OBADIYA
1 Chiwona chaku Obadiya:*
Yehova, Ambuya Fumu Yikulu, wakamba vakukwaskana ndi Edomu kuti:+
“Tavwa uthenga wakutuliya kwaku Yehova,
Nthumi yatumika pakati pa mitundu ya ŵanthu kuti yikakambi kuti:
‘Yukani, tiyeni tinozgeke kuti tikachiti nkhondu ndi Edomu.’”+
2 “Awona! Ndakuchitiska kuti uje wambula kuzirwa pakati pa mitundu ya ŵanthu;
Wayuyulika ukongwa.+
3 Wapusisika chifukwa cha mtima waku wakujikuzga.+
Yiwi wakuja kusi kwa jalawi,
Yiwi wakuja pamalu ngapachanya, ndipu mumtima mwaku ukamba kuti,
‘Ndiyani yo wazakundisisiya pasi?’
4 Chinanga kuti ungaja pachanya* nge nombu,
Pamwenga chinanga kuti ungazenga chizimbu chaku pakati pa nyenyezi,
Ndazakukusisiya pasi kutuwa penipo,” Yehova ndiyu wakamba.
5 “Asani ankhungu angaza kwaku yiwi, asani akuphanga angaza ndi usiku,
(Wazamusakazika ukongwa!)*
Asi angaba vinthu vo akhumba pe?
Pamwenga asani ŵanthu akutondo mphereska angaza kwaku yiwi,
Kumbi angalekaku cha mphereska zinyaki kuti ŵanthu atondo?+
6 Esawu wafufuzika ukongwa!
Chuma chaki chakubisika chapenjeka ukongwa!
7 Yiwu akudikisiya kumphaka.
Wosi wo unguchita nawu phanganu akupusika.
Ŵanthu wo wenga nawu pa chimangu akuthereska.
Wo waryanga nawu chiŵandi azakukuthyiya chilepa,
Kweni yiwi wazamuziŵa cha.
8 Mu zuŵa lenilo,” Yehova ndiyu wakamba,
“Asi ndazamusakaza ŵanthu azeru a mu Edomu+
Kweniso ŵanthu akuziŵa vinthu a muchigaŵa chamapiri chaku Esawu?
9 Ndipu vinkhara vaku vazamuchita mantha,+ yiwi Temani,+
Chifukwa weyosi muchigaŵa chamapiri chaku Esawu wazamubayika.+
10 Chifukwa cha nkhaza zo unguchitiya mubali waku Yakobe,+
Wazamuchita soni ukongwa,+
Ndipu wazamumala kwamuyaya.+
11 Pa zuŵa lo unguma pamphepeti,
Pa zuŵa lo alendu angutole asilikali ŵaki ku ukapolu,+
Pa nyengu yo alendu anguselere pageti laki kweniso kuchita mayeri+ paku Yerusalemu,
Yiwi unguchita vinthu nge yiwu.
12 Mphanyi ungusekere cha chifukwa cha zuŵa la mubali waku, pa zuŵa la soka laki,+
Mphanyi ungukondwa cha chifukwa cha ŵanthu a ku Yuda pa zuŵa la kumala kwawu,+
Ndipuso mphanyi ungulongoro mwakujikuzga cha pa zuŵa lo angusuzgika.
13 Mphanyi unguza cha pageti la ŵanthu ŵangu mu zuŵa la soka lawu,+
Mphanyi ungusekere cha chifukwa cha suzgu yaki mu zuŵa la soka laki,
Ndipuso mphanyi unguphanga cha chuma chaki mu zuŵa la soka laki.+
14 Mphanyi unguma cha pamphatukanu kuti ubayi ŵanthu ŵaki wo athaŵanga,+
Ndipuso ŵanthu ŵaki akupona mphanyi unguŵapereka cha mu manja mwa arwani mu zuŵa la suzgu.+
15 Pakuti zuŵa laku Yehova lakulangiya mitundu yosi ya ŵanthu le pafupi.+
Vinthu vo unguchita, ndivu vazakukuchitikiya.+
Vo unguchitiya anyaku, vazamuwere pamutu waku.
16 Pakuti nge mo yimwi mwamwiya vinyu paphiri langu lakupaturika,
Ndimu so mitundu ya ŵanthu yazamumwiyanga ukali wangu nyengu zosi.+
Mitundu yo, yazamukumwa ukali wangu ndi kuwumeza,
Ndipu azamuja nge kuti kwengavi.
17 Kweni ŵanthu akupona azamuja paphiri la Ziyoni,+
Ndipu phiri lo lazamuja lakupaturika,+
Nyumba yaku Yakobe yazamuto vinthu vawu.+
18 Nyumba yaku Yakobe yazamusambuka motu,
Nyumba yaku Yosefi yazamusambuka mulipu wa motu,
Ndipu nyumba yaku Esawu yazamuja nge mapesi;
Yiwu azakuŵawotcha ndi motu kweniso azakuŵapiriza,
Ndipu palivi munthu wa munyumba yaku Esawu yo wazamupona,+
Pakuti Yehova ndiyu wakamba.
19 Yiwu azamuto chigaŵa cha Negebu kweniso chigaŵa chamapiri chaku Esawu,+
Azamuto chigaŵa cha Shefela kweniso charu cha Afilisiti.+
Azamuto charu cha Efurayemu kweniso cha Samariya,+
Ndipu Benjamini wazamuto charu cha Giliyadi.
20 Ŵanthu wo angutoleke ku ukapolu kutuliya pachimbumira chakuchitiyapu nkhondu ichi,*+
Wo Mbayisirayeli, azamuto charu cha Akanani mpaka ku Zarefati.+
Ndipu ŵanthu a ku Yerusalemu wo angutoleke ku ukapolu, wo ŵenga ku Sefaradi, azamuto matawuni nga ku Negebu.+
21 Ndipu akutaska azamukwere paphiri la Ziyoni
Kuti ayeruzgi chigaŵa chamapiri chaku Esawu,+
Ndipu ufumu wazamukuŵa waku Yehova.”+
Kung’anamuwa kuti, “Mteŵeti waku Yehova.”
Yapa pangafwatulikiya so kuti, “Chinanga kuti uphululukiya muchanya.”
Yapa pangafwatulikiya so kuti, “Kumbi azamunanga vinthu vinandi wuli”?
Pamwenga kuti, “kutuliya pamalu ngakuvikilirika yanga.”