HAGAYI

1 Mu chaka chachiŵi cha ulamuliru wa Fumu Dariyo, mu mwezi wa 6, pa zuŵa lakwamba la mwezi wo, Yehova wangulongoro ndi Zerubabeli+ mwana waku Salatiyeli, nduna ya ku Yuda kweniso Yoswa, mwana waku Yehozadaki wasembi mura, kuporote mwa mchimi Hagayi,*+ ndipu wangukamba kuti:

2 “Yehova wa mizinda wakamba kuti: ‘Ŵanthu yaŵa akamba kuti, “Nyengu yakuzenge* nyumba* yaku Yehova yechendakwani.”’”+

3 Ndipu Yehova wangulongoro so kuporote mwa mchimi Hagayi+ kuti: 4 “Kumbi iyi ndi nyengu yakuti yimwi mujengi munyumba zinu zakutoweseka ndi mathabwa, penipo nyumba yangu njakupasuka?+ 5 Sonu Yehova wa mizinda wakamba kuti, ‘Ŵanaŵaniyani mwakuphwere vo muchita. 6 Mwamija mbewu yinandi kweni muvunengi vimanavi.+ Muturya kweni muguta cha. Mutumwa kweni nyota yimala cha. Muvwala vakuvwala kweni mutuvwa kufunda cha. Munthu yo wachita ganyu waŵika malipiru ngaki muthumba lakutolokatoloka.’”

7 “Yehova wa mizinda wakamba kuti, ‘Ŵanaŵaniyani mwakuphwere vo muchita.’

8 “‘Kweliyani kuphiri ndipu mukazi ndi vimiti.+ Zengani nyumba+ kuti ndikondwi nayu ndipuso kuti ndikankhuskiki,’+ Yehova ndiyu wakamba.”

9 “‘Mwakhazanga vinandi kweni mwalondiyanga vimanavi; asani mwaza navu munyumba yangu, ndaviputisiyanga kutali.+ Chifukwa wuli?’ Yehova wa mizinda ndiyu wakamba. ‘Chifukwa chakuti nyumba yangu njakupasuka, penipo yimwi mutangwanika ndi kuphwere nyumba zinu.+ 10 Mwaviyo, machanya nganguleka kukuwisiyani dungwi, ndipu charu chapasi chinguleka kupasa vipasu vaki. 11 Ndipu ndingulutirizga kudaniya chilala pa charu chapasi, pa mapiri, pa mbewu, pa vinyu wasonu, pa mafuta, pa vinthu vo vime pacharu, pa ŵanthu, pa viŵetu ndipuso pa ntchitu zosi za manja nginu.’”

12 Zerubabeli+ mwana waku Salatiyeli+ ndi Yoswa mwana waku Yehozadaki,+ wasembi mura, ndipuso ŵanthu wosi, anguvwa mazu ngaku Yehova Chiuta wawu, kweniso mazu ngaku Hagayi mchimi, chifukwa Yehova Chiuta wawu wangumutuma; ndipu ŵanthu angwamba kuchita mantha chifukwa chaku Yehova.

13 Pavuli paki, Hagayi muthenga waku Yehova, wangukambiya ŵanthu uthenga mwakukoliyana ndi vo Yehova wangumulamula. Iyu wangukamba uthenga wakuti: “‘Ini nde namwi,’+ Yehova ndiyu wakamba.”

14 Mwaviyo, Yehova wanguchiska*+ Zerubabeli mwana waku Salatiyeli, nduna ya ku Yuda,+ wanguchiska Yoswa+ mwana waku Yehozadaki, wasembi mura, kweniso wanguchiska ŵanthu wosi; ndipu yiwu anguza ndi kwamba kuzenga nyumba yaku Yehova wa mizinda, Chiuta wawu.+ 15 Yapa penga pa zuŵa la 24 la mwezi wa 6, mu chaka chachiŵi cha ulamuliru wa Fumu Dariyo.+

2 Mu mwezi wa 7, pa zuŵa la 21 la mwezi wo, Yehova wangulongoro kuziya mwa mchimi Hagayi,+ ndipu wangukamba kuti, 2 “Fumba Zerubabeli+ mwana waku Salatiyeli, nduna ya ku Yuda+ ndipuso Yoswa+ mwana waku Yehozadaki,+ wasembi mura kweniso ŵanthu wosi kuti: 3 ‘Ndiyani waku yimwi yo wanguwona unkhankhu wakali wa nyumba* iyi?+ Kumbi sonu yiwoneka wuli? Kumbi muwona cha kuti yilivi unkhankhu pakuyeruzgiya ndi mo yenge kali?’+

4 “‘Kweni sonu khwima yiwi Zerubabeli,’ Yehova ndiyu wakamba, ndipuso khwima yiwi Yoswa mwana waku Yehozadaki, wasembi mura.’

“‘Khwimani yimwi mwaŵanthu mosi a mucharu,’+ Yehova ndiyu wakamba, ‘ndipu gwirani ntchitu.’

“‘Pakuti nde namwi,’+ Yehova wa mizinda ndiyu wakamba. 5 ‘Kumbukani vo ndingukulayizgani mwati mwatuwa mucharu cha Ijipiti,+ ndipu mzimu wangu we pakati pinu.*+ Mungawopanga cha.’”+

6 “Pakuti Yehova wa mizinda wakamba kuti, ‘Pambula kuswera yapa, ndisukunyisengi so kuchanya ndi charu chapasi, nyanja ndi mtunda.’+

7 “‘Ndisukunyisengi mitundu yosi ya ŵanthu ndipu vinthu vakuzirwa vakutuliya mu mitundu yosi vizengi munyumba iyi;+ ndipu ndichitiskengi kuti yizazi ndi unkhankhu,’+ Yehova wa mizinda ndiyu wakamba.

8 “‘Siliva ngwangu, ndipuso golidi ngwangu,’ Yehova wa mizinda ndiyu wakamba.

9 “‘Kunthazi, unkhankhu wa nyumba yo, wazamukuŵa ukulu ukongwa kuluska wakali,’+ Yehova wa mizinda ndiyu wakamba.

“‘Ndipu ndazakukupaskani chimangu mumalu ngenanga,’+ Yehova wa mizinda ndiyu wakamba.”

10 Pa zuŵa la 24 la mwezi wa 9, mu chaka chachiŵi cha ulamuliru waku Dariyo, Yehova wangulongoro ndi mchimi Hagayi,+ ndipu wangukamba kuti: 11 “Yehova wa mizinda wakamba kuti, ‘Fumba asembi vakukwaskana ndi dangu, afumbi kuti:+ 12 “Asani munthu wapinga nyama yakupaturika pachivungu cha laya laki, ndipu chakuvwala cho chakwaska chiŵandi pamwenga chakurya pamwenga vinyu pamwenga mafuta pamwenga chakurya chinyaki chechosi, kumbi chakurya cho chiŵengi chakupaturika?”’”

Asembi angumuka kuti: “Awa!”

13 Pavuli paki, Hagayi wangufumba kuti: “Asani munthu ngwakufipiskika chifukwa chakukwaska munthu wakufwa ndipu iyu wakwaska chimoza mwa vakurya venivi, kumbi chakurya cho chiŵengi chakufipiskika?”+

Asembi angumuka kuti: “Chiŵengi chakufipiskika.”

14 Mwaviyo, Hagayi wangukamba kuti: “‘Ndimu ŵanthu yaŵa aliri, kweniso ndimu mtundu uwu uliri pa masu pangu,’ Yehova ndiyu wakamba, ‘ndimu so ziliri ntchitu zosi za manja ngawu; vinthu vosi vo apereka kweniko vakufipiskika.’

15 “‘Kweni kwamba sonu mpaka kunthazi, ŵanaŵaniyani mwakuphwere vo vinguchitika mwa wechendaŵikiki pa mwa unyaki munyumba yakusopiyamu yaku Yehova,+ 16 pa nyengu yo, asani munthu waza pa ndundu ya mbewu yo waŵanaŵananga kuti yikwana miyesu 20, wasaniyanga miyesu 10 pe; ndipu asani munthu waza mwakusunga vinyu kuti waneŵi vinyu wakukwana miyesu 50, wasaniyanga miyesu yakukwana 20 pe;+ 17 Yimwi limoza ndi ntchitu za manja nginu ndingukusakazani ndi chifundizi chikulu, kodikodi+ kweniso matalala, kweni palivi yo wanguwere kwaku ini,’ Yehova ndiyu wakamba.

18 “‘Chondi ŵanaŵaniyani ivi mwakuphwere kwamba msanawale mpaka kunthazi, kwamba pa zuŵa la 24 mu mwezi wa 9, kwamba zuŵa lo fawundeshoni ya nyumba yakusopiyamu yaku Yehova yinguzengeke;+ ŵanaŵaniyani ivi mwakuphwere: 19 Kumbi munkhokwi* mweche mbewu?+ Kumbi chimiti cha mphereska, cha mkuyu, cha pomegiraneti* ndipuso chimiti cha maolivi vapasa vipasu? Kwamba msanawale ndikutumiziyeningi vitumbiku.’”+

20 Pa zuŵa la 24 la mwezi wo, Yehova wangulongoro so ndi Hagayi, ndipu wangukamba kuti:+ 21 “Kambiya Zerubabeli nduna ya ku Yuda kuti, ‘Ndisukunyisengi kuchanya ndi charu chapasi.+ 22 Ndibwanganduwengi mipandu yaufumu kweniso ndituzgengepu nthazi za maufumu nga mitundu yinyaki;+ ndipu ndisakazengi magaleta ndi akukwerapu ŵaki, mahachi ndi akukwerapu ŵaki viwengi, munthu weyosi wabayengi mubali waki ndi lipanga.’”+

23 “‘Mu zuŵa lo,’ Yehova wa mizinda ndiyu wakamba, ‘Ndazamuto yiwi, mteŵeti wangu Zerubabeli+ mwana waku Salatiyeli,’+ Yehova ndiyu wakamba, ‘ndipu ndazamuchitiska kuti uŵi nge mpheti yakudindiya, pakuti ndasankha yiwi,’ Yehova wa mizinda ndiyu wakamba.”