YOWELI
1 Yehova wangukambiya Yoweli* mwana waku Petuweli, kuti:
2 “Vwani ivi, yimwi ŵara,
Khazaniku gutu, mosi yimwi muja mucharu ichi.*
Kumbi vinthu va nge ivi vikuchitikapu mu mazuŵa nginu
Pamwenga mu mazuŵa nga apapi ŵinu akali?+
3 Kambiyani ŵana ŵinu vinthu venivi,
Ŵana ŵinu akambiyi ŵana ŵawu,
Ndipu ŵana ŵawu akambiyi mugonezi wapanthazi.
4 Vo azombi akusakaza angulekaku, chigulu cha azombi charya;+
Vo chigulu cha azombi chingulekaku, azombi ambula mapapa arya;
Ndipu vo azombi ambula mapapa angulekaku, azombi anja arya.+
5 Yukani yimwi aloŵevu,+ ndipu liyani!
Tenjeni, yimwi mosi mutumwa vinyu,
Chifukwa chakuti vinyu winu wakunong’ome watuzgikaku ku milomu yinu.+
6 Pakuti mtundu wakwere kucharu changu, mtundu wanthazi kweniso wambula kuŵerengeka.+
Minyu ngaki nge nge minyu nga nkharamu,+ ndipu vibwanyu vaki ve nge vibwanyu va nkharamu.
7 Wananga chimiti changu cha mphereska ndipu chimiti changu cha mkuyu wachisambusa chipandu,
Wakomole limu makungwa nga vimiti vo ndipu wavitaya pamphepeti,
Wakomo so makungwa nga mphukira za vimiti vo.
8 Liya nge mo mwali* yo wavwala chigudulu waliriya
Chifukwa cha mulumu waki wa pa unyamata.
9 Sembi ya mbewu+ kweniso sembi ya chakumwa+ zaleka kuperekeka munyumba yaku Yehova;
Asembi, ateŵeti aku Yehova aliya.
11 Alimi ŵe ndi chitima, akuphwere minda ya mphereska aliya,
Chifukwa cha tirigu ndi balire;
Pakuti mbewu zo apenjanga kuvuna zanangika.
12 Chimiti cha mphereska chamira,
Chimiti cha mkuyu chafota.
Chimiti cha pomegiraneti, chimiti cha kantchindi kweniso chimiti cha maapozi vamira,
Vimiti vosi vamudondu vamira;+
Pakuti likondwa lasambuka chilengesu pakati pa ŵanthu.
Sereni ndipu gonani mwavwala vigudulu, yimwi ateŵeti aku Chiuta wangu;
Pakuti palivi yo watuza ndi sembi ya mbewu+ ndipuso sembi ya chakumwa+ kunyumba yaku Chiuta winu.
14 Pharazga kuti ŵanthu afungi; danisa unganu wapade.+
Wunganisa ŵara limoza ndi ŵanthu wosi a mucharu ichi,
Awunganisi pa nyumba yaku Yehova Chiuta winu,+ ndipu liriyani Yehova kuti wakuwovyeni.
15 Soka chifukwa cha zuŵa lo!
Pakuti zuŵa laku Yehova le pafupi,+
Ndipu lizengi nge pharanyiku lakutuliya kwa Wanthazizosi!
16 Asi chakurya chatuzgikapu pa masu pidu,
Asi kuzaya kweniso likondwa vatuzgikamu munyumba yaku Chiuta widu?
17 Mbewu zaphapha* kusi kwa mafocholu ngaki.
Nyumba zakusungamu vinthu zanangika.
Nkhokwi zabwangandulika, pakuti mbewu zamira.
18 Chinanga ndi viŵetu vitamantha!
Miskambu ya ng’ombi yitendatenda ŵaka chifukwa cha kutimbanyizgika pakuti palivi po yingarya uteka!
Ndipu miskambu ya mbereri yilangika.
19 Ndidanengi yimwi, yimwi Yehova;+
Pakuti motu wawotcha malu ngakuliskaku viŵetu nga muchipululu,
Ndipu mulipu wa motu wawotcha vimiti vosi vamudondu.
20 Chinanga ndi vimiti vamudondu viliriya yimwi kuti muviwovyi,
Chifukwa misinji yakamuka
Ndipu motu wawotcha malu ngakuliskaku viŵetu nga muchipululu.”
Danirizani chiwawa cha nkhondu muphiri langu lakupaturika.
2 Ndi zuŵa la mdima kweniso mdima ukulu,+
Zuŵa la mitambu kweniso mdima ukulu ukongwa,+
Le nge ukweru wa kumatandakucha wo uŵaliya pamapiri.
Pe ŵanthu anandi kweniso anthazi;+
Ŵanthu a nge ŵenaŵa akuŵapu kali cha,
Ndipu azamuŵapu so cha
Mu vyaka va migonezi yosi.
3 Kunthazi kwawu motu usakaza vinthu,
Ndipu kuvuli kwawu mulipu wa motu unanga vinthu.+
Charu cha kunthazi kwawu che nge munda wa Edeni,+
Kweni kuvuli kwawu kwe chipululu chakunangika,
Palivi cho chingapona.
4 Yiwu awoneka nge mahachi,
Ndipu atchimbiya nge mahachi ngankhondu.+
5 Asani andwika pachanya pa mapiri, chiwawa chawu chivwika nge chiwawa cha magaleta,+
Chivwika nge kuphwalaphwatuka kwa mapesi ngo ngatufya ndi motu.
Che nge chiwawa cha ŵanthu wo andanda mumzeri kuti achiti nkhondu.+
6 Chifukwa chaku yiwu, ŵanthu wosi azamusuzgika.
Chisku chechosi chazamubwanthuka.
7 Alotoka nge asilikali,
Akwera mpanda nge asilikali,
Weyosi watenda panthowa yaki,
Ndipu atuwapu cha panthowa zawu.
8 Yiwu atutuzganatutuzgana cha;
Munthu weyosi watenda panthowa yaki.
Asani vidya vawisa anyaki mwaku yiwu,
Anyaki awere vuli cha.
9 Atchimbiriya mutawuni, atchimbiya pampanda.
Akwera panyumba, asere munyumba kuziya mumawindu nge munkhungu.
10 Charu chisukunyika ndipu machanya nganjekeme pa masu pawu.
Lumwi kweniso mwezi vachita mdima,+
Ndipu nyenyezi zaleka kuŵala.
11 Yehova wazamukweza mazu ngaki pa masu pa asilikali ŵaki,+ pakuti asilikali ŵaki mbanandi ukongwa.+
Pakuti yo wafiska mazu Ngaki ngwanthazi;
Pakuti zuŵa laku Yehova ndikulu kweniso ndakuchitiska mantha ukongwa.+
Ndiyani yo wangalizizipizga?”+
12 Yehova wakamba kuti: “Chinanga ndi sonu, weriyani kwaku ini ndi mitima yinu yosi,+
Ndi kufunga,+ kuliya kweniso kutenje.
13 Paluwani mitima yinu,+ vakuvwala vinu cha,+
Ndipu weriyani kwaku Yehova Chiuta winu,
Pakuti iyu ngwalisungu kweniso ngwawezi, ngwambula kukwiya liŵi+ ndipuso ngwakuzaza ndi chanju chambula kumala,+
Ndipu wazamusintha maŵanaŵanu* kuti waleki kukuwisiyani soka.
14 Ndiyani yo wangaziŵa, panyaki waweleriyengi ndi kusintha maŵanaŵanu*+
Ndi kukulekiyani vitumbiku,
Sembi ya mbewu kweniso sembi ya chakumwa kuti mupereki kwaku Yehova Chiuta winu?
15 Mbani mbata mu Ziyoni!
Pharazgani kuti ŵanthu afungi; danisani unganu wapade.+
16 Wunganisani ŵanthu; towesani mpingu.+
Wunganisani anthulumi akukota;* wunganisani ŵana kweniso malitema ngakonkha.+
Munthulumi mweneku wa nthengwa watuwi muchipinda chaki ndipuso mwali watuwi muchipinda chaki.
17 Pakati pa khondi ndi guŵa la sembi+
Asembi, ateŵeti aku Yehova aliyi ndi kukamba kuti:
‘Yimwi Yehova, chitiyani lisungu ŵanthu ŵinu;
Mungachitiskanga cha kuti chihara chinu chije chinthu chakunyozeka,
Mungazomerezanga cha kuti ŵanthu amitundu yinyaki aŵalamuliyi.
Ŵanthu amitundu yinyaki akambiyenji kuti, “Chiuta wawu we pani?”’+
18 Pavuli paki, Yehova wazamuvikiliya charu chaki
Ndipu wazamuchitiya lisungu ŵanthu ŵaki.+
19 Yehova wazamumuka ŵanthu ŵaki kuti:
‘Nditikutumiyani tirigu, vinyu wasonu kweniso mafuta,
Ndipu mwazamuguta ukongwa;+
Ndazamuzomereza so cha kuti ŵanthu amitundu yinyaki akunyozeni.+
20 Munthu wa kunkhondi,* ndazakumudikisiya kutali ndi yimwi;
Ndazakumumbininiskiya kucharu chakumira kweniso chakunangika,
Asilikali ŵaki akunthazi ndazakuŵadikisiya kunyanja ya kuvuma*
Ndipu Asilikali ŵaki akuvuli ndazakuŵadikisiya kunyanja ya kuzambwi.*
Fungu laki lazamukwera kuchanya,
Mwefu waki wazamukweranga kuchanya;+
Pakuti Chiuta wazamuchita vinthu vikulu.’
21 Yiwi charu, leka kopa.
Zaya kweniso kondwa, pakuti Yehova wazamuchita vinthu vikulu.
22 Yimwi vinyama vamudondu, mungawopanga cha,
Pakuti uteka wamuchipululu wazamubiriŵira,+
Ndipu vimiti vazamupasa vipasu;+
Chimiti cha mkuyu kweniso chimiti cha mphereska, vazamupasa ukongwa.+
23 Yimwi ŵana aku Ziyoni, zayani kweniso kondwani mwaku Yehova Chiuta winu;+
Pakuti iyu wazakukupaskani vuwa yakwamba yakukwana,
Ndipu wazakukuwisiyani vuwa yinandi,
Wazakukuwisiyani vuwa yakwamba kweniso yakumaliya nge mo wachitiyanga kali.+
24 Malu ngakukhwemiyapu mbewu, ngazamuzaza ndi tirigu wamampha,
Ndipu malu ngakukandiyapu mphereska ngazamuzaza ndi vinyu wasonu, kweniso malu ngakukamiyapu mafuta ngazamuzaza ndi mafuta.+
25 Ndazakukuweziyanipu mbewu zinu mwakukoliyana ndi vyaka
Vo zinguryika ndi chigulu cha azombi, azombi ambula mapapa, azombi anja kweniso azombi akusakaza,
Asilikali ŵangu anandi wo ndingutuma pakati pinu.+
26 Mwazamukurya ndi kuguta,+
Ndipu mwazamuthamika zina laku Yehova Chiuta winu,+
Yo wachita vakuziziswa chifukwa chaku yimwi;
Ŵanthu ŵangu azamulengeseka so cha.+
27 Ndipu mwazamuziŵa kuti ini nde pakati pa Ayisirayeli+
Kweniso kuti ndini Yehova Chiuta winu,+ palivi munyaki!
Ŵanthu ŵangu azamulengeseka so cha.
28 Pavuli paki, ndazamupunguliya mzimu wangu+ pa chamoyu chechosi,
Ndipu ŵana ŵinu anthulumi ndi ŵana ŵinu anthukazi azamukamba mauchimi,
Anthulumi akukota azamulota malotu,
Ndipu anyamata azamuwona viwona.+
29 Ndipuso mu mazuŵa ngeningo, ndazamupunguliya so mzimu wangu
Pa akapolu ŵangu anthulumi kweniso akapolu ŵangu anthukazi.
30 Ndazamuchita vakuziziswa kuchanya kweniso pacharu chapasi,
Ndopa, motu kweniso josi linandi.+
31 Lechendazi zuŵa likulu kweniso lakuchitiska mantha laku Yehova,+
Lumwi lazamuchita mdima ndipu mwezi wazamusambuka ndopa.+
32 Ndipu weyosi yo wadaniya pa zina laku Yehova wazamutaskika;+
Pakuti pa Phiri la Ziyoni kweniso mu Yerusalemu, mwazamukuŵa ŵanthu akupona+ nge mo Yehova wakambiya,
Akupona wo Yehova watiŵadana.”
3 “Pakuti awonani! mu mazuŵa ngo kweniso mu nyengu yo,
Ndazamuweze kwawu ŵanthu a ku Yuda ndipuso ku Yerusalemu wo angutoleke ku ukapolu,+
2 Kweniso ndazamuwunganisa pamoza mitundu yosi ya ŵanthu
Ndazakuŵayeruzgiya kweniko+
Chifukwa cha Ayisirayeli wo mbanthu ŵangu kweniso wo ntchihara changu,
Pakuti anguŵambininiskiya pakati pa mitundu ya ŵanthu,
Ndipu angugaŵana charu changu.+
3 Pakuti achitiyanga mayeri ŵanthu ŵangu;+
Agulisanga anyamata kuti alipiri mahuli
Kweniso agulisanga asungwana kuti aguli vinyu.
4 Ndipuso, ndakunangiyanji,
Yiwi Turo, Sidoni ndipuso vigaŵa vosi va ku Filisitiya?
Kumbi mutindiweze nduzga chifukwa cha chinthu chinyaki cho ndakuchitiyani?
Asani mutindiweze nduzga,
Ndazamuweze nduzga zo pa mitu yinu mwaliŵi.+
5 Chifukwa chakuti mwato siliva ndi golidi wangu,+
Ndipuso mwato vinthu vangu vakuzirwa ukongwa ndi kuviŵika munyumba zinu zakusopiyamu;
6 Ndipuso mwagulisa ŵanthu a ku Yuda ndi a ku Yerusalemu kwa Agiriki,+
Kuti muŵatuzgemu mucharu chawu ndi kuchiŵaŵika kutali;
7 Ndiŵaweziyengi mucharu chawu kutuliya ko munguŵagulisa,+
Ndipu ndazamuweze nduzga pa mitu yinu.
8 Ndazamugulisa ŵana ŵinu anthulumi kweniso ŵana ŵinu anthukazi ku ŵanthu a ku Yuda,+
Ndipu yiwu azakuŵagulisa ku ŵanthu a ku Sheba, mtundu wakutali;
Pakuti Yehova ndiyu wakamba.
9 Pharazgani pakati pa mitundu ya ŵanthu kuti:+
‘Nozgekiyani nkhondu! Vundumuwani anthulumi anthazi!
Asilikali wosi azi kufupi, alekeni akengi!+
10 Sulani mayembi nginu nga pulawu kuti ngaje malipanga kweniso sulani vidya vinu vakuphatiya vimiti kuti vije mikondu.
Munthu wambula nthazi wakambi kuti: “Nde ndi nthazi.”
11 Zani ndipu wovyani, yimwi mitundu yosi yapafupi, wunganani pamoza!’”+
Yimwi Yehova, sisiyani vinkhara vinu* kumalu ngo.
12 “Mitundu yiyuskiki ndipu yiluti ku Dambu laku* Yehosafati;
Pakuti ndazamuja kweniko kuti ndiyeruzgi mitundu yosi yapafupi.+
13 Ponyani chisenga pakuti mbewu zacha.
Sikiyani kunu ndipu kandani mphereska, pakuti malu ngakukandiyapu mphereska ngazaza.+
Vakusungiyamu vazaza, pakuti uheni wawu ngukulu.
14 Magulu nga ŵanthu, magulu nga ŵanthu nge mudambu la* cheruzgu,
Pakuti zuŵa laku Yehova le pafupi mudambu la cheruzgu.+
15 Lumwi ndi mwezi vazamuchita mdima,
Ndipu nyenyezi zazamuleka kuŵala.
16 Yehova wazamuwuluma kutuliya mu Ziyoni,
Wazamukweza mazu ngaki kutuliya mu Yerusalemu.
Ndipu kuchanya ndi charu chapasi vazamusukunyika;
Kweni Yehova wazamuja malu ngakuthaŵiyaku ŵanthu ŵaki,+
Malu ngakuvikilirika nga Ayisirayeli.
17 Ndipu mwazamuziŵa kuti ini ndini Yehova Chiuta winu, yo waja mu Ziyoni, phiri langu lakupaturika.+
18 Mu zuŵa lenilo, mumapiri mwazamunthonya vinyu wakunong’ome,+
Mumitunthu mwazamukwenda mkaka,
Ndipu mutimisinji ta ku Yuda mwazamukwenda maji.
19 Kweni Ijipiti wazamusambuka mahami,+
Ndipu Edomu wazamusambuka chipululu chakunangika,+
Chifukwa cha nkhaza zo wanguchitiya ŵanthu a ku Yuda,+
Yiwu angudira ndopa zambula kunanga mucharu cha Yuda.+
20 Kweni mu Yuda mwazamujanga ŵanthu nyengu zosi,
Ndipuso mu Yerusalemu mwazamujanga ŵanthu mu migonezi yosi.+
21 Ndopa zawu zo ndaziwonanga kuti zakunanga, ndazakuziwona kuti zakunanga cha;+
Ndipu Yehova wazamujanga mu Ziyoni.”+
Kung’anamuwa kuti, “Yehova Ndi Chiuta.”
Pamwenga kuti, “pacharu chapasi.”
Pamwenga kuti, “msungwana.”
Mazu ngaki chayingu, “Jimangeni muchiwunu.”
Pamwenga kuti, “jipumeni pachifuŵa.”
Yapa pangafwatulikiya so kuti, “vipasu va mkuyu vakumira vanangika.”
Anyaki akamba kuti “lipenga.”
Pamwenga kuti, “pacharu chapasi.”
Pamwenga kuti, “wazamuchita chitima.”
Pamwenga kuti, “kuchita chitima.”
Pamwenga kuti, “ŵara.”
Anyaki akamba kuti, “kumpotu.”
Kung’anamuwa Nyanja Yakufwa.
Kung’anamuwa Nyanja ya Meditereniyani.
Pamwenga kuti, “Chidika chaku.”
Kung’anamuwa kuti, “Yehova Ngwakweruzga.”
Mazu ngaki chayingu, “asilikali ŵinu.”
Pamwenga kuti, “Chidika chaku.”
Pamwenga kuti, “muchidika cha.”
Ili ndi dambu lo lija ndi maji mu nyengu ya vuwa pe.