KALATA YAKULUTA KWA AGALATIYA

1 Ini Paulo, wakutumika wakutuliya ku ŵanthu cha pamwenga kuporote mwa munthu, kweni kuporote mwaku Yesu Khristu+ ndi Chiuta, Ada,+ yo wangumuyuska ku nyifwa, 2 limoza ndi abali wosi wo nde nawu, ndilembe mipingu ya ku Galatiya kuti:

3 Wezi ukulu kweniso chimangu vakutuliya kwaku Chiuta Awusefwi ndipuso kwa Ambuya Yesu Khristu, viŵi namwi. 4 Iyu wangujipereka yija chifukwa cha maubudi ngidu,+ kuti titaskiki ku nyengu* yiheni yo tilimu,+ mwakukoliyana ndi khumbu laku Chiuta widu kweniso Awusefwi,+ 5 kwaku iyu kuŵi unkhankhu muyaya mpaka muyaya. Ame.

6 Ndazizwa kuti mupetukaku* liŵi ukongwa kwaku Yo wakukudanani mwakugwiriskiya ntchitu wezi ukulu waku Khristu, ndipu muluta ku uthenga wamampha wamtundu unyaki.+ 7 Palivi uthenga wamampha unyaki; kweni pe ŵanthu anyaki wo atikusuzgani+ ndipu akhumba kutimbanyizga uthenga wamampha wakukwaskana ndi Khristu. 8 Kweni asani weyosi, kwali ndisi pamwenga mungelu wakutuliya kuchanya, wangakupharazgiyani uthenga wamampha wakupambana ndi wo tingukupharazgiyani, mbwenu watembeki. 9 Nge mo takambiya kali, ndiwerezapu so, Weyosi yo watikupharazgiyani uthenga wamampha wakupambana ndi wo mukulonde, mbwenu watembeki.

10 Kumbi sonu ndikhumba kukopa ŵanthu pamwenga Chiuta? Pamwenga kumbi ndikhumba kukondwesa ŵanthu? Asani ndingulutirizga kukondwesa ŵanthu, ndatingi ndiŵengi kapolu waku Khristu cha. 11 Pakuti ndikhumba kuti muziŵi abali kuti uthenga wamampha wo ndingukupharazgiyani, ngwakutuliya ku ŵanthu cha.+ 12 Chifukwa ndinguwulonde kutuliya ku munthu cha pamwenga kusambizika, kweni Yesu Khristu ndiyu wangundivumbuliya.

13 Mukuvwa vo ndachitanga kali muchisopa cha Chiyuda+ kuti ndawutombozganga ukongwa* mpingu waku Chiuta ndipuso ndawunanganga.+ 14 Ndipu pakati pa ŵanthu amtundu wangu, ndachitanga umampha ukongwa muchisopa cha Chiyuda kuluska ŵanthu anandi a nthanga yangu, chifukwa ndenga ndi phamphu ukongwa pa midawuku ya apapi ŵangu.+ 15 Kweni Chiuta yo wangundituzga munthumbu ya ama ndi kundidana kuporote mu wezi waki ukulu,+ wati wawona kuti nkhwamampha 16 kuvumbuwa Mwana waki kuporote mwaku ini, kuti ndipharazgi uthenga wamampha wakukwaskana ndi iyu ku ŵanthu amitundu yinyaki,+ ndinguluta nyengu yeniyo cha kuchipempha ulongozgi ku munthu weyosi.* 17 Kweniso ndingukwere ku Yerusalemu cha, ku ŵanthu wo ŵenga akutumika ini ndechendaje wakutumika, kweni ndinguluta ku Arebiya, pavuli paki ndinguwere ku Damasiko.+

18 Pati pajumpha vyaka vitatu, ndingukwere ku Yerusalemu+ kuchikumana ndi Kefa*+ ndipu ndinguja nayu mazuŵa 15. 19 Kweni ndinguwonaku so wakutumika munyaki weyosi cha, kupatuwaku Yakobe+ mvurwa wa Ambuya. 20 Sonu vakukwaskana ndi vinthu vo nditikulembiyani, nditikusimikiziyani pa masu paku Chiuta kuti ndipusika cha.

21 Pavuli paki, ndinguluta muvigaŵa va Siriya ndi Kilikiya.+ 22 Kweni ndaziŵikanga cha ku mipingu ya mu Yudeya yo yakoliyananga ndi Khristu. 23 Yiwu avwanga ŵaka kuti: “Munthu yo kali watitombozganga,+ sonu wapharazga uthenga wamampha wakukwaskana ndi chivwanu cho kali wachinanganga.”+ 24 Mwaviyo, angwamba kukankhuska Chiuta chifukwa chaku ini.

2 Pati pajumpha vyaka 14, ndingukwere so ku Yerusalemu limoza ndi Baranaba+ ndipu ndenga so ndi Tito.+ 2 Ndingulutaku chifukwa cha vo vinguvumbulika kwaku ini, ndipu ŵanthu wo awonekanga kuti mbakuzirwa ndinguŵakonkhoske uthenga wamampha wo ndapharazganga ku ŵanthu amitundu yinyaki. Ndinguŵakonkhoske venivi mwachisisi, kuti ndisimikizi asani ndatchimbiyanga paŵaka cha pamwenga asani ndingutchimbiya paŵaka cha. 3 Kweni chinanga kuti venga viyo, Tito+ yo ndenga nayu wanguchichizgika cha kuti wadumuliki,+ chinanga kuti wenga Mgiriki. 4 Kweni nkhani yeniyi yingwamba chifukwa cha abali aboza wo angunyeremukiya mu mpingu+ kuti afufuzi mwachisisi wanangwa+ wo te nawu mwakukoliyana ndi Khristu Yesu, ndi chilatu chakuti atisambusi akapolu.+ 5 Tinguŵavwiya cha+ chinanga nkhanyengu kamanavi,* kuti yimwi mulutirizgi kuja ndi uneneska wa uthenga wamampha.

6 Sonu vakukwaskana ndi ŵanthu wo awonekanga kuti mbakukhumbika,+ kwali awonekanga wuli, kweni ini ndinguwonapu kupambana cha pakuti Chiuta wawona kawonekeru ka kubwalu cha, ŵanthu ŵenaŵa wo awonekanga kuti mbakuzirwa, angundisambizapu kanthu kekosi cha kasonu. 7 Mumalu mwaki, ŵati awona kuti ndapaskika ntchitu yakupharazga uthenga wamampha ku ŵanthu ambula kudumulika,+ nge mo Peturo wakupaskikiya ntchitu yakupharazgiya ŵanthu akudumulika, 8 pakuti mweniyo wakupaska nthazi Peturo kuti waje wakutumika ku ŵanthu akudumulika, ndiyu so wakundipaska nthazi kuti ndije wakutumika ku ŵanthu amitundu yinyaki,+ 9 ndipuso ŵati aziŵa wezi ukulu wo ndingupaskika,+ Yakobe,+ Kefa* ndi Yohane ŵeniwo ŵenga nge vipilala, angukolana janja lamaryi ndi ini ndipuso ndi Baranaba nge chisimikizu chakuti tigwiriyengi nawu ntchitu limoza,*+ ndi chilatu chakuti isi tiluti ku ŵanthu amitundu yinyaki, kweni yiwu ku ŵanthu akudumulika. 10 Yiwu angutipempha ŵaka chinthu chimoza, chakuti tikumbukengi akavu ndipu venivi ndivu ndaja ndichichita ndi mtima wosi.+

11 Kweni Kefa*+ wati waza ku Antiyoke,+ ndingumususka* pa masu ndi pa masu, chifukwa wanguwoneke limu kuti ngwakunanga.* 12 Pakuti ŵanthu wo angutuliya kwaku Yakobe+ ŵechendazi, waryiyanga limoza ndi ŵanthu amitundu yinyaki.+ Kweni ŵati aza, wanguleka ndipu wangujipatuwa chifukwa chakuti wawopanga ŵanthu akudumulika.+ 13 Ayuda anyaki wosi angukoliyana nayu pakuchita chinyengu chenichi, mwakuti Baranaba nayu wangulandizgika ndipu wachitangaku. 14 Kweni ndati ndawona kuti aleka kwenda mwakukoliyana ndi uneneska wa uthenga wamampha,+ ndingukambiya Kefa* pa masu paku wosi kuti: “Asani yiwi chinanga kuti ndiwi Myuda uchita vinthu nge mo Ayuda achitiya cha, kweni nge mo ŵanthu amitundu yinyaki achitiya, ungachichizga wuli ŵanthu amitundu yinyaki kuti achitengi nge mo Ayuda achitiya?”+

15 Isi Ayuda mwakawi, mwakupambana ndi ŵanthu akubuda akutuliya mu mitundu yinyaki, 16 tiziŵa kuti munthu wakambika kuti ndi murunji chifukwa cha dangu cha, kweni chifukwa chakuja ndi chivwanu+ mwaku Yesu Khristu.+ Mwaviyo, taŵika chivwanu chidu mwaku Khristu Yesu kuti tikambiki kuti te arunji, chifukwa cha ntchitu za dangu cha, kweni chifukwa cha chivwanu mwaku Khristu, pakuti palivi munthu yo wazamukambika kuti ndi murunji* chifukwa cha ntchitu za dangu.+ 17 Sonu asani isi tasanirika so kuti te akubuda uku tipenja kuti tikambiki kuti te arunji chifukwa chaku Khristu, kumbi ndikuti Khristu ndi mteŵeti wa ubudi? Awa! 18 Asani ndizenga so vinthu vo nyengu yinyaki ndinguvipasuwa, ndilongo kuti nde wambula kuvwiya marangu. 19 Pakuti chifukwa cha dangu ndingufwa ku dangu,+ kuti ndije wamoyu kwaku Chiuta. 20 Ndakhomeka pachimiti limoza ndi Khristu.+ Ndini so cha ndaja ndi umoyu,+ kweni ndi Khristu mweniyo waja ndi umoyu mwakukoliyana ndi ini. Kukamba uneneska, umoyu wo ndija sonu muliŵavu, nde nawu chifukwa chakuvwana mu Mwana waku Chiuta,+ mweniyo wakundiyanja ndipu wakujipereka chifukwa chaku ini.+ 21 Nditiwukana* cha wezi ukulu waku Chiuta,+ pakuti asani urunji utuza kuporote mu dangu, mbwenu palivi cho Khristu wakufwiya.+

3 Hate, Agalatiya akupusa yimwi! Ndiyani wakupuluzgani?+ Pakuti kali munguwovyeka kuvwisa umamphaumampha mo Yesu Khristu wangukhomeke pachimiti.+ 2 Ndikufumbeni* chinthu chimoza: Kumbi mukulonde mzimu kuporote mu ntchitu za dangu, pamwenga chifukwa cha kuja ndi chivwanu mu vinthu vo mukuvwa?+ 3 Kumbi mwe akupusa viyo? Mungwamba kwenda mwakukoliyana ndi mzimu,* kumbi mukhumba kumaliza mwa kwenda mwakukoliyana ndi liŵavu?*+ 4 Kumbi masuzgu ngosi ngo mungukumana nangu, mungusuzgikiya paŵaka? Ndigomezga kuti mungusuzgikiya nadi paŵaka cha. 5 Sonu kumbi yo watikupaskani mzimu ndipuso wachita ntchitu zanthazi+ pakati pinu, watizichita chifukwa cha ntchitu zinu za dangu, pamwenga chifukwa cha chivwanu chinu mu vinthu vo mukuvwa? 6 Ndimu so venge kuti Abrahamu “wenga ndi chivwanu mwaku Yehova* ndipu Iyu wangumuwona kuti wenga murunji.”+

7 Ndipu muziŵa kuti wo alutirizga kuja ndi chivwanu ndiwu ŵana aku Abrahamu.+ 8 Sonu lemba lati lawone limu kuti Chiuta wazamudana ŵanthu amitundu yinyaki kuti mbarunji chifukwa cha chivwanu, iyu wangukambiya limu uthenga wamampha kwaku Abrahamu wakuti: “Kuziya mwaku yiwi, mitundu yosi yazamutumbikika.”+ 9 Mwaviyo, wosi wo alutirizga kuja ndi chivwanu, atumbikika nge mo Abrahamu wangutumbikikiya.+

10 Wosi wo athemba ntchitu za dangu mbakutembeka, pakuti kukulembeka kuti: “Ngwakutembeka weyosi yo waleka kusunga ndi kuchita vinthu vosi vo vikulembeka mumpukutu wa Dangu.”*+ 11 Kweniso viwoneke limu kuti palivi yo Chiuta watimudana kuti ndi murunji chifukwa cha dangu,+ pakuti “munthu murunji wazamukuŵa ndi umoyu chifukwa cha chivwanu.”+ 12 Sonu Dangu* lithemba chivwanu cha. Kweni “weyosi yo wachita vinthu venivi, wazamuja ndi umoyu chifukwa cha vinthu venivi.”+ 13 Khristu wakutigula+ ndipu wakutifwatuwa+ ku thembu la Dangu,* pakuti iyu wangutembeka mumalu mwaku isi. Ve viyo chifukwa kukulembeka kuti: “Munthu weyosi yo wapayikika pachimiti ngwakutembeka.”+ 14 Venga viyo kuti vitumbiku vo Chiuta wangulayizga Abrahamu vifiki ku ŵanthu amitundu yinyaki mwakugwiriskiya ntchitu Khristu Yesu,+ kuti tilonde mzimu wo tingulayizgika+ kuporote mu chivwanu chidu.

15 Abali ŵangu, ndilongoro mwakugwiriskiya ntchitu chakuyeruzgiyapu cha vo ŵanthu achita: Asani phanganu lajalikiskika, chinanga lingajalikiskika ndi munthu pe, palivi yo wangalituzgapu pamwenga kusazgiyapu vinthu vinyaki. 16 Sonu malayizgu nganguperekeka kwaku Abrahamu kweniso ku mphapu* yaki.+ Lemba likambapu cha kuti, “ku mphapu* zaku” nge kuti zilipu zinandi. Kweni likamba kuti, “ku mphapu* yaku” kulongo kuti njimoza, yeniyo ndi Khristu.+ 17 Kweniso ndikamba kuti: Dangu* lo linguŵapu pati pajumpha vyaka 430,+ limalisa cha phanganu lo Chiuta wangupangiya limu kali, pamwenga kutuzgapu layizgu. 18 Pakuti asani chihara chithemba dangu, ndikuti chithemba so layizgu cha, kweni Chiuta wakuchipereka ndi mtima wosi kwaku Abrahamu kuporote mu layizgu.+

19 Sonu ntchifukwa wuli Dangu* linguperekeka? Linguperekeka kuti ubudi uwoneke+ mpaka po mphapu* yinguziya,+ yeniyo yingupaskika layizgu. Linguperekeka kuporote mwa angelu+ kweniso mu janja la mwendapakati.+ 20 Sonu asani munthu yumoza pe ndiyu wakwaskika, paja mwendapakati cha, kweni Chiuta wenga yija wachilayizga. 21 Kumbi Dangu* lisuskana ndi malayizgu ngaku Chiuta? Awa! Pakuti asani dangu lo linguperekeka lenga lakuti lingapaska umoyu, ndikuti urunji watingi uŵengepu chifukwa cha dangu. 22 Kweni Malemba ngakupereka vinthu vosi ku ukapolu wa ubudi, kuti layizgu lo liŵapu chifukwa cha kuvwana mwaku Yesu Khristu, liperekeki ku ŵanthu wo ŵe ndi chivwanu.

23 Kweni chivwanu chechendafiki, talongozgekanga ndi dangu ndipu tinguperekeka ku ukapolu. Tachitanga venivi tichilindizga chivwanu cho chenga pafupi kuvumbulika.+ 24 Sonu Dangu* linguja mlezi* widu wakutilongozge kwaku Khristu,+ kuti tidaniki kuti te arunji chifukwa cha chivwanu.+ 25 Kweni sonu pakuti chivwanu chafika,+ te pasi pa mlezi* so cha.+

26 Mosi mwe ŵana aku Chiuta chifukwa cha+ kuja ndi chivwanu mwaku Khristu Yesu.+ 27 Pakuti mosi yimwi mukubatizika mwaku Khristu, ndikuti mwavwala Khristu.+ 28 Palivi Myuda pamwenga Mgiriki,+ palivi kapolu pamwenga mwanangwa,+ palivi munthulumi pamwenga munthukazi,+ pakuti mosi mwe amoza mwakukoliyana ndi Khristu Yesu.+ 29 Kweniso asani mwe aku Khristu, ndikuti mwe mphapu* yaku Abrahamu+ nadi, akuhara+ mwakukoliyana ndi layizgu.+

4 Sonu nditikukambiyani kuti asani wakuhara weche munamana, wapambana cha ndi kapolu chinanga kuti iyu ndi mweneku wa vinthu vosi. 2 Kweni waja pasi pa alongozgi ndi akuwonere mpaka po yakwaniya nyengu yo awisi akusankhiya limu. 3 Mwakuyanana ŵaka, nasi po tenga anamana tenga akapolu a fundu zipusu zo charu chitende.+ 4 Kweni nyengu yati yakwana, Chiuta wangutuma Mwana waki, mweniyo wangubalika ndi munthukazi+ kweniso yo wenga pasi pa dangu,+ 5 kuti wawombo ŵanthu wo ŵenga pasi pa dangu mwakuchita kuŵagula,+ ndi chilatu chakuti tisambuki ŵana ŵaki.+

6 Sonu chifukwa chakuti ndimwi ŵana ŵaki, Chiuta watuma mzimu+ wa Mwana waki mumtima mwidu+ ndipu udaniriza kuti, “Abba,* Ada!”+ 7 Mwaviyo, ndimwi so akapolu cha, kweni ndimwi ŵana. Ndipu asani mwe ŵana, ndikuti so mwe akuhara kuporote mwaku Chiuta.+

8 Chinanga kuti ve viyo, pa nyengu yo mwalekanga kuziŵa Chiuta, mwenga akapolu aku wo mbachiuta nadi cha. 9 Kweni sonu pakuti mwamuziŵa Chiuta pamwenga kuti mwaziŵika ndi Chiuta, ntchifukwa wuli muwere so ku fundu zipusu, zakulopwa+ ndipuso zambula ntchitu ndipu mukhumba kuja so akapolu a vinthu venivi?+ 10 Mufwiyapu kusunga mazuŵa, myezi,+ nyengu ndipuso vyaka. 11 Nditopa kuti panyaki phamphu langu paku yimwi lingaluta paŵaka.

12 Abali, nditikupemphani kuti muje nge ndini, pakuti nani ndenga nge yimwi.+ Mukundinangiyapu kanthu cha. 13 Pakuti muziŵa kuti kutama kwangu ndiku kunguchitiska kuti ndikupharazgiyeni uthenga wamampha kakwamba. 14 Ndipu chinanga kuti nthenda yangu yenga chiyesu kwaku yimwi, mungundinyozapu cha pamwenga kuchita nani unyakazi;* kweni mungundilonde nge mungelu waku Chiuta, pamwenga nge Khristu Yesu. 15 Le pani likondwa liya mwenga nalu? Pakuti nditikusimikiziyani kuti asani venga vamachitika, mwatingi mukolowongi masu nginu ndi kundipaska.+ 16 Sonu kumbi ndaja murwani winu chifukwa chakuti nditikukambiyani uneneska? 17 Yiwu akhumbisiska kuti akukopeni, kweni ndi chilatu chamampha cha. Akhumba kuti mutinkhani ndi ini, kuti muŵalondo mwambula kusuzga. 18 Kweni vituŵa umampha nyengu zosi kuti munthu wakupenjeningi ndi chilatu chamampha, ndipu watenere kuchita venivi pa nyengu yo mwe ndi ini pe cha 19 mwaŵana ŵangu.+ Chifukwa chaku yimwi ndituvwa so urwirwi wa pakubala mpaka po Khristu wapangikiya* mwaku yimwi. 20 Ndakhumbanga kuti mphanyi sonu ndenga namwi ndi kukamba namwi mu nthowa yinyaki, chifukwa mwandimala zeru.

21 Andikambiyeni, yimwi mukhumba kuja pasi pa dangu, Kumbi Dangu* mutilivwa cha? 22 Mwakuyeruzgiyapu, kukulembeka kuti Abrahamu wenga ndi ŵana ŵaŵi, munyaki wangubaliya pa kapolu munthukazi,+ penipo munyaki wangubaliya pa munthukazi yo wenga mwanangwa.+ 23 Kweni yo wangubalikiya pa munthukazi yo wenga kapolu, wanguwaku nge mo ŵana wosi awiya,*+ penipo yo wangubalikiya pa munthukazi yo wenga mwanangwa, wanguwaku mwa layizgu.+ 24 Vinthu venivi tingavito nge nkhani yakumiya vinthu vinyaki; pakuti anthukazi ŵenaŵa amiya mapanganu ngaŵi, limoza nda pa Phiri la Sinayi,+ lenilo libala ŵana wo mbakapolu ndipu phanganu lenili ndi Hagara. 25 Sonu Hagara wamiya Sinayi,+ phiri la ku Arebiya ndipu mazuŵa nganu wayanana ndi Yerusalemu, pakuti we mu ukapolu limoza ndi ŵana ŵaki. 26 Kweni Yerusalemu wakuchanya ndi mwanangwa ndipu iyu ndiyu nyinafwi.

27 Pakuti kukulembeka kuti: “Kondwa yiwi munthukazi muchumba, yiwi wambula kubala, daniriza mwakukondwa wamunthukazi yiwi wechendavwepu urwirwi wa pakubala, pakuti ŵana a munthukazi wakujowoleka mbanandi ukongwa kuluska ŵana a munthukazi yo we ndi munthulumi.”+ 28 Sonu yimwi abali, mwe ŵana a layizgu nge mo wenge Isaki.+ 29 Kweni nge mo venge pa nyengu yeniyo, kuti mwana yo wanguwaku nge mo ŵana wosi awiya* wangwamba kutombozga mwana yo wanguwaku mwa mzimu,+ ndimu so viliri sonu.+ 30 Kweni kumbi lemba likambanji? “Dikisani kapolu munthukazi limoza ndi mwana waki, pakuti mwana wa kapolu munthukazi wangahariya limoza cha ndi mwana wa munthukazi mwanangwa.”+ 31 Mwaviyo abali, isi te ŵana a kapolu munthukazi cha, kweni a munthukazi mwanangwa.

5 Khristu wakutifwatuwa kuti tije ndi wanangwa wenuwu. Mwaviyo, munganderezekanga cha+ ndipu mungajimanganga so cha mugoli la ukapolu.+

2 Awonani! Ini Paulo nditikukambiyani kuti asani mudumulikengi, ndikuti Khristu wajengi wambula phindu kwaku yimwi.+ 3 Kweniso ndisimikiziya munthu weyosi yo wadumulika kuti iyu watenere kuchita vosi vo ve mu Dangu.*+ 4 Yimwi mutesesa kuti mudaniki kuti mwe arunji chifukwa cha dangu,+ mwe kutali ndi Khristu. Mwe kutali ukongwa ndi wezi waki ukulu. 5 Kweni mwa mzimu, isi tilindizga ndi mtima wosi urunji wo ukulayizgika, weniwo tazamulonde chifukwa cha chivwanu. 6 Pakuti mwakukoliyana ndi Khristu Yesu, kudumulika pamwenga kuleka kudumulika kulivi phindu,+ kweni chivwanu cho chigwira ntchitu kuporote mu chanju ndichu che ndi phindu.

7 Mwatchimbiyanga umampha.+ Kumbi ndiyani yo wakukutimbanyizgani kuti muleki kulutirizga kuvwiya uneneska? 8 Kukopeka kwenuku kutuliya kwaku Yo watikudanani cha. 9 Chakutupisa chimanavi, chitupisa bulunga losi la fulawu.+ 10 Ndigomezga kuti yimwi mwe akukoliyana ndi Ambuya,+ mwazamusintha maŵanaŵanu cha, kweni yo wachitiska kuti musuzgikengi,+ kwali wangaŵa yani, wazamulonde cheruzgu chakumuyenere. 11 Kweni kwaku ini abali, asani ndilutirizga kupharazga vakukwaskana ndi kudumulika, ntchifukwa wuli ndeche kutombozgeka? Asani vingaŵa viyo ndikuti chimiti chakutombozgekiyapu*+ chenicho ntchinthu chakuguŵiska chatuzgikapu. 12 Ndingayanja kuti ŵanthu wo atesa kukutimbanyizgani ajitheni.*

13 Abali ŵangu, mukudanika kuti muje anangwa, mwaviyo muleki kugwiriskiya ntchitu wanangwa wenuwu pakuchita makhumbiru nga liŵavu,+ kweni chifukwa cha chanju, muteŵetiyanengi ndi mtima wosi.+ 14 Pakuti Marangu ngosi ngaku Mozesi ngafiskika* mu dangu limoza lakuti: “Uyanjengi munyaku nge mo utijiyanjiya wamweni.”+ 15 Sonu asani mulutirizga kulumana ndi kuryana,+ phweriyani kuti mungapwetekana mwijamwija.+

16 Kweni ndikamba kuti, Lutirizgani kwenda mwa mzimu,+ ndipu asani mwachita viyo muchitengeku cha makhumbiru nga liŵavu.+ 17 ­Pakuti khumbiru la liŵavu lisuskana ndi mzimu ndipu mzimu ususkana ndi liŵavu. Vinthu venivi visuskana kuti muleki kuchita vinthu vo mukhumba.+ 18 Kweniso asani mulongozgeka ndi mzimu, mwe pasi pa dangu cha.

19 Sonu ntchitu za liŵavu ziwoneke limu ndipu ntchitu zenizi ndi ureŵi,*+ jalidu launyakazi, kuchita jalidu liheni mwambula soni,*+ 20 kusopa ngoza, kuchita vamizimu,*+ kutinkhana, ndewu, sanji, ukali, mphindanu, kugaŵikana, magulu nga mpatuku, 21 bina, kuloŵe,+ maphwandu ngaviwawa ndi vinthu vinyaki vakuyanana ndi venivi.+ Nditikutcheŵeskiyani limu vakukwaskana ndi vinthu venivi nge mo ndingukutcheŵeskiyani kali kuti ŵanthu wo achita vinthu vaviyo, azamuhara cha Ufumu waku Chiuta.+

22 Kweni mijalidu yo mzimu utuzga* ntchanju, likondwa, chimangu, kuzikira,* lisungu, umampha,+ chivwanu, 23 kuzika, kujiko.+ Palivi dangu lakususkana ndi vinthu venivi. 24 Kweniso ŵanthu aku Khristu Yesu akhome liŵavu pachimiti, limoza ndi khumbiru laki lanthazi ndipuso liheni.+

25 Asani tija mwakukoliyana ndi mzimu, ndi mzimu so tilutirizgi kwenda mwakwenere.+ 26 Tingajikuzganga cha,+ tingayambisanga maphara cha+ kweniso tingachitiyananga bina cha.

6 Abali, asani munthu walandiya kuheni kwambula kuziŵa, yimwi Akhristu akukhwima,* yesani kumunyolo munthu waviyo mwakuzika.+ Kweni yimwi mwaŵeni phweriyani+ kuti namwi so muleki kuyeseka.+ 2 Lutirizgani kunyamuliyana mphingu,+ ndipu asani muchita venivi, mufiskengi dangu laku Khristu.+ 3 Pakuti asani munyaki watijivwa kuti iyu ndiyu, penipo ndi munthu mweneku cha,+ watijipusika ŵaka. 4 Kweni weyosi wasandi vakuchita vaki,+ ndipu pavuli paki waŵengi ndi chifukwa chakukondwe pa vo iyu mweneku wachita, kweni mwakujiyeruzgiya ndi munthu munyaki cha.+ 5 Pakuti weyosi wazamunyamuwa katundu* waki.+

6 Kweniso, weyosi yo wasambizika mazu,* wagaŵani vinthu vosi vamampha ndi munthu yo watimusambiza.*+

7 Mungalandizgikanga cha: Chiuta wanganyozeka* cha. Pakuti chechosi cho munthu wamija, ndichu so wazamuvuna;+ 8 pakuti yo wamija mwakukoliyana ndi liŵavu laki, wazamuvuna kuvunda kutuliya mu liŵavu laki, kweni yo wamija mwakukoliyana ndi mzimu, wazamuvuna umoyu wambula kumala kutuliya mu mzimu.+ 9 Tingavukanga cha kuchita vamampha, pakuti pa nyengu yaki tazamuvuna asani taleka kuvuka.+ 10 Mwaviyo, asani tasaniya ŵaka mpata,* tichitiyi vamampha ŵanthu wosi, ukongwa abali ŵidu mu chivwanu.

11 Wonani vilembu vikulu vo ndakulembiyani ndi janja langu.

12 Wosi wo akhumba kukondwesa ŵanthu ndiwu atesesa kukuchichizgani kuti mudumuliki. Yiwu achita viyo kuti agwenthi ŵaka kutombozgeka chifukwa cha chimiti chakutombozgekiyapu* chaku Khristu. 13 Pakuti chinanga mbanthu wo adumulika, yiwu ŵeneku asunga cha Dangu,*+ kweni akhumba kuti yimwi mudumuliki ndi chilatu chakuti aŵi ndi chifukwa chakumalikiya pa liŵavu linu. 14 Kweni ini ndingamalika cha, kupatuwaku chifukwa cha chimiti chakutombozgekiyapu* cha Ambuyafwi Yesu Khristu pe,+ ŵeniwo kuporote mwaku yiwu, kwaku ini charu chosi chabayika* ndipu kucharu ini ndabayika.* 15 Pakuti kudumulika pamwenga kuleka kudumulika nkhanthu cha,+ kweni chakulengeka chifya ndichu.+ 16 Kweni kwaku wosi wo atenda umampha mwakulongozgeka ndi dangu lenili, chimangu ndi lisungu viŵi paku yiwu, hinya chiŵi paku Isirayeli waku Chiuta.+

17 Kwamba sonu, paŵevi munthu wakundisuzga, pakuti paliŵavu langu pe mabamba ngakulongo kuti nde kapolu waku Yesu.+

18 Abali, wezi ukulu wa Ambuyafwi Yesu Khristu, uŵi ndi mzimu wo mulongo. Ame.