CHITENJE
א [Aleph]*
1 Tawuni yo yinguzaza ndi ŵanthu,+ sonu yaja yija!
Tawuni yo yenga ndi ŵanthu anandi pakati pa mitundu ya ŵanthu,+ yasambuka choko!
Yo wenga fumukazi pakati pa vigaŵa, wagwira ntchitu ya ukapolu!+
ב [Beth]
2 Iyu waliya ukongwa ndi usiku,+ ndipu masozi ngasika mumatakama ngaki.
Pa vibwezi vaki vosi, palivi yo watimupembuzga.+
Anyaki wosi amupereka;+ yiwu asambuka arwani ŵaki.
ג [Gimel]
3 Yuda watoleke ku ukapolu,+ wasuzgika ndipu we mu ukapolu ukulu.+
Iyu watenere kuja pakati pa mitundu ya ŵanthu;+ wasaniya cha malu ngakupumuliyapu.
Ŵanthu wosi wo atimutombozga, amuthereska pa nyengu ya masuzgu ngaki.
ד [Daleth]
4 Misewu yakuluta ku Ziyoni yiliya, chifukwa palivi munthu yo waluta ku phwandu.+
Mageti ngaki ngosi ngabwangandulika;+ asembi ŵaki atamantha.
Amwali* ŵaki achita chitima, ndipu iyu wachita chitima ukongwa.
ה [He]
5 Arwani ŵaki, sonu asambuka ambuyaki;* arwani ŵaki ŵe phee.+
Pakuti Yehova wachitiska kuti waje ndi chitima chifukwa chakuti mphulupulu zaki zinandi.+
Ŵana ŵaki atoleke ku ukapolu panthazi pa murwani.+
ו [Waw]
6 Kutowa kosi kwa mwana munthukazi wa ku Ziyoni kwamala.+
Alongozgi ŵaki ŵe nge mphoyu zo zisoŵa uteka,
Ndipu zitenda zavuka panthazi pa munthu yo watizitchimbiza.
ז [Zayin]
7 Mu mazuŵa nga kusuzgika kwaki kweniso kuja kwambula nyumba, Yerusalemu wakumbuka
Vinthu vosi vakuzirwa vo venga vaki mu mazuŵa ngamwaka.+
Pa nyengu yo ŵanthu ŵaki anguperekeka mu manja mwa murwani, ndipu pengavi wakumuwovya,+
Arwani angumuwona ndipu angumuseka chifukwa cha kubwangandulika kwaki.+
ח [Heth]
8 Yerusalemu wabuda ukongwa.+
Ndichu chifukwa chaki wasambuka chinthu chaunyakazi.
Ŵanthu wosi wo amutumbikanga sonu atimuyuyuwa, pakuti amuwona we nkhuli.+
Iyu watamantha+ ndipu wang’anamukiya kumphepeti chifukwa cha soni.
ט [Teth]
9 Kufipiskika kwaki kwe muvakuvwala vaki.
Iyu waŵanaŵanaku cha vo vimuchitikiyengi munthazi.+
Kuwa kwaki kunguziziswa; palivi wakumupembuzga.
Yimwi Yehova wonani masuzgu ngangu, pakuti murwani wajikuzga.+
י [Yod]
10 Murwani waŵika manja ngaki pa chuma chaki chosi.+
Pakuti wawona ŵanthu amitundu yinyaki achisere mumalu ngakupaturika,+
Ŵanthu wo unguŵalamula kuti angaserenga cha mu mpingu waku.
כ [Kaph]
11 Ŵanthu ŵaki wosi atamantha; apenja chiŵandi.+
Yiwu apereka vinthu vawu vakuzirwa kuti asaniyi chakurya, kuti aje ndi umoyu.
Yimwi Yehova, wonani kuti ndasambuka munthukazi* wambula ntchitu.
ל [Lamed]
12 Kumbi yimwi mosi mujumpha mumsewu vitikukwaskani cha?
Lereskani kuti muwoni!
Kumbi ulipu urwirwi wakuyanana ndi wo wawiya ini?
Wo Yehova wandilanga nawu mu zuŵa la ukali waki wakukole?+
מ [Mem]
13 Iyu wasisiya motu mu viwanga vangu+ kutuliya kuchanya, ndipu wathereska chiwanga chechosi.
Watambasuwa chilepa kuti malundi ngangu ngawiremu; ndipu wandiweze vuli.
Wachitiska kuti ndije nge munthukazi wakujowoleka.
Nditama zuŵa losi.
נ [Nun]
14 Mphulupulu zangu zamangika mukhosi mwangu nge goli, iyu wazimanga ndi manja ngaki.
Zaŵikika mukhosi mwangu, ndipu ndilivi nthazi.
Yehova wandipereka mu manja mwa ŵanthu wo ndingalimbana nawu cha.+
ס [Samekh]
15 Yehova wanditole anthulumi wosi anthazi.+
Wandidaniya gulu la ŵanthu kuti liswi anyamata ŵangu.+
Yehova wakanda mwali wa ku Yuda pamalu ngakukandiyapu mphereska.+
ע [Ayin]
16 Ndiliya chifukwa cha vinthu venivi;+ masu ngangu ngadira masozi.
Chifukwa munthu yo wangandipembuzga pamwenga kundisisipuwa we kutali ndi ini.
Ŵana ŵangu anthulumi ajowoleka, pakuti murwani wathereska.
פ [Pe]
17 Ziyoni watambasuwa manja ngaki;+ iyu walivi wakumupembuzga.
Yehova walamula arwani wosi wo azunguliya Yakobe kuti amuyukiyi.+
Yerusalemu wasambuka chinthu chaunyakazi kwaku yiwu.+
צ [Tsade]
18 Yehova ndi murunji,+ kweni ndagarukiya marangu ngaki.*+
Vwisiyani, yimwi mwaŵanthu mosi ndipu wonani urwirwi wangu.
Amwali* ŵangu kweniso anyamata ŵangu atoleke ku ukapolu.+
ק [Qoph]
19 Ndadana vibwezi vangu kweni vandipereka.+
Mutawuni asembi ŵangu kweniso ŵara ŵangu amala,
Yiwu amala achipenja chakurya kuti aje ndi umoyu.+
ר [Resh]
20 Yimwi Yehova wonani, pakuti ndasuzgika ukongwa.
Mukati mwangu mubwata.*
Mtima wangu wagadabuka mukati mwangu, pakuti ndagaruka ukongwa.+
Kubwalu lipanga labaya ŵana ŵangu;+ ndipu mukati mwa nyumba le nge nyifwa.
ש [Shin]
21 Ŵanthu avwa kutamantha kwangu; palivi yo watindipembuzga.
Arwani ŵangu wosi avwa soka lo landiwiya.
Yiwu akondwa chifukwa cha soka lo mwachitiska kuti lindiwiyi.+
Kweni muchitiskengi kuti zuŵa lo mungupharazga lizi,+ penipo yiwu azamuja nge ini.+
ת [Taw]
22 Uheni wawu wosi uzi pa masu pinu, ndipu muŵalangi,+
Nge mo mungulangiya ini chifukwa cha mphulupulu zangu zosi.
Pakuti ndatamantha ukongwa, ndipu mtima wangu watama.
א [Aleph]
2 Yehova wabenekere mwana munthukazi wa ku Ziyoni mu mtambu wa ukali waki!
Wawisa kutowa kwaku Isirayeli kutuliya kuchanya kufika pacharu chapasi.+
Wachikumbuka cha chakukandapu malundi ngaki+ mu zuŵa la ukali waki.
ב [Beth]
2 Yehova wameza malu ngosi ngakujamu ngaku Yakobe kwambula lisungu.
Chifukwa cha ukali waki, wawisiya pasi malu ngakukho nga mwana munthukazi wa ku Yuda.+
Wawisiya pasi kweniso wafipiska ufumu+ ndi alongozgi ŵaki.+
ג [Gimel]
3 Chifukwa cha kukwiya ukongwa, wadumuwa nthazi zosi zaku* Isirayeli.
Arwani achiza wanguweza janja laki lamaryi,+
Ndipuso wangukole mwaku Yakobe nge motu wo upiriza vinthu vo ve pafupi.+
ד [Daleth]
4 Wakunga* uta waki nge murwani; janja laki lamaryi lanozgeka nge murwani;+
Wangubaya ŵanthu wosi akuzirwa mu masu mwaki.+
Ndipuso wangupunguliya ukali waki nge motu+ pahema la mwana munthukazi wa ku Ziyoni.+
ה [He]
5 Yehova waja nge murwani;+
Wameza Isirayeli.
Wameza tinyumba taki tosi takuthopoka;
Wabwanganduwa malu ngaki ngosi ngakukho.
Ndipu wachitiska mwana munthukazi wa ku Yuda kuti waliyi ndi kutenje ukongwa.
ו [Waw]
6 Wapapasuwa msasa waki,+ nge chigongwi mumunda.
Yehova wachitiska kuti phwandu ndi Sabata viluwiki mu Ziyoni,
Ndipu chifukwa cha ukali waki wakofya, wayuyuwa fumu kweniso wasembi.+
ז [Zayin]
7 Yehova wakana guŵa laki la sembi;
Wakana malu ngaki ngakupaturika.+
Iyu wapereka mipanda ya tinyumba taki takuthopoka takukho mu manja mwa murwani.+
Yiwu adaniriza munyumba yaku Yehova,+ nge pa zuŵa la phwandu.
ח [Heth]
8 Yehova wasimikiza kubwanganduwa mpanda wa mwana munthukazi wa ku Ziyoni.+
Watambasuwa chingwi chakupimiya.+
Waweza cha janja laki kuti lileki kubwanganduwa.*
Wachitiska chimbumira kweniso mpanda kuti viliyi.
Vosi vamala nthazi.
ט [Teth]
9 Mageti ngaki ngatitimiya pasi pacharu.+
Wabwanganduwa kweniso wafyo akabali ŵaki.
Fumu yaki kweniso alongozgi ŵaki ŵe pakati pa mitundu ya ŵanthu.+
Kulivi dangu;* chinanga mbachimi ŵaki asaniya cha viwona kutuliya kwaku Yehova.+
י [Yod]
10 Ŵara ŵa ŵana anthukazi a ku Ziyoni aja pasi ndipu aja cheti.+
Yiwu adira dongu pamitu yawu ndipu avwala vigudulu.+
Amwali a ku Yerusalemu azgoreka mitu yawu pasi.
כ [Kaph]
11 Masu ngangu ngavuka kudira masozi.+
Mukati mwangu mubwata.*
Mtima wangu wasweka* chifukwa cha kuwa kwa mwana munthukazi wa ŵanthu ŵangu,+
Chifukwa cha ŵana kweniso malitema ngo ngazinduka mumabalaza nga tawuni.+
ל [Lamed]
12 Yiwu afumba anyinawu kuti, “Chakurya ndi vinyu ve pani?”+
Achizinduka nge munthu yo wapwetekeka mumabalaza nga tawuni,
Umoyu wawu uchimalizika mumanja mwa anyinawu.
מ [Mem]
13 Kumbi ndingakulongo ukaboni wuli,
Pamwenga ndingakuyeruzgiya ndi chinthu wuli, yiwi mwana munthukazi wa ku Yerusalemu?
Ndingakuyananiska ndi chinthu wuli, kuti ndikupembuzgi, yiwi mwali wa ku Ziyoni?
Pakuti kupwetekeka kwaku nkhukulu nge nyanja.+ Ndiyani wangakuchizga?+
נ [Nun]
14 Viwona vo achimi ŵinu akukambiyaningi venga vaboza kweniso vambula fundu,+
Ndipuso yiwu anguvumbuwa cha kunanga kwinu kuti muleki kutoleke ku ukapolu,+
Kweni akukambiyaningi viwona vaboza kweniso vakulandizga.+
ס [Samekh]
15 Ŵanthu wosi wo ajumpha munthowa atikumbiyani manja mwachipongu.+
Mwakuzizwa yiwu atumba khwelu+ ndi kupukunya mitu yawu chifukwa cha mwana munthukazi wa ku Yerusalemu, ndipu akamba kuti:
“Asi tawuni iyi ndiyu ayikambanga kuti, ‘Ndi tawuni yakutowa ukongwa, yo yikondwesa ŵanthu pacharu chosi chapasi’?”+
פ [Pe]
16 Arwani ŵaku wosi atikujuliya milomu yawu.
Yiwu atumba khwelu ndi kukukuta minyu ngawu ndipu akamba kuti: “Tamumeza.+
Ili ndi zuŵa lo talindizganga!+ Lafika, ndipu taliwona!”+
ע [Ayin]
Wabwanganduwa kwambula lisungu.+
Wazomereza murwani kuti wakondwi chifukwa chaku yiwi; wapaska nthazi* arwani ŵaku.
צ [Tsade]
18 Mitima yawu yiliriya Yehova; yiwi mpanda wa mwana munthukazi wa ku Ziyoni.
Masozi ngasiki nge msinji msana ndi usiku.
Ungapumuwanga cha, jisu laku lingapumuwanga cha.*
ק [Qoph]
19 Yuka! Daniriza ndi usiku, pakwamba pa maulinda.
Punguwa mtima waku nge maji pa masu paku Yehova.
Musoske manja ngaku chifukwa cha umoyu wa ŵana ŵaku,
ר [Resh]
20 Lereskani, yimwi Yehova, ndipu wonani munthu yo mwamulanga ukongwa.
Kumbi anthukazi atenere kulutirizga kurya mphapu yawu,* ŵana ŵawu wo akubala,+
Pamwenga kumbi asembi ndi achimi atenere kubayikiya mumalu ngakupaturika ngaku Yehova?+
ש [Shin]
21 Mathupi nga anyamata kweniso nga madoda nge ngundangunda mumisewu.+
Amwali* ŵangu kweniso anyamata ŵangu awa ndi lipanga.+
Mwaŵabaya mu zuŵa la ukali winu; mwaŵabaya kwambula lisungu.+
ת [Taw]
22 Mudana vinthu vakofya kutuliya muvigaŵa vosi nge kuti mudaniya ŵanthu ku zuŵa la phwandu.+
Mu zuŵa la ukali waku Yehova, palivi yo wanguthaŵa pamwenga kupona;+
א [Aleph]
3 Ndini munthu yo wawona masuzgu chifukwa cha nthonga ya ukali waki.
2 Wandidikisiya kubwalu ndipu wachitiska kuti ndiyendi mu mdima, mu ukweru cha.+
3 Janja laki lilimbana nani mwakuwerezawereza zuŵa losi.+
ב [Beth]
4 Wawondesa liŵavu langu ndi kukhwinyatisa khungu langu;
Wafyo viwanga vangu.
5 Iyu wandizingiliza; wandizingiliza ndi poyizoni wakuŵaŵa+ kweniso masuzgu.
6 Wandichichizga kuti ndije mumalu ngamdima, nge ŵanthu wo akufwa kali ukongwa.
ג [Gimel]
7 Wandizingiliza ndi mpanda, kuti ndileki kuthaŵa;
Wandimanga ndi simbi zamkuŵa zizitu.+
8 Ndipu asani nditimuliriya kuti wandiwovyi, wavwisiya cha pempheru langu.+
9 Wajala nthowa zangu ndi mya yakusema;
Wanyongoro nthowa zangu.+
ד [Daleth]
10 Watindikhaza nge chinyama cha biyere, nge nkharamu yo yabisama.+
12 Wakunga* uta waki ndipu wandisambusa chinthu chakuhomapu muvu.
ה [He]
13 Wagwaza sana zangu ndi mivi ya mukachikwama kaki ka mivi.
14 Ndasambuka chinthu chakusekesa ku mitundu yosi ya ŵanthu, yiwu atindizumbuwa mu sumu yawu zuŵa losi.
15 Iyu wandizaza ndi vinthu vakuŵaŵa kweniso wandigutisa kamiti kakuŵaŵa.+
ו [Waw]
16 Watuswa minyu ngangu ndi timya;
Ndipu watindivivika muvyotu.+
17 Mwandinola chimangu; ndaluwa vinthu vamampha.
18 Mwaviyo, ndikamba kuti: “Unkhankhu wangu wamala, kweniso chilindizga changu mwaku Yehova chamala.”
ז [Zayin]
19 Kumbukani kusuzgika kwangu kweniso kuti ndilivi pakuja,+ kamiti kakuŵaŵa ndipuso poyizoni wakuŵaŵa.+
20 Mundikumbukengi nadi ndi kusindama kuti mundiwovyi.+
21 Ndikumbuka venivi mumtima mwangu; ndichu chifukwa chaki ndilindizgengi.+
ח [Heth]
22 Tamaliya limu cha chifukwa cha chanju chambula kumala chaku Yehova,+
23 Lija lifya* mlenji wewosi;+ yimwi ndimwi wakugomezgeka ukongwa.+
24 Ini ndakamba kuti: “Yehova ntchigaŵa changu,+ ndichu chifukwa chaki ndimulindizgengi.”+
ט [Teth]
25 Yehova ngwamampha ku munthu yo watimulindizga,+ ngwamampha ku munthu yo walutirizga kumupenja.+
26 Mbumampha kulindizga mwachisisi*+ utaski waku Yehova.+
27 Mbumampha kuti munthu wapingi goli weche mnyamata.+
י [Yod]
28 Iyu waje pakuyija ndipu waje cheti asani Chiuta waŵika goli paku iyu.+
29 Iyu waŵiki mulomu waki mufuvu;+ panyaki pangaŵa chilindizga.+
30 Wapereki dakama laki ku munthu yo watimupuma; iyu wanyozeki ukongwa.
כ [Kaph]
31 Pakuti Yehova watitayengi mpaka muyaya cha.+
32 Chinanga kuti wachitiska kuti tije ndi chitima, wazakutilongo so lisungu mwakukoliyana ndi chanju chaki chambula kumala.+
33 Pakuti mtima waki ukondwa cha kusuzga pamwenga kuchitiska chitima ŵana a ŵanthu.+
ל [Lamed]
34 Kukandakanda akayidi wosi a pacharu chapasi,+
35 Kuleka kuchitiya munthu urunji pa masu pa Wapachanya Limu,+
36 Kweniso kubendezga mulandu wa munthu,
Yehova wazomereza cha vinthu venivi.
מ [Mem]
37 Sonu ndiyani yo wangakamba chinthu ndi kuchitiska kuti chichitiki, kwambula kuti Yehova walamula?
38 Mumulomu mwa Wapachanya Limu,
Mutuwa cha vinthu viheni limoza ndi vinthu vamampha.
39 Kumbi munthu wamoyu wadandawuliyenji ndi vinthu viheni vo vachitika chifukwa cha ubudi waki?+
נ [Nun]
40 Tiyeni tisandi ndi kuwona nthowa zidu,+ ndipu tiwere kwaku Yehova.+
41 Tiyeni tiŵeyere Chiuta kuchanya ndi mtima wosi ndipuso tisoski manja ngidu, ndi kukamba kuti:+
42 “Tananga kweniso tagaruka,+ ndipu yimwi mwagowoka cha.+
ס [Samekh]
43 Chifukwa cha ukali winu mwatijaliza kuti tileki kundere kwaku yimwi;+
Mwatitchimbiza ndi kutibaya kwambula lisungu.+
44 Mwatijaliza ndi mtambu kuti tileki kundere kwaku yimwi, kuti pempheru lidu lileki kujumpha.+
45 Mwatisambusa vinthu vabwekabweka kweniso vimalala pakati pa mitundu ya ŵanthu.”
פ [Pe]
46 Arwani ŵidu wosi ajula milomu yawu kuti alimbani nasi.+
47 Mantha kweniso mbuna vaja chigaŵa chidu,+ kubwangandulika kweniso kupwetekeka.+
48 Mumasu mwangu mutuwa masozi nge misinji ya maji chifukwa cha kupwetekeka kwa mwana munthukazi wa ŵanthu ŵangu.+
ע [Ayin]
49 Masu ngangu ngaliya kwambula kulekeza, kwambula kupumuwa,+
50 Mpaka po Yehova walereske pasi kweniso kuwona kutuliya kuchanya.+
51 Masu ngangu ngachitiska kuti ndije ndi chitima chifukwa cha ŵana wosi anthukazi a mutawuni yangu.+
צ [Tsade]
52 Arwani ŵangu andiŵinga nge chiyuni kwambula chifukwa.
53 Achetamisa umoyu wangu mumbuna; andiponyanga ndi mya.
54 Maji ngangubizga mutu wangu, ndipu ndingukamba kuti: “Ndamala!”
ק [Qoph]
55 Ndingudana zina linu, yimwi Yehova, kutuliya pasi pa mbuna.+
56 Vwisiyani mazu ngangu; mungajalanga cha makutu nginu asani nditikuliriyani kuti mundiwovyi, kuti munditaski.
57 Munguza pafupi mu zuŵa lo ndingukudanani. Mungukamba kuti: “Ungawopanga cha.”
ר [Resh]
58 Mwandimiya pa mulandu wangu, yimwi Yehova, mwawombo umoyu wangu.+
59 Yimwi Yehova, mwawona vinthu viheni vo andichitiya; chondi ndichitiyeni urunji.+
60 Mwawona kuweze kwawu kosi, viŵembu vosi vo andinozge.
ש [Sin] or [Shin]
61 Mwavwa kunyoza kwawu, yimwi Yehova, viŵembu vosi vo andinozge,+
62 Mazu nga arwani ŵangu ndipuso vinthu vo atokotoskiyana zuŵa losi kuti alimbani nani.
63 Awoneni; kwali aja pasi pamwenga ama wima, atindinyoza achimba sumu zawu!
ת [Taw]
64 Yimwi Yehova, muŵaweziyengi mwakukoliyana ndi ntchitu zawu.
65 Munonopesengi mitima yawu ndipu venivi vijengi nge thembu linu kwaku yiwu.
66 Yimwi Yehova, muŵaskerengi chifukwa cha ukali winu, ndipuso muŵamalengi pacharu chapasi.
א [Aleph]
4 Golidi wamampha ukongwa, golidi wakugabuka, waleka kugabuka!+
Mya yakupaturika+ ye ngundangunda mumakona ngosi nga msewu!*+
ב [Beth]
2 Ŵana akuzirwa a ku Ziyoni, wo ŵenga akuzirwa nge golidi wakuyengetulika umampha ukongwa,
Aja nge misuku yadongu,
Ntchitu ya manja nga wakuwumba viŵiya!
ג [Gimel]
3 Chinanga mbakambwi awonkhesa ŵana ŵawu,
Kweni mwana munthukazi wa ŵanthu ŵangu ngwankhaza,+ nge nthiŵatiŵa za muchipululu.+
ג [Gimel]
4 Lilimi la mwana wakonkha lakaniriya kuchavu chaki chifukwa cha nyota.
Ŵana apempha chiŵandi,+ kweni palivi yo watiŵapaska.+
ג [Gimel]
5 Wo aryanga vakurya vamampha agona mumisewu chifukwa chakulenguka ndi nja.+
Ŵanthu wo avwalanga vakuvwala viyera+ kutuliya pa unamana wawu agona muvyotu.
ו [Waw]
6 Chilangu cha* mwana munthukazi wa ŵanthu ŵangu ntchikulu ukongwa kuluska chilangu cha ubudi wa tawuni ya Sodomu,+
Yo yingubwangandulika mu kanyengu kamanavi, kwambula janja lakuyiwovya.+
ז [Zayin]
7 Anaziri ŵaki+ ŵenga akutowa ukongwa kuluska sinoo,* ŵenga atuŵa ukongwa kuluska mkaka.
Ŵenga ayera ukongwa kuluska mya ya korali; ŵenga nge mya ya safiro yakugabuka.
ח [Heth]
8 Yiwu asambuka afipa ukongwa kuluska mwayi;
Ndipu aziŵika cha mumisewu.
Khungu lawu lakaniriya kuviwanga vawu;+ laja nge chimiti chakumira.
ט [Teth]
9 Ŵanthu wo abayika ndi lipanga ŵe umamphaku kuluska wo abayika ndi nja,+
Ŵanthu wo awonda, wo afwa* chifukwa cha kusoŵa kwa chakurya mumunda.
י [Yod]
10 Manja nga anthukazi alisungu ngabika ŵana ŵawu chayiwu.+
Ŵana wo, asambuka chakurya chawu pa nyengu ya kuliya, chifukwa cha kubwangandulika kwa mwana munthukazi wa ŵanthu ŵangu.+
כ [Kaph]
11 Yehova walongo ukali waki;
Iyu wapunguwa ukali waki wakukole.+
Ndipuso wabuska motu mu Ziyoni, wo upiriza mafawundeshoni ngaki.+
ל [Lamed]
12 Mafumu nga pacharu chapasi kweniso ŵanthu wosi wo aja pacharu chapasi agomezganga cha
Kuti wakubwanganduwa kweniso murwani wangasere pamageti nga Yerusalemu.+
מ [Mem]
13 Chenga chifukwa cha maubudi nga achimi ŵaki, kunanga kwa asembi ŵaki,+
Wo angudira ndopa za ŵanthu arunji pakati paki.+
נ [Nun]
14 Yiwu ambundambunda+ mumisewu.
Afipiskika ndi ndopa,+
Mwakuti palivi yo wangakwaska vakuvwala vawu.
ס [Samekh]
15 Yiwu atiŵadaniriziya kuti: “Tiyeni ko! Akufipiskika yimwi! Tiyeni ko! Tiyeni ko! Kutikwaska cha!”
Pakuti alivi pakuja ndipu ayingayinga ŵaka.
Ŵanthu amitundu yinyaki akamba kuti: “Yiwu angaja cha ndi isi.*+
פ [Pe]
16 Chisku chaku Yehova chaŵambininiska;+
Iyu wazakuŵalenge so lisungu cha.
Ŵanthu azakuŵatumbika cha asembi,+ azakuŵalenge lisungu cha ŵara.”+
ע [Ayin]
17 Chinanga ndi sonu masu ngidu ngavuka kupenja chovyu cho chisanirika cha.+
Tingupenjapenja chovyu ku mtundu wo ungutitaska cha.+
צ [Tsade]
18 Angutipenjapenja kwekosi+ mwakuti tatondekanga kwenda mumabalaza nga tawuni yidu.
Umaliru widu we pafupi; mazuŵa ngidu ngamala, pakuti umaliru widu wafika.
ק [Qoph]
19 Ŵanthu wo atitchimbizanga atchimbiyanga ukongwa kuluska nombu zamude.+
Angutitchimbiza mumapiri; angutikhaza muchipululu.
ר [Resh]
20 Wakusankhika waku Yehova,+ yo ndi mvuchi wamumphunu zidu, wakoleka mumbuna yawu yikulu,+
Mweniyo tingukamba kuti: “Tazamuja mu mduzi waki pakati pa mitundu ya ŵanthu.”
ש [Sin]
21 Zaya ndipuso kondwa, yiwi mwana munthukazi wa ku Edomu,+ yo waja mucharu cha Uzi.
Kweni nawi upaskikengi kapu,+ ndipu uroŵiyengi ndi kuja nkhuli.+
ת [Taw]
22 Yiwi mwana munthukazi wa ku Ziyoni, chilangu cha kunanga kwaku chamala.
Iyu wazakukutole so ku ukapolu cha.+
Kweni wazamukumbuka kunanga kwaku, yiwi mwana munthukazi wa ku Edomu.
Wazamuvumbuwa maubudi ngaku.+
5 Yimwi Yehova, kumbukani vo vatiwiya.
Lereskani ndipu wonani mo talengeseke.+
2 Chihara chidu chaperekeka kwa alendu, nyumba zidu zaperekeka kwa alendu.+
3 Tasambuka ŵana alanda ambula awusewu; anyinafwi ŵe nge vyoko.+
4 Tilipira kuti timwi maji ngidu chayingu,+ ndipu titchajika ndalama pa nkhuni zidu.
5 Ŵanthu wo atitiskera ŵe pafupi kutiko;
Talakatuka, kweni atitipumuzga cha.+
6 Titanda manja ngidu ku Ijipiti+ kweniso ku ŵanthu a ku Asiriya,+ kuti tisaniyi chiŵandi chakukwana chakuti tiryi.
7 Apapi ŵidu wo akubuda kulivi, kweni isi tisuzgika chifukwa cha kunanga kwawu.
8 Ateŵeti ndiwu atitilamuliya sonu; palivi yo wangatikwamphuwa mumanja mwawu.
9 Tiŵika umoyu widu pa ngozi kuti tisaniyi chakurya,+ chifukwa cha lipanga la muchipululu.
10 Khungu lidu litotcha nge ng’anju, chifukwa cha kuŵaŵa kwa nja.+
11 Yiwu ayuyuwa* anthukazi mu Ziyoni, ayuyuwa amwali mumatawuni nga ku Yuda.+
12 Alongozgi angupayikika janja limoza,+ ndipu ŵara anguyuyulika.+
13 Anyamata apinga chakuperiyapu, ndipu tinyamata taguŵa chifukwa cha kupinga nkhuni zizitu.
14 Ŵara atuwapu pageti la tawuni;+ anyamata aleka kumba sumu zawu.+
15 Likondwa latuwamu mumtima mwidu, guli widu wasambuka kuliya.+
16 Chisoti chaufumu chawa kutuliya kumutu kwidu. Soka kwaku isi, chifukwa chakuti tabuda!
17 Chifukwa cha venivi, mtima widu watama,+
Ndipu chifukwa cha vinthu venivi, masu ngidu ngachita mdima,+
18 Chifukwa chakuti Phiri la Ziyoni lasambuka mahami,+ akambwi atendatenda mwenimo sonu.
19 Kweni yimwi Yehova, muja pampandu winu waufumu kwamuyaya.
Mpandu winu waufumu uŵengeku mu migonezi yosi.+
20 Ntchifukwa wuli mutitiluwiya limu ndipuso kutijowo kwa nyengu yitali viyo?+
21 Tiweziyeni kwaku yimwi, yimwi Yehova, ndipu tiweriyengi kwaku yimwi ndi mtima wosi.+
Vinthu vosi vije nge mo venge kali.+
22 Kweni mwatijowole limu.
Mulutirizga kutikwiyiya ukongwa.+
Machaputala 1-4 ndi sumu zakumba pakuliya ndipu zikulembeka mwakukoliyana ndi vilembu va mu alifabeti ya Chiheberi.
Pamwenga kuti, “Asungwana.”
Mazu ngaki chayingu, “mutu waki.”
Munthukazi uyu wamiya Yerusalemu.
Mazu ngaki chayingu, “mulomu waki.”
Pamwenga kuti, “Asungwana.”
Mazu ngaki chayingu, “Matumbu ngangu ngabwata.”
Mazu ngaki chayingu, “masengwi ngosi ngaku.”
Mazu ngaki chayingu, “Wakanda.”
Pamwenga kuti, “Wabwanganduwa.”
Mazu ngaki chayingu, “kumeza.”
Pamwenga kuti, “ulongozgi.”
Mazu ngaki chayingu, “Matumbu ngangu ngabwata.”
Mazu ngaki chayingu, “Chiŵindi changu chapungulika pasi.”
Mazu ngaki chayingu, “sengwi.”
Mazu ngaki chayingu, “mwana munthukazi wa jisu laku wangapumuwanga cha.”
Mazu ngaki chayingu, “pamitu ya misewu yosi.”
Pamwenga kuti, “chipasu chawu.”
Pamwenga kuti, “Asungwana.”
Pamwenga kuti, “ŵana anthazi.”
Yapa pangafwatulikiya so kuti, “wandijowo.”
Mazu ngaki chayingu, “Wakanda.”
Mazu ngaki chayingu, “Pakuti malisungu ngaki ngamala cha.”
Mazu ngaki chayingu, “Ngaja ngafya.”
Pamwenga kuti, “mwakuzikira.”
Mazu ngaki chayingu, “ye pamutu wa misewu yosi.”
Mazu ngaki chayingu, “Kunanga kwa.”
Sinoo ndi maji ngakukhoma ngo ngawoneka tuu nge mche wakusilirika ndipu ngatuwa kutuliya kuchanya.
Mazu ngaki chayingu, “wo agwazika.”
Pamwenga kuti, “angaja cha kunu nge alendu.”
Pamwenga kuti, “akolere.”