha pamwenga yakubwatusa, yakubika mumaji, kweni muyiwotchi pamotu limoza ndi mutu waki, viboda vaki ndipuso vamukati. 10 Mungasungangaku cha nyama yo kuti yifiki mlenji, kweni asani yajaku ndipu yafika mlenji, muyiwotchi ndi motu.+ 11 Muchirya nyama yo, muzije kuti mwamanga lamba winu,* mwavwala sapatu zinu, mwanyamuwa nthonga yinu mumanja ndipu muziyiryi mwaliŵiliŵi. Uyu ndi Pasika waku Yehova. 12 Pakuti ndijumphengi mucharu cha Ijipiti usiku wunu ndipu ndibayengi mwana wakwamba weyosi mucharu cha Ijipiti, kwambiya ŵanthu mpaka nyama,+ ndipuso ndiperekengi cheruzgu kwa achiuta wosi a ku Ijipiti.+ Ini ndini Yehova. 13 Ndopa ziŵengi chisimikizu chinu munyumba zo yimwi muli, ndiwonengi ndopa ndi kujumphiriya ŵaka. Ndipu ndichilanga charu cha Ijipiti, mulili uwu uzengi cha paku yimwi kuti ukunangeni.+

14 “‘Zuŵa ili, lazamuja chikumbusu kwaku yimwi ndipu muzichitiyengi Yehova phwandu mu migonezi yinu yosi. Muzichitengi phwandu lenili chifukwa ndi dangu lamuyaya. 15 Kwa mazuŵa 7 muziryengi chiŵandi chambula chakutupisa.+ Pa zuŵa lakwamba muzituzgengemu fulawu wakukasa wakusazgaku chakutupisa munyumba zinu chifukwa weyosi yo wazamukurya chakurya chakusazgaku chakutupisa kwambiya pa zuŵa lakwamba mpaka zuŵa la 7, watenere kuzibayika kuti wazileki kuja pakati pa Ayisirayeli. 16 Pa zuŵa lakwamba muzichitengi unganu wakupaturika ndipu pa zuŵa la 7 muzichitengi so unganu unyaki wakupaturika. Pa mazuŵa ngenanga mungazigwiranga ntchitu cha.+ Mungazibika ŵaka chakurya chakuti munthu weyosi waryi.

17 “‘Mutenere kusunga Phwandu la Viŵandi Vambula Chakutupisa,+ chifukwa pa zuŵa ili ndituzgengi magulu nginu* mucharu cha Ijipiti. Ndipu mutenere kusunga zuŵa ili mu migonezi yinu yosi nge dangu lamuyaya. 18 Mu mwezi wakwamba, pa zuŵa la 14 la mwezi weniwo ndi mazulu, muziryengi chiŵandi chambula chakutupisa mpaka pa zuŵa la 21 la mwezi wo ndi mazulu.+ 19 Kwa mazuŵa 7, munyumba zinu mungazisanirikanga fulawu wakukasa wakusazgaku chakutupisa cha, chifukwa munthu weyosi yo warya chakurya chakusazgaku chakutupisa, kwali ndi mulendu pamwenga mweneku charu,+ munthu mweniyo watenere kuzibayika kuti wazileki kuja pakati pa Ayisirayeli.+ 20 Mungaziryanga chakurya chechosi cha chakusazgaku chakutupisa. Munyumba zinu zosi muziryengi chiŵandi chambula chakutupisa.’”

21 Nyengu yeniyo, Mozesi wangudana ŵara wosi ŵa Ayisirayeli+ ndipu wanguŵakambiya kuti: “Lutani ndipu mukasankhi ŵana a viŵetu* a banja lelosi ndipu mukabayi sembi ya Pasika. 22 Pavuli paki, mukabizgi kamiti ka hisopi* mundopa zo ze mubeseni ndipu mukawazi ndopa zo kuchanya kwa fulemu ndi mumphepeti mwaki. Ndipu munthu weyosi wangazituwanga cha munyumba mpaka mlenji. 23 Pavuli paki, asani Yehova wajumpha mwa Ayijipiti kuti waŵalangi ndi mulili ndipu wawona ndopa kuchanya kwa fulemu ya khomu kweniso mumphepeti mwaki, Yehova wazamujumphiriya ŵaka khomu lo. Ndipu wazamuzomereza cha kuti mulili wa nyifwa* usere munyumba zinu.+

24 “Mutenere kusunga mwambu wenuwu chifukwa ndi dangu lambula kumala kwaku yimwi ndi ŵana ŵinu.+ 25 Ndipu asani mwazisere mucharu cho Yehova wazakukupaskani nge mo wakukambiya, muzichitengi mwambu wenuwu.+ 26 Ndipu asani ŵana ŵinu azikufumbani kuti, ‘Kumbi mwambu wenuwu ung’anamuwanji kwaku yimwi?’+ 27 muziŵamukengi kuti, ‘Ndi mwambu wakupereka sembi ya Pasika kwaku Yehova, yo wangujumphiriya nyumba za Ayisirayeli pa nyengu yo wangulanga Ayijipiti. Kweni nyumba zidu wanguzikwaska cha.’”

Pavuli paki, ŵanthu angujikama ndi kusindama mpaka visku vawu pasi. 28 Mwaviyo, Ayisirayeli anguluta ndipu anguchichita nge mo Yehova wangulamuliya Mozesi ndi Aroni.+ Anguchita nadi viyo.

29 Sonu usiku pakati, Yehova wangubaya mwana wakwamba weyosi mucharu cha Ijipiti,+ kwamba mwana wakwamba waku Farawo, yo wenga pampandu waki waufumu mpaka mwana wakwamba wa kapolu yo wenga mujeri,* ndipuso chiŵetu chechosi chakwamba kuwaku.+ 30 Farawo wanguyuka usiku weniwo limoza ndi ateŵeti ŵaki kweniso Ayijipiti anyaki wosi, ndipu Ayijipiti anguliya ukongwa chifukwa chakuti pengavi nyumba yo munguleka kufwa munthu.+ 31 Nyengu yeniyo, Farawo wangudana Mozesi ndi Aroni+ ndi usiku ndipu wanguti: “Sokani, tuwanipu pakati pa ŵanthu ŵangu, yimwi ndi Ayisirayeli anyaki wosi. Lutani kuchiteŵete Yehova, nge mo mwakambiya.+ 32 Toni mbereri zinu ndipuso ng’ombi zinu ndipu lutani nge mo mwakambiya.+ Kweni mutenere so kunditumbika.”

33 Ndipu Ayijipiti angwamba kuchichizga Ayisirayeli kuti atuwemu mwaliŵi+ mucharu cho. Yiwu angukamba kuti, “chifukwa tosi tafwa kali!”+ 34 Mwaviyo Ayisirayeli anguto fulawu wawu wakukasa wambula chakutupisa limoza ndi viyaŵi vakukasiyamu* ndipu anguvivunga musalu ndi kuvipayika pamapewa ngawu. 35 Ayisirayeli anguchita vo Mozesi wanguŵakambiya ndipu angupempha Ayijipiti kuti aŵapaski vinthu vasiliva, vagolidi ndi vakuvwala.+ 36 Yehova wanguchitiska kuti Ayisirayeli asaniyi wezi pa masu pa Ayijipiti, mwakuti anguŵapaska vosi vo angupempha ndipu Ayisirayeli anguto vinthu vinandi va Ayijipiti.+

37 Pavuli paki, Ayisirayeli angusoka ku Ramesesi+ ndipu anguselere ku Sukoti.+ Ŵengapu anthulumi 600,000 kwambula kuŵerengiyaku ŵana, ndipu ayendanga wapasi.+ 38 Gulu la ŵanthu amitundu yakupambanapambana*+ angulutiya limoza ndi Ayisirayeli, anguluta so ndi mbereri kweniso ng’ombi. Viŵetu vawu venga vinandi ukongwa. 39 Angwamba kupanga viŵandi vakuzunguliya vambula chakutupisa mwakugwiriskiya ntchitu fulawu wakukasa yo angutuwa nayu ku Ijipiti. Fulawu yo, wenga wambula chakutupisa chifukwa chakuti angudikisika mwamabuchibuchi mucharu cha Ijipiti mwakuti angunozga chakurya chechosi cha.+

40 Ayisirayeli anguja mucharu cha Ijipiti+ vyaka 430.+ 41 Pakumaliya pa vyaka 430, pa zuŵa lenili, magulu ngosi ngaku* Yehova ngangutuwa mucharu cha Ijipiti. 42 Wenuwu mbusiku wo Ayisirayeli azamuchitiyanga phwandu Yehova chifukwa chakuti wanguŵatuzga mucharu cha Ijipiti. Ayisirayeli wosi mu migonezi yawu yosi, azamuchitiyanga phwandu Yehova mu usiku wenuwu.+

43 Pavuli paki, Yehova wangukambiya Mozesi ndi Aroni kuti, “Dangu la Pasika ndakuti: Mulendu wangaryangaku cha.+ 44 Kweni asani munthu munyaki we ndi kapolu munthulumi yo wakumugula ndi ndalama mutenere kumudumuwa.+ Asani mwachita viyo ndipu wangaryaku Pasika. 45 Mulendu yo muja nayu ndipuso munthu waganyu wangaryangaku cha. 46 Nyama yo muryiyengi munyumba yimoza. Mungayituzgiyanga kubwalu cha ndipuso mungafyonga cha viwanga vaki.+ 47 Ayisirayeli wosi achitengi* phwandu lenili. 48 Asani mulendu yo muja nayu wakhumba kuchitaku phwandu la Pasika waku Yehova, munthulumi weyosi wa munyumba yaki watenere kudumulika. Pavuli paki wangachitaku phwandu lenili, ndipu wajengi nge mweneku charu. Kweni munthulumi weyosi wambula kudumulika wangaryangaku cha.+ 49 Dangu lelosi ligwirengi ntchitu mwakuyanana ku mweneku charu kweniso ku mulendu yo waja namwi.”+

50 Ayisirayeli wosi anguchita nge mo Yehova wangulamuliya Mozesi ndi Aroni. Anguchita nadi viyo. 51 Pa zuŵa lenili Yehova wangutuzga Ayisirayeli mucharu cha Ijipiti, limoza ndi magulu ngawu.*

13 Yehova wangulutirizga kulongoro ndi Mozesi ndipu wangukamba kuti: 2 “Ndipatuliyeni mwana munthulumi weyosi wakwamba kuwaku* pakati pa Ayisirayeli. Mwana munthulumi wakwamba kuwaku, wa munthu kweniso wa nyama, ngwangu.”+

3 Pavuli paki, Mozesi wangukambiya Ayisirayeli kuti: “Kumbukani zuŵa ili lo mungutuliya mucharu cha Ijipiti,+ munyumba ya ukapolu, chifukwa chakuti Yehova wangukutuzganiku kunu ndi janja lanthazi.+ Mwaviyo, mungaryanga cha chakurya chechosi chakusazgaku chakutupisa. 4 Pa zuŵa lenili, mungutuwa mucharu cha Ijipiti, mu mwezi wa Abibu.*+ 5 Asani Yehova wazikuserezani mucharu cha Akanani, Ahiti, Aamori, Ahivi ndipuso Ayebusi,+ charu cho wangulapizga kwa apapi ŵinu kuti wachiperekengi kwaku yimwi,+ charu chakwenda mkaka ndi uchi,+ muzichitengi mwambu uwu mu mwezi wenuwu. 6 Kwa mazuŵa 7, muziryengi viŵandi vambula chakutupisa,+ ndipu pa zuŵa la 7, muzichitiyengi phwandu Yehova. 7 Mwazamuryanga viŵandi vambula chakutupisa kwa mazuŵa 7,+ mungazisanirikanga ndi chakurya chechosi cha chakusazgaku chakutupisa+ ndipu muchigaŵa chinu chosi mungazisanirikanga fulawu wakukasa wakusazgaku chakutupisa cha. 8 Pa zuŵa lo, muzikambiyengi mwana winu kuti, ‘Ntchifukwa cha vo Yehova wangundichitiya po ndatuwanga mucharu cha Ijipiti.’+ 9 Ndipu mwambu wenuwu wazamuja nge chisimikizu kwaku yimwi pajanja linu ndipuso nge chikumbusu pachisku chinu,*+ kuti dangu laku Yehova lizije mumulomu mwinu, pakuti Yehova wangukutuzganimu mucharu cha Ijipiti ndi janja lanthazi. 10 Chaka chechosi muzisungengi dangu lenili pa nyengu yaki yakuŵikika.+

11 “Asani Yehova wazikuserezani mucharu cha Kanani cho wakulapizga kwaku yimwi kweniso kwa apapi ŵinu akali kuti wakupaskeningi,+ 12 muziperekengi kwaku Yehova mwana munthulumi weyosi wakwamba kuwaku,* kweniso chiŵetu chinthulumi chechosi chakwamba kuwaku pa viŵetu vo mwasaniya. Vinthulumi vaku Yehova.+ 13 Bulu weyosi wakwamba kuwaku muzimuwombongi ndi mbereri ndipu asani mwatondeka kumuwombo, muzimufyongi khosi. Mwana munthulumi weyosi wakwamba kuwaku wa ŵana ŵinu anthulumi, muzimuwombongi.+

14 “Asani mwana winu wazikufumbani kunthazi kuti, ‘Kumbi venivi ving’anamuwanji?’ muzimukambiyengi kuti, ‘Ndi janja lanthazi, Yehova wangutituzga mucharu cha Ijipiti, munyumba ya ukapolu.+ 15 Farawo wati wanonopesa mtima waki ndi kukana kutizomereza kuti tituwi mucharu chaki,+ Yehova wangubaya mwana wakwamba weyosi mucharu cha Ijipiti, kwamba mwana wakwamba wa munthu, mpaka mwana wakwamba wa nyama.+ Ndichu chifukwa chaki ndipereka sembi chiŵetu chinthulumi chechosi chakwamba kuwaku* kwaku Yehova, ndipuso ndiwombo mwana wakwamba weyosi wa ŵana ŵangu anthulumi.’ 16 Mwambu wenuwu uje nge chisimikizu pajanja linu, kweniso uje nge kamubambi* pavisku vinu,*+ pakuti Yehova wangutituzgamu mucharu cha Ijipiti ndi janja lanthazi.”

17 Sonu Farawo wati wazomereza Ayisirayeli kuti alutengi, Chiuta wanguŵayendesa munthowa yakujumpha mucharu cha Afilisiti cha, chinanga kuti ndiyu yenga nthowa yifupi. Pakuti Chiuta wangukamba kuti: “Ŵanthu yaŵa angachisintha maŵanaŵanu asani achikumana ndi nkhondu ndipu amuwere ku Ijipiti.” 18 Mwaviyo, Chiuta wanguchitiska kuti Ayisirayeli azunguliyi kunthowa ya kuchipululu cha ku Nyanja Yiyera.+ Kweni Ayisirayeli achituwa mucharu cha Ijipiti ayendanga mwandondomeku nge mo ngayendiyanga magulu nga asilikali. 19 Kweniso Mozesi wangupinga viwanga vaku Yosefi chifukwa chakuti Yosefi wanguchitiska kuti Ayisirayeli alapizgi. Iyu wanguŵakambiya kuti: “Chiuta wazakukukumbukani, ndipu muchituwa mucharu chinu, muzipingi viwanga vangu.”+ 20 Ayisirayeli angutuwaku ku Sukoti ndipu angujintha mahema ngawu ku Etamu, kukumaliya kwa chipululu.

21 Sonu Yehova wayendanga panthazi pawu ndi msana muchipilala cha mtambu kuti waŵalongozgengi munthowa,+ ndipu ndi usiku wayendanga panthazi pawu muchipilala cha motu kuti waŵapaskengi ukweru, ndi chilatu chakuti ayendengi msana ndipuso usiku.+ 22 Chipilala cha mtambu chatuwangaku cha kunthazi kwa Ayisirayeli ndi msana, ndipu chipilala cha motu chatuwangaku cha kunthazi kwawu ndi usiku.+

14 Sonu Yehova wangukambiya Mozesi kuti: 2 “Kambiya Ayisirayeli kuti awelere ndipu akajinthi mahema ngawu pafupi ndi Pihahiroti, pakati pa Migidoli ndi nyanja, mwakulereskana ndi Bala-zefoni.+ Mukajinthi mahema nginu pafupi ndi nyanja mwakulereskana ndi Bala-zefoni. 3 Asani vaŵa viyo, Farawo wazamukamba vakukwaskana ndi Ayisirayeli kuti, ‘Atimbanyizgika ndipu awulawula ŵaka mucharu. Atondeka kutuwamu muchipululu.’ 4 Ndizomerezengi Farawo kuti wanonopesi mtima waki+ ndipu wandondoloskengi Ayisirayeli. Ndikankhuskengi zina langu mwakuthereska Farawo kweniso asilikali ŵaki wosi;+ ndipu ŵanthu a ku Ijipiti aziŵengi nadi kuti ini ndini Yehova.”+ Ndipu Ayisirayeli anguchita nadi viyo.

5 Pavuli paki, fumu ya ku Ijipiti yinguziŵisika kuti Ayisirayeli athaŵa. Nyengu yeniyo, Farawo ndi ateŵeti ŵaki angusintha maŵanaŵanu pa nkhani yakukwaskana ndi Ayisirayeli,+ ndipu angukamba kuti: “Ntchifukwa wuli tachita venivi? Taŵafwatuliyanji Ayisirayeli kuti aleki kutiteŵete nge akapolu?” 6 Mwaviyo, Farawo wangunozgekeresa magaleta ngaki ngankhondu ndipu wanguto asilikali ŵaki.+ 7 Iyu wanguto magaleta ngapade 600 kweniso magaleta nganyaki ngosi nga mucharu cha Ijipiti, ndipu mugaleta lelosi mwenga asilikali. 8 Mwaviyo, Yehova wanguzomereza kuti mtima waku Farawo, fumu ya ku Ijipiti unonopi, ndipu wangundondoloska Ayisirayeli wo atuwanga mucharu cho kwambula mantha.+ 9 Ayijipiti angundondoloska Ayisirayeli,+ ndipu magaleta ngosi ngaku Farawo, asilikali ŵaki ndi asilikali akukwera pamahachi ŵenga pafupi kuŵasaniya po angujintha mahema pafupi ndi nyanja, pafupi ndi Pihahiroti, mwakulereskana ndi Bala-zefoni.

10 Farawo wati wafika pafupi, Ayisirayeli anguyunuska visku vawu ndipu anguwona kuti Ayijipiti atiŵandondoloska. Ayisirayeli anguchita mantha ukongwa ndipu angwamba kuliriya Yehova.+ 11 Yiwu angukambiya Mozesi kuti: “Kumbi waza nasi kunu kuti tizifwiyi muchipululu chifukwa chakuti ku Ijipiti kulivi masanu?+ Ntchifukwa wuli watichitiya venivi? Watituzgiyanji mucharu cha Ijipiti? 12 Asi venivi ndivu tingukukambiya ku Ijipiti kuti, ‘Tileki kuti titeŵetiyengi Ayijipiti’? Pakuti mbumampha kuteŵete Ayijipiti kuluska kuti tifwiyi muchipululu.”+ 13 Pavuli paki Mozesi wangukambiya Ayisirayeli kuti: “Mungawopanga cha.+ Tchinthani ndipu wonani mo Yehova wakutaskiyeningi msanawale.+ Pakuti Ayijipiti wo mutiŵawona msanawale mwazakuŵawona so cha.+ 14 Yehova ndiyu wakuchitiyeningi* nkhondu,+ ndipu yimwi mujengi ŵaka cheti.”

15 Sonu Yehova wangukambiya Mozesi kuti: “Ntchifukwa wuli utindiliriya? Kambiya Ayisirayeli kuti anyamuki. 16 Ndipu yiwi soska nthonga yaku, tambasuliya janja laku panyanja ndi kuyigaŵa kuti Ayisirayeli ayendi pakati pa nyanja pakumira. 17 Ini ndizomerezengi kuti mtima wa ŵanthu a ku Ijipiti unonopi kuti aziŵandondoloski munyanja. Mwaviyo, ndazamukankhuska zina langu mwakuthereska Farawo, asilikali ŵaki wosi, magaleta ngaki ngankhondu ndi asilikali ŵaki akukwera pamahachi.+ 18 Ndipu asani ndakankhuska zina langu mwakuthereska Farawo, magaleta ngaki ngankhondu kweniso asilikali ŵaki akukwera pamahachi, ŵanthu a ku Ijipiti aziŵengi nadi kuti ini ndini Yehova.”+

19 Pavuli paki, mungelu waku Chiuta wauneneska+ yo wayendanga panthazi pa Ayisirayeli wangutuwaku kunthazi kwawu ndi kuluta kuvuli kwawu, ndipu chipilala cha mtambu cho chenga kunthazi kwa Ayisirayeli chinguluta kuvuli kwawu ndipu chinguma kweniko.+ 20 Chipilala cho, chinguma pakati pa Ayijipiti ndi Ayisirayeli.+ Kuchigaŵa chinyaki chachitiskanga mdima. Ndipu kuchigaŵa chinyaki chaperekanga ukweru usiku.+ Mwaviyo, Ayijipiti angufika cha kufupi ndi Ayisirayeli usiku wosi.

21 Sonu Mozesi wangutambasuliya janja laki panyanja+ ndipu Yehova wanguchitiska kuti panyanja paputi mphepu yanthazi yakutuliya kuvuma* usiku wosi. Nyanja yo yingugaŵikana+ ndipu pasi pa nyanja pangumira.+ 22 Mwaviyo, Ayisirayeli angujumpha pakati pa nyanja pakumira,+ maji ngangupanga chimati kujanja lawu lamaryi ndipuso kujanja lawu lamazge.+ 23 Ŵanthu a ku Ijipiti angulondo Ayisirayeli, ndipu mahachi ngosi ngaku Farawo, magaleta ngaki ngankhondu ndi asilikali ŵaki akukwera pamahachi angwamba kuŵalondo pakati pa nyanja.+ 24 Pa nyengu ya ulinda wamlenji,* Yehova wangulereska Ayijipiti kutuliya muchipilala cha motu ndi mtambu,+ ndipu wanguchitiska kuti Ayijipiti atimbanyizgiki. 25 Chiuta wakhwetuwanga vingelengeli va magaleta ngawu mwakuti asuzgikanga kungayendesa. Ndipu Ayijipiti akambanga kuti: “Tiyeni tithaŵi pa masu pa Ayisirayeli chifukwa Yehova ndiyu watiŵachitiya nkhondu kulimbana ndi Ayijipiti.”+

26 Pavuli paki, Yehova wangukambiya Mozesi kuti: “Tambasuliya janja laku panyanja kuti maji ngawere mumalu mwaki ndi kubizga Ayijipiti, magaleta ngawu ngankhondu ndi asilikali ŵawu akukwera pamahachi.” 27 Nyengu yeniyo, Mozesi wangutambasuliya janja laki panyanja ndipu kuchicha nyanja yinguwere mumalu mwaki. Ayijipiti achithaŵa, Yehova wanguŵaponya pakati pa nyanja.+ 28 Maji ngo ngachiwere mumalu mwaki, ngangubizga magaleta ngankhondu, asilikali akukwera pamahachi ndi asilikali wosi aku Farawo wo angulondo Ayisirayeli pakati pa nyanja.+ Palivi chinanga njumoza yo wangupona.+

29 Kweni Ayisirayeli angwenda pakati pa nyanja pakumira,+ maji ngangupanga chimati kujanja lawu lamaryi ndipuso kujanja lawu lamazge.+ 30 Mwaviyo, Yehova wangutaska Ayisirayeli mu manja mwa Ayijipiti pa zuŵa lenili,+ ndipu Ayisirayeli anguwona Ayijipiti afwa mulikumba.* 31 Ayisirayeli anguwona so nthazi zikulu zo* Yehova wangugwiriskiya ntchitu pakuthereska Ayijipiti ndipu ŵanthu angwamba kopa Yehova, kuja ndi chivwanu mwaku Yehova kweniso kugomezga Mozesi.+

15 Pa nyengu yo, Mozesi ndi Ayisirayeli angumbiya Yehova sumu yakuti:+

“Ndimumbiyi Yehova, pakuti iyu wakwezeka ukongwa.+

Waponya munyanja hachi ndi wakukwerapu waki.+

 2 Ya* ndi nthazi zangu, pakuti iyu wanditaska.+

Uyu ndi Chiuta wangu, ndimuthamikengi;+ ndi Chiuta wa ada,+ ndimukwezengi.+

 3 Yehova ntchinkhara pa nkhondu.+ Zina laki ndi Yehova.+

 5 Maji ngamweza wanthazi nganguŵabenekere; angudodome pasi pa nyanja nge mwa.+

 9 Murwani wangukamba kuti: ‘Ndiŵandondoloskengi! Ndiŵasaniyengi!

Ndigaŵengi vinthu vakuphanga mpaka po ndakhorwe!

Ndisolongi lipanga langu! Janja langu liŵathereskengi!’+

11 Ndi chiuta nuyu yo wayanana namwi, Yimwi Yehova?+

Ndiyani yo wayanana namwi, yimwi wakupaturika ukongwa?+

Yimwi wakwenere kuwopeka ndi kukumbiyani sumu zakuthamika, Yimwi wakuchita vinthu vakuziziswa.+

12 Mungutambasuwa janja linu lamaryi, ndipu charu chinguŵameza.+

Ŵanthu wosi a ku Kanani azamusongonoka mtima.+

16 Mantha ndi chitenthi vazakuŵawiya.+

18 Yehova wazamulamuliya nge fumu muyaya mpaka muyaya.+

20 Ndipu Miriyamu, mchimi munthukazi, mzichi waku Aroni, wanguto kang’oma, ndipu anthukazi wosi amulondonga achimba ting’oma ndi kuvina. 21 Miriyamu walondeziyananga ndi anthulumi, ndipu wambanga kuti:

“Mbiyani Yehova, pakuti iyu wakwezeka ukongwa.+

Waponya munyanja hachi ndi wakukwerapu waki.”+

22 Pavuli paki, Mozesi wangulongozga Ayisirayeli kutuwa ku Nyanja Yiyera, ndipu anguluta kuchipululu cha Shuru. Yiwu angwenda muchipululu kwa mazuŵa ngatatu, kweni mwengavi maji. 23 Angufika ku Mara,*+ kweni angutondeka kumwa maji nga kwenuku chifukwa ngenga ngakuŵaŵa. Ndichu chifukwa chaki Mozesi wangudana malu ngo kuti Mara. 24 Mwaviyo, Ayisirayeli angwamba kudinginyikiya Mozesi+ ndipu akambanga kuti: “Sonu timwengenji?” 25 Mozesi wanguliriya Yehova+ ndipu Yehova wangumulongo kamiti. Kamiti ko wati wakaponya mumaji, maji ngo ngangwamba kunowa.

Pamalu ngenanga, Chiuta wanguŵaŵikiya dangu kweniso wanguŵakambiya vo vingachitiska kuti ayeruzgiki ndipu wanguŵayesa.+ 26 Chiuta wangukamba kuti: “Asani muvwiyengi mazu ngaku Yehova Chiuta winu ndi mtima wosi, ndi kuchita cho ntchamampha mu masu ngaki, ndipuso asani muvwiyengi marangu ngaki ndi kusunga fundu zaki zosi,+ ndikulangeningi cha ndi matenda ngo ndingulanga nangu Ayijipiti,+ pakuti ini Yehova, nditikuchizgani.”+

27 Pavuli paki, angufika ku Elimu, ko kwenga akasupi 12 a maji ndipuso vimiti 70 va kantchindi. Mwaviyo angujintha mahema ngawu pafupi ndi maji.

16 Ŵati atuwa ku Elimu, Ayisirayeli wosi angufika* muchipululu cha Sini,+ cho che pakati pa Elimu ndi Sinayi. Angufika muchipululu ichi pa zuŵa la 15 la mwezi wachiŵi kutuliya po angunyamukiya mucharu cha Ijipiti.

2 Ayisirayeli wosi angwamba* kudinginyikiya Mozesi ndi Aroni muchipululu.+ 3 Ayisirayeli wo, akambiyanga Mozesi ndi Aroni kuti: “Vatingi viŵengi umampha asani Yehova wangutibayiya mucharu cha Ijipiti mo tajanga pafupi ndi mimphika ya nyama,+ ndipuso mo taryanga viŵandi ndi kuguta. Sonu mwaza nasi munu muchipululu kuti mubayi mpingu wosi uwu ndi nja.”+

4 Pavuli paki, Yehova wangukambiya Mozesi kuti: “Ndikuwisiyeningi chiŵandi nge vuwa kutuliya kuchanya,+ ndipu zuŵa lelosi munthu wakatongi chakurya cho wangarya,+ kuti ndiŵayesi ndi chilatu chakuti ndiwoni asani azamuvwiya dangu langu pamwenga cha.+ 5 Kweni pa zuŵa la 6,+ akatongi chakurya chakukwana mazuŵa ngaŵi ndipu achinozgiyengi limu.”+

6 Mwaviyo, Mozesi ndi Aroni angukambiya Ayisirayeli wosi kuti: “Ndi mazulu, muziŵengi kuti Yehova ndiyu wakukutuzgani mucharu cha Ijipiti.+ 7 Ndi mlenji mwazamuwona unkhankhu waku Yehova, pakuti Yehova wavwa vo mutimudinginyikiya. Ndisi ayani isi kuti mutidinginyikiyengi?” 8 Mozesi wangulutirizga kukamba kuti: “Asani Yehova wakupaskani nyama yakuti muryi mazulu kweniso chiŵandi chakuti muryi ndi mlenji ndi kuguta, muziŵengi kuti Yehova wavwa vo mutimudinginyikiya. Kweni te ayani isi? Mudinginyikiya isi cha kweni mudinginyikiya Yehova.”+

9 Pavuli paki Mozesi wangukambiya Aroni kuti: “Kambiya Ayisirayeli wosi* kuti, ‘Zani pafupi pa masu paku Yehova, pakuti wavwa kudinginyika kwinu.’”+ 10 Aroni wati wamaliza ŵaka kulongoro ndi Ayisirayeli wosi,* Ayisirayeli wo angung’anamuka ndi kulereska kuchipululu, ndipu awonani! unkhankhu waku Yehova unguwoneka mumtambu.+

11 Yehova wangulutirizga kulongoro ndi Mozesi, ndipu wanguti: 12 “Ndavwa kudinginyika kwa Ayisirayeli.+ Uŵakambiyi kuti, ‘Ndi mazulu mdima wechendayambi* mwazamukurya nyama, ndi mlenji mwazamukurya chiŵandi ndi kuguta+ ndipu mwazamuziŵa kuti ini ndini Yehova Chiuta winu.’”+

13 Sonu ndi mazulu kunguza tiyuni ta kambuŵi ndipu tingubenekere msasa wa Ayisirayeli.+ Ndi mlenji pasi penga dungwi kuzunguliya msasa wosi. 14 Asani dungwi lakamuka, pasi paŵanga tinthu takupapatika,+ to tenga nge ayisi. 15 Ayisirayeli ŵati awona venivi angwamba kufumbana kuti, “Ndi vinthu wuli ivi?” Pakuti anguziŵa cha kuti venga vinthu wuli. Mozesi wanguŵakambiya kuti: “Ntchiŵandi cho Yehova wakupaskani kuti muryi.+ 16 Yehova walamula kuti, ‘Weyosi watongi chakurya cho wangarya. Mutongi mwesu umoza wa omeri*+ wa munthu weyosi mwakukoliyana ndi unandi wa ŵanthu wo ŵe muhema linu.’” 17 Ayisirayeli angwamba kuchita venivi; anguto chakurya, anyaki anguto chinandi ndipu anyaki anguto chimana. 18 Asani apima ndi mwesu wa omeri, munthu yo wanguto vinandi vajumphanga cha mwesu ndipu yo wanguto vimanavi vamupeleŵeriyanga cha.+ Weyosi wanguto chakurya cho wangarya.

19 Pavuli paki, Mozesi wanguŵakambiya kuti: “Munthu weyosi wangasiyangaku chakurya chechosi cha kuti mpaka chifiki mlenji.”+ 20 Kweni yiwu angumuvwiya cha Mozesi. Ayisirayeli anyaki ŵati asiyaku chakurya mpaka kufika mlenji, chingutapuka mphorozi ndipuso chingununkha. Ndipu Mozesi wanguŵakwiyiya ukongwa. 21 Yiwu atonga chakurya mlenji wewosi, weyosi watonga chakurya cho wangarya. Asani lumwi lafunda, chasongonokanga.

22 Pa zuŵa la 6, anguto chiŵandi cha mazuŵa ngaŵi,+ miyesu yiŵi ya omeri ya munthu weyosi. Sonu alongozgi wosi ŵa Ayisirayeli anguza kwaku Mozesi ndipu angumukambiya venivi. 23 Mozesi wanguŵamuka kuti: “Yehova wakamba kuti. Mawa mwazamupumuwa* chifukwa ndi sabata lakupaturika laku Yehova.+ Pangani chiŵandi cho mukhumba kupanga ndipu bikani vo mukhumba kubika;+ chechosi cho chajaku muchisungi mpaka mlenji.” 24 Mwaviyo anguchisunga mpaka mlenji nge mo Mozesi wangulamuliya, ndipu chingununkha cha pamwenga kutapuka mphorozi. 25 Pavuli paki, Mozesi wangukamba kuti: “Muchiryi msanawale chifukwa msanawale ndi sabata laku Yehova. Msanawale muchisaniyengi cha chakurya pasi. 26 Mutongi chakurya kwa mazuŵa 6, kweni pa zuŵa la 7, lo ndi Sabata+ mwakuchisaniya cha.” 27 Kweni ŵanthu anyaki anguluta kuti akato chakurya pa zuŵa la 7 ndipu angusaniyaku kanthu cha.

28 Sonu Yehova wangukambiya Mozesi kuti: “Kumbi mukanengi kusunga marangu ngangu kweniso ulongozgi wangu mpaka zuŵanji?+ 29 Ziŵani kuti Yehova wakupaskani zuŵa la Sabata.+ Ndichu chifukwa chaki watikupaskani chiŵandi cha mazuŵa ngaŵi pa zuŵa la 6. Weyosi wajengi po wali; munthu weyosi wangatuwangapu cha pamalu ngaki pa zuŵa la 7.” 30 Mwaviyo ŵanthu angusunga Sabata* pa zuŵa la 7.+

31 Ayisirayeli angudana chiŵandi chenichi zina lakuti “mana.”* Ichu chenga chituŵa nge nje za koriyanda,* ndipu chanowanga nge makeki ngakupapatika ngakudaku uchi.+ 32 Pavuli paki Mozesi wangukamba kuti: “Yehova walamula kuti, ‘Zazani mwesu umoza wa omeri wa mana kuti ngasungiki mu migonezi yinu yosi.+ Musungi kuti migonezi yakunthazi yiziwoni chiŵandi cho ndingukupaskani kuti muryi muchipululu pa nyengu yo ndakutuzganingi mucharu cha Ijipiti.’” 33 Sonu Mozesi wangukambiya Aroni kuti: “To msuku ndipu uŵikemu mwesu umoza wa omeri wa mana. Msuku wo uwuŵiki pa masu paku Yehova kuti mana ngasungiki mu migonezi yinu yosi.”+ 34 Nge mo Yehova wangulamuliya Mozesi, Aroni wanguŵika mana panthazi pa bokosi la Ukaboni*+ kuti ngasungiki. 35 Ayisirayeli angurya mana kwa vyaka 40+ mpaka po angufikiya mucharu cho mwajanga ŵanthu.+ Angurya mana ngenanga mpaka po angufikiya kumphaka ya charu cha Kanani.+ 36 Ndipu miyesu 10 ya omeri yikwana mwesu umoza wa efa.*

17 Ayisirayeli wosi angunyamuka* kutuwa kuchipululu cha Sini.+ Yiwu apumuwanga mumalu ngakupambanapambana mwakukoliyana ndi mo Yehova waŵakambiyanga+ ndipu angujintha mahema ngawu ku Refidimu.+ Kweni kwenuku kwengavi maji ngakuti amwi.

2 Mwaviyo, Ayisirayeli angwamba kupindana ndi Mozesi+ ndipu akambanga kuti: “Tipaski maji ngakuti timwi.” Kweni Mozesi wanguŵakambiya kuti: “Ntchifukwa wuli mupindana nani? Ntchifukwa wuli mulutirizga kuyesa+ Yehova?” 3 Kweni nyota yinguŵapweteka ukongwa Ayisirayeli kwenuku ndipu angudinginyikiya Mozesi.+ Yiwu angukamba kuti: “Ntchifukwa wuli ukutituzga mucharu cha Ijipiti kuti uzitibayi ndi nyota, isi, ŵana ŵidu kweniso viŵetu vidu?” 4 Pakumaliya paki, Mozesi wanguliriya Yehova kuti: “Ndichiti nawu wuli ŵanthu yaŵa? Yiwu aja kamanavi kundiponya ndi mya!”

5 Sonu Yehova wangukambiya Mozesi kuti: “Danjiyapu panthazi pa ŵanthu wo, ndipu uto anyaki mwa ŵara ŵa Ayisirayeli kweniso nthonga yaku yo ungupumiya Msinji wa Nayelu.+ Yipingi mujanja laku ndipu lutanga. 6 Awona! Ini ndamukuma panthazi paku, pajalawi ku Horebu. Ukapumi jalawi, ndipu pamutuwa maji kuti ŵanthu akamwi.”+ Mozesi wanguchita venivi pa masu pa ŵara ŵa Ayisirayeli. 7 Sonu Mozesi wangudana malu ngo kuti Masa*+ kweniso Meriba*+ chifukwa chakuti Ayisirayeli angupindana nayu ndipuso chifukwa chakuti Ayisirayeli anguyesa+ Yehova mwakukamba kuti: “Kumbi Yehova we pakati pidu pamwenga cha?”

8 Pavuli paki, kunguza Aamaleki+ ndipu anguchita nkhondu ndi Ayisirayeli ku Refidimu.+ 9 Mwaviyo, Mozesi wangukambiya Yoswa+ kuti: “Tisankhiyi anthulumi ndipu luta kuchichita nkhondu ndi Aamaleki. Mawa ndazamukuma pachanya pa phiri ndipu nthonga yaku Chiuta wauneneska yazamukuŵa mujanja langu.” 10 Sonu Yoswa wanguchita mwakukoliyana ndi mo Mozesi wangumukambiya.+ Iyu wanguchita nkhondu ndi Aamaleki. Ndipu Mozesi, Aroni ndi Huru+ anguluta pachanya pa phiri.

11 Asani Mozesi walutirizga kusoske manja ngaki muchanya, Ayisirayeli athereskanga Aamaleki kweni asani wasisiya manja ngaki pasi, Aamaleki athereskanga Ayisirayeli. 12 Manja ngaku Mozesi ngati ngazilirika, anguza ndi mwa kuti wajepu ndipu wangujapu. Pavuli paki, Aroni ndi Huru anguwovya Mozesi kusoska manja ngaki, munyaki kujanja lamaryi munyaki kujanja lamazge, kuti manja ngo ngalutirizgi kuja viyo mpaka po lumwi linguselere. 13 Mwaviyo, Yoswa wanguthereska Aamaleki ndi lipanga.+

14 Sonu Yehova wangukambiya Mozesi kuti: “Lemba venivi mubuku la chikumbusu ndipuso ukambiyi Yoswa kuti, ‘Ndazakuŵamaliya limu Aamaleki wosi ndipu azamukumbukika so cha pacharu chapasi.’”+ 15 Pavuli paki, Mozesi wanguzenga guŵa la sembi ndipu wangulidana kuti Yehova-nisi.* 16 Iyu wangukamba kuti: “Chifukwa Aamaleki alimbana ndi mpandu waufumu waku Ya,+ ndipu Yehova wazamuchita nkhondu ndi Aamaleki mu migonezi yawu yosi.”+

18 Sonu Yeteru, wasembi wa ku Midiyani, awisi a muwolu waku Mozesi+ anguvwa vosi vo Chiuta wanguchitiya Mozesi ndipuso vo wanguchitiya ŵanthu ŵaki, Ayisirayeli. Anguvwa so mo Yehova wangutuzgiya Ayisirayeli mucharu cha Ijipiti.+ 2 Yeteru, awisi a muwolu waku Mozesi, ajanga ndi Zipora muwolu waku Mozesi, Mozesi wati wamuweze kwa awisi, 3 limoza ndi ŵana ŵaki ŵaŵi anthulumi.+ Mwana munyaki zina laki lenga Gerisomu,*+ pakuti Mozesi wangukamba kuti, “Ndaja mulendu mucharu chaŵeni.” 4 Ndipu munyaki zina laki lenga Eliyezere* pakuti Mozesi wangukamba kuti, “Chiuta wa ada ndiyu watindiwovya, wakunditaska ku lipanga laku Farawo.”+

5 Sonu Yeteru, awisi a muwolu waku Mozesi, ŵana aku Mozesi kweniso muwolu waki anguza kwaku Mozesi kuchipululu ko wangujintha mahema kuphiri laku Chiuta wauneneska.+ 6 Yeteru wangutumiza uthenga kwaku Mozesi wakuti: “Ini Yeteru,+ msibweni* waku, ndituza kweniko ndi muwolu waku kweniso ŵana ŵaki ŵaŵi anthulumi.” 7 Nyengu yeniyo, Mozesi wanguluta kuchikumana ndi asibweni ŵaki, wangusindama ndipu wanguŵafyofyontha. Angufumbana za umoyu, ndipu pavuli paki, angusere muhema.

8 Mozesi wangukonkhoske asibweni ŵaki vosi vo Yehova wanguchitiya Farawo ndi Ijipiti kuti wataski Ayisirayeli.+ Wangukonkhoska so masuzgu ngosi ngo angukumana nangu munthowa,+ ndipuso mo Yehova wanguŵataskiya. 9 Yeteru wangukondwa chifukwa cha vinthu vamampha vo Yehova wanguchitiya Ayisirayeli mwakuŵataska mucharu cha Ijipiti. 10 Pavuli paki, Yeteru wangukamba kuti: “Wathamikiki Yehova, mweniyo wakukutaskani mucharu cha Ijipiti kweniso kwaku Farawo ndipuso yo wakutaska Ayisirayeli mu manja mwa Ayijipiti. 11 Sonu ndaziŵa kuti Yehova ndi mukulu kuluska achiuta anyaki wosi,+ chifukwa cha vo wanguchitiya ŵanthu akujikuzga wo alimbananga ndi ŵanthu ŵaki.” 12 Pavuli paki, asibweni aku Mozesi, a Yeteru, anguza ndi sembi yakupiriza kweniso sembi zinyaki kwaku Chiuta ndipu Aroni ndi ŵara wosi ŵa Ayisirayeli anguza kuzirya chakurya ndi asibweni aku Mozesi pa masu paku Chiuta wauneneska.

13 Zuŵa lamawa laki, Mozesi wanguja pasi nge mo wachitiyanga nyengu zosi kuti wayeruzgi ŵanthu, ndipu ŵanthu anguma wima panthazi paku Mozesi kutuwa mlenji mpaka mazulu. 14 Asibweni aku Mozesi ŵati awona vosi vo Mozesi wachitiyanga ŵanthu, angukamba kuti: “Uchitiyanji viyo ndi ŵanthu yaŵa? Ntchifukwa wuli waja yapa wija ndi ŵanthu wosi yaŵa, wo ama wima panthazi paku, kutuwa mlenji mpaka mazulu?” 15 Mozesi wangukambiya asibweni ŵaki kuti: “Ntchifukwa chakuti ŵanthu atuza kwaku ini kuti ndiŵafumbiyi ulongozgi kwaku Chiuta. 16 Asani ŵanthu ayambana atuza kwaku ini, ndipu ndiyeruzga nkhani yawu ndi kuŵakambiya vyeruzgu vaku Chiuta wauneneska ndipuso marangu ngaki.”+

17 Asibweni aku Mozesi, angumukambiya kuti: “Uchita umampha cha. 18 Yiwi kweniso ŵanthu wo we nawu muvukengi, chifukwa chakuti katundu uyu ndi muzitu kwaku yiwi ndipu ungamunyamuwa cha wija. 19 Sonu vwiya, ndikhumba kukulunguchizga ndipu Chiuta waŵengi nawi.+ Yiwi umiyengi ŵanthu pa masu paku Chiuta wauneneska+ ndipu ulutengi ndi milandu kwaku Chiuta wauneneska.+ 20 Uŵasambizengi marangu kweniso fundu zo atenere kulondo+ ndipuso uŵakambiyengi nthowa yo atenere kwendamu kweniso ntchitu yo atenere kuchita. 21 Kweni usankhi anthulumi akwenere+ wo atopa Chiuta, anthulumi akugomezgeka wo atinkha kusaniya phindu mwachinyengu.+ Uŵaŵiki kuti aje alongozgi a magulu nga ŵanthu 1,000, alongozgi a magulu nga ŵanthu 100, alongozgi a magulu nga ŵanthu 50 ndi alongozgi a magulu nga ŵanthu 10.+ 22 Yiwu ayeruzgengi ŵanthu wo ayambana,* ndipu azengi ndi milandu yikuluyikulu kwaku yiwi+ kweni milandu yimanayimana ayeruzgengi ndiwu. Agaŵiyeku ntchitu kuti vinthu vikupepukiyeku.+ 23 Asani ungachita venivi, ndipu ndivu Chiuta wakulamula, ufyokengi cha ndi ntchitu, kweniso weyosi walutengi kwaki ndi chimangu.”

24 Mozesi wanguvwiya asibweni ŵaki ndipu nyengu yeniyo wanguchita vosi vo angumukambiya. 25 Mozesi wangusankha anthulumi akwenere pakati pa Ayisirayeli wosi ndipu wanguŵaŵika kuti aje alongozgi a magulu nga ŵanthu 1,000, alongozgi a magulu nga ŵanthu 100, alongozgi a magulu nga ŵanthu 50 ndi alongozgi a magulu nga ŵanthu 10. 26 Mwaviyo, ayeruzganga ŵanthu asani ayambana. Milandu yikuluyikulu alutanga nayu kwaku Mozesi,+ kweni milandu yimanayimana, ayeruzganga ndiwu. 27 Pavuli paki, Mozesi wanguperekeza awisi a muwolu waki,+ ndipu anguluta kucharu chawu.

19 Mu mwezi wachitatu kutuliya po Ayisirayeli angutuliya mucharu cha Ijipiti, pa zuŵa lenili,* angufika muchipululu cha Sinayi. 2 Angutuwaku ku Refidimu,+ ndipu angufika muchipululu cha Sinayi ndi kujintha mahema ngawu muchipululu chenichi. Yiwu angujintha mahema ngawu kwenuku, pafupi ndi phiri.+

3 Pavuli paki, Mozesi wangukwere kuphiri kwaku Chiuta wauneneska ndipu Yehova wangulongoro nayu kutuliya muphiri+ kuti: “Ukakambiyi nyumba yaku Yakobe kweniso Ayisirayeli kuti, 4 ‘Mungujiwone mwija vo ndinguchitiya Ayijipiti+ kuti ndikunyamuweni pamapapa nga nombu ndi kuza namwi kwaku ini.+ 5 Sonu asani muvwiyengi mazu ngangu pa chinthu chechosi ndipuso asani musungengi phanganu langu, mwazamuja chuma changu chapade* kutuliya mu mitundu yosi ya ŵanthu,+ pakuti charu chosi chapasi ntchangu.+ 6 Mwazamuja asembi wo azamulamuliya nge mafumu ndipuso mtundu wakupaturika.’+ Ukakambi mazu ngenanga kwa Ayisirayeli.”

7 Mwaviyo, Mozesi wanguluta ndipu wangudana ŵara ŵa Ayisirayeli ndi kuŵakambiya mazu ngosi ngo Yehova wangumulamula.+ 8 Pavuli paki, ŵanthu wosi angumuka mwakukoliyana kuti: “Vosi vo Yehova wakamba, tichitengi.”+ Nyengu yeniyo, Mozesi wanguchikambiya Yehova vo ŵanthu wo angumuka. 9 Ndipu Yehova wangukambiya Mozesi kuti: “Awona! Ndizengi kwaku yiwi mumtambu ufipa kuti ŵanthu avwi ndichilongoro nawi ndipuso kuti yiwi nawi akugomezgengi nyengu zosi.” Pavuli paki, Mozesi wangukambiya Yehova vo ŵanthu angumuka.

10 Sonu Yehova wangukambiya Mozesi kuti: “Luta kwa Ayisirayeli ndipu ukaŵatowesi msanawale ndi mawa, ndipuso achapi vakuvwala vawu. 11 Ndipu atenere kunozgeke zuŵa lachitatu chifukwa pa zuŵa lachitatu, Yehova wazamusikiya pa Phiri la Sinayi, pa masu pa ŵanthu wosi. 12 Uŵikiyi ŵanthu mphaka kuzunguliya phiri losi ndipu uŵakambiyi kuti, ‘Phweriyani kuti weyosi wangalutanga kufupi ndi phiri cha pamwenga kukwaska mphaka yaki. Weyosi yo wakwaskengi phiri wabayikengi nadi. 13 Pangazisanirikanga janja lakukwaska munthu yo cha, kweni waziponyeki mya pamwenga wazihomeki.* Kwali ntchiŵetu pamwenga munthu wazamuja ndi umoyu cha.’+ Kweni asani kwavwika kuliya kwa mbata* ya sengwi la mbereri,+ angaziza kufupi ndi phiri.”

14 Sonu Mozesi wangusikiya kwa Ayisirayeli kutuliya kuphiri, ndipu wangwamba kuŵatowesa, ndipu yiwu anguchapa vakuvwala vawu.+ 15 Iyu wangukambiya Ayisirayeli kuti: “Nozgekiyani zuŵa lachitatu. Munthulumi weyosi wangagonananga ndi munthukazi cha.”*

16 Ndi mlenji pa zuŵa lachitatu, paphiri pangung’anima limphezi ndipuso pangugululusa. Paphiri lo, penga mtambu ufipa+ ndipuso panguvwika kuliya kwa mbata ya sengwi, ndipu ŵanthu wosi mumsasa wa Ayisirayeli angwamba kumbwambwanthiya.+ 17 Sonu Mozesi wangutuzga ŵanthu wo mumsasa kuti akumani ndi Chiuta wauneneska. Ŵanthu wo, anguma musina mwa phiri. 18 Mu Phiri losi la Sinayi mwatolorokanga josi chifukwa chakuti Yehova wanguza paphiri lo mumotu.+ Josi lo, latolorokanga nge josi lakutuwa mu uvunu ndipu phiri losi lasukunyikanga ukongwa.+ 19 Sonu kuliya kwa mbata kuchikuliyakuliya, Mozesi walongoronga ndipu Chiuta wauneneska wamumukanga.*

20 Sonu Yehova wangusikiya pa Phiri la Sinayi, pachanya pa phiri lo. Pavuli paki, Yehova wangudaniya Mozesi pachanya pa phiri, ndipu Mozesi wanguluta penipo.+ 21 Yehova wangukambiya Mozesi kuti: “Sika muphiri ndipu ukatcheŵeski ŵanthu kuti angayesanga cha kujumpha mphaka ndi chilatu chakuti awoni Yehova. Chifukwa asani angachita viyo, anandi afwengi. 22 Ndipu asembi wo atuza pafupi ndi Yehova nyengu zosi, ajitowesi kuti Yehova waleki kuŵabaya.”+ 23 Pavuli paki, Mozesi wangukambiya Yehova kuti: “Ŵanthu yaŵa angaza cha kufupi ndi Phiri la Sinayi chifukwa mukutitcheŵeska kali kuti, ‘Uŵiki mphaka kuzunguliya phiri, ndipu ukambiyi ŵanthu kuti ndakupaturika.’”+ 24 Kweni Yehova wangumukambiya kuti: “Luta, sika muphiri, ndipu uziwere so kunu limoza ndi Aroni, kweni asembi ndipuso ŵanthu wosi angajumphanga cha mphaka ndi kuza kwaku Yehova, kuti waleki kuŵabaya.”+ 25 Mwaviyo, Mozesi wangusikiya kwa Ayisirayeli ndipu wanguŵakambiya.

20 Pavuli paki, Chiuta wangulongoro mazu ngosi yanga kuti:+

2 “Ini ndini Yehova Chiuta waku yo wakukutuzga mucharu cha Ijipiti, munyumba ya ukapolu.+ 3 Ungajanga ndi achiuta anyaki cha, kupatuwaku ini.+

4 “Ungajipangiyanga chikozgu chakusema cha, pamwenga chikozgu cha chinthu chechosi chakuchanya, chapacharu chapasi pamwenga chamumaji nga pacharu chapasi.+ 5 Ungavisindamiyanga cha pamwenga kunyengeka kuti uviteŵete,+ pakuti ini Yehova Chiuta waku, ndini Chiuta yo wakhumba kuti ŵanthu ajiperekengi kwaku ini pe.+ Ndilanga ŵana chifukwa cha ubudi wa awusewu mpaka mugonezi wachitatu ndipuso mugonezi wachinayi wa ŵanthu wo atinditinkha, 6 kweni ndilongo chanju chambula kumala mpaka ku mugonezi wa nambala 1,000 wa ŵanthu wo atindiyanja ndi kusunga marangu ngangu.+

7 “Ungagwiriskiyanga ntchitu zina laku Yehova Chiuta waku munthowa yambula kwenere cha,+ chifukwa Yehova walekengi cha kulanga munthu yo wagwiriskiya ntchitu zina Laki munthowa yambula kwenere.+

8 “Ukumbukengi kuti zuŵa la Sabata ndakupaturika.+ 9 Ugwirengi ntchitu zaku zosi mazuŵa 6,+ 10 kweni zuŵa la 7 ndi sabata laku Yehova Chiuta waku. Ungagwiranga ntchitu yeyosi cha, kwali ndiwi, mwana waku munthulumi, mwana waku munthukazi, kapolu waku munthulumi, kapolu waku munthukazi, chiŵetu chaku pamwenga mulendu yo waja mumizi yaku.*+ 11 Chifukwa chakuti mu mazuŵa 6, Yehova wangupanga kuchanya ndi charu chapasi, nyanja ndi vinthu vosi vo ve mwenimo, ndipu wangwamba kupumuwa pa zuŵa la 7.+ Ndichu chifukwa chaki Yehova wangutumbika zuŵa la Sabata ndi kulipatuwa.

12 “Utumbikengi awusu ndi anyoku+ kuti uzije ndi umoyu utali mucharu cho Yehova Chiuta waku wakupaskengi.+

13 “Ungabayanga munthu cha.+

14 “Ungachitanga chigololu cha.+

15 “Ungabanga cha.+

16 “Ungaperekanga ukaboni waboza cha wakupusikiya munyaku.+

17 “Ungakhumbiranga nyumba ya munyaku cha. Ungakhumbiranga muwolu wa munyaku cha+ pamwenga kapolu waki munthulumi pamwenga kapolu waki munthukazi pamwenga ng’ombi yaki yinthulumi pamwenga bulu waki pamwenga chinthu chechosi cha munyaku.”+

18 Sonu ŵanthu wosi avwanga kugululusa kwa malimphezi ndi kumba kwa mbata* ya sengwi, ndipuso awonanga kung’anima kwa malimphezi ndi josi lo latolorokanga muphiri. Ŵanthu ŵati awona ndi kuvwa venivi angumbwambwanthiya ukongwa ndipu anguma patali.+ 19 Mwaviyo, ŵanthu wo angukambiya Mozesi kuti: “Yiwi ndiwi ulongoro nasi, ndipu tivwengi kweni ungazomerezanga cha kuti Chiuta ndiyu walongoro nasi pakuti titopa kuti tingafwa.”+ 20 Sonu Mozesi wangukambiya ŵanthu kuti: “Mungawopanga cha pakuti Chiuta wauneneska waza kuzikuyesani+ ndi chilatu chakuti mulutirizgi kumuwopa kuti muleki kubuda.”+ 21 Ndipu ŵanthu angulutirizga kuma patali kweni Mozesi wanguluta kufupi ndi mtambu ufipa ko kwenga Chiuta wauneneska.+

22 Pavuli paki, Yehova wangukambiya Mozesi kuti: “Kambiya Ayisirayeli kuti, ‘Mwajiwone mwija kuti ndalongoro namwi kutuliya kuchanya.+ 23 Ungajipangiyanga achiuta asiliva cha kuti nawu uŵasopengi ndipuso ungajipangiyanga achiuta agolidi cha.+ 24 Undipangiyi guŵa la sembi ladongu, ndipu wazamuperekiyangapu sembi zaku zakupiriza, sembi zaku za chimangu, mbereri zaku ndi ng’ombi zaku. Pamalu peposi po ndazamuchitiska kuti zina langu likumbukiki,+ ndazamukuza kwaku yiwi ndipu ndazakukutumbika. 25 Asani utindizenge guŵa la sembi lamya, ungachilizenganga mwakugwiriskiya ntchitu mya yakusema ndi tchezulu cha.+ Pakuti asani wazamuchita viyo, mbwenu wazamufipiska guŵa la sembi lo. 26 Guŵa la sembi lingajanga ndi masitepusi cha kuti uchikwerapu, viŵalu vaku vakubisika vileki kuwoneka.’

21 “Ivi ndi vyeruzgu vakuti ukaŵakambiyi:+

2 “Asani mwagula kapolu wachiheberi,+ wazamuja kapolu vyaka 6, kweni mu chaka cha 7, wazamufwatulika kwambula kulipira chechosi.+ 3 Asani wanguza yija, wazamuluta yija. Asani wakuto, wazamuluta ndi muwolu waki. 4 Asani mbuyaki wamupaska munthukazi ndipu wamubaliya ŵana anthulumi pamwenga anthukazi, munthukazi yo ndipuso ŵana azamuja ŵa ambuyaki, ndipu iyu wazamuluta yija.+ 5 Kweni asani kapolu wakana kuluta ndipu wakamba kuti, ‘Nditanja ambuya, muwolu wangu, ndipuso ŵana ŵangu; ndikhumba cha kufwatulika,’+ 6 mbwenu mbuyaki waluti nayu pa masu paku Chiuta wauneneska. Pavuli paki wazamuluta nayu pakhomu la nyumba pamwenga pafulemu, ndipu mbuyaki wazamutolo gutu laki ndi chitungu, ndipu wazamuja kapolu waki umoyu waki wosi.

7 “Asani munthu wagulisa mwana waki munthukazi kuti waje kapolu, mwana yo wazamufwatulika nge mo kapolu munthulumi wafwatulikiya cha. 8 Asani mbuyaki wakondwa nayu cha ndipu wamuto cha kuti waje mbilika,* kweni wakhumba kuti waguliki ndi munthu munyaki,* wakhumbika cha kumugulisa ku mulendu, pakuti wamuchitiya chinyengu. 9 Asani wamupereka ku mwana waki kuti wamuto, watenere kumuwona nge mwana waki munthukazi. 10 Asani mwana yo, wato munthukazi munyaki, wangalekanga cha kupereka chakurya, vakuvwala ndipuso cho ntchakwenere mu nthengwa*+ ku muwolu waki wakwamba. 11 Asani waleka kumupaska vinthu vitatu venivi, mbwenu wazamufwatulika kwambula kulipira ndalama yeyosi.

12 “Weyosi yo wapuma munyaki mpaka kumubaya, nayu watenere kubayika.+ 13 Kweni asani wamubayiya dala cha, ndipu Chiuta wauneneska wazomereza kuti vichitiki, ndazakukunozgiyani malu ngakuti wangathaŵiyaku.+ 14 Asani munthu wakwiyiya ukongwa munyaki mpaka kumubayiya dala,+ nayu watenere kubayika chinanga kuti wangathaŵiya kuguŵa la sembi.+ 15 Munthu yo wapuma awisi pamwenga anyina watenere kubayika.+

16 “Weyosi yo waba munthu+ ndi kumugulisa pamwenga wasanirika kuti we mu manja mwaki,+ watenere kubayika.+

17 “Weyosi yo watemba awisi pamwenga anyina watenere kubayika.+

18 “Vo vitenere kuchitika asani ŵanthu ayambana ndipu yumoza wapuma munyaki ndi mwa pamwenga fayiti,* munthu yo wafwa cha, kweni wapwetekeka ŵaka ndi kugona pabedi, ndi ivi: 19 Asani munthu yo wayuka ndipu watenda kubwalu ndi nthonga, yo wangumupuma wangalangikanga cha. Kweni wamulipirengi pa nyengu yo munthu wakupwetekeka wagwira ntchitu cha mpaka po wachiriya limu.

20 “Asani munthu wapuma kapolu waki munthulumi pamwenga kapolu waki munthukazi ndi nthonga, ndipu wamubaya, munthu yo watenere kulangika.+ 21 Kweni asani kapolu yo waja ndi umoyu kwa zuŵa limoza pamwenga ngaŵi kutuliya po wangumupumiya, mbuyaki wangalangikanga cha, chifukwa wakumugula ndi ndalama zaki.

22 “Asani anthulumi apumana ndipu apweteka munthukazi wanthumbu, ndipu wabala mwana muteta*+ kweni palivi yo wafwa,* munthulumi yo wapweteka munthukazi, walipiri mwakukoliyana ndi vo mulumu wa munthukazi yo wakamba. Ndipu malipiru ngo wakangapereke kwa akweruzga.+ 23 Kweni asani pafwa munthu, wapereki umoyu kulipa umoyu,+ 24 ndipuso asani munthu wamupweteka ukongwa munyaki, wapereki jisu kulipa jisu, jinu kulipa jinu, janja kulipa janja, phazi kulipa phazi,+ 25 kotcha kulipa kotcha, chilonda kulipa chilonda, fayiti kulipa fayiti.

26 “Asani munthu wapuma jisu la kapolu waki munthulumi pamwenga munthukazi ndipu walituluwa, wamufwatuwi kuti walutengi chifukwa walipira jisu laki.+ 27 Ndipu asani wagontho jinu la kapolu waki munthulumi pamwenga kapolu waki munthukazi, wamufwatuwi kuti walutengi chifukwa walipira jinu laki.

28 “Asani ng’ombi yavwinkhuwa munthulumi pamwenga munthukazi ndipu munthu yo wafwa, ng’ombi yo ayiponyi ndi mya mpaka yifwi+ ndipu nyama yaki yingaryikanga cha; kweni mweneku wa ng’ombi yo wangalangikanga cha. 29 Kweni asani ng’ombi yenga ndi kalusu kakuvwinkhuwa ŵanthu, ndipu mweneku wangutcheŵeskekapu kweni wayiphweriyanga cha, ndipu yabaya munthulumi pamwenga munthukazi, ng’ombi yo, ayiponyi ndi mya ndipu mweneku nayu wabayiki. 30 Asani mweneku wa ng’ombi yo, walamulika kuti wapereki chakuwombole ndi chilatu chakuti waleki kubayika, mbwenu wapereki malipiru ngo amulangiya. 31 Kwali ng’ombi yavwinkhuwa mwana munthulumi pamwenga munthukazi, mweneku wa ng’ombi yo, watenere so kulonde cheruzgu chenichi. 32 Asani ng’ombi yavwinkhuwa kapolu munthulumi pamwenga munthukazi, mweneku wa ng’ombi yo, wapereki masekeli* 30 ku mweneku wa kapolu yo, ndipu ng’ombi yo yiponyeki mya mpaka yifwi.

33 “Asani munthu wabenuwa mbuna pamwenga wakumba mbuna ndi kuyileka mwazi, ndipu ng’ombi pamwenga bulu wawiyamu, 34 mweneku wa mbuna yo, walipiri.+ Watenere kulipira ku mweneku wa chiŵetu cho, ndipu chiŵetu chakufwa chijengi chaki. 35 Asani ng’ombi yinyaki yapweteka ng’ombi ya munthu munyaki, ndipu ng’ombi yo yafwa, mbwenu agulisi ng’ombi yamoyu, ndipu ndalama zaki agaŵani. Yiwu agaŵani so ng’ombi yo yafwa. 36 Ndipu asani ng’ombi yo yaziŵikanga kuti yenga ndi kalusu kakuvwinkhuwa zinyaki, kweni mweneku wayiphweriyanga cha, wapereki ng’ombi kulipa ng’ombi, ndipu ng’ombi yakufwa yijengi yaki.

22 “Asani munthu waba ng’ombi pamwenga mbereri ndipu wayibaya pamwenga kuyigulisa, walipiyepu ng’ombi zinkhondi pa ng’ombi yimoza ndipu walipiyepu mbereri zinayi pa mbereri yimoza.+

2 (“Asani munkhungu+ wakoleka wachiswa nyumba kuti wabi ndipu wapumika mpaka kufwa, yo wamubaya walivi mulandu wa ndopa. 3 Kweni asani vachitika lumwi latuwa, yo wamubaya we ndi mulandu wa ndopa.)

“Munkhungu walipiri. Asani walivi kanthu, mbwenu wagulisiki kuti walipiri vinthu vo wanguba. 4 Asani amusaniya ndi vo wanguba ndipu veche vamoyu, kwali ndi ng’ombi, bulu pamwenga mbereri, walipiyepu kaŵi.

5 “Asani munthu munyaki waliska viŵetu vaki mumunda wa mphereska pamwenga mumunda wa mbewu zinyaki, ndipu wavilekere kuti vikaryi mumunda wa munyaki, wamulipiyepu munda waki wa mphereska wamampha ukongwa pamwenga munda waki unyaki wamampha ukongwa.

6 “Asani kwabuka motu ndipu wasapaliya kuvivwati vaminga ndi kuwotcha ntchinda za mbewu pamwenga mbewu zambula kuvuna pamwenga munda wosi, munthu yo wabuska motu watenere kulipira chifukwa cha vinthu vo vafya.

7 “Asani munthu wapaska ndalama munyaki pamwenga katundu kuti wamusungiyi, ndipu vinthu venivi vabika ve munyumba ya munyaki yo wamusungiyanga, asani munkhungu wasanirika, walipiyepu kaŵi.+ 8 Asani munkhungu wasanirika cha, mweneku wa nyumba azi nayu pa masu paku Chiuta wauneneska+ kuti aziŵi asani ndiyu wanguba* katundu wa munyaki. 9 Milandu yosi ya katundu wakubika, kwali ndi ng’ombi, bulu, mbereri, chakuvwala pamwenga chinthu chechosi cho chasoŵa, cho mweneku wangakamba kuti, ‘Ichi ntchangu!’ wosi ŵaŵi aluti ndi mulandu wawu pa masu paku Chiuta wauneneska.+ Ndipu munthu yo Chiuta wamusaniya ndi mulandu, wazamulipiyapu kaŵi ku munyaki.+

10 “Asani munthu wapaska munyaki bulu, ng’ombi, mbereri pamwenga chiŵetu chinyaki chechosi kuti wamusungiyi ndipu chiŵetu cho chafwa pamwenga chapwetekeka pamwenga chabika kwambula munthu kuwona, 11 yo wasunganga walapizgi ku mweneku pa masu paku Yehova kuti ndiyu cha wakuba katundu wa munyaki. Ndipu mweneku wa katundu wazomeri vo munyaki wakamba. Yo wasunganga katundu wangazilipiyangapu cha.+ 12 Kweni asani chiŵetu chabika che ndi iyu, wamulipiyepu mweneku. 13 Asani chiŵetu chikupalurika ndi chinyama chamudondu, wazi ndi chiŵetu cho chikupalurika kuti uje ukaboni. Iyu wangazimulipiyangapu cha chiŵetu cho chikupalurika ndi chinyama chamudondu.

14 “Kweni asani munthu wabwereka chiŵetu kwa munyaki ndipu chapwetekeka pamwenga chafwa che mu manja mwa mweneku cha, munthu yo wangubwereka walipiyepu. 15 Asani chiŵetu cho chenga ndi mweneku, wangalipiyangapu cha. Asani pakubwereka wangupereka ndalama, mbwenu vamalirana ndi ndalama zo wangupereka pakubwereka.

16 “Asani munthu wanyenga mwali yo walivi chibwezi ndipu wagonana nayu, wapereki malowolu kuti waje muwolu waki.+ 17 Asani awisi a munthukazi yo akanisisa kumupereka ku munthulumi, munthulumi yo, wapereki mbwenu ndalama zo alowole mwali.

18 “Mungazomerezanga cha kuti munthukazi wamasenga waje wamoyu.+

19 “Weyosi yo wagona ndi nyama wabayiki.+

20 “Weyosi yo wapereka sembi kwa achiuta anyaki, kweni kwaku Yehova cha, wabayiki.+

21 “Mungachitiyanga nkhaza mulendu cha pamwenga kumukandirizga,+ pakuti namwi mwenga alendu mucharu cha Ijipiti.+

22 “Mungasuzganga choko chechosi cha pamwenga mwana yo walivi awisi.*+ 23 Asani mutimusuzga ndipu waliriya ini, ndazamutondeka cha kuvwa kuliya kwaki.+ 24 Ndipu ukali wangu wazamukore, ndazakukubayani ndi lipanga, awolu ŵinu azamusambuka vyoko ndipu ŵana ŵinu azamusambuka alanda.

25 “Asani mwakongolesa ndalama ku mukavu* weyosi pakati pa ŵanthu ŵangu, munthu yo waja ndi yimwi, mungajanga nge wakuchitiska katapira cha kwaku iyu. Mungamulipirisanga ndalama zapachanya cha.+

26 “Asani wato chakuvwala cha munyaku nge chikoli cha ngongoli,+ umuweze lumwi lichisere. 27 Pakuti chakuvwala chenichi ndichu salu yaki yimoza pe yo wadika liŵavu laki. Sonu asani wamutole chakuvwala chaki, wadikengenji pakugona?+ Asani wandiliriya, ndivwengi pakuti nde walisungu.+

28 “Ungatembanga* Chiuta+ cha pamwenga mulongozgi yo we pakati pa ŵanthu ŵaku.+

29 “Ungaziŵanizanga cha kupereka vinthu kutuliya pa vinthu vaku vinandi vo wavuna kweniso kutuliya pa vinyu waku munandi ndi mafuta ngaku nganandi.+ Muperekengi ŵana ŵinu anthulumi akwamba kwaku ini.+ 30 Ng’ombi yinu yinthulumi ndi mbereri yinu muchitengi nayu ivi:+ Yijengi ndi nyina kwa mazuŵa 7 kutuliya po yawiya. Pa zuŵa la 8 muyiperekengi kwaku ini.+

31 “Mujengi ŵanthu akupaturika pa masu pangu,+ mungaryanga cha nyama yeyosi yo yapalurika ndi chinyama chamudondu.+ Muponyiyengi agalu.

23 “Ungawandisanga nkhani yaboza cha.+ Ungakoliyananga ndi munthu muheni cha mwakuja kaboni wakunanga mbiri ya munthu.+ 2 Ungalondonga gulu la ŵanthu cha kuti uchiti vinthu viheni, ndipuso ungabendezganga urunji cha, mwakupereka ukaboni kuti ukoliyani ndi ŵanthu anandi. 3 Ungayanjiyanga cha pa mulandu wa munthu mukavu.+

4 “Asani wasaniya ng’ombi pamwenga bulu wa murwani waku kuti walanda, kamuweze mweneku.+ 5 Asani wawona bulu wa murwani waku wawa pasi katundu we pamsana, ungamulekanga ŵaka cha ndi kutuwapu. Umuwovyi murwani waku kutuzgapu katundu pamsana wa bulu.+

6 “Ungabendezganga urunji cha asani uyeruzga mulandu wa munthu mukavu yo we pakati pinu.+

7 Ungaseleriyangapu cha pa mulandu waboza,* ndipuso ungabayanga cha munthu wambula mulandu kweniso murunji, pakuti munthu muheni ndazakumuwonapu cha kuti ndi murunji.*+

8 “Ungalondiyanga chinyeda cha, pakuti chinyeda chijala masu nga ŵanthu azeru, ndipuso chingabendezga mazu nga ŵanthu arunji.+

9 “Ungakandirizganga mulendu cha. Uziŵa mo viŵiya asani munthu ndi mulendu,* pakuti yiwi nawi wenga mulendu mucharu cha Ijipiti.+

10 “Kwa vyaka 6 wazamupanda mbewu mucharu chaku ndi kuvuna vipasu vaki.+ 11 Kweni chaka cha 7 uziwulekengi, ungaziwulimanga cha, ndipu akavu wo ŵe pakati pa ŵanthu ŵaku, azamuryanga va mumunda wo. Ndipu vinyama vamudondu vazamuryanga vinthu vo yiwu alekamu. Ivi ndivu uzichitengi ndi munda waku wa mphereska ndipuso munda waku wa maolivi.

12 “Ugwirengi ntchitu yaku kwa mazuŵa 6, kweni pa zuŵa la 7 ungagwiranga ntchitu cha, kuti ng’ombi yaku ndi bulu waku vipumuwengi. Ndipuso kuti mwana munthulumi wa kapolu waku munthukazi kweniso mulendu apumuwengi.+

13 “Muwonesesi kuti muchita vosi vo ndakukambiyani,+ ndipuso mungazumbuwanga cha mazina nga achiuta anyaki, ngangavwikanga cha pamulomu paku.+

14 “Uzindichitiyengi phwandu katatu pa chaka.+ 15 Uzichitengi Phwandu la Viŵandi Vambula Chakutupisa.+ Kwa mazuŵa 7, uziryengi chiŵandi chambula chakutupisa, nge mo ndakulamuliya, pa nyengu yakuŵikika mu mwezi wa Abibu,*+ pakuti pa nyengu yeniyi ndipu ungutuliya mucharu cha Ijipiti. Palivi yo watenere kuziwoneke pa masu pangu ndi manja ngaŵaka.+ 16 Uzichitengi so Phwandu la Kuvuna* asani uvuna vipasu vakwamba kucha mumunda waku+ ndipuso uzichitengi Phwandu la Kuwunganisa* kukumaliya kwa chaka asani uwunganisa vo wavuna.+ 17 Katatu pa chaka, anthulumi wosi aziwonekiyengi pa masu pa Ambuya auneneska, Yehova.+

18 “Ungaperekanga cha ndopa za sembi yangu limoza ndi chechosi chakusazgaku chakutupisa. Ndipu sembi za mafuta zakuperekeka pa maphwandu ngangu zingajanga cha usiku wosi mpaka mlenji.

19 “Uziperekengi kunyumba yaku Yehova Chiuta waku vipasu vakwamba kucha vamampha ukongwa vakutuliya mumunda waku.+

“Ungabikanga cha mwana wa mbuzi mumkaka wa nyina.+

20 “Nditumiza mungelu panthazi paku+ kuti wakuvikiliyi munthowa ndi kuluta nawi kumalu ngo ndanozga.+ 21 Uwonesesi kuti uvwiya mazu ngaki. Ungamugarukiyanga cha, pakuti wazakukugowoke cha maubudi ngaku,+ chifukwa zina langu le mwaku iyu. 22 Kweni asani uvwiya mazu ngaki ndi mtima wosi ndipuso uchita vosi vo ndikamba, ndazamuja murwani wa arwani ŵaku ndi kususka wo atikususka. 23 Pakuti mungelu wangu wazamuja panthazi paku ndi kuluta nawi kucharu cha Aamori, Ahiti, Aperezi, Akanani, Ahivi ndi Ayebusi ndipu ndazakuŵamala.+ 24 Ungasindamiyanga achiuta ŵawu cha pamwenga kunyengeka kuti uŵateŵete, ndipu ungatoliyangaku cha vakuchita vawu.+ Kweni utenere kubwanganduwa achiuta ŵawu ndi kuswa vipilala vawu vakupaturika.+ 25 Mutenere kuteŵete Yehova Chiuta winu+ ndipu wazamutumbika chiŵandi chinu ndi maji nginu.+ Ndazamutuzgapu matenda pakati pinu.+ 26 Anthukazi a mucharu chaku azamubalanga ŵana akufwa cha pamwenga kuja achumba,+ ndipu ndazakukupaska umoyu utali.

27 “Yiwi wechendafiki, ndazakuŵachitiska kuti andiwopi,+ ndipu ŵanthu wosi wo wazamukumana nawu ndazakuŵatimbanyizga, ndipuso ndazamuchitiska kuti arwani ŵaku wosi athaŵi pa masu paku chifukwa chakuthereskeka.+ 28 Yiwi wechendafiki, ndazamuchitiska kuti mitima ya arwani ŵaku yisongonoki*+ ndipu Ahivi, Akanani ndi Ahiti azamuthaŵa pa masu paku.+ 29 Ndazakuŵadikisa pa masu paku mu chaka chimoza cha, kuti charu chizileki kuja mahami ndipuso kuti nyama zamudondu zizileki kuyandana ndi kukuyukiya.+ 30 Ndazakuŵadikisa pa masu paku kamanakamana mpaka po wazamuyandaniyana ndi kuto charu kuti chije chaku.+

31 “Ndazamuŵika mphaka yaku kutuwa ku Nyanja Yiyera mpaka ku nyanja ya Afilisiti ndipuso kutuwa kuchipululu mpaka ku Msinji;*+ pakuti ŵanthu a mucharu ichi ndazakuŵapereka mu manja mwaku ndipu wazakuŵadikisa pa masu paku.+ 32 Yiwu pamwenga achiuta ŵawu ungachitanga nawu phanganu cha.+ 33 Angajanga mucharu chaku cha kuti aleki kuzikuchitiska kuti undibudiyi. Asani wazamuteŵete achiuta ŵawu, chazamuja chiŵana kwaku yiwi.”+

24 Pavuli paki, Chiuta wangukambiya Mozesi kuti: “Yiwi, Aroni, Nadabu, Abihu+ ndi ŵara 70 ŵa Ayisirayeli, kweriyani kuphiri kwaku Yehova ndipu mwe pataliku, mukasindami. 2 Mozesi waluti yija kufupi ndi Yehova, kweni anyaki angalutanga kufupi cha, ndipu ŵanthu wosi angalutanga nayu cha kuphiri.”+

3 Pavuli paki, Mozesi wanguza ku ŵanthu ndipu wanguŵakambiya mazu ngosi ngaku Yehova ndipuso vyeruzgu vosi.+ Ŵanthu wosi angumuka mwakukoliyana kuti: “Mazu ngosi ngo Yehova wakamba, tichitengi.”+ 4 Sonu Mozesi wangulemba mazu ngosi ngaku Yehova.+ Pavuli paki, wanguyuka mlenjilenji ndipu wanguzenga guŵa la sembi musina mwa phiri ndipuso wanguzenga mya 12 yachikumbusu, mwakukoliyana ndi mafuku 12 ngaku Isirayeli. 5 Pavuli paki, wangutuma anyamata achiyisirayeli ndipu yiwu angupereka sembi zakupiriza ndipuso angupereka ng’ombi zinthulumi nge sembi za chimangu+ kwaku Yehova. 6 Sonu Mozesi wanguto hafu ya ndopa ndipu wanguziŵika mumbali zabakuli, hafu yinyaki ya ndopa zo, wanguziwaza paguŵa la sembi. 7 Pavuli paki, Mozesi wanguto buku la phanganu ndipu wanguŵerenge ŵanthu mwakukweza.+ Ŵanthu wo angukamba kuti: “Vosi vo Yehova wakamba, tichitengi ndipu tivwiyengi.”+ 8 Sonu Mozesi wanguto ndopa ndipu wanguwaziya ŵanthu.+ Iyu wangukamba kuti: “Izi ndi ndopa za phanganu lo Yehova wachita namwi mwakukoliyana ndi mazu ngosi yanga.”+

9 Mozesi, Aroni, Nadabu ndi Abihu ndipuso ŵara 70 ŵa Ayisirayeli angukwere kuphiri, 10 ndipu yiwu anguwona Chiuta wa Isirayeli.+ Kusi kwa maphazi ngaki kwenga chinthu chakuwoneka nge nthowa ya mya ya safiro, ndipu chenga chakutowa ukongwa nge kuchanya.+ 11 Chiuta wanguŵapweteka cha anthulumi akutumbikika ŵa Ayisirayeli.+ Yiwu anguwona chiwona chaku Chiuta wauneneska ndipu angurya ndi kumwa.

12 Sonu Yehova wangukambiya Mozesi kuti: “Kwere kunu kuphiri kwaku ini ndipu uzije kwenikunu. Ndikupaskengi mya yo ndilembengepu dangu ndipuso marangu kuti Ayisirayeli asambiziki.”+ 13 Mwaviyo Mozesi wangusoka limoza ndi mteŵeti waki Yoswa,+ ndipu Mozesi wangukwere kuphiri laku Chiuta wauneneska.+ 14 Kweni Mozesi wangukambiya ŵara ŵa Ayisirayeli kuti: “Mulindizgi penipanu mpaka po tazamuziya so kwaku yimwi.+ Aroni ndi Huru+ aŵengi namwi. Weyosi yo we ndi mulandu wakuti uyeruzgiki, walutengi kwaku yiwu.”+ 15 Pavuli paki, Mozesi wangukwere kuphiri ndipu pa nyengu iyi mtambu ungubenekere phiri lo.+

16 Unkhankhu waku Yehova+ ungulutirizga kuja paphiri la Sinayi+ ndipu mtambu ungulibenekere kwa mazuŵa 6. Pa zuŵa la 7, Chiuta wangudana Mozesi kutuliya mumtambu. 17 Kwa Ayisirayeli wo awonanga, unkhankhu waku Yehova wawonekanga nge motu wakulilima pachanya pa phiri. 18 Pavuli paki, Mozesi wangusere mumtambu ndipu wangukwere kuphiri.+ Ndipu Mozesi wanguja paphiri lo mazuŵa 40, msana ndi usiku.+

25 Pavuli paki, Yehova wangukambiya Mozesi kuti: 2 “Kambiya Ayisirayeli kuti apereki vakupereka kwaku ini. Mundilonde vakupereka ku munthu weyosi yo mtima waki wamuchiska.+ 3 Vakupereka vo mutenere kulonde kutuliya kwaku yiwu ndi ivi: golidi,+ siliva,+ mkuŵa,+ 4 wuzu wabuluu, weya wa mbereri wapepo, wuzu uyera, salu zamampha, weya wa mbuzi, 5 vikopa va mbereri vakudaya ndi dayi muyera, vikopa va katumbwi, mathabwa nga vimiti va akeshiya,+ 6 mafuta nga nyali,+ mafuta nga basamu ngakupangiya mafuta ngakuŵikiya munthu pa udindu+ ndipuso vakununkhira,+ 7 mya ya onekisi ndipuso mya yinyaki yakuŵika pa efodi+ kweniso pachakuvwala chapachifuŵa.+ 8 Andipangiyi malu ngakupaturika, ndipu ndazamuja* pakati pawu.+ 9 Mupangi chihema ndipuso vinthu vosi vo vijengi mukati mwaki,* mwakulondo pulanu yo nditikulongo.+

10 “Andipangiyi bokosi lamathabwa nga vimiti va akeshiya, lije masentimita pafufupi 110* mu utali, masentimita pafufupi 70* mu usani ndi masentimita pafufupi 70* kutuwa pasi kufika pachanya.+ 11 Pavuli paki, ulipaki golidi chayiyu.+ Mukati ndi kubwalu ulipaki golidi ndipu upangi mkomberu wagolidi* kuzunguliya bokosi lo.+ 12 Upangi mpheti zinayi zagolidi ndipu uziŵiki muchanya mwa malundi ngaki nganayi, mpheti ziŵi uziŵiki kurwandi ndipu mpheti zinyaki ziŵi uziŵiki kurwandi linyaki. 13 Ndipu upangi vimiti vakunyamuliya kutuliya ku vimiti va akeshiya ndi kuvipaka golidi.+ 14 Uziserezi vimiti vo mumpheti zo ze mumphepeti mwa Bokosi kuti azinyamuliyengi Bokosi lo. 15 Vimiti vo vizijengi ku Bokosi lenili, vingazituzgikangaku cha.+ 16 Mukati mwa Bokosi uziŵikemu Ukaboni* wo ndikupaskengi.+

17 “Upangi chibenekeleru chagolidi chayiyu, chije masentimita pafufupi 110* mu utali ndipuso masentimita pafufupi 70* mu usani.+ 18 Upangi akerubi ŵaŵi agolidi; uchiti kuŵasula ndipu uŵaŵiki pachanya kukumaliya kwa chibenekeleru, uku ndi uku.+ 19 Upangi akerubi ŵaŵi ndipu uŵaŵiki kukumaliya kosi kuŵi kwa chibenekeleru, uku ndi uku. 20 Akerubi wo atambasuliyi muchanya mapapa ngawu ngaŵi, abenekere chibenekeleru ndi mapapa ngawu,+ ndipu alazgiyani. Visku va akerubi visindamiyi pachibenekeleru. 21 Uziŵiki chibenekeleru+ pa Bokosi, ndipu mukati mwa Bokosi uziŵikemu Ukaboni wo ndikupaskengi. 22 Ndazamuwoneke kwaku yiwi kweniko, ndipu ndazamulongoro nawi kutuliya pachanya pa chibenekeleru.+ Ndipu kutuliya pakati pa akerubi ŵaŵi wo ŵe pabokosi la Ukaboni, ndazakukuziŵisa vinthu vosi vo ndazakukulamula kuti ukambiyi Ayisirayeli.

23 “Upangi so thebulu+ kutuliya ku mathabwa nga vimiti va akeshiya, lije pafufupi mita yimoza* mu utali, masentimita pafufupi 45* mu usani ndipuso masentimita pafufupi 70* kutuwa pasi kufika pachanya.+ 24 Ndipu ulipaki golidi chayiyu ndipuso upangi mkomberu wagolidi* kuzunguliya thebulu lo. 25 Upangi fulemu kuzunguliya thebulu lo, pafufupi masentimita 7* mu usani ndipuso upangi mkomberu wagolidi* kuzunguliya fulemu yo. 26 Ulipangiyi mpheti zinayi zagolidi ndipu uziŵiki mumakona nganayi mo mwe malundi nganayi. 27 Mpheti zije kufupi ndi fulemu kuti muserezemu vimiti vakunyamuliya thebulu. 28 Ndipu vimiti vakunyamuliya vo, uvipangi kutuliya ku vimiti va akeshiya ndi kuvipaka golidi. Vimiti venivi ndivu azinyamuliyengi thebulu.

29 “Upangi so mabeseni ngaki, makapu ngaki kweniso misuku yaki ndi mbali zabakuli, mo azamupunguliyangamu sembi za chakumwa. Upangi vinthu venivi ndi golidi chayiyu.+ 30 Ndipu pathebulu uziŵikengepu viŵandi vakulongo,* kuti vizijengi pa masu pangu nyengu zosi.+

31 “Upangi chakuŵikapu nyali+ chagolidi chayiyu. Chakuŵikapu nyali uchisuli. Chapasi chaki, chapakati chaki, mphanda zaki, makapu ngaki, timafundu taki kweniso maluŵa ngaki, vosi vituliyi ku golidi yumoza, vingapangikanga pakuvijapakuvija cha.+ 32 Ndipu kuchapakati cha chakuŵikapu nyali kwazamutuliya mphanda 6, mphanda zitatu kurwandi ndipu mphanda zinyaki zitatu kurwandi linyaki. 33 Kurwandi kwa chapakati cha chakuŵikapu nyali, mphanda yeyosi yije ndi makapu ngatatu ngakupangika nge maluŵa nga alimondi, timafundu ndi maluŵa, vije mwakujalizana. Kurwandi linyaki naku, mphanda yeyosi yije ndi makapu ngatatu ngakupangika nge maluŵa nga alimondi, timafundu ndi maluŵa, ndipu vije mwakujalizana. Umu ndimu mphanda zosi 6 zakutuliya kuchapakati cha chakuŵikapu nyali, zijaliyengi. 34 Pachapakati cha chakuŵikapu nyali paje makapu nganayi ngakupangika nge maluŵa nga alimondi, timafundu ndi maluŵa, ndipu vije mwakujalizana. 35 Kafundu kaje kusi kwa mphanda ziŵi zakwamba zakutuliya kuchapakati cha chakuŵikapu nyali, kafundu kanyaki kaje kusi kwa mphanda zinyaki ziŵi ndipuso kafundu kanyaki kaje kusi kwa mphanda zinyaki ziŵi. Umu ndimu mphanda zosi 6 zakutuliya kuchapakati cha chakuŵikapu nyali zijaliyengi. 36 Timafundu, mphanda ndi chakuŵikapu nyali chosi visuliki kutuliya kugolidi chayiyu. Vosi vipangiki kutuliya ku golidi yumoza.+ 37 Uchipangiyi nyali 7 ndipu asani nyali zo zakozgeka, zazamuŵaliya kunthazi kwaki.+ 38 Vakuŵaniya vaki ndipuso vakupaliya motu vaki vije vagolidi chayiyu.+ 39 Chakuŵikapu nyali chipangiki limoza ndi viyaŵi venivi kutuliya ku golidi chayiyu wakukwana talenti yimoza.* 40 Uwonesesi kuti wavipanga mwakulondo pulanu yo ndingukulongo paphiri.+

26 “Upangi chihema+ mwakugwiriskiya ntchitu salu 10 zakupangiya mahema. Chije cha salu zamampha zakuluka, za wuzu wabuluu, zaweya wa mbereri wapepo, ndi za wuzu uyera. Ndipu pasalu zo, udyoŵepu+ akerubi.+ 2 Salu yeyosi ya chihema yije mamita pafufupi 12* mu utali ndipuso mamita pafufupi ngaŵi* mu usani. Ndipu salu zosi 10 za chihema zije za sayizi yimoza.+ 3 Salu zinkhondi zilumikiziki pamoza kuti zije salu yakulumikizana. Ndipu salu zinyaki zinkhondi nazu zilumikiziki pamoza kuti zije salu yakulumikizana. 4 Upangi akakhuluriya a wuzu wabuluu, ndipu uŵaŵiki mumphepeti kukumaliya kwa salu yimoza yakulumikizana. Uŵiki so akakhuluriya kukumaliya kwa salu yinyaki yakulumikizana. Kukumaliya kwenuku ndiku salu ziŵi zakulumikizana zilumikizanengi. 5 Kusalu yimoza yakulumikizana uŵikeku akakhuluriya 50 ndipu kukumaliya kwa salu yinyaki yakulumikizana uŵikeku so akakhuluriya 50, kuti alazgiyani po salu zo zilumikizanengi. 6 Upangi takukoloŵeke 50 tagolidi, ndipu ulumikizi salu za chihema ndi takukoloŵeke teniti kuti zije salu yimoza ya chihema.+

7 “Upangi so salu zaweya wa mbuzi zakubenekere pachihema.+ Ndipu salu zo zije 11.+ 8 Salu yeyosi ya chihema yije mamita pafufupi 13* mu utali ndipuso mamita pafufupi ngaŵi* mu usani. Ndipu salu zosi 11 za chihema zije za sayizi yimoza. 9 Ulumikizi salu zinkhondi ndipuso ulumikizi salu zinyaki 6. Ndipu salu ya 6 yo ye kukumaliya, kunthazi kwa chihema, uyipeti. 10 Uŵiki akakhuluriya 50 mumphepeti mwa salu yimoza yakulumikiza, aje kukumaliya kwaki, ndipu kukumaliya kwa salu yinyaki yakulumikiza uŵikeku so akakhuluriya 50. Akakhuluriya wo aje kukumaliya, ko salu zakulumikizana zo zilumikizanengi. 11 Upangi takukoloŵeke 50 tamkuŵa ndipu utiserezi mu akakhuluriya ndi kulumikiza salu zakulumikizana zo, kuti zije salu yimoza. 12 Salu yakubenekere pachihema yijumphiriyi salu yamukati. Hafu ya salu yo yajumphiriya, yilendiyengi kuvuli kwa chihema. 13 Mumphepeti mwa chihema, uku ndi uku, salu yakubenekere pachihema yijumphi salu yamukati ndi masentimita pafufupi 45,* kuti yibenekere chihema.

14 “Upangi so chakubenekere pachihema cha vikopa va mbereri vakudaya ndi dayi muyera, ndipu pachanya paki, uŵikepu chakubenekere cha vikopa va katumbwi.+

15 “Upangi mafulemu ngakumika+ nga chihema kutuliya ku mathabwa nga vimiti va akeshiya.+ 16 Fulemu yeyosi yije mamita pafufupi nganayi* kutuwa pasi kufika pachanya ndipuso masentimita pafufupi 70* mu usani. 17 Fulemu yeyosi yije ndi minyu ngaŵi. Mafulemu ngosi nga chihema ungapangi viyo. 18 Kumwera kwa chihema upangiyeku mafulemu 20, ngalazgiyi kumwera.

19 “Upangi visulu 40 vasiliva vamazenji+ vakujinthamu mafulemu 20. Visulu viŵi vije kusi kwa fulemu yimoza ya minyu ngaŵi. Ndipu visulu viŵi vije kusi kwa fulemu yeyosi ya minyu ngaŵi.+ 20 Kuchigaŵa chinyaki cha chihema, kunkhondi,* upangiyeku mafulemu 20, 21 ndi visulu vaki 40 vasiliva vamazenji ndipu visulu viŵi vije kusi kwa fulemu yimoza. Visulu viŵi vije kusi kwa fulemu yeyosi. 22 Kuvuli kwa chihema, kuzambwi,* upangiyeku mafulemu 6.+ 23 Upangi mafulemu ngaŵi kuti ngaje ntchindamilu ziŵi zapakona za kuvuli kwa chihema. 24 Fulemu yeyosi yije ya mathabwa ngaŵi ngakuyanana kutuwa pasi mpaka pachanya, pampheti yakwamba. Ndimu muchitiyi ndi mafulemu ngosi ngaŵi. Ndipu ngaje ntchindamilu ziŵi zapakona. 25 Upangi mafulemu 8 ndi visulu vaki 16 vasiliva vamazenji. Visulu viŵi vamazenji vije kusi kwa fulemu yimoza. Visulu viŵi vamazenji vije kusi kwa fulemu yeyosi.

26 “Upangi nthantha kutuliya ku vimiti va akeshiya kuti zikholesi mafulemu, nthantha zinkhondi zije kurwandi limoza la chihema.+ 27 Kurwandi linyaki la chihema kuje so nthantha zinkhondi zakukholese mafulemu, ndipu kuzambwi* kuje nthantha zinkhondi zakukholese mafulemu nga kuvuli kwa chihema. 28 Nthantha yapakati yiko mafulemu ngosi kutuliya kukwamba mpaka kukumaliya.

29 “Kumafulemu upakeku golidi,+ ndipu upangi mpheti zaki zagolidi zakuserezamu nthantha, ndipu kunthantha upakeku golidi. 30 Ujinthi chihema mwakukoliyana ndi pulanu yaki yo ungulongoreka muphiri.+

31 “Upangi ketani+ yawuzu wabuluu, weya wa mbereri wapepo, wuzu uyera ndi salu yamampha yakuluka. Ndipu paketani yo, padyoŵeki akerubi. 32 Uyipayiki pa ntchindamilu zinayi za vimiti va akeshiya zakupakaku golidi. Ndipu tivisulu taki takukoloŵekamu salu, tije tagolidi. Ntchindamilu zijinthiki mu visulu vinayi vasiliva vamazenji. 33 Upayiki ketani kusi kwa takukoloŵeke ndipu userezi bokosi la Ukaboni+ kuseri kwa* ketani. Ndipu ketani yipatuwengi Malu Ngakupaturika+ ndi Malu Ngakupaturika Ukongwa.+ 34 Pa bokosi la Ukaboni uŵikepu chibenekeleru ndipu uliŵiki mu Malu Ngakupaturika Ukongwa.

35 “Uŵiki thebulu kubwalu kwa ketani, ndipu chakuŵikapu nyali+ uchiŵiki kumwera kwa chihema mwakulereskana ndi thebulu. Ndipu thebulu lije kunkhondi* kwa chihema. 36 Upangi ketani ya pakhomu la chihema. Ketani yo yije yasalu yawuzu wabuluu, weya wa mbereri wapepo, wuzu uyera ndipuso salu yamampha yakulukika pamoza.+ 37 Upangi ntchindamilu zinkhondi za vimiti va akeshiya zakupayikapu ketani ndipu uzipaki golidi. Vakukoloŵekapu vaki vije vagolidi, ndipu upangi visulu vinkhondi vamkuŵa vamazenji vakujinthamu ntchindamilu.

27 “Upangi guŵa la sembi lamathabwa nga vimiti va akeshiya.+ Lije mamita pafufupi ngaŵi* mu utali ndipuso mamita pafufupi ngaŵi* mu usani. Guŵa la sembi lo, lije lakuyanana mu utali ndi mu usani, ndipu kutuwa pasi kufika pachanya lije pafufupi mita yimoza.*+ 2 Upangi masengwi+ mumakona ngaki nganayi; masengwi ndi guŵa la sembi vije chinthu chimoza ndipu guŵa la sembi ulipaki mkuŵa.+ 3 Upangi viyaŵi vakuyole vyotu,* mafocholu, mbali zabakuli, mafoloku ngakulungakulu ndi vakupaliya motu. Ndipu viyaŵi vaki vosi vije vamkuŵa.+ 4 Upangi tcheleku la paguŵa la sembi la visulu vamkuŵa vakupinjikana, ndipu mumakona mwaki uŵikemu mpheti zinayi zamkuŵa. 5 Tcheleku lo, uliŵiki pafupi ndi pakati pa guŵa la sembi, mumphata mwa mkomberu. 6 Upangi vimiti vakunyamuliya guŵa la sembi kutuliya ku vimiti va akeshiya ndipu uvipaki mkuŵa. 7 Vimiti vakunyamuliya viserezeki mumpheti kuti pakunyamuwa guŵa la sembi, vakunyamuliya vijengi uku ndi uku.+ 8 Upangi guŵa la sembi la nge bokosi lamathabwa lamwazi pachanya ndi kusi. Lipangiki nge mo Iyu wangukulongore muphiri.+

9 “Upangi balaza+ la chihema. Kuchigaŵa cha kumwera, kuje mpanda wasalu zamampha zakuluka. Ndipu utali waki uje mamita pafufupi 45* kurwandi limoza.+ 10 Mpanda wo, uje ndi ntchindamilu 20 kweniso visulu 20 vamkuŵa vamazenji. Tivisulu takukoloŵekamu salu ta ntchindamilu ndipuso vakumangiya,* vije vasiliva. 11 Kuchigaŵa cha kunkhondi,* mpanda wasalu uje so mamita pafufupi 45.* Upangi ntchindamilu zaki 20 kweniso visulu vaki 20 vamkuŵa vamazenji, ndipuso tivisulu takukoloŵekamu salu tasiliva ndi vakumangiya. 12 Kuzambwi,* mpanda wasalu ya balaza la chihema uje mamita pafufupi 22.* Upangi so ntchindamilu 10 ndi visulu 10 vamazenji. 13 Ndipu usani wa balaza la kuvuma, cha ko kutuliya lumwi uje mamita pafufupi 22.* 14 Mpanda wasalu kurwandi limoza uje mamita pafufupi 7,* ndipuso kuje ntchindamilu zitatu ndi visulu vitatu vamazenji.+ 15 Ndipu kurwandi linyaki kuje mpanda wasalu mamita pafufupi 7,* ndipuso kuje ntchindamilu zitatu ndi visulu vitatu vamazenji.

16 “Khomu la balaza la chihema lije ndi ketani ya mamita pafufupi 9.* Ketani yo yije yawuzu wabuluu, weya wa mbereri wapepo, wuzu uyera kweniso yasalu yamampha yakuluka, ndipu yilukiki kuti yije yimoza.+ Paje so ntchindamilu zinayi ndi visulu vinayi vamazenji.+ 17 Ntchindamilu zosi kuzunguliya balaza la chihema zije ndi vakumangiya vasiliva ndipuso vakukoloŵekamu vasiliva, kweni visulu vaki vamazenji vije vamkuŵa.+ 18 Mpanda wasalu wa balaza la chihema uje mamita pafufupi 45* mu utali,+ mamita pafufupi 22* mu usani ndipuso mamita pafufupi ngaŵi* kutuwa pasi kufika pachanya, ndipu upangiki kutuliya ku salu zamampha zakuluka, ndipu chije ndi visulu vamkuŵa vamazenji. 19 Viyaŵi ndi vinthu vosi vakugwiriskiya ntchitu pachihema, vikhomu va chihema ndipuso vikhomu vosi va balaza la chihema, vije vamkuŵa.+

20 “Uzilamuli Ayisirayeli kuti azikupaski mafuta ngamampha ukongwa nga maolivi ngakuyengetulika ngakumbulikiya kuti nyali zikoliyengi nyengu zosi.+ 21 Muchihema chakukumanaku, kubwalu kwa ketani yo ye kufupi ndi bokosi la Ukaboni,+ Aroni ndi ŵana ŵaki anthulumi awonesesengi kuti nyali zizimwa cha kwamba mazulu mpaka mlenji pa masu paku Yehova.+ Lenili ndi dangu lamuyaya lakuti Ayisirayeli asungengi mu migonezi yawu yosi.+

28 “Udani Aroni+ mku waku kweniso ŵana ŵaki anthulumi+ Nadabu, Abihu,+ Eliyazara ndi Itamara+ kutuliya pakati pa Ayisirayeli, ndipu uŵapatuwi kuti anditeŵetiyengi nge asembi.+ 2 Upangiyi Aroni mku waku vakuvwala vakupaturika. Vakuvwala vo vije vaunkhankhu ndipuso vakutowa.+ 3 Ukambiyi ŵanthu wosi alusu,* wo ndaŵapaska mzimu wazeru+ ndipu apangi vakuvwala vaku Aroni vakulongo kuti ngwakupaturika, kuti wanditeŵete nge wasembi.

4 “Yiwu apangi vakuvwala ivi: chakuvwala chapachifuŵa,+ efodi,+ mkhanju wapanthuwa,+ mkhanju wamandalasi, mphumphu+ ndipuso lamba.+ Apangiyi mku waku Aroni ndi ŵana ŵaki anthulumi vakuvwala vakupaturika venivi, kuti wanditeŵete nge wasembi. 5 Ŵanthu alusu agwiriskiyi ntchitu golidi, wuzu wabuluu, weya wa mbereri wapepo, wuzu uyera kweniso salu yamampha.

6 “Apangi efodi mwakugwiriskiya ntchitu golidi, wuzu wabuluu, weya wa mbereri wapepo, wuzu uyera, salu yamampha yakuluka ndipu wadyoŵeki.+ 7 Efodi waje ndi salu ziŵi zapaphewa zo zilumikizana pamapewa ngosi ngaŵi. 8 Lamba wakuluka+ yo wasonekiyengi ku efodi, kuti efodi wajengi mumalu mwaki, wapangiki mwakugwiriskiya ntchitu vinthu vo apangiyengi efodi. Lamba yo wapangiki ndi golidi, wuzu wabuluu, weya wa mbereri wapepo, wuzu uyera ndi salu yamampha yakuluka.

9 “Uto mya yiŵi ya onekisi+ ndipu ulembepu mazina nga ŵana anthulumi aku Isirayeli mwakuchita kujoba.+ 10 Pamwa umoza ulembepu mazina 6, ndipu pamwa unyaki ulembepu mazina nganyaki 6. Ungalembi mwakukoliyana ndi mo ŵana anthulumi aku Isirayeli akuwiya. 11 Munthu yo wakuziŵa kujoba mya, walembi mazina nga ŵana anthulumi aku Isirayeli pamya yiŵi nge mo wangalembe mazu pachidindu mwakuchita kujoba.+ Pavuli paki, mya yo yiziŵikiki mutakuŵikamu mya tagolidi. 12 Uŵiki mya yiŵi pasalu zapaphewa za efodi kuti yije mya yachikumbusu ku ŵana anthulumi aku Isirayeli,+ ndipu Aroni wapingengi mazina ngawu pasalu ziŵi zapaphewa pa masu paku Yehova nge chikumbusu. 13 Upangi takuŵikamu mya tagolidi 14 kweniso matcheni ngaŵi ngagolidi chayiyu,+ ngakuposa nge chingwi ndipu matcheni ngo ungalumikizi ku takuŵikamu mya.+

15 “Munthu wakuziŵa kudyoŵa, wapangi chakuvwala chapachifuŵa cha cheruzgu.+ Chipangiki mwakugwiriskiya ntchitu vinthu vo apangiyengi efodi. Chipangiki ndi golidi, wuzu wabuluu, weya wa mbereri wapepo, wuzu uyera ndi salu yamampha yakuluka.+ 16 Asani mwachipeta, chije chakuyanana muvigaŵa vosi vinayi, chije masentimita pafufupi 22* mu utali ndi mu usani. 17 Uŵikepu mya ndipu yije mu mizeri yinayi. Muzeri wakwamba uje ndi mwa wa rube, wa topazi ndi wa emeradi. 18 Mzeri wachiŵi uje ndi mwa wa takoyizi, wa safiro ndi wa jasipa. 19 Mzeri wachitatu uje ndi mwa wa leshemu,* wa agate ndi wa ametusito. 20 Mzeri wachinayi uje ndi mwa wa kurusolito, wa onekisi ndi wa yade. Yiŵikiki mutakuŵikamu mya tagolidi. 21 Mya yo, yikoliyani ndi mazina nga ŵana anthulumi 12 aku Isirayeli. Pamwa wewosi palembeki zina mwakuchita kujoba nge mo alembe mazu pachidindu, zina lelosi limiyi limoza mwa mafuku 12.

22 “Pachakuvwala chapachifuŵa, upangiyepu matcheni ngakuposeka nge vingwi, ngaje nge vingwi vakupangika ndi golidi chayiyu.+ 23 Upangiyepu so mpheti ziŵi zagolidi ndipu uziŵiki mumakona ngaŵi nga chakuvwala cho. 24 Userezi vingwi viŵi vagolidi mumpheti zo ze mumakona nga chakuvwala chapachifuŵa. 25 Userezi vingwi viŵi mutakuŵikamu mya tiŵi, ndipu uvilumikizi kusalu zapaphewa za efodi, kunthazi kwaki. 26 Upangi mpheti ziŵi zagolidi ndipu uziŵiki mumakona ngaŵi nga chigaŵa cha chakuvwala chapachifuŵa cho chipetekiyengi mukati, chenicho chikwaskanengi ndi efodi.+ 27 Upangi so mpheti zinyaki ziŵi zagolidi kunthazi kwa efodi, mumphata mwa salu ziŵi zapaphewa, pafupi ndi pakulumikiziya, pachanya pa lamba wakuluka wa efodi.+ 28 Chakuvwala chapachifuŵa uchimangi ndi chingwi chabuluu kuti chijengi pamalu ngaki, chingwi cho uchimangiriyi kumpheti za chakuvwala chapachifuŵa ndi kumpheti za efodi. Venivi viwovyengi kuti chakuvwala chapachifuŵa chijengi pamalu ngaki pa efodi, pachanya pa lamba wakuluka.

29 “Aroni wapingengi mazina nga ŵana anthulumi aku Isirayeli pa mtima paki, pachakuvwala chapachifuŵa cha cheruzgu asani wasere mu Malu Ngakupaturika, kuti chijengi chikumbusu pa masu paku Yehova nyengu zosi. 30 Uŵiki Urimu ndi Tumimu*+ muchakuvwala chapachifuŵa cha cheruzgu, ndipu vijengi pa mtima paku Aroni asani watuza pa masu paku Yehova. Nyengu zosi asani Aroni wawoneke pa masu paku Yehova, wapingengi pa mtima paki vinthu venivi vakuyeruzgiya Ayisirayeli.

31 “Upangi mkhanju wapanthuwa wa efodi ndipu wosi uje wa wuzu wabuluu.+ 32 Pakati pa mkhanju wo paje malu ngakuserezapu mutu. Ndipu mumphepeti mwa malu ngakuserezapu mutu mubinyiliki ndi munthu wakuziŵa kupanga salu. Pamalu ngakuserezapu mutu nga mkhanju wo, paje nge pamalu ngakuserezapu mutu nga chakuvwala chamamba ngavisulu, kuti pangakerukanga cha. 33 Upangi tinthu takuwoneka nge vipasu va pomegiraneti* ta wuzu wabuluu, weya wa mbereri wapepo ndi wuzu uyera. Tinthu to, utiŵiki mwakuzunguliya, mumphata mwa mkhanju, mo mwabinyilika. Upangi so timabelu tagolidi ndipu utiŵiki pakati pa tivipasu ta pomegiraneti. 34 Kabelu kagolidi kajalizani ndi kachipasu ka pomegiraneti,* ndipu viŵikiki viyo kuzunguliya mumphata mwa mkhanju wapanthuwa mo mwabinyilika. 35 Aroni wavwalengi mkhanju wenuwu kuti wateŵete, ndipu kuliya kwa timabelu kuvwikengi asani Aroni wasere ndi kutuwa mumalu ngakupaturika pa masu paku Yehova, kuti waleki kufwa.+

36 “Upangi kachisulu kakung’anima kagolidi chayiyu, ndipu ulembepu mazu mwakuchita kujoba nge mo alembe mazu pachidindu. Ulembepu mazu ngakuti: ‘Utuŵa ngwaku Yehova.’+ 37 Ukamangiriyi pamphumphu+ ndi kachingwi kabuluu; ndipu kajengi panthazi pa mphumphu. 38 Kachisulu ko, kajengi pachisku chaku Aroni ndipu Aroni ndiyu wajengi ndi mulandu asani munthu wabudiya vinthu vakupaturika,+ vo Ayisirayeli ativitowesa asani ativipereka nge mphasu zakupaturika. Nyengu zosi kajengi pachisku chaki kuti ayanjiki ndi Yehova.

39 “Upangi mkhanju wamandalasi wasalu yamampha, upangi so mphumphu yasalu yamampha, ndipuso upangi lamba wakuluka wa mkhanju.+

40 “Upangi so mikhanju, malamba nga mikhanju ndipuso vakuvwala vakumutu va ŵana anthulumi aku Aroni.+ Vinthu venivi vije vaunkhankhu kweniso vakutowa.+ 41 Uvwaliki Aroni mku waku ndi ŵana ŵaki anthulumi, ndipu uŵatowesi, uŵasankhi+ ndi kuŵaŵika+ kuti anditeŵetiyengi nge asembi. 42 Uŵapangiyi so akabunthu asalu* kuti abisengi nkhuli zawu.+ Ndipu ngaje ngatali kutuwa muchiwunu mpaka muchiŵa. 43 Aroni ndipuso ŵana ŵaki anthulumi avwalengi akabunthu ŵenaŵa asani asere muchihema chakukumanaku pamwenga asani atuza kufupi ndi guŵa la sembi kuti ateŵete mumalu ngakupaturika. Achitengi viyo kuti aleki kubuda ndi kufwa. Lenili ndi dangu lamuyaya kwaku iyu ndipuso ku mphapu* yaki yosi.

29 “Pakutowesa Aroni ndi ŵana ŵaki anthulumi kuti anditeŵetiyengi nge asembi, uchiti ivi: Uto tholi* linthulumi, mbereri ziŵi zinthulumi zambula kalema,+ 2 viŵandi vambula chakutupisa, viŵandi vakuzunguliya vazenji pakati vambula chakutupisa kweni vije vakudiraku mafuta, ndipuso uto viŵandi vakupapatika vambula chakutupisa vakupakaku mafuta.+ Uvipangi ndi ufwa wakusilirika wa tirigu. 3 Uviŵiki mulipalu ndipu uzi navu pa masu pangu ve mulipalu+ ndipuso uzi ndi tholi linthulumi ndi mbereri ziŵi zinthulumi.

4 “Uzi ndi Aroni kweniso ŵana ŵaki anthulumi pakhomu la chihema chakukumanaku+ ndipu asambi.*+ 5 Pavuli paki, uto vakuvwala+ ndi kuvwalika Aroni. Umuvwaliki mkhanju wapanthuwa wa efodi, efodi ndipuso chakuvwala chapachifuŵa, ndipu lamba wakuluka wa efodi umumangi muchiwunu chaki umamphaumampha.+ 6 Umuvwaliki mphumphu kumutu waki ndipu pamphumphu uŵikepu chisimikizu chakupaturika cha kujipereka.+ 7 Uto mafuta ngakuŵikiya munthu pa udindu,+ ungadiri pamutu waki ndipu umusankhi.+

8 “Pavuli paki, uzi ndi ŵana ŵaki anthulumi pa masu pangu ndipu uŵavwaliki mikhanju.+ 9 Aroni ndi ŵana ŵaki anthulumi uŵavwaliki malamba nga mikhanju muviwunu vawu kweniso uŵavwaliki vakuvwala vakumutu. Yiwu ajengi asembi ndipu lenili ndi dangu lambula kumala.+ Venivi ndivu uchiti pakuŵika Aroni ndi ŵana ŵaki anthulumi kuti anditeŵetiyengi nge asembi.+

10 “Sonu uzi ndi tholi linthulumi panthazi pa chihema chakukumanaku, ndipu Aroni ndi ŵana ŵaki anthulumi aŵiki manja ngawu pamutu wa tholi lo.+ 11 Ubayi tholi lo pa masu paku Yehova, pakhomu la chihema chakukumanaku.+ 12 Uto zinyaki mwa ndopa za tholi lo ndi chikumbu chaku ndipu uzipaki kumasengwi nga guŵa la sembi.+ Ndopa zinyaki zosi uzidiri musina mwa guŵa la sembi.+ 13 Pavuli paki, uto mafuta ngosi+ ngakubwalu kwa matumbu, mafuta nga kuchiŵindi, sana zosi ziŵi ndi mafuta nga kusana zo, ndipu uviwotchi paguŵa la sembi kuti visunkhi josi.+ 14 Kweni nyama ya tholi lo, chikopa chaki ndi mavi ngaki ukaviwotchi kubwalu kwa msasa. Tholi lo, ndi sembi ya ubudi.

15 “Pavuli paki, uto mbereri yimoza yinthulumi ndipu Aroni ndi ŵana ŵaki anthulumi aŵiki manja ngawu pamutu wa mbereri yo.+ 16 Ubayi mbereri yo, uto ndopa zaki ndipu uziwazi mumphepeti mosi mwa guŵa la sembi.+ 17 Udumuwi mbereri yo viŵaluviŵalu, usuki matumbu ngaki+ ndi viboda vaki ndipu chiŵalu chechosi uchiŵiki pamoza ndi chinyaki, uŵikepu so mutu waki. 18 Uwotchi mbereri yosi yamphumphu ndipu yisunkhi josi paguŵa la sembi. Yeniyi ndi sembi yakupiriza ya kafungu kamampha* kwaku Yehova.+ Ndi sembi yakotcha ndi motu yakuperekeka kwaku Yehova.

19 “Pavuli paki, uto mbereri yinyaki yinthulumi ndipu Aroni ndi ŵana ŵaki anthulumi aŵiki manja ngawu pamutu wa mbereri yo.+ 20 Ubayi mbereri yo, uto zinyaki mwa ndopa zaki ndipu uzipaki pagutu lakumaryi laku Aroni kweniso pamakutu ngakumaryi nga ŵana ŵaki. Uzipaki so pavikumbu vikulu va manja ngawu ngamaryi ndipuso pavikumbu vikulu va maphazi ngawu ngamaryi, ndipu ndopa zo uziwazi mumphepeti mosi mwa guŵa la sembi. 21 Pavuli paki, uto zinyaki mwa ndopa zo ze paguŵa la sembi ndipuso nganyaki mwa mafuta ngakuŵikiya munthu pa udindu+ ndipu unthonyezi paku Aroni kweniso pavakuvwala vaki. Unthonyezi so pa ŵana ŵaki ndi pavakuvwala vawu. Uchiti venivi kuti iyu ndi ŵana ŵaki aje akupaturika kweniso kuti vakuvwala vaki ndi vakuvwala va ŵana ŵaki vije vakupaturika.+

22 “Pavuli paki, ku mbereri yo utoku mafuta, muchiya wamafuta, mafuta ngakubwalu kwa matumbu, mafuta nga kuchiŵindi, sana zosi ziŵi, kweniso mafuta nga kusana zo,+ ndipuso chiŵa chakumaryi, pakuti mbereri iyi njakuŵikiya munthu pa udindu nge wasembi.+ 23 Uto so chiŵandi chakuzunguliya, chiŵandi chakuzunguliya chazenji pakati chakudiraku mafuta ndipuso chiŵandi chakupapatika kutuliya mulipalu la viŵandi vambula chakutupisa lo le pa masu paku Yehova. 24 Viŵandi vosi venivi uviŵiki mumanja ngaku Aroni kweniso mumanja nga ŵana ŵaki anthulumi ndipu uvizungunyi uku ndi uku nge sembi yakuzungunya* pa masu paku Yehova. 25 Pavuli paki, uvituzgemu mumanja ngawu ndipu uviwotchi paguŵa la sembi, pachanya pa sembi yakupiriza, kuti vituzgi kafungu kamampha* pa masu paku Yehova. Yeniyi ndi sembi yakotcha ndi motu yakuperekeka kwaku Yehova.

26 “Pavuli paki, uto nganga ya mbereri yinthulumi yakuŵikiya munthu pa udindu nge wasembi+ yo yaperekeka chifukwa chaku Aroni ndipu uyizungunyi uku ndi uku nge sembi yakuzungunya* pa masu paku Yehova. Ndipu yijengi yaku.* 27 Utowesi nganga ya sembi yakuzungunya* ndipuso chiŵa cho ntchigaŵa chakupaturika cho chinguzungunyika ndipuso cho chingutoleka ku mbereri yinthulumi yakuŵikiya munthu pa udindu nge wasembi,+ yeniyo yinguperekeka chifukwa chaku Aroni ndipuso ŵana ŵaki. 28 Nganga ndi chiŵa viŵengi vaku Aroni ndi ŵana ŵaki anthulumi nge dangu lambula kumala lakuti Ayisirayeli alisungengi, pakuti viŵalu venivi ntchigaŵa chakupaturika. Vijengi chigaŵa chakupaturika cho chiperekekengi ndi Ayisirayeli.+ Ntchigaŵa chakupaturika cho aperekengi kwaku Yehova kutuliya pa sembi zawu za chimangu.+

29 “Asani ŵana anthulumi aku Aroni+ wo azamusere mumalu mwaki azisankhika ndi kuŵikika kuja asembi, azamugwiriskiya ntchitu vakuvwala vaki vakupaturika.+ 30 Asembi akutuliya pa ŵana anthulumi aku Aroni wo azamusere mumalu mwaki ndipuso wo azamuserenga muchihema chakukumanaku kuti ateŵete mumalu ngakupaturika, azamuvwalanga vakuvwala venivi kwa mazuŵa 7.+

31 “Uto mbereri yinthulumi yakuŵikiya munthu pa udindu nge wasembi ndipu ubiki nyama yaki mumalu ngakupaturika.*+ 32 Aroni ndi ŵana ŵaki anthulumi aryi+ nyama ya mbereri yinthulumi ndipuso viŵandi vo ve mulipalu pakhomu la chihema chakukumanaku. 33 Yiwu aryi vinthu vo vaperekeka nge sembi yakubenekere maubudi pakuŵaŵika pa udindu nge asembi ndipuso pakuŵatowesa. Kweni munthu wambula kuzomerezeka* wangaryanga cha vinthu venivi chifukwa chakuti ndi vinthu vakupaturika.+ 34 Asani nyama ya sembi yakuŵikiya munthu pa udindu nge wasembi ndipuso viŵandi vajaku mpaka mlenji, mutenere kuviwotcha ndi motu.+ Mungaryanga cha pakuti vakupaturika.

35 “Venivi ndivu uchitiyi Aroni ndi ŵana ŵaki anthulumi, mwakukoliyana ndi vosi vo ndakulamula. Utongi mazuŵa 7 kuti uŵaŵiki kuja asembi.+ 36 Zuŵa lelosi uperekengi ng’ombi yinthulumi nge sembi ya ubudi kuti yibenekere maubudi ndipuso uperekengi sembi yeniyi kuti utowesengi guŵa la sembi. Udengepu mafuta kuti litoweseki.+ 37 Utongi mazuŵa 7 kuti ubenekere maubudi nga guŵa la sembi ndipuso ulitowesi kuti lije lakupaturika ukongwa.+ Weyosi yo wakwaskengi guŵa la sembi wajengi wakupaturika.

38 “Uperekengi vinthu ivi paguŵa la sembi: Uperekengi ŵana a mbereri ŵaŵi anthulumi a chaka chimoza zuŵa lelosi kwambula kulekeza.+ 39 Uperekengi mwana wa mbereri yumoza ndi mlenji ndipu mwana wa mbereri munyaki umuperekengi ndi mazulu mdima wechendayambi.*+ 40 Asani upereka mwana wa mbereri wakwamba, uperekengi so ufwa wakusilirika wakukwana chigaŵa chimoza mwa vigaŵa 10 va mwesu wa efa,* wakudaku mafuta ngakuyengetulika umampha ngakukwana chigaŵa chimoza mwa vigaŵa vinayi va mwesu wa hini* ndi sembi ya chakumwa ya vinyu wakukwana chigaŵa chimoza mwa vigaŵa vinayi va mwesu wa hini. 41 Uperekengi mwana wa mbereri wachiŵi ndi mazulu mdima wechendayambi* limoza ndi sembi ya mbewu kweniso sembi ya chakumwa yakuyanana ndi yo wapereka ndi mlenji. Uyiperekengi nge sembi ya kafungu kamampha,* sembi yakotcha ndi motu yakuperekeka kwaku Yehova. 42 Mu migonezi yinu yosi muziperekengi sembi yakupiriza yeniyi nyengu zosi pa masu paku Yehova, pakhomu la chihema chakukumanaku, ko ndazamuwonekiyanga kwaku yimwi kuti ndilongoro nawi.+

43 “Ndazamuwonekiyanga kwa Ayisirayeli kumalu ngenanga ndipu ngazamutoweseka ndi unkhankhu wangu.+ 44 Ndazamutowesa chihema chakukumanaku kweniso guŵa la sembi ndipu ndazamutowesa so Aroni ndi ŵana ŵaki anthulumi+ kuti azinditeŵetiyengi nge asembi. 45 Ndazamuja* pakati pa Ayisirayeli, ndipu ndazamuja Chiuta wawu.+ 46 Yiwu azamuziŵa kuti ini ndini Yehova Chiuta wawu, yo wakuŵatuzga mucharu cha Ijipiti kuti ndije pakati pawu.+ Ini ndini Yehova Chiuta wawu.

30 “Upangi guŵa la sembi kuti uwotchiyengepu vakununkhira;+ lije lamathabwa nga vimiti va akeshiya.+ 2 Lije lakuyanana muvigaŵa vosi vinayi, mu utali lije masentimita pafufupi 45,* mu usani masentimita pafufupi 45,* ndipu kutuwa pasi kufika pachanya lije pafufupi mita yimoza.* Guŵa la sembi ndi masengwi ngaki vipangiki kutuliya ku chimiti chimoza.+ 3 Ulipaki golidi chayiyu, pachanya, mumphepeti mwaki mosi ndipuso mumasengwi ngaki. Upangi so mkomberu wagolidi* kuzunguliya guŵa la sembi lo. 4 Upangi so mpheti ziŵi zagolidi mumphata mwa mkomberu, uku ndi uku. Mumpheti zenizi ndimu muserezekengi vimiti vakunyamuliya guŵa la sembi. 5 Upangi vimiti vakunyamuliya kutuliya ku vimiti va akeshiya ndi kuvipaka golidi. 6 Guŵa la sembi za vakununkhira uliŵiki panthazi pa ketani ya Malu Ngakupaturika Ukongwa kuti lije pafupi ndi bokosi la Ukaboni.*+ Ndiwonekiyengi kwaku yiwi+ kutuliya pachanya pa chibenekeleru cha bokosi la Ukaboni.

7 “Aroni+ wawotchiyengepu+ vakununkhira,+ kuti josi lisunkhengi paguŵa la sembi asani waphwere nyali+ mlenji wewosi. 8 Kweniso asani Aroni wabuska nyali mazulu mdima wechendayambi,* wawotchengi vakununkhira. Iyi ndi sembi ya vakununkhira yakuti muperekengi nyengu zosi pa masu paku Yehova mu migonezi yinu yosi. 9 Paguŵa la sembi za vakununkhira, mungaperekiyangapu cha sembi ya vakununkhira yambula kuzomerezeka+ pamwenga sembi yakupiriza pamwenga sembi ya mbewu, ndipuso mungapunguliyangapu cha sembi ya chakumwa. 10 Kamoza pa chaka,+ Aroni wapakengi zinyaki mwa ndopa za sembi ya ubudi kumasengwi nga guŵa la sembi kuti litoweseki.+ Venivi vichitikengi mu migonezi yinu yosi. Pakuti guŵa la sembi ndakupaturika ukongwa kwaku Yehova.”

11 Pavuli paki, Yehova wangukambiya Mozesi kuti: 12 “Nyengu yeyosi yo muchita kalembera ndi kuŵerenga Ayisirayeli,+ weyosi waperekengi kwaku Yehova chakuwombole umoyu waki. Achitengi venivi kuti milili yileki kuŵawiya pa nyengu yo alembeka mazina. 13 Wosi wo alembesa aperekengi vinthu ivi: hafu ya sekeli* mwakukoliyana ndi sekeli ya mumalu ngakupaturika.*+ Magera* 20 ngayanana ndi sekeli yimoza. Hafu ya sekeli ntchakupereka chakuluta kwaku Yehova.+ 14 Weyosi yo walembesa, asani we ndi vyaka 20 pamwenga kujumpha, waperekengi chakupereka kwaku Yehova.+ 15 Pakupereka vakupereka kwaku Yehova, ŵanthu akukhupuka angaperekanga vinandi cha kujumpha hafu ya sekeli* ndipu akavu angaperekanga cha vakupeleŵere hafu ya sekeli. Vakupereka venivi vigwirengi ntchitu pakupereka sembi yakubenekere maubudi kuti muwombo maumoyu nginu. 16 Ulondengi ndalama zasiliva zakubenekere maubudi kwa Ayisirayeli ndipu uziperekengi kuchihema chakukumanaku kuti zikawovyengi pa uteŵeti wo uchitika kweniko, kuti Yehova wakumbukengi Ayisirayeli ndipuso kuti mubenekere maubudi nginu ndi chilatu chakuti muwombo maumoyu nginu.”

17 Yehova wangulongoro so ndi Mozesi kuti: 18 “Upangi beseni lamkuŵa ndipuso chakuŵikapu chaki.+ Pavuli paki, uliŵiki pakati pa chihema chakukumanaku ndi guŵa la sembi ndipu udemu maji ngakusamba.+ 19 Penapa ndipu Aroni limoza ndi ŵana ŵaki anthulumi asambiyengepu mumanja kweniso mumalundi.+ 20 Asani asere muchihema chakukumanaku pamwenga atuza paguŵa la sembi kuti ateŵete kweniso kuti awotche Yehova sembi kuti josi laki likwere kuchanya, asambengi ndi maji kuti aleki kufwa. 21 Atenere kusamba mumanja kweniso mumalundi kuti aleki kufwa. Lenili liŵengi dangu lambula kumala kwaku yiwu, kwaku Aroni ndi mphapu yaki mu migonezi yawu yosi.”+

22 Yehova wangulutirizga kulongoro ndi Mozesi ndipu wangukamba kuti: 23 “Pavuli paki, uto vakununkhira vamampha ukongwa ivi: mure wakukhoma wakukwana masekeli* 500, sinamoni wakununkhira umampha wakukwana masekeli 250, ngo ndi hafu ya mwesu wa mure, kalamasi wakununkhira umampha wakukwana masekeli 250, 24 ndipuso kasiya wakukwana masekeli 500 ndipu vipimiki mwakukoliyana ndi sekeli ya mumalu ngakupaturika.*+ Uto so mafuta nga maolivi ngakukwana hini* yimoza. 25 Pavuli paki, vinthu venivi upangiyi mafuta ngakupaturika ngakuŵikiya munthu pa udindu. Uvisazgi umamphaumampha.+ Ngenanga ngajengi mafuta ngakupaturika ngakuŵikiya munthu pa udindu.

26 “Mafuta ngo ungadiri pachihema chakukumanaku+ ndi pabokosi la Ukaboni, 27 pathebulu ndi paviyaŵi vaki vosi, pachakuŵikapu nyali ndi paviyaŵi vaki vosi, paguŵa la sembi za vakununkhira, 28 paguŵa la sembi zakupiriza ndi paviyaŵi vaki vosi kweniso pabeseni ndi chakuŵikapu chaki. 29 Uvitowesi kuti vije vakupaturika ukongwa.+ Weyosi yo wavikongi wajengi wakupaturika.+ 30 Mafuta ngo ungagwiriskiyi ntchitu pakusankha* Aroni+ ndi ŵana ŵaki anthulumi+ ndipu uŵatowesi kuti anditeŵetiyengi nge asembi.+

31 “Ukambiyi Ayisirayeli kuti, ‘Mafuta yanga ngajengi mafuta ngangu ngakupaturika ngakuŵikiya munthu pa udindu mu migonezi yinu yosi.+ 32 Ŵanthu angapakanga cha mafuta yanga ndipuso mungapanganga mafuta nganyaki cha ngakuyanana ndi mafuta ngenanga. Ndi mafuta ngakupaturika. Ngalutiriyi kuja mafuta ngakupaturika kwaku yimwi. 33 Weyosi yo wapangengi mafuta nge yanga ndipuso yo wadirengi nganyaki mwa mafuta ngenanga pa munthu wambula kuzomerezeka,* watenere kubayika kuti waleki kuja pakati pa ŵanthu a mtundu waki.’”+

34 Pavuli paki, Yehova wangukambiya Mozesi kuti: “Uto miyesu yakuyanana ya vakununkhira ivi:+ sitakate, onika, galibanamu wakununkhira ndipuso libani lamampha. 35 Upangi vakununkhira+ mwakugwiriskiya ntchitu vinthu venivi. Uvisazgi umamphaumampha, udeku mche,+ vije vamampha ndipuso vakupaturika. 36 Upuwi vinyaki mwa vakununkhira venivi kuti vije ufwa wakusilirika ndipu unyaki mwa ufwa wo uwuŵiki pafupi ndi bokosi la Ukaboni muchihema chakukumanaku, mo ndiwonekiyengi kwaku yiwi. Vakununkhira vo vije vakupaturika ukongwa kwaku yimwi. 37 Mungapanganga cha vakununkhira ivi kuti muvigwiriskiyengi ntchitu mwaŵeni.+ Uviwonengi kuti vakupaturika kwaku Yehova. 38 Weyosi yo wapangengi vakununkhira vakuyanana ndi venivi kuti wavwengi kafungu kaki, watenere kubayika kuti waleki kuja pakati pa ŵanthu a mtundu waki.”

31 Yehova wangulutirizga kulongoro ndi Mozesi ndipu wangukamba kuti: 2 “Awona, ndasankha Bezaleli+ mwana munthulumi waku Uri, mwana munthulumi waku Huru, wa fuku laku Yuda.+ 3 Ndimupaskengi* mzimu wangu, kuti waje ndi zeru, wavwisengi vinthu, waziŵengi vinthu, waje ndi lusu lakupanga vinthu vakupambanapambana, 4 waziŵengi mo vinthu vitenere kupangikiya, wapangengi vinthu vagolidi, vasiliva ndi vamkuŵa, 5 waje ndi lusu lakudumuwa mya ndi kuyiŵika mumalu mwaki+ ndipuso wapangengi vinthu vakupambanapambana kutuliya ku vimiti.+ 6 Kweniso ndasankha Oholiyabu+ mwana munthulumi waku Ahisamaki wa fuku laku Dani kuti wawovyi Bezaleli. Ndiŵikengi zeru mumitima ya ŵanthu wosi wo ŵe ndi lusu* kuti apangi vinthu vosi vo ndakulamula. Vinthu vo atenere kupanga ndi ivi:+ 7 chihema chakukumanaku,+ bokosi la Ukaboni+ ndi chibenekeleru chaki,+ vipangizu vosi va muchihema, 8 thebulu+ ndi viyaŵi vaki, chakuŵikapu nyali chagolidi chayiyu ndi viyaŵi vaki vosi,+ guŵa la sembi za vakununkhira,+ 9 guŵa la sembi zakupiriza+ ndi viyaŵi vaki vosi, beseni ndi chakuŵikapu chaki,+ 10 vakuvwala vakulukika umampha, vakuvwala vakupaturika vaku Aroni wasembi, vakuvwala va ŵana ŵaki anthulumi vakuti avwalengi achiteŵete nge asembi,+ 11 mafuta ngakuŵikiya munthu pa udindu ndipuso vakununkhira va mumalu ngakupaturika.+ Yiwu achiti vosi vo ndakulamula.”

12 Yehova wangukambiya so Mozesi kuti: 13 “Ulongoro ndi Ayisirayeli ndipu uŵakambiyi kuti, ‘Muwonesesi kuti musunga masabata ngangu,+ pakuti ntchisimikizu pakati paku ini ndi yimwi mu migonezi yinu, kuti muziŵi kuti ini Yehova, nditikutowesani. 14 Musungengi zuŵa la Sabata, pakuti ndakupaturika kwaku yimwi.+ Weyosi yo waliyuyuwengi watenere kubayika. Munthu weyosi yo wagwirengi ntchitu pa zuŵa ili, watenere kubayika kuti waleki kuja pakati pa ŵanthu a mtundu waki.+ 15 Mungagwira ntchitu kwa mazuŵa 6, kweni zuŵa la 7 ndi sabata ndipu mupumuwengi.+ Ili ndi zuŵa lakupaturika kwaku Yehova. Weyosi yo wagwirengi ntchitu pa zuŵa la Sabata watenere kubayika. 16 Ayisirayeli atenere kusunga Sabata; atenere kusunga Sabata mu migonezi yawu yosi. Lenili ndi phanganu lamuyaya. 17 Ntchisimikizu chambula kumala pakati paku ini ndi Ayisirayeli,+ pakuti mu mazuŵa 6, Yehova wangupanga kuchanya ndi charu chapasi ndipu pa zuŵa la 7 wangupumuwa.’”+

18 Sonu Chiuta wati wamaliza ŵaka kulongoro ndi Mozesi pa Phiri la Sinayi, wangumupaska mya yiŵi ya Ukaboni,+ pamya yo pangulembeka mazu ndi chikumbu chaku Chiuta.+

32 Ndipu ŵanthu anguwona kuti Mozesi waswera kusika muphiri.+ Mwaviyo, anguwungana kwaku Aroni ndipu angumukambiya kuti: “Soka, tipangiyi chiuta kuti watilongozgengi+ chifukwa tiziŵa cha vo vachitikiya Mozesi, munthu yo wangutilongozga tichituwa mucharu cha Ijipiti.” 2 Sonu Aroni wanguŵakambiya kuti: “Toni ndeŵereŵi zagolidi+ zo ze mumakutu nga awolu ŵinu, ŵana ŵinu anthulumi ndi ŵana ŵinu anthukazi ndipu muzi nazu kwaku ini.” 3 Mwaviyo, ŵanthu wosi anguzuwa ndeŵereŵi zagolidi zo zenga mumakutu ngawu ndipu anguza nazu kwaku Aroni. 4 Pavuli paki, Aroni wanguto golidi yo ndipu wangupanga chikozgu cha mwana wa ng’ombi mwakugwiriskiya ntchitu chidya chakujobe.+ Ŵanthu wo angwamba kukamba kuti: “Yimwi Ayisirayeli, uyu ndiyu Chiuta winu, yo wakukutuzgani mucharu cha Ijipiti.”+

5 Aroni wati wawona venivi, wanguzenga guŵa la sembi panthazi pa chikozgu cha mwana wa ng’ombi. Pavuli paki, Aroni wangudaniriza kuti: “Mawa tichitiyengi phwandu Yehova.” 6 Mawa laki, ŵanthu wo anguyuka mlenjilenji ndipu angupereka sembi zakupiriza kweniso sembi za chimangu. Pavuli paki anguja pasi, angurya ndi kumwa. Ndipu angusoka ndi kwamba kukondwa.+

7 Sonu Yehova wangukambiya Mozesi kuti: “Luta, sika muphiri, chifukwa ŵanthu ŵaku wo unguŵalongozga kutuwa mucharu cha Ijipiti achita vinthu vo vingachitiska kuti anangiki.+ 8 Yiwu atuwamu liŵi mu nthowa yo ndinguŵalamula kuti ayendengemu.+ Ajipangiya chikozgu cha mwana wa ng’ombi, atichisindamiya ndi kupereka sembi kwaku ichu ndipu akamba kuti, ‘Yimwi Ayisirayeli, uyu ndiyu Chiuta winu, yo wakukutuzgani mucharu cha Ijipiti.’” 9 Yehova wangukambiya so Mozesi kuti: “Ndawona kuti ŵanthu yaŵa mbakumira mtima.*+ 10 Mwaviyo ndakwiya ukongwa. Sonu ndileki kuti ndiŵabayi ndipu ndichitiskengi kuti yiwi uje mtundu ukulu mumalu mwaku yiwu.”+

11 Pavuli paki, Mozesi wanguŵeyere Yehova Chiuta waki+ kuti: “Yehova, ntchifukwa wuli mwakwiyiya ŵanthu ŵinu wo mukuŵatuzga mucharu cha Ijipiti ndi nthazi zinu zikulu kweniso janja linu lanthazi?+ 12 Ayijipiti akambiyenji kuti, ‘Wenga ndi vilatu viheni pakuŵatuzga mucharu chidu. Wakhumbanga kuti wakaŵabayiyi kumapiri ndi kuŵatuzgiyapu limu pacharu chapasi’?+ Mwaviyo, wezani ukali winu wakukole ndipu sinthani maŵanaŵanu nginu kuti muleki kuwisiya soka ŵanthu ŵinu. 13 Kumbukani ateŵeti ŵinu, Abrahamu, Isaki ndi Isirayeli wo munguŵalapizgiya mu zina linu kuti: ‘Ndazamuyandanisa mphapu* yinu nge nyenyezi zakuchanya+ ndipu charu chosi ichi cho ndachisankha, ndazakuchipereka ku mphapu* yinu kuti chije chawu mpaka muyaya.’”+

14 Mwaviyo, Yehova wangusintha maŵanaŵanu ngaki pa soka lo wangukamba kuti wawisiyengi ŵanthu ŵaki.+

15 Pavuli paki, Mozesi wangung’anamuka ndipu wangusika muphiri. Iyu wenga ndi mya yiŵi ya Ukaboni+ mumanja mwaki.+ Mya yo yingulembeka kosikosi; yingulembeka mazu kuseri ndi kuseri. 16 Mya yo yingupangika ndi Chiuta, ndipu Chiuta ndiyu wangulembapu mazu mwakuchita kujoba.+ 17 Yoswa wati wayamba kuvwa chiwawa cha ŵanthu wo adanirizanga, wangukambiya Mozesi kuti: “Mumsasa muvwika chiwawa cha nkhondu.” 18 Kweni Mozesi wangukamba kuti:

19 Mozesi wati wafika pafupi ndi msasa ndi kuwona mwana wa ng’ombi+ kweniso ŵanthu wo avinanga, wangukwiya ukongwa. Mwaviyo, wanguponya pasi mya yo yenga mumanja mwaki ndipu wanguyiswiya musina mwa phiri.+ 20 Wanguto mwana wa ng’ombi yo angupanga, wangumuwotcha ndi motu ndipu wangumusira mpaka kuja fuvu.+ Pavuli paki, wangudira fuvu lo mumaji ndipu wangukambiya Ayisirayeli kuti amwi.+ 21 Ndipu Mozesi wangukambiya Aroni kuti: “Kumbi ŵanthu yaŵa akuchitiyanji kuti uŵachitiski ubudi ukulu viyo?” 22 Aroni wangumuka kuti: “Ambuya, kukwiya cha. Muziŵa umampha kuti ŵanthu yaŵa atanja kuchita vinthu viheni.+ 23 Sonu angundikambiya kuti, ‘Tipangiyi chiuta kuti watilongozgengi chifukwa tiziŵa cha vo vachitikiya Mozesi, munthu yo wangutilongozga tichituwa mucharu cha Ijipiti.’+ 24 Mwaviyo, ndinguŵakambiya kuti, ‘Weyosi yo we ndi golidi wakato ndi kuza nayu kwaku ini.’ Pavuli paki, ndingumuponya pamotu ndipu pangutuwa mwana wa ng’ombi.”

25 Mozesi wanguwona kuti ŵanthu wo angugaruka chifukwa chakuti Aroni wanguŵalekere kuti agaruki, ndipu angulengeseka pa masu pa arwani ŵawu. 26 Pavuli paki, Mozesi wanguma pageti la msasa ndipu wangukamba kuti: “Ndiyani yo we kuchigaŵa chaku Yehova? Wazi kwaku ini!”+ Ndipu Alevi wosi anguwungana kwaku iyu. 27 Sonu Mozesi wangukambiya Alevi kuti: “Yehova Chiuta waku Isirayeli wakamba kuti, ‘Weyosi wamangiriyi lipanga laki, ndipu wajumphi mumsasa wosi kutuwa kwakuselere mpaka kwakuselere kunyaki ndipu wabayi mubali waki, munthu yo waja nayu pafupi ndipuso mubwezi waki.’”+ 28 Alevi anguchita vo Mozesi wanguŵakambiya. Mwaviyo, anthulumi pafufupi 3,000 angubayika pa zuŵa lo. 29 Pavuli paki, Mozesi wangukamba kuti: “Jitoweseni kuti muteŵete Yehova msanawale, pakuti weyosi wayukiya mwana waki munthulumi ndipuso mubali waki.+ Msanawale Chiuta wakutumbikeningi.”+

30 Mawa laki, Mozesi wangukambiya ŵanthu wo kuti: “Mwachita ubudi ukulu ukongwa. Sonu ndikhumba kukwere kuphiri kwaku Yehova kuti panyaki ndingachikupepesiyani kuti wakugowokiyeni ubudi winu.”+ 31 Sonu Mozesi wanguwere kwaku Yehova ndipu wangumukambiya kuti: “Ŵanthu yaŵa achita ubudi ukulu ukongwa! Ajipangiya chiuta wagolidi!+ 32 Kweni asani mukhumba, agowokiyeni ubudi wawu.+ Asani po cha, mbwenu mundisisiti mubuku linu lo mukulemba.”+ 33 Kweni Yehova wangukambiya Mozesi kuti: “Munthu yo wandibudiya, ndiyu ndimusisitengi mubuku langu. 34 Sonu luta, longozge ŵanthu yaŵa kumalu ngo ndakukambiya. Awona! Mungelu wangu wazamuja panthazi paku+ ndipu pa zuŵa lo ndazamuyeruzgiya ŵanthu yaŵa, ndazakuŵalanga chifukwa cha maubudi ngawu.” 35 Pavuli paki, Yehova wangwamba kuŵawisiya milili ŵanthu wo chifukwa cha mwana wa ng’ombi yo Aroni wanguŵapangiya ŵati amupempha.

33 Yehova wangulutirizga kulongoro ndi Mozesi ndipu wangukamba kuti: “Tuwaku kunu limoza ndi ŵanthu wo unguŵalongozga kutuwa mucharu cha Ijipiti. Muluti kucharu cho ndingulapizga kwaku Abrahamu, Isaki kweniso Yakobe kuti, ‘Ndiperekengi charu ichi ku mphapu* yaku.’+ 2 Nditumizengi mungelu panthazi paku+ ndipu ndidikisengi Akanani, Aamori, Ahiti, Aperezi, Ahivi ndi Ayebusi.+ 3 Lutani kucharu chakwenda mkaka ndi uchi.+ Kweni ndiyendengi pakati pinu cha kuchitiya kuti ndingakubayani munthowa,+ pakuti ndimwi ŵanthu akumira mtima.”*+

4 Ŵanthu ŵati avwa mazu ngakofya ngenanga, angwamba kuliya ndipu pengavi munthu weyosi yo wanguvwala vakujitowese. 5 Yehova wangukambiya Mozesi kuti: “Kambiya Ayisirayeli kuti, ‘Ndimwi ŵanthu akumira mtima.*+ Mu kanyengu kamanavi, ndingayenda pakati pinu ndi kukubayani mosi.+ Sonu mungavwalanga cha vakujitowese po ndiŵanaŵana vo ndingachita namwi.’” 6 Mwaviyo, Ayisirayeli avwalanga cha vakujitowese kwambiya pa nyengu yo ŵenga pa Phiri la Horebu kuluta kunthazi.

7 Sonu Mozesi wanguto hema laki ndipu wanguchilijintha kubwalu kwa msasa, chapataliku. Hema lo wangulidana kuti chihema chakukumanaku. Ndipu munthu weyosi yo wakhumbanga kuziŵa maŵanaŵanu ngaku Yehova pa nkhani yinyaki,+ walutanga kuchihema chakukumanaku chenichi cho chenga kubwalu kwa msasa. 8 Asani Mozesi waluta kuchihema, ŵanthu wosi asokanga ndi kuma wima pamakhomu nga mahema ngawu ndipu amulereseskanga mpaka po waselere muchihema. 9 Asani Mozesi wasere ŵaka muchihema, chipilala cha mtambu+ chasikanga ndi kuma pakhomu la chihema Chiuta wachilongoro ndi Mozesi.+ 10 Asani ŵanthu wosi awona kuti chipilala cha mtambu chama pakhomu la chihema, weyosi wasokanga ndi kusindama pakhomu la hema laki. 11 Yehova walongoronga ndi Mozesi pa masu ndi pa masu+ nge mo munthu wangalongolore ndi munthu munyaki. Ndipu asani Mozesi wawere kumsasa, Yoswa+ mwana waku Nuni yo wenga mteŵeti waki kweniso yo wamuwovyanga,+ watuwangapu cha pachihema.

12 Sonu Mozesi wangukambiya Yehova kuti: “Mwandikambiya kuti, ‘Longozga ŵanthu yaŵa,’ kweni mwandiziŵisa cha munthu yo walutengi nani. Mwakamba so kuti, ‘Nditikuziŵa umampha,* ndipuso wasaniya wezi pa masu pangu.’ 13 Asani ndasaniya wezi pa masu pinu, ndiziŵiseni nthowa zinu,+ kuti ndikuziŵeni ndipuso kuti ndilutirizgi kusaniya wezi pa masu pinu. Kumbukani kuti mtundu uwu mbanthu ŵinu.”+ 14 Sonu Chiuta wangukamba kuti: “Ini ndilutengi nawi,+ ndipuso ndikupumuzgengi.”+ 15 Pavuli paki, Mozesi wangukamba kuti: “Asani yimwi mulutengi nasi cha, mbwenu mungazomerezanga cha kuti tituwepu panu. 16 Kumbi ŵanthu aziŵengi wuli kuti ini ndi ŵanthu ŵinu tasaniya wezi pa masu pinu? Asi ini limoza ndi ŵanthu ŵinu tipambanengi ndi ŵanthu anyaki wosi pacharu chapasi+ asani yimwi mwaluta nasi?”+

17 Yehova wangulutirizga kulongoro ndi Mozesi kuti: “Ndichitengi so vo wapempha, chifukwa chakuti wasaniya wezi pa masu pangu ndipuso chifukwa chakuti nditikuziŵa umampha.”* 18 Pavuli paki, Mozesi wangukamba kuti: “Chondi ndilongoni unkhankhu winu.” 19 Kweni Chiuta wangukamba kuti: “Ndikulongongi umampha wangu wosi, ndipuso ndipharazgengi zina langu lakuti Yehova kwaku yiwi.+ Munthu yo ndakhumba kumulongo wezi ndimulongongi wezi, ndipu yo ndakhumba kumulongo lisungu ndimulongongi lisungu.”+ 20 Kweni wangukamba so kuti: “Chisku changu ungachiwona cha, pakuti palivi munthu yo wangawona ini ndi kuja ndi umoyu.”

21 Yehova wangulutirizga kukamba kuti: “Pafupi ndi ini yapa pe malu. Ja pajalawi yapa. 22 Asani unkhankhu wangu ujumpha, ndikuŵikengi kumphanji ya jalawi, ndipu ndikubenekeriyengi ndi janja langu mpaka po ndajumphiya. 23 Pavuli paki, ndituzgengepu janja langu, ndipu uwonengi msana wangu pe. Kweni chisku changu chingawoneka cha.”+

34 Pavuli paki, Yehova wangukambiya Mozesi kuti: “Sema mya yiŵi ya nge yakwamba,+ ndipu pamya yo ndilembengepu mazu ngo ngenga pamya yakwamba+ yo ukuswa.+ 2 Unozgeke, chifukwa mawa ndi mlenji, ukwerengi pa Phiri la Sinayi ndipu wamuja pafupi ndi ini, pachanya paphiri penipo.+ 3 Kweni ungazilutanga ndi munthu munyaki cha, ndipu paphiri pangaziwonekanga munthu munyaki weyosi cha. Ŵanthu angaziliskanga cha mbereri pamwenga ng’ombi zawu pafupi ndi phiri lenili.”+

4 Mwaviyo, Mozesi wangusema mya yiŵi ya nge yakwamba ndipu wanguyuka mlenjilenji ndi kukwera pa Phiri la Sinayi nge mo Yehova wangumulamuliya. Iyu wangupinga mya yiŵi mumanja mwaki. 5 Pavuli paki, Yehova wangusika+ mumtambu ndi kuma pafupi ndi Mozesi penipo paphiri ndipu wangupharazga zina laki lakuti Yehova.+ 6 Yehova wajumphanga panthazi paku Mozesi ndipu wapharazganga kuti: “Yehova, Yehova, Chiuta walisungu+ kweniso wawezi,+ wambula kukwiya liŵi+ ndipuso wakuzaza ndi chanju chambula kumala+ kweniso uneneska,*+ 7 walongo chanju chambula kumala ku ŵanthu masawuzandi,+ wagowoke ŵanthu wo ananga, wo achita vinthu viheni ndipuso wo abuda,+ kweni waleka cha kulanga munthu yo wananga,+ walanga ŵana kweniso azuku mpaka mugonezi wachitatu ndipuso wachinayi chifukwa cha vo awusewu ananga.”+

8 Nyengu yeniyo Mozesi wangujikama ndi kusindama mpaka chisku chaki pasi. 9 Pavuli paki, wangukamba kuti: “Asani ndasaniya wezi pa masu pinu Yehova, chondi Yehova mbwenu lutani nasi,+ chinanga kuti ndisi ŵanthu akumira mtima.*+ Tigowokiyeni vo tananga kweniso ubudi widu+ ndipu tizomerezeni kuti tije ŵanthu ŵinu.” 10 Chiuta wangumuka kuti: “Ndichita namwi phanganu ili: Ndichitengi vinthu vo vechendachitikepu pacharu chosi chapasi pamwenga pakati pa mitundu yosi ya ŵanthu.+ Ndichitengi venivi ŵanthu ŵaku wosi achiwona. Ndipu ŵanthu wosi wo muja pakati pawu awonengi ntchitu zaku Yehova chifukwa vinthu vo ndichitengi namwi vakuchitiska mantha.+

11 “Vwisiyani mwakuphwere vo nditikulamulani msanawale.+ Ndidikisengi Aamori, Akanani, Ahiti, Aperezi, Ahivi ndipuso Ayebusi+ pa masu pinu. 12 Muphwere kuti mungachichitanga cha phanganu ndi ŵanthu a mucharu cho mulutaku+ chifukwa chingachija chiŵana kwaku yimwi.+ 13 Kweni mukabwanganduwi maguŵa ngawu nga sembi, mukaswi vipilala vawu vakupaturika kweniso mukawisiyi pasi mapolu ngawu ngakupaturika.*+ 14 Mungasindamiyanga chiuta munyaki cha,+ chifukwa Yehova ndi Chiuta yo waziŵika kuti* wakhumba kuti ŵanthu ajiperekengi kwaku iyu pe.* Iyu ndi Chiuta yo wakhumba kuti ŵanthu ajiperekengi kwaku iyu pe.+ 15 Muphwere kuti mungachichitanga cha phanganu ndi ŵanthu a mucharu cho, chifukwa asani achita uhuli ndi achiuta ŵawu ndipuso apereka sembi kwa achiuta ŵawu,+ azakukudanani ndipu mwazamukurya sembi zawu.+ 16 Pavuli paki, mwazamuto ŵana ŵawu anthukazi kuti aje awolu a ŵana ŵinu anthulumi,+ ndipu ŵana ŵawu anthukazi azamuchitanga uhuli ndi achiuta ŵawu ndi kuchitiska kuti ŵana ŵinu anthulumi achiti uhuli ndi achiuta ŵawu.+

17 “Mungapanganga cha achiuta avisulu vakusongono.+

18 “Muchitengi Phwandu la Viŵandi Vambula Chakutupisa.+ Muryengi viŵandi vambula chakutupisa nge mo ndakulamuliyani. Ndipu muchitengi venivi kwa mazuŵa 7 pa nyengu yakuŵikika mu mwezi wa Abibu*+ chifukwa mungutuwa mucharu cha Ijipiti mu mwezi wa Abibu.

19 “Mwana munthulumi weyosi wakwamba kuwaku* ngwangu,+ ndipuso mwana wakwamba kuwaku wa viŵetu vinu vosi, kwali ndi ng’ombi yinthulumi yakwamba kuwaku pamwenga mbereri, vangu.+ 20 Bulu weyosi wakwamba kuwaku mumuwombongi ndi mbereri. Kweni asani mwatondeka kumuwombo, mumufyongi khosi. Mwana weyosi wakwamba kuwaku wa ŵana ŵinu anthulumi, mumuwombongi.+ Palivi munthu yo watenere kuziwoneke pa masu pangu ndi manja ngaŵaka.

21 “Mugwirengi ntchitu kwa mazuŵa 6, kweni pa zuŵa la 7 mupumuwengi.*+ Chinanga ndi mu nyengu ya kulima ndipuso ya kuvuna, mupumuwengi mbwenu pa zuŵa la 7.

22 “Ndipu mugwiriskiyengi ntchitu vipasu vakwamba kucha va tirigu vo mwakolola kuti muchitengi Phwandu la Masabata kweniso Phwandu la Kuwunganisa* kukumaliya kwa chaka.+

23 “Katatu pa chaka, anthulumi wosi awonekiyengi pa masu pa Ambuya auneneska, Yehova, Chiuta waku Isirayeli.+ 24 Pakuti ndazamudikisa mitundu yinyaki pa masu pinu+ ndi kusanuzga chigaŵa chinu, ndipu muchiluta kuchiwona chisku chaku Yehova Chiuta winu katatu pa chaka, palivi munthu yo wazamukhumbira charu chinu.

25 “Mungaperekanga cha ndopa za sembi yangu limoza ndi chechosi chakusazgaku chakutupisa.+ Sembi ya phwandu la Pasika yingasungikanga cha usiku wosi mpaka mlenji.+

26 “Muziperekengi kunyumba yaku Yehova Chiuta winu vipasu vakwamba kucha vamampha ukongwa vakutuliya muminda yinu.+

“Mungabikanga cha mwana wa mbuzi mumkaka wa nyina.”+

27 Yehova wangulutirizga kulongoro ndi Mozesi kuti: “Ulembi mazu yanga + chifukwa ndichitengi phanganu ndi yiwi kweniso Ayisirayeli mwakukoliyana ndi mazu ngenanga.”+ 28 Ndipu Mozesi wangulutirizga kuja ndi Yehova kuphiri kwa mazuŵa 40 msana ndi usiku. Iyu waryanga chiŵandi cha ndipuso wamwanga maji cha.+ Ndipu Chiuta wangulemba mazu nga phanganu pamya, Marangu 10.*+

29 Pavuli paki, Mozesi wanguweku ku Phiri la Sinayi, ndipu wangupinga mya yiŵi ya Ukaboni mumanja mwaki.+ Mozesi wati waweku kuphiri wanguziŵa cha kuti chisku chaki chaŵalanga chifukwa chakuti wangulongoro ndi Chiuta. 30 Aroni ndi Ayisirayeli wosi ŵati awona Mozesi, anguwona kuti chisku chaki chaŵalanga. Mwaviyo anguchita mantha kuza kufupi ndi iyu.+

31 Kweni Mozesi wanguŵadana ndipu Aroni ndi alongozgi wosi ŵa Ayisirayeli anguza kwaku iyu. Sonu Mozesi wangulongoro nawu. 32 Pavuli paki, Ayisirayeli wosi anguza kufupi ndi Mozesi, ndipu wanguŵakambiya marangu ngosi ngo Yehova wangumupaska pa Phiri la Sinayi.+ 33 Asani Mozesi wamaliza kulongoro nawu, wabenekeriyanga chisku chaki ndi salu.+ 34 Kweni asani Mozesi waluta kuchiwoneke pa masu paku Yehova kuti walongoro nayu, watuzgangaku salu kuchisku chaki mpaka po watuliya pabwalu.+ Pavuli paki, watuwanga ndipu wakambiyanga Ayisirayeli marangu ngo walonde.+ 35 Ayisirayeli awonanga kuti chisku chaku Mozesi chaŵalanga ndipu Mozesi wabenekeriyanga chisku chaki ndi salu mpaka po walutiyanga kuchilongoro ndi Chiuta.*+

35 Pavuli paki, Mozesi wanguwunganisa Ayisirayeli wosi* ndipu wanguŵakambiya kuti: “Yehova walamula kuti muchitengi vinthu ivi:+ 2 Mungagwira ntchitu kwa mazuŵa 6, kweni zuŵa la 7 lijengi lakupaturika kwaku yimwi. Mupumuwengi pa zuŵa ili chifukwa ndi sabata ndipu ndakupaturika kwaku Yehova.+ Weyosi yo wagwirengi ntchitu pa zuŵa lenili wabayikengi.+ 3 Mungapembanga motu cha pa zuŵa la Sabata kwekosi ko muja.”

4 Pavuli paki, Mozesi wangukambiya Ayisirayeli wosi* kuti: “Yehova walamula kuti muchiti vinthu ivi, 5 ‘Muto vinthu vinu ndipu muvipereki kwaku Yehova.+ Weyosi yo mtima waki ukhumba,+ wapereki kwaku Yehova vinthu ivi: golidi, siliva, mkuŵa, 6 wuzu wabuluu, weya wa mbereri wapepo, wuzu uyera, salu zamampha, weya wa mbuzi,+ 7 vikopa va mbereri vakudaya ndi dayi muyera, vikopa va katumbwi, mathabwa nga vimiti va akeshiya, 8 mafuta nga nyali, mafuta nga basamu ngakupangiya mafuta ngakuŵikiya munthu pa udindu ndipuso ngakupangiya vakununkhira,+ 9 mya ya onekisi ndipuso mya yinyaki yakuŵika pa efodi+ kweniso pachakuvwala chapachifuŵa.+

10 “‘Ŵanthu wosi wo ŵe ndi lusu*+ pakati pinu azi ndipu azipangi vinthu vo Yehova walamula. 11 Vinthu vaki ndi ivi, chihema ndi salu yaki kweniso chakubenekere pachanya, takukoloŵeke taki ndi mafulemu ngaki ngakumika, nthantha zaki, ntchindamilu zaki ndipuso visulu vaki vamazenji; 12 Bokosi+ ndi vimiti vaki vakunyamuliya,+ chibenekeleru,+ ndipuso ketani+ yakugaŵa mphaka; 13 thebulu+ ndi vimiti vaki vakunyamuliya kweniso viyaŵi vaki vosi ndi viŵandi vakulongo;*+ 14 chakuŵikapu nyali+ ndi viyaŵi vaki kweniso nyali zaki ndi mafuta nga nyali;+ 15 guŵa la sembi za vakununkhira+ ndi vimiti vaki vakunyamuliya; mafuta ngakuŵikiya munthu pa udindu ndipuso vakununkhira;+ ketani ya pakhomu la chihema; 16 guŵa la sembi zakupiriza,+ tcheleku laki lamkuŵa, vimiti vaki vakunyamuliya ndi viyaŵi vaki vosi, beseni ndi chakuŵikapu chaki;+ 17 mpanda wasalu wa balaza,+ ntchindamilu zaki ndi visulu vaki vamazenji; ketani ya pakhomu la balaza; 18 vikhomu va chihema ndi vikhomu va balaza kweniso vingwi vaki;+ 19 vakuvwala vakulukika umampha+ vakuti avwalengi pakuteŵete mumalu ngakupaturika, vakuvwala vakupaturika vaku Aroni+ wasembi ndipuso vakuvwala va ŵana ŵaki anthulumi vakuti avwalengi achiteŵete nge asembi.’”

20 Sonu Ayisirayeli wosi angutuwapu* pa masu paku Mozesi. 21 Pavuli paki, munthu weyosi yo mtima waki ungumuchiska+ ndipuso weyosi yo mzimu waki ungumuchiska, wanguza ndi vakupereka vaki ndipu wanguvipereka kwaku Yehova kuti avigwiriskiyi ntchitu pakupanga chihema chakukumanaku, pa ntchitu zosi za pachihema kweniso pakupanga vakuvwala vakupaturika. 22 Anthulumi kweniso anthukazi wo ŵenga ndi mtima wakukhumba kupereka, aziyangaziyanga ndipu aperekanga tinthu takubatika pavakuvwala,* ndeŵereŵi, mpheti ndi vakutowese vinyaki kweniso vinthu vakupambanapambana vagolidi. Wosi angupereka vakupereka vawu vagolidi* kwaku Yehova.+ 23 Wosi wo ŵenga ndi wuzu wabuluu, weya wa mbereri wapepo, wuzu uyera, salu zamampha, weya wa mbuzi, vikopa va mbereri vakudaya ndi dayi muyera ndipuso vikopa va katumbwi, anguza navu. 24 Wosi wo akhumbanga kupereka siliva ndipuso mkuŵa kwaku Yehova, anguza navu. Kweniso wosi wo ŵenga ndi mathabwa nga vimiti va akeshiya anguza nangu kuti angagwiriskiyi ntchitu.

25 Anthukazi wosi wo ŵenga ndi lusu,+ anguluka vinthu pa manja ndipu anguza navu. Yiwu anguza ndi wuzu wabuluu, weya wa mbereri wapepo, wuzu uyera kweniso salu zamampha. 26 Ndipu anthukazi wosi wo ŵenga ndi lusu, wo mtima wawu unguŵachiska, angupanga salu zaweya wa mbuzi.

27 Alongozgi ŵa Ayisirayeli anguza ndi mya ya onekisi ndipuso mya yinyaki yakuŵika pa efodi kweniso pachakuvwala chapachifuŵa.+ 28 Anguza so ndi mafuta nga nyali kweniso mafuta nga basamu ngakupangiya mafuta ngakuŵikiya munthu pa udindu+ ndipuso ngakupangiya vakununkhira.+ 29 Anthulumi ndi anthukazi wosi wo mitima yawu yinguŵachiska, anguza ndi vinthu kuti viwovyi pa ntchitu yo Yehova wanguŵalamula kuziya mwaku Mozesi. Ayisirayeli anguza ndi vakupereka kwaku Yehova mwakukhumba kwawu.+

30 Pavuli paki, Mozesi wangukambiya Ayisirayeli kuti: “Awonani, Yehova wasankha Bezaleli mwana munthulumi waku Uri, mwana munthulumi waku Huru, wa fuku laku Yuda.+ 31 Chiuta wamupaska mzimu waki, kuti waje ndi zeru, wavwisengi vinthu, waziŵengi vinthu, waje ndi lusu lakupanga vinthu vakupambanapambana, 32 waziŵengi mo vinthu vitenere kupangikiya, wapangengi vinthu vagolidi, vasiliva ndi vamkuŵa, 33 waje ndi lusu lakudumuwa mya ndi kuyiŵika mumalu mwaki ndipuso wapangengi vinthu vakupambanapambana kutuliya ku vimiti. 34 Chiuta waŵika lusu lakusambiza mumtima waku Bezaleli ndipuso Oholiyabu+ mwana munthulumi waku Ahisamaki wa fuku laku Dani. 35 Waŵapaska lusu lakupanga*+ vinthu vakupambanapambana, kudyoŵa vinthu, kuluka vinthu mwakugwiriskiya ntchitu wuzu wabuluu, weya wa mbereri wapepo, wuzu uyera ndi salu zamampha kweniso waŵapaska lusu lakupanga salu. Anthulumi ŵenaŵa agwirengi ntchitu yeyosi ndipuso anozgengi mo vinthu vakupambanapambana vitenere kupangikiya.

36 “Bezaleli wagwirengi ntchitu ndi Oholiyabu ndipuso munthulumi weyosi walusu* yo Yehova wamupaska zeru kweniso yo wamuwovya kuti wavwisengi vinthu ndi chilatu chakuti waziŵi mo wangagwiriya ntchitu zosi za uteŵeti wakupaturika nge mo Yehova walamuliya.”+

2 Sonu Mozesi wangudana Bezaleli ndi Oholiyabu kweniso munthulumi weyosi walusu yo Yehova wangumupaska zeru,+ ndipuso yo mtima waki ungumuchiska kuti wajipereki kugwira ntchitu.+ 3 Pavuli paki, yiwu anguto vinthu vosi vo Ayisirayeli angupereka kwaku Mozesi+ kuti vigwiri ntchitu pa uteŵeti wakupaturika. Kweni mlenji wewosi, Ayisirayeli azanga mbwenu kwaku iyu ndi vinthu vo aperekanga mwakukhumba ŵija.

4 Ŵati ayamba kugwira ntchitu yakupaturika, anthulumi wosi alusu azanga yumozayumoza, 5 ndipu akambiyanga Mozesi kuti: “Ŵanthu atuza ndi vinthu vinandi kuluska vo vikhumbika pa ntchitu yo Yehova walamula kuti yigwiriki.” 6 Mwaviyo, Mozesi wangulamula kuti apharazgi mumsasa wosi kuti: “Anthulumi ndi anthukazi, lekani kuza ndi vinthu vinyaki kuti vije vakupereka vakupaturika.” Ndipu ŵanthu anguleka kuza ndi vinthu vinyaki. 7 Vinthu vingukwana kugwiriya ntchitu yosi, mwakuti vinyaki vingujaku.

8 Sonu anthulumi wosi alusu+ angupanga chihema+ mwakugwiriskiya ntchitu salu 10 zakupangiya mahema. Yiwu anguchipanga ndi salu zamampha zakuluka, za wuzu wabuluu, zaweya wa mbereri wapepo, ndi za wuzu uyera. Ndipu pasalu zo, wangudyoŵapu* akerubi.+ 9 Salu yeyosi ya chihema yenga mamita pafufupi 12* mu utali ndipuso mamita pafufupi ngaŵi* mu usani. Ndipu salu zosi 10 za chihema zenga za sayizi yimoza. 10 Pavuli paki, Bezaleli wangulumikiza pamoza salu zinkhondi. Ndipu salu zinyaki zinkhondi nazu wanguzilumikiza pamoza. 11 Sonu wangupanga akakhuluriya a wuzu wabuluu ndipu wanguŵaŵika mumphepeti mwa salu yakulumikizana mumalu mo yilumikizanengi ndi yinyaki. Wanguŵika so akakhuluriya kukumaliya kwa salu yinyaki yakulumikizana mumalu mo yilumikizanengi ndi yinyaki. 12 Kusalu yimoza yakulumikizana wanguŵikaku akakhuluriya 50 ndipu kukumaliya kwa salu yinyaki yakulumikizana mumalu mo salu zo zilumikizanengi, wanguŵikaku so akakhuluriya 50, kuti akakhuluriya wo alazgiyani. 13 Pakumaliya, wangupanga takukoloŵeke 50 tagolidi, wangulumikiza salu za chihema ndi takukoloŵeke teniti ndipu zinguja salu yimoza ya chihema.

14 Wangupanga so salu zaweya wa mbuzi zakubenekere pachihema. Ndipu salu zo zengapu 11.+ 15 Salu yeyosi ya chihema yenga mamita pafufupi 13* mu utali ndipuso mamita pafufupi ngaŵi* mu usani. Ndipu salu zosi 11 za chihema zenga za sayizi yimoza. 16 Wangulumikiza salu zinkhondi ndipuso wangulumikiza salu zinyaki 6. 17 Pavuli paki, wanguŵika akakhuluriya 50 mumphepeti mwa salu yimoza yakulumikiza, kukumaliya kwaki, ndipu wanguŵika so akakhuluriya 50 kukumaliya kwa salu yinyaki yakulumikiza mumalu mo yilumikizanengi ndi yinyaki. 18 Wangupanga takukoloŵeke 50 tamkuŵa kuti walumikiziyi salu za chihema ndipu salu zo zinguja salu yimoza.

19 Wangupanga chakubenekere pachihema cha vikopa va mbereri vakudaya ndi dayi muyera, ndipu wangupanga so chakubenekere cha vikopa va katumbwi kuti wachiŵiki pachanya paki.+

20 Wangupanga mafulemu ngakumika+ nga chihema kutuliya ku mathabwa nga vimiti va akeshiya.+ 21 Fulemu yeyosi yenga mamita pafufupi nganayi* kutuwa pasi kufika pachanya ndipuso masentimita pafufupi 70* mu usani. 22 Fulemu yeyosi yenga ndi minyu ngaŵi. Mafulemu ngosi nga chihema wangungapanga viyo. 23 Mwaviyo, kumwera kwa chihema wangupangiyaku mafulemu 20, ndipu ngangulazgiya kumwera. 24 Pavuli paki, wangupanga visulu 40 vasiliva vamazenji vakujinthamu mafulemu 20. Visulu viŵi wanguviŵika kusi kwa fulemu yimoza ya minyu ngaŵi. Visulu viŵi wanguviŵika kusi kwa fulemu yeyosi ya minyu ngaŵi.+ 25 Kuchigaŵa chinyaki cha chihema, kunkhondi,* wangupangiyaku mafulemu 20 26 ndi visulu vaki 40 vasiliva vamazenji ndipu visulu viŵi wanguviŵika kusi kwa fulemu yimoza. Visulu viŵi wanguviŵika kusi kwa fulemu yeyosi.

27 Kuvuli kwa chihema, kuzambwi* wangupangiyaku mafulemu 6.+ 28 Wangupanga mafulemu ngaŵi kuti ngaje ntchindamilu ziŵi zapakona za kuvuli kwa chihema. 29 Fulemu yeyosi yenga ya mathabwa ngaŵi ngakuyanana kutuwa pasi mpaka pachanya, pampheti yakwamba. Wanguchita venivi ndi ntchindamilu ziŵi zapakona. 30 Mwaviyo, penga mafulemu 8 ndi visulu vaki 16 vasiliva vamazenji. Visulu viŵi vamazenji wanguviŵika kusi kwa fulemu yeyosi.

31 Pavuli paki, wangupanga nthantha kutuliya ku vimiti va akeshiya kuti zikholesi mafulemu, nthantha zinkhondi wanguziŵika kurwandi limoza la chihema.+ 32 Kurwandi linyaki la chihema wanguŵikaku so nthantha zinkhondi zakukholese mafulemu, ndipu kuzambwi* wanguŵikaku nthantha zinkhondi zakukholese mafulemu nga kuvuli kwa chihema. 33 Wangupanga nthantha yapakati kuti yikongi mafulemu ngosi kutuliya kukwamba mpaka kukumaliya. 34 Kumafulemu wangupakaku golidi, ndipu wangupanga mpheti zaki zagolidi zakuserezamu nthantha, ndipu kunthantha wangupakaku golidi.+

35 Wangupanga ketani+ yawuzu wabuluu, weya wa mbereri wapepo, wuzu uyera ndi salu yamampha yakuluka. Ndipu paketani yo, wangudyoŵapu+ akerubi.+ 36 Wangupanga ntchindamilu zinayi zakupayikapu ketani yo. Ntchindamilu zo zenga za vimiti va akeshiya ndipu wanguzipaka golidi. Wangupanga so tivisulu taki takukoloŵekamu salu tagolidi. Ntchindamilu zo wanguzijintha mu visulu vinayi vasiliva vamazenji. 37 Pavuli paki, wangupanga ketani ya pakhomu la chihema. Ketani yo yenga yasalu yawuzu wabuluu, weya wa mbereri wapepo, wuzu uyera ndipuso salu yamampha yakulukika pamoza.+ 38 Wangupanga so ntchindamilu zinkhondi zakupayikapu ketani ndipuso vakukoloŵekapu vaki. Mitu ya ntchindamilu zo ndi vakumangiya* vaki wanguvipaka golidi, kweni visulu vinkhondi vamazenji vakujinthamu ntchindamilu venga vamkuŵa.

37 Pavuli paki, Bezaleli+ wangupanga Bokosi+ lamathabwa nga vimiti va akeshiya. Bokosi lo lenga masentimita pafufupi 110* mu utali, masentimita pafufupi 70* mu usani ndi masentimita pafufupi 70* kutuwa pasi kufika pachanya.+ 2 Wangulipaka golidi chayiyu mukati ndi kubwalu, ndipu wangupanga mkomberu wagolidi* kuzunguliya bokosi lo.+ 3 Pavuli paki, wangupanga mpheti zinayi zagolidi ndipu wanguziŵika muchanya mwa malundi ngaki nganayi, mpheti ziŵi wanguziŵika kurwandi ndipu mpheti zinyaki ziŵi wanguziŵika kurwandi linyaki. 4 Wangupanga so vimiti vakunyamuliya kutuliya ku vimiti va akeshiya ndipu wanguvipaka golidi.+ 5 Pavuli paki, wangusereza vimiti vo mumpheti zo zenga mumphepeti mwa Bokosi kuti anyamuliyengi Bokosi lo.+

6 Wangupanga chibenekeleru chagolidi chayiyu.+ Ndipu chenga masentimita pafufupi 110* mu utali ndipuso masentimita pafufupi 70* mu usani.+ 7 Pavuli paki, wangupanga akerubi+ ŵaŵi agolidi; wanguchita kuŵasula ndipu wanguŵaŵika pachanya kukumaliya kwa chibenekeleru,+ uku ndi uku. 8 Kerubi yumoza wenga kukumaliya ndipu munyaki wenga kukumaliya kunyaki. Wanguŵaŵika kukumaliya kwa chibenekeleru, uku ndi uku. 9 Akerubi ŵaŵi wo, angutambasuliya muchanya mapapa ngawu, ndipu angubenekere chibenekeleru ndi mapapa ngawu.+ Yiwu angulazgiyana ndipu visku vawu vingusindamiya pachibenekeleru.+

10 Pavuli paki, wangupanga thebulu kutuliya ku mathabwa nga vimiti va akeshiya.+ Lenga pafufupi mita yimoza* mu utali, masentimita pafufupi 45* mu usani ndipuso masentimita pafufupi 70* kutuwa pasi kufika pachanya.+ 11 Ndipu wangulipaka golidi chayiyu ndipuso wangupanga mkomberu wagolidi* kuzunguliya thebulu lo. 12 Pavuli paki, wangupanga fulemu kuzunguliya thebulu lo, pafufupi masentimita 7* mu usani ndipuso wangupanga mkomberu wagolidi* kuzunguliya fulemu yo. 13 Kweniso wangupanga mpheti zinayi zagolidi, ndipu wanguziŵika mumakona nganayi mo mwenga malundi nganayi. 14 Mpheti zo zenga pafupi ndi fulemu ndipu wanguserezamu vimiti vakunyamuliya thebulu. 15 Wangupanga vimiti vakunyamuliya thebulu kutuliya ku vimiti va akeshiya ndipu wanguvipaka golidi. 16 Pavuli paki, wangupanga viyaŵi va pathebulu, mabeseni ngaki, makapu ngaki kweniso mbali zaki zabakuli ndi misuku, mo apunguliyangamu sembi za chakumwa. Wangupanga vinthu venivi ndi golidi chayiyu.+

17 Pavuli paki, wangupanga chakuŵikapu nyali+ chagolidi chayiyu. Chakuŵikapu nyali cho, wanguchita kuchisula. Chapasi chaki, chapakati chaki, makapu ngaki, timafundu taki kweniso maluŵa ngaki, vosi vingutuliya ku golidi yumoza, wanguvipanga pakuvijapakuvija cha.+ 18 Kuchapakati cha chakuŵikapu nyali kungutuwa mphanda 6, mphanda zitatu kurwandi ndipu mphanda zinyaki zitatu kurwandi linyaki. 19 Kurwandi kwa chapakati cha chakuŵikapu nyali, mphanda yeyosi yenga ndi makapu ngatatu ngakupangika nge maluŵa nga alimondi, timafundu ndi maluŵa, ndipu vinguja mwakujalizana. Kurwandi linyaki naku, mphanda yeyosi yenga ndi makapu ngatatu ngakupangika nge maluŵa nga alimondi, timafundu ndi maluŵa, ndipu vinguja so mwakujalizana. Umu ndimu zenge mphanda zosi 6 zakutuliya kuchapakati cha chakuŵikapu nyali. 20 Pachapakati cha chakuŵikapu nyali penga makapu nganayi ngakupangika nge maluŵa nga alimondi, timafundu ndi maluŵa, ndipu vinguja mwakujalizana. 21 Kafundu kenga kusi kwa mphanda ziŵi zakwamba zakutuliya kuchapakati cha chakuŵikapu nyali, kafundu kanyaki kenga kusi kwa mphanda zinyaki ziŵi ndipuso kafundu kanyaki kenga kusi kwa mphanda zinyaki ziŵi. Umu ndimu zenge mphanda zosi 6 zakutuliya kuchapakati cha chakuŵikapu nyali. 22 Timafundu, mphanda ndi chakuŵikapu nyali chosi wanguvisula kutuliya kugolidi chayiyu. Vosi wanguvipanga kutuliya ku golidi yumoza. 23 Pavuli paki, wangupanga nyali zaki 7,+ vakuŵaniya vaki ndipuso vakupaliya motu vaki ndipu venga vagolidi chayiyu. 24 Chakuŵikapu nyali limoza ndi viyaŵi vaki vosi wanguvipanga kutuliya ku golidi chayiyu wakukwana talenti yimoza.*

25 Sonu wangupanga guŵa la sembi za vakununkhira+ lamathabwa nga vimiti va akeshiya. Chenga chakuyanana muvigaŵa vosi vinayi, mu utali chenga masentimita pafufupi 45,* mu usani masentimita pafufupi 45,* ndipu kutuwa pasi kufika pachanya chenga pafufupi mita yimoza. Guŵa la sembi ndi masengwi ngaki vingupangika kutuliya ku chimiti chimoza.*+ 26 Wangulipaka golidi chayiyu, pachanya, mumphepeti mwaki mosi ndipuso mumasengwi ngaki. Wangupanga so mkomberu wagolidi* kuzunguliya guŵa la sembi lo. 27 Wangupanga so mpheti ziŵi zagolidi mumphata mwa mkomberu,* uku ndi uku. Mumpheti zenizi ndimu wangusereza vimiti vakunyamuliya guŵa la sembi. 28 Pavuli paki, wangupanga vimiti vakunyamuliya kutuliya ku vimiti va akeshiya ndipu wanguvipaka golidi. 29 Wangupanga so mafuta ngakupaturika ngakuŵikiya munthu pa udindu+ ndipuso vakununkhira vamampha,+ vakusazgika umamphaumampha.

38 Wangupanga guŵa la sembi zakupiriza kutuliya ku mathabwa nga vimiti va akeshiya. Lenga lakuyanana muvigaŵa vosi vinayi, mu utali lenga mamita pafufupi ngaŵi,* mu usani lenga mamita pafufupi ngaŵi* ndipu kutuwa pasi kufika pachanya lenga pafufupi mita yimoza.*+ 2 Pavuli paki, wangupanga masengwi mumakona ngaki nganayi. Guŵa la sembi ndi masengwi venga chinthu chimoza. Ndipu wangulipaka mkuŵa.+ 3 Wangupanga viyaŵi vakugwiriskiya ntchitu paguŵa la sembi, viyaŵi vakuyole vyotu, mafocholu, mbali zabakuli, mafoloku ngakulungakulu ndi vakupaliya motu. Viyaŵi vaki vosi venga vamkuŵa. 4 Wangupanga so tcheleku la paguŵa la sembi lavisulu vamkuŵa vakupinjikana, ndipu wanguliŵika mumphata mwa mkomberu pafupi ndi pakati paguŵa la sembi. 5 Wanguŵika mpheti zinayi mumakona nganayi nga guŵa la sembi pafupi ndi tcheleku lamkuŵa kuti waserezemu vimiti vakunyamuliya. 6 Pavuli paki, wangupanga vimiti vakunyamuliya kutuliya ku vimiti va akeshiya ndipu wanguvipaka mkuŵa. 7 Vimiti vakunyamuliya wanguvisereza mumpheti zo zenga mumphepeti mwa guŵa la sembi kuti alinyamuwengi. Guŵa la sembi lo, lenga nge bokosi lamathabwa lamwazi pachanya ndi kusi.

8 Pavuli paki, wangupanga beseni lamkuŵa+ ndipuso chakuŵikapu chaki. Iyu wangugwiriskiya ntchitu magilasi ngakuwonapu* nga anthukazi wo ateŵetiyanga mwandondomeku pakhomu la chihema chakukumanaku.

9 Ndipu wangupanga balaza+ la chihema. Kuchigaŵa cha kumwera, wangupanga mpanda wasalu zamampha zakuluka ndipu utali waki wenga mamita pafufupi 45.*+ 10 Kuchigaŵa cha kumwera, kwenga ntchindamilu 20 kweniso visulu 20 vamkuŵa vamazenji. Tivisulu takukoloŵekamu salu ta ntchindamilu ndipuso vakumangiya* venga vasiliva. 11 Kuchigaŵa cha kunkhondi,* mpanda wasalu wenga so mamita pafufupi 45.* Kuchigaŵa ichi kwenga ntchindamilu 20 kweniso visulu 20 vamkuŵa vamazenji ndipu venga vamkuŵa. Tivisulu takukoloŵekamu salu ta ntchindamilu zo, ndipuso vakumangiya* venga vasiliva. 12 Kweni kuzambwi,* usani wa mpanda wasalu ya balaza la chihema wenga mamita pafufupi 22.* Kuchigaŵa ichi kwenga ntchindamilu 10 ndi visulu 10 vamazenji. Tivisulu takukoloŵekamu salu ta ntchindamilu zo, ndipuso vakumangiya* venga vasiliva. 13 Kuvuma, kwakutuliya lumwi, mpanda wa balaza la chihema, wenga mamita pafufupi 22.* 14 Kuchigaŵa chimoza cha khomu la balaza la chihema, kwenga mpanda wasalu wa mamita pafufupi 7,* ndipu wenga ndi ntchindamilu zitatu ndi visulu vitatu vamazenji. 15 Kuchigaŵa chinyaki cha khomu la balaza la chihema kwenga mpanda wasalu wa mamita pafufupi 7,* ndipu wenga ndi ntchindamilu zitatu ndi visulu vitatu vamazenji. 16 Mpanda wosi kuzunguliya balaza la chihema wenga wa salu yamampha yakuluka. 17 Visulu vamazenji va ntchindamilu venga vamkuŵa, takukoloŵekamu salu taki ndi vakumangiya* vaki venga vasiliva. Mitu ya ntchindamilu zo, yingupakika siliva ndipu ntchindamilu zosi za balaza la chihema zenga ndi vakumangiya vasiliva.+

18 Ketani ya pakhomu la balaza la chihema yingupangika* ndi wuzu wabuluu, weya wa mbereri wapepo, wuzu uyera kweniso salu yamampha yakuluka. Ketani yo, yenga mamita pafufupi 9* mu utali ndipuso mamita pafufupi ngaŵi* kutuwa pasi kufika pachanya. Ndipu kutuwa pasi kufika pachanya, ketani yo yayanananga ndi mpanda wasalu wa balaza la chihema.+ 19 Ntchindamilu zaki zinayi ndi visulu vaki vinayi vamazenji venga vamkuŵa. Takukoloŵekamu salu taki kweniso vakumangiya* venga vasiliva, ndipu mitu ya ntchindamilu zo, yingupakika siliva. 20 Vikhomu vosi va chihema ndipuso va mpanda wa balaza la chihema venga vamkuŵa.+

21 Mozesi wangulamula kuti aŵerengese unandi wa vinthu vosi vo angupangiya chihema, chihema cha Ukaboni.+ Alevi+ ndiwu angugwira ntchitu yeniyi ndipu angulongozgeka ndi Itamara,+ mwana munthulumi waku Aroni, wasembi. 22 Bezaleli+ mwana munthulumi waku Uri, mwana munthulumi waku Huru, wa fuku laku Yuda, wanguchita vosi vo Yehova wangulamula Mozesi. 23 Iyu wenga ndi Oholiyabu+ mwana munthulumi waku Ahisamaki wa fuku laku Dani. Oholiyabu wenga ndi lusu lakupanga vinthu vakupambanapambana, kudyoŵa vinthu kweniso kuluka vinthu mwakugwiriskiya ntchitu wuzu wabuluu, weya wa mbereri wapepo, wuzu uyera ndi salu zamampha.

24 Golidi yosi yo angugwiriskiya ntchitu pa ntchitu ya pamalu ngakupaturika wayanananga ndi golidi yo wanguperekeka nge sembi yakuzungunya*+ ndipu wangukwana matalenti* 29 ndipuso masekeli* 730, mwakukoliyana ndi sekeli ya mumalu ngakupaturika.* 25 Ndipu siliva yo wanguperekeka ndi anthulumi wo angulembesa mazina ngawu, wangukwana matalenti* 100 ndipuso masekeli* 1,775, mwakukoliyana ndi sekeli ya mumalu ngakupaturika.* 26 Munthulumi weyosi yo wangulembesa wakwambiya vyaka 20 kuluta kunthazi, wangupereka siliva wakukwana hafu ya sekeli* mwakukoliyana ndi sekeli ya mumalu ngakupaturika.*+ Anthulumi wo angukwana 603,550.+

27 Siliva wakukwana matalenti 100 angupangiya visulu vamazenji vakujinthamu mafulemu va mumalu ngakupaturika kweniso visulu vamazenji vo venga pafupi ndi ketani yakugaŵa mphaka. Siliva wakukwana matalenti* 100 angupangiya visulu vamazenji 100, siliva wakukwana talenti yimoza angupangiya chisulu chimoza chazenji.+ 28 Siliva wakukwana masekeli* 1,775 angupangiya tivisulu takukoloŵekamu salu ta ntchindamilu. Mitu ya ntchindamilu zo, anguyipaka siliva ndipu anguzilumikiza pamoza.

29 Mkuŵa wo unguperekeka nge sembi* ungukwana matalenti 70 ndipuso masekeli 2,400. 30 Mkuŵa wenuwu angupangiya visulu vamazenji va pakhomu la chihema chakukumanaku, guŵa la sembi lamkuŵa ndi tcheleku laki, viyaŵi vosi vakugwiriskiya ntchitu paguŵa la sembi, 31 visulu vamazenji va mpanda wasalu wa balaza la chihema, visulu vamazenji va pakhomu la balaza la chihema ndipuso vikhomu vosi va chihema+ kweniso va mpanda wa balaza la chihema.

39 Angupanga vakuvwala vakulukika umampha vakuti avwalengi pakuteŵete mumalu ngakupaturika, ndipu angugwiriskiya ntchitu wuzu wabuluu, weya wa mbereri wapepo ndi wuzu uyera.+ Angupanga so vakuvwala vakupaturika vaku Aroni+ nge mo Yehova wangulamuliya Mozesi.

2 Wangupanga efodi+ mwakugwiriskiya ntchitu golidi, wuzu wabuluu, weya wa mbereri wapepo, wuzu uyera ndi salu yamampha yakuluka. 3 Angusula golidi kuja wakupapatika, angumucheketacheketa kuti waje nge wuzu ndipu golidi yo, angumusone limoza ndi wuzu wabuluu, weya wa mbereri wapepo, wuzu uyera ndi salu yamampha yakuluka. Efodi yo angumudyoŵa. 4 Angupanga salu ziŵi zapaphewa zo zingulumikizana pamapewa ngosi ngaŵi. 5 Ku efodi angusoniyaku lamba wakuluka kuti efodi wajengi mumalu mwaki+ ndipu lamba yo wangupangika mwakugwiriskiya ntchitu vinthu vo angupangiya efodi. Wangupangika ndi golidi, wuzu wabuluu, weya wa mbereri wapepo, wuzu uyera ndi salu yamampha yakuluka, nge mo Yehova wangulamuliya Mozesi.

6 Pavuli paki, anguŵika mya ya onekisi mutakuŵikamu mya tagolidi, ndipu angulembapu mazina nga ŵana anthulumi aku Isirayeli mwakuchita kujoba, nge mo alembe mazu pachidindu.+ 7 Mya yo, wanguyiŵika pasalu zapaphewa za efodi kuti yije mya yachikumbusu ku ŵana anthulumi aku Isirayeli,+ nge mo Yehova wangulamuliya Mozesi. 8 Pavuli paki, wangupanga chakuvwala chapachifuŵa+ ndipu wanguchidyoŵa mwalusu nge mo angupangiya efodi. Wanguchipanga mwakugwiriskiya ntchitu golidi, wuzu wabuluu, weya wa mbereri wapepo, wuzu uyera ndi salu yamampha yakuluka.+ 9 Chakuvwala chapachifuŵa cho, ŵati achipeta chenga chakuyanana muvigaŵa vosi vinayi, ndipu mu utali ndi mu usani chenga masentimita pafufupi 22.* 10 Pachakuvwala chapachifuŵa anguŵikapu mizeri yinayi ya mya. Muzeri wakwamba wenga ndi mwa wa rube, wa topazi ndi wa emeradi. 11 Mzeri wachiŵi wenga ndi mwa wa takoyizi, wa safiro ndi wa jasipa. 12 Mzeri wachitatu wenga ndi mwa wa leshemu,* wa agate ndi wa ametusito. 13 Mzeri wachinayi wenga ndi mwa wa kurusolito, wa onekisi ndi wa yade. Ndipu yinguŵikika mutakuŵikamu mya tagolidi. 14 Mya yo, yingukoliyana ndi mazina nga ŵana anthulumi 12 aku Isirayeli. Pamwa wewosi pangulembeka zina mwakuchita kujoba nge mo alembe mazu pachidindu, zina lelosi lamiyanga limoza mwa mafuku 12.

15 Pavuli paki, pachakuvwala chapachifuŵa, angupangiyapu matcheni ngakuposeka nge vingwi, ngenga nge vingwi vakupangika ndi golidi chayiyu.+ 16 Ndipu angupanga takuŵikamu mya tiŵi tagolidi ndipuso mpheti ziŵi zagolidi ndipu anguziŵika mumakona ngaŵi nga chakuvwala cho. 17 Pavuli paki, angusereza vingwi viŵi vagolidi mumpheti zo zenga mumakona nga chakuvwala chapachifuŵa. 18 Angusereza vingwi viŵi mutakuŵikamu mya tiŵi, ndipu anguvilumikiza kusalu zapaphewa za efodi, kunthazi kwaki. 19 Pavuli paki, angupanga mpheti ziŵi zagolidi ndipu anguziŵika mumakona ngaŵi nga chigaŵa cha chakuvwala chapachifuŵa cho chingupetekeke mukati, chenicho chakwaskananga ndi efodi.+ 20 Angupanga so mpheti zinyaki ziŵi zagolidi kunthazi kwa efodi, mumphata mwa salu ziŵi zapaphewa, pafupi ndi pakulumikiziya, pachanya pa lamba wakuluka wa efodi. 21 Pakumaliya, chakuvwala chapachifuŵa anguchimanga ndi chingwi chabuluu kuti chijengi pamalu ngaki, chingwi cho anguchimangiriya kumpheti za chakuvwala chapachifuŵa ndi kumpheti za efodi. Venivi vawovyanga kuti chakuvwala chapachifuŵa chijengi pamalu ngaki pa efodi, pachanya pa lamba wakuluka, nge mo Yehova wangulamuliya Mozesi.

22 Pavuli paki, angupanga mkhanju wapanthuwa wa efodi ndipu wosi wenga wa wuzu wabuluu. Mkhanju wo ungupangika ndi munthu wakuziŵa kupanga salu.+ 23 Pakati pa mkhanju wo penga malu ngakuserezapu mutu ndipu ngenga nge malu ngakuserezapu mutu nga chakuvwala chamamba ngavisulu. Ndipu mumphepeti mwa malu ngakuserezapu mutu mungubinyilika kuti mungakerukanga cha. 24 Mumphata mwa mkhanju wapanthuwa angupangiyamu tinthu takuwoneka nge vipasu va pomegiraneti* ta wuzu wabuluu, weya wa mbereri wapepo ndi wuzu uyera wakulukika pamoza. 25 Ndipu angupanga timabelu tagolidi chayiyu ndipu angutiŵika pakati pa tivipasu ta pomegiraneti mwakuzunguliya mumphata mwa mkhanju wapanthuwa, mo mungubinyilika, pakati pa tivipasu ta pomegiraneti. 26 Kabelu kangujalizana ndi kachipasu ka pomegiraneti, ndipu vinguŵikika viyo kuzunguliya mumphata mwa mkhanju wapanthuwa mo mungubinyilika. Ndipu mkhanju wo awuvwalanga pakuteŵete, nge mo Yehova wangulamuliya Mozesi.

27 Ndipu angupangiya Aroni ndi ŵana ŵaki anthulumi+ mikhanju yasalu yamampha yo yingulukika ndi munthu wakuziŵa kupanga salu. 28 Angupanga so mphumphu+ yasalu yamampha, vakuvwala vakumutu+ vasalu yamampha, akabunthu asalu*+ yamampha yakuluka, 29 ndipuso lamba wa mkhanju wasalu yamampha yakuluka, wuzu wabuluu, weya wa mbereri wapepo ndi wuzu uyera wakulukika pamoza, nge mo Yehova wangulamuliya Mozesi.

30 Pakumaliya, angupanga kachisulu kakung’anima kagolidi chayiyu, ko kenga chisimikizu chakupaturika cha kujipereka. Ndipu angulembapu mazu mwakuchita kujoba nge mo alembe mazu pachidindu kuti: “Utuŵa ngwaku Yehova.”+ 31 Ndipu pakachisulu ko, angumangiriyapu chingwi cha wuzu wabuluu kuti amangiriyi pamphumphu, nge mo Yehova wangulamuliya Mozesi.

32 Sonu ntchitu yosi yakupanga chihema, chihema chakukumanaku yingumala ndipu Ayisirayeli anguchita vosi vo Yehova wangulamula Mozesi.+ Anguchita nadi viyo.

33 Pavuli paki, anguza ndi vinthu vosi vakupangiya chihema+ kwaku Mozesi, limoza ndi salu za chihema+ ndi vipangizu vaki vosi. Vinthu vaki ndi ivi: takukoloŵeke salu,+ mafulemu,+ nthantha,+ ntchindamilu ndi visulu vamazenji;+ 34 chakubenekere pachihema cha vikopa va mbereri vakudaya ndi dayi muyera,+ chakubenekere cha vikopa va katumbwi, ketani yakugaŵa mphaka;+ 35 bokosi la Ukaboni ndi vimiti vaki vakunyamuliya+ ndi chibenekeleru chaki;+ 36 thebulu, viyaŵi vaki vosi+ ndi viŵandi vakulongo;* 37 chakuŵikapu nyali chagolidi chayiyu ndi nyali zaki+ zakuŵikika umampha, viyaŵi vaki vosi+ ndi mafuta nga nyali;+ 38 Guŵa la sembi+ lagolidi, mafuta ngakuŵikiya munthu pa udindu,+ vakununkhira,+ ketani+ ya pakhomu la chihema; 39 guŵa la sembi lamkuŵa+ ndi tcheleku laki lamkuŵa, vimiti vakunyamuliya,+ viyaŵi vaki vosi,+ beseni ndi chakuŵikapu chaki;+ 40 mpanda wasalu wa balaza, ntchindamilu zaki ndi visulu vaki vamazenji;+ ketani+ ya pakhomu la balaza; vingwi, vikhomu+ ndi viyaŵi vosi vakugwiriskiya ntchitu pachihema, chihema chakukumanaku; 41 vakuvwala vakulukika umampha vakuti avwalengi pakuteŵete mumalu ngakupaturika, vakuvwala vakupaturika vaku Aroni wasembi+ ndipuso vakuvwala va ŵana ŵaki anthulumi vakuti avwalengi achiteŵete nge asembi.

42 Ayisirayeli angugwira ntchitu yosi mwakukoliyana ndi mo Yehova wangulamuliya Mozesi.+ 43 Mozesi wati wayendere ntchitu yosi, wanguwona kuti anguchita nge mo Yehova wangulamuliya; ndipu Mozesi wanguŵatumbika.

40 Pavuli paki, Yehova wangukambiya Mozesi kuti: 2 “Pa zuŵa lakwamba la mwezi wakwamba, uzimiki chihema, chihema chakukumanaku.+ 3 Muchihema uziŵikemu bokosi la Ukaboni+ ndipu uziŵiki ketani+ kuti bokosi lo lingaziwonekanga cha. 4 Uziŵikemu thebulu+ ndi kuŵikapu vinthu vaki umamphaumampha kweniso uziŵikemu chakuŵikapu nyali+ ndipu uzibuski nyali zaki.+ 5 Pavuli paki, uziŵiki guŵa la sembi la vakununkhira lagolidi,+ pafupi ndi bokosi la Ukaboni ndipu pakhomu la chihema uziŵikepu ketani.+

6 “Guŵa la sembi zakupiriza uziliŵiki+ panthazi pa khomu la chihema, cho ntchihema chakukumanaku. 7 Beseni uziliŵiki pakati pa chihema chakukumanaku ndi guŵa la sembi ndipu uzidemu maji.+ 8 Pavuli paki, uzimiki mpanda wa balaza+ kuzunguliya chihema ndipuso uziŵiki ketani+ pakhomu la mpanda wa balaza. 9 Uzito mafuta*+ ndipu uzingadiri pachihema ndi pa vosi vo ve mwenimo+ ndipu uzichitowesi kweniso uzitowesi viyaŵi vaki vosi kuti chizije chakutowa. 10 Uzidiri so mafuta paguŵa la sembi zakupiriza ndi paviyaŵi vaki vosi ndipu uzitowesi guŵa la sembi kuti lizije lakupaturika ukongwa.+ 11 Uzidiri mafuta pabeseni ndi pachakuŵikapu chaki ndipu uzilitowesi.

12 “Uzizi ndi Aroni kweniso ŵana ŵaki anthulumi pafupi ndi khomu la chihema chakukumanaku ndipu azisambi.*+ 13 Aroni uzimuvwaliki vakuvwala vakupaturika+ ndipu uzimusankhi+ ndi kumutowesa kuti wazinditeŵetiyengi nge wasembi. 14 Pavuli paki, uzizi ndi ŵana ŵaki anthulumi ndipu uziŵavwaliki mikhanju.+ 15 Uziŵasankhi nge mo wazamusankhiya awusewu+ kuti azinditeŵetiyengi nge asembi. Ndipu asani azisankhika azamulutirizga kunditeŵete nge asembi kwamuyaya mu migonezi yawu yosi.”+

16 Mozesi wanguchita vosi mwakukoliyana ndi vo Yehova wangumulamula.+ Wanguchita nadi viyo.

17 Mu mwezi wakwamba mu chaka chachiŵi, pa zuŵa lakwamba la mwezi wo, chihema chingumikika.+ 18 Mozesi wachimika chihema, wanguŵika pasi visulu vamazenji,+ wangumika mafulemu,+ wanguŵika nthantha+ ndipuso wangumika ntchindamilu. 19 Pachihema, wangubenekeriyapu salu+ ya chihema ndipu pachanya paki wanguŵikapu chakubenekere pachihema,+ nge mo Yehova wangulamuliya Mozesi.

20 Pavuli paki, wanguto mya ya Ukaboni+ ndi kuyiŵika mu Bokosi+ ndipu wangusereza vimiti vakunyamuliya+ mumpheti zo zenga mumphepeti mwa Bokosi kweniso wanguŵika chibenekeleru+ pachanya pa Bokosi.+ 21 Wangusereza Bokosi muchihema ndipu wanguŵika ketani+ pamalu ngaki kuti bokosi la Ukaboni+ lingawonekanga cha, nge mo Yehova wangulamuliya Mozesi.

22 Ndipu wanguŵika thebulu+ kuchigaŵa cha kunkhondi* cha chihema, kung’anamuwa, chihema chakukumanaku, kubwalu kwa ketani, 23 ndipu pathebulu wanguyerekapu viŵandi+ kuti vijengi pa masu paku Yehova, nge mo Yehova wangulamuliya Mozesi.

24 Wanguŵika chakuŵikapu nyali+ kuchigaŵa cha kumwera cha chihema, kung’anamuwa chihema chakukumanaku, kunthazi kwa thebulu. 25 Wangubuska nyali+ pa masu paku Yehova nge mo Yehova wangulamuliya Mozesi.

26 Pavuli paki, wanguŵika guŵa la sembi lagolidi+ muchihema chakukumanaku panthazi pa ketani, 27 kuti vakununkhira+ visunkhengi josi paguŵa la sembi lo,+ nge mo Yehova wangulamuliya Mozesi.

28 Ndipu pakhomu la chihema wanguŵikapu ketani.+

29 Wanguŵika guŵa la sembi zakupiriza+ panthazi pa khomu la chihema, kung’anamuwa chihema chakukumanaku, kuti waperekiyengepu sembi zakupiriza+ kweniso sembi za mbewu, nge mo Yehova wangulamuliya Mozesi.

30 Pavuli paki, wanguŵika beseni pakati pa chihema chakukumanaku ndi guŵa la sembi ndipu wangudamu maji ngakusamba.+ 31 Penapa ndipu Mozesi kweniso Aroni limoza ndi ŵana ŵaki anthulumi asambanga mumanja ndi mumalundi. 32 Asani asere muchihema chakukumanaku pamwenga asani atuza paguŵa la sembi asambanga,+ nge mo Yehova wangulamuliya Mozesi.

33 Pavuli paki, wangumika mpanda wa balaza+ kuzunguliya chihema kweniso guŵa la sembi ndipu wanguŵika ketani pakhomu la mpanda wa balaza.+

Mwaviyo, Mozesi wangumaliza ntchitu yosi. 34 Mtambu ungwamba kubulumutizga chihema chakukumanaku, ndipu unkhankhu waku Yehova unguzaza muchihema.+ 35 Mozesi watondekanga kusere muchihema chakukumanaku chifukwa mtambu ungubulumutizga chihema cho, ndipu unkhankhu waku Yehova unguzaza muchihema.+

36 Asani mtambu wakwera muchanya pachihema, Ayisirayeli ajinthuwanga mahema ngawu. Achitanga viyo peposi po ŵama kuti apumuwi pa ulendu wawu wosi.+ 37 Kweni asani mtambu wakwere muchanya cha, ajinthuwanga cha mahema ngawu mpaka pa zuŵa lo wakwere muchanya.+ 38 Mtambu waku Yehova wajanga pachanya pa chihema ndi msana ndipu ndi usiku pajanga motu. Peposi po Ayisirayeli ama kuti apumuwi pa ulendu wawu wosi, awonanga venivi.+