KALATA YAKULUTA KWA AKOLOSE

1 Ini Paulo, wakutumika waku Khristu Yesu chifukwa cha khumbu laku Chiuta, nde limoza ndi mubali widu Timote,+ 2 ndilembe akupaturika ndipuso abali akugomezgeka, akukoliyana ndi Khristu wo ŵe ku Kolose kuti:

Wezi ukulu kweniso chimangu vakutuliya kwaku Chiuta Awusefwi, viŵi namwi.

3 Nyengu zosi tiwonga Chiuta Awusewu ŵa Ambuyafwi Yesu Khristu, asani titikupempheriyani, 4 pakuti tikuvwa vakukwaskana ndi chivwanu chinu mwaku Khristu Yesu kweniso chanju cho mulongo akupaturika wosi, 5 chifukwa cha chilindizga cho chasungikiya yimwi kuchanya.+ Kuvuli uku mukuvwapu vakukwaskana ndi chilindizga chenichi kuporote mu mazu ngauneneska nga uthenga wamampha 6 wo ukuza kwaku yimwi. Nge mo uthenga wamampha upasiya vipasu ndipuso ukuliya mucharu chosi,+ ndimu so uchitiya pakati pinu kutuliya pa zuŵa lo mukuvwiya ndi kuziŵa mwauneneska wezi ukulu chayiwu waku Chiuta. 7 Venivi ndivu mwasambira kwaku Epafura,+ kapolu munyidu wakwanjiwa, yo ndi mteŵeti wakugomezgeka waku Khristu mumalu mwaku isi. 8 Iyu wangutiziŵisa so vakukwaskana ndi chanju cho mzimu waku Chiuta wakuwovyani kuti muŵi nachu.*

9 Ndichu chifukwa chaki so, kutuliya pa zuŵa lo tikuvwiya venivi, tilekapu cha kukupempheriyani+ kweniso kupempha kuti muziŵi mwauneneska+ vinthu vakukwaskana ndi khumbu laki, muje ndi zeru zosi, ndipuso kuti muvwisengi vinthu vauzimu.+ 10 Tichita venivi ndi chilatu chakuti muyendengi nge mo Yehova* wakhumbiya, kuti mumukondwesengi ukongwa muchilutirizga kupasa vipasu mu ntchitu yeyosi yamampha ndipuso kuti musazgiyengeku kuziŵa Chiuta mwauneneska;+ 11 kweniso kuti mupaskiki nthazi zinandi mwakukoliyana ndi nthazi zaki zaunkhankhu,+ kuti mukunthiyengepu ukongwa mwakuzikira ndipuso mwalikondwa, 12 muchiwonga Ada wo akuchitiska kuti namwi muje akwenere kulondiyaku chihara cha akupaturika+ wo ŵe mu ukweru.

13 Iyu wakutitaska ku mazaza nga mdima,+ ndi kutisamisiya mu ufumu wa Mwana waki wakwanjiwa, 14 kuporote mwaku iyu, tikufwatulika ndi sembi yakuwombole kuti maubudi ngidu ngagowokereki.+ 15 Iyu ntchikozgu chaku Chiuta wambula kuwoneka,+ ndipuso ndiyu wakwamba kuwaku pa chilengedu chosi;+ 16 chifukwa kuporote mwaku iyu, vinthu vinyaki vosi vikulengeka kuchanya ndi pacharu chapasi, vinthu vakuwoneka ndi vinthu vambula kuwoneka,+ kwali ndi mipandu yaufumu, pamwenga ambuya, pamwenga maboma pamwenga mazaza. Vinthu vinyaki vosi vikulengeka kuporote mwaku iyu+ ndipuso chifukwa chaku iyu. 17 Kweniso, iyu wakuŵaku vinthu vinyaki vosi+ vechendaŵeku, ndipuso vinthu vinyaki vosi vikuŵaku kuporote mwaku iyu, 18 ndipu iyu ndi mutu wa liŵavu, lo ndi mpingu.+ Iyu ngwakwamba pa vinthu vosi, ndi mwana wakwamba kuwaku kutuliya ku nyifwa,+ kuti waje wakwamba pa vinthu vosi; 19 pakuti Chiuta wanguwona kuti ve umampha kuti vinthu vosi vizazi mwaku iyu,+ 20 ndipuso kuti kuporote mwaku iyu, vinthu vinyaki vosi+ viyanjanisikiyi kwaku iyu mweneku mwakujalikiska chimangu kuporote mu ndopa+ zo wangudira pachimiti chakutombozgekiyapu,* kwali ndi vinthu vapacharu chapasi pamwenga va kuchanya.

21 Ndipu yimwi, kali mwenga kutali kweniso mwenga arwani aku Chiuta chifukwa maŵanaŵanu nginu ngenga pa ntchitu ziheni, 22 kweni sonu mwayanjana nayu mwakugwiriskiya ntchitu liŵavu laumunthu la munthu mwenuyu kuporote mu nyifwa yaki, kuti wakuperekeni mwe akupaturika, ambula kalema, ndipuso ambula mulandu pa masu paki.+ 23 Kweni mulutirizgi kuja mu chivwanu,+ mujalikiskiki pafawundeshoni+ ndipuso muje akukho,+ ambula kunderezeka pa chilindizga cha uthenga wamampha cho mukuvwa kweniso cho chingupharazgika ku chakulengeka chechosi pacharu chapasi.+ Ndipu ini Paulo ndaja mteŵeti wa uthenga wamampha wenuwu.+

24 Sonu ndikondwa ukongwa ndi masuzgu ngo ndikumana nangu chifukwa chaku yimwi.+ Ndipu ndiwona kuti masuzgu ngo ndikumana nangu chifukwa chakuti nde chiŵalu cha liŵavu laku Khristu+ lo ndi mpingu,+ ngakukwana cha. 25 Ndikuja mteŵeti wa mpingu wenuwu mwakukoliyana ndi uteŵeti wakuwonere+ wakutuliya kwaku Chiuta, wo ndikupaskika mumalu mwaku yimwi kuti ndipharazgi mazu ngaku Chiuta mwakukwana, 26 chisisi chakupaturika+ cho chingubisika kwambiya mu nyengu yakali*+ ndipuso ku migonezi yakali. Kweni sonu chavumbulika kwa akupaturika ŵaki,+ 27 wo Chiuta wakondwa kuŵaziŵisa chuma cha unkhankhu cha chisisi chakupaturika chenichi,+ cho wachiziŵikisa pakati pa mitundu ya ŵanthu. Chisisi ichi ndi Khristu mwakukoliyana ndi yimwi, yo ntchilindizga cha unkhankhu waki.+ 28 Iyu ndiyu tipharazga, titcheŵeska weyosi ndipuso tisambiza weyosi mwa zeru zosi, ndi chilatu chakuti tipereki munthu weyosi we wakukwana mwakukoliyana ndi Khristu.+ 29 Mwaviyo, nditesesa kugwira ntchitu mwaphamphu, nditijipereka mwakugwiriskiya ntchitu nthazi zaki zo zigwira ntchitu mwaku ini.+

2 Pakuti ndikhumba kuti muziŵi kuti nde pa nkhondu yikulu chifukwa chaku yimwi, chifukwa cha ŵanthu a ku Lawodikaya+ kweniso chifukwa cha ŵanthu wosi wo ŵechendandiwonepu.* 2 Ve viyo kuti mitima yawu yipembuzgiki,+ kuti aje akukoliyana mu chanju+ ndipuso kuti aŵi ndi chuma chosi chifukwa chakuti asimikiza nadi kuti avwisa vinthu, ndi chilatu chakuti achiziŵi mwauneneska chisisi chakupaturika chaku Chiuta. Chisisi chenichi ndi Khristu.+ 3 Chuma chosi cha zeru kweniso kuziŵa vinthu, vikubisika mwakuphwere mwaku iyu.+ 4 Ndikamba venivi kuti munthu weyosi waleki kukulandizgani ndi mazu ngakukopa. 5 Chinanga kuti mwakuliŵavu nde namwi limoza cha, kweni mwauzimu nde namwi limoza, ndipu ndikondwa kuwona kuti muchita vinthu mwakwenere+ ndipuso kuti chivwanu chinu mwaku Khristu ntchakukho.+

6 Mwaviyo, mwakukoliyana ndi mo mwazomere Khristu Yesu, Ambuya, lutirizgani kwenda mwakukoliyana ndi iyu. 7 Mume misisi, muzengeki mwaku iyu+ ndipuso mujalikiskiki mu chivwanu,+ nge mo mukusambizikiya, ndipu chivwanu chinu chikuwi muchiwonga Chiuta.+

8 Phweriyani kuti munthu weyosi waleki kukukoni* ukapolu mwakugwiriskiya ntchitu zeru za ŵanthu kweniso uryarya waŵakaŵaka+ mwakukoliyana ndi mudawuku wa ŵanthu, ndipuso fundu zipusu zo charu chitende, kweni mwakukoliyana ndi Khristu cha; 9 chifukwa mijalidu yosi yaku Chiuta yazaza mwaku iyu.+ 10 Musoŵa kanthu kekosi cha chifukwa chaku iyu, ndipu iyu ndiyu mutu wa boma lelosi ndipuso mazaza ngengosi.+ 11 Mwakuja nayu pa ubwezi, mungudumulika, ndipu kudumulika kwinu kukuchitika ndi manja cha, kweni mwakuzuwa liŵavu la umunthu,+ ko kung’anamuwa kudumulika mwakukoliyana ndi Khristu.+ 12 Pakuti munguwundikiya limoza ndi iyu mu ubatizu waki,+ ndipu mwakuja nayu pa ubwezi, munguyuskikiya+ nayu limoza kuporote mu chivwanu chinu, mu ntchitu zanthazi zaku Chiuta, mweniyo wangumuyuska ku nyifwa.+

13 Kweniso chinanga kuti mwenga akufwa chifukwa cha maubudi nginu ndipuso mwenga ambula kudumulika, Chiuta wakukupaskani umoyu limoza ndi Khristu.+ Ndipu iyu wakutigowoke maubudi ngidu ngosi ndi mtima wosi,+ 14 wakusisita chikalata chakuchita kulembeka ndi manja+ cho chenga ndi marangu+ kweniso cho chatisuskanga.+ Wakuchituzgapu mwakuchikhome pachimiti chakutombozgekiyapu.*+ 15 Mwakugwiriskiya ntchitu chimiti chakutombozgekiyapu,* wazuwa maboma ndipuso mazaza ngosi, wangathereska pakweru+ ndipu watingalongozga mwakugiya.

16 Mwaviyo munthu wangakuyeruzganingi cha pa nkhani ya vo muturya ndi kumwa,+ pamwenga pa nkhani ya kukumbuka mazuŵa nga maphwandu pamwenga kusunga zuŵa la mwezi wufya+ pamwenga kusunga sabata.+ 17 Vinthu venivi ntchithuthuzi cha vinthu vo vituza,+ kweni chayivu ve mwaku Khristu.+ 18 Munthu yo watanja kujiyuyuwa kwaboza, kweniso yo wasopa angelu, “yo wangangamiya”* vinthu vo wawona, wangakutondekesaningi cha kulonde mphotu.+ Chifukwa cha kuŵanaŵana kwaki nge munthu wambula kufikapu, iyu watijikuzga kwambula chifukwa chakuvwika, 19 ndipu watimukolesa cha yo ndi mutu,+ mweniyo kuporote mwaku iyu liŵavu losi lilonde vakukhumbika ndipuso lilungana pamoza mwakugwiriskiya ntchitu malunga ngaki kweniso misipi ya mumalunga ndipu likuwa nge mo Chiuta wakhumbiya.+

20 Asani mukufwiya limoza ndi Khristu ku fundu zipusu zo charu chitende,+ ntchifukwa wuli muchita vinthu nge kuti mweche kuchigaŵa cha charu mwakujithereska ku marangu ngakuti:+ 21 “Mungachikonga cha, mungachiyesanga cha, mungachikwaskanga cha,” 22 kung’anamuwa vinthu vo vimala asani titivigwiriskiya ntchitu, mwakukoliyana ndi marangu ndi visambizu va ŵanthu?+ 23 Chinanga kuti marangu ngenanga ngawoneka nge kuti ngazeru, kweni ngatiŵawovya cha ŵanthu kuti alimbani ndi makhumbiru nga liŵavu lawu.+ Ve viyo chifukwa chakuti ŵanthu asankha ŵija mo angasope Chiuta, atijiyuyuwa mwaboza ndipuso asuzga maliŵavu ngawu.

3 Sonu asani mukuyuskika limoza ndi Khristu,+ lutirizgani kupenja vinthu vakuchanya, ko Khristu wakujalikika kujanja lamaryi laku Chiuta.+ 2 Ŵikani maŵanaŵanu nginu pa vinthu vakuchanya,+ pa vinthu vapacharu chapasi cha.+ 3 Pakuti mungufwa, ndipu umoyu winu ubisika mwaku Khristu mwakukoliyana ndi Chiuta. 4 Asani Khristu mweniyo mbumoyu widu+ waziwoneke, ndikuti namwi so mwazamuwoneke limoza ndi iyu mu unkhankhu.+

5 Mwaviyo, chitiskani viŵalu va liŵavu linu+ vo ve pacharu chapasi kuja vakufwa ku ureŵi,* ukazuzi, khumbiru liheni lakugonana,+ kukhumbira vinthu viheni ndipuso kuchita mbunu ko nkhusopa ngoza. 6 Ukali waku Chiuta utuza chifukwa cha vinthu venivi. 7 Ndimu so namwi mwachitiyanga* mu umoyu winu wakali.+ 8 Kweni sonu mutayi kutali ndi yimwi vinthu nge: ukali, kukwiya, ntchitu ziheni,+ mazu ngaheni,+ ndipu pamulomu pinu pangatuwanga nkhani zakutuka+ cha. 9 Mungapusikananga cha.+ Zuwani umunthu* wakali+ limoza ndi ntchitu zaki, 10 ndipu vwalani umunthu wufya,+ wo uja wufya chifukwa cha kuziŵa vinthu mwauneneska mwakukoliyana ndi chikozgu chaku Yo wakuwulenga.+ 11 Mu umunthu wufya mulivi Mgiriki pamwenga Myuda, wakudumulika pamwenga wambula kudumulika, mulendu, Msukuti,* kapolu, pamwenga mwanangwa; kweni Khristu ndiyu vinthu vosi, ndipuso mu vinthu vosi.+

12 Pakuti mwe akusankhika aku Chiuta,+ akupaturika ndipuso akwanjiwa, vwalani chitima chikulu,+ lisungu, kujiyuyuwa,+ kuzika+ ndi kuzizipizga.+ 13 Lutirizgani kuzizipizgiyana kweniso kugowokiyana ndi mtima wosi+ chinanga munyaki wangaŵa ndi chifukwa chakudandawuliya vakukwaskana ndi munyaki.+ Nge mo Yehova* wakukugowokiyani ndi mtima wosi, namwi so muchitengi viyo.+ 14 Kusazgiyapu pa vosi ivi, vwalani chanju,+ pakuti ndichu chitovya kuti ŵanthu akoliyanengi ukongwa.+

15 Kweniso, chimangu chaku Khristu chilamuliyi mumitima yinu,+ pakuti mukudanikiya ku chimangu chenichi mu liŵavu limoza. Ndipu longoni kuti muwonga. 16 Mazu ngaku Khristu ngazaziki mwaku yimwi ndipuso muje ndi zeru zosi. Lutirizgani kusambizana ndi kuchiskana* mwa masalimo,+ sumu zakuthamika Chiuta, sumu zauzimu zakumbika mwakuwonga, kweniso muchimbiya Yehova* mumitima yinu.+ 17 Chechosi cho muchita, mu mazu kweniso mu ntchitu, muchichitengi mu zina la Ambuya Yesu, muchiwonga Chiuta, Ada kuporote mwaku iyu.+

18 Mwaŵanthukazi, mujithereskengi kwa alumu ŵinu,+ pakuti venivi ndivu vakwenere pa masu pa Ambuya. 19 Mwaŵanthulumi, lutirizgani kwanja awolu ŵinu,+ ndipu mungaŵakwiyiyanga* ukongwa cha.+ 20 Mwaŵana, muvwiyengi apapi ŵinu mu vinthu vosi,+ pakuti venivi vikondwesa Ambuya. 21 Yimwi ada, mungakwiyisanga ŵana ŵinu cha,+ kuti aleki kuguŵa.* 22 Yimwi akapolu, muvwiyengi ambuyamwi akuliŵavu,+ ndipu mungachitanga venivi pa nyengu yo atikuwonani pe cha pakukhumba kukondwesa ŵanthu, kweni muchitengi ndi mtima wosi muchiwopa Yehova.* 23 Chechosi cho muchita, muchichitengi ndi umoyu winu wosi nge kuti muchitiya Yehova,*+ ŵanthu cha, 24 pakuti muziŵa kuti mwazamulonde chihara nge mphotu kutuliya kwaku Yehova.*+ Teŵetiyani Ambuya Khristu, nge akapolu. 25 Kukamba uneneska, munthu yo wachita viheni wazamulipirika chifukwa cha viheni vo wachita,+ ndipu palivi kwanjiya.+

4 Yimwi ambuyawu, akapolu ŵinu muchitengi nawu vinthu mwaurunji kweniso mwakwenere, pakuziŵa kuti namwi so mwe ndi Ambuyamwi kuchanya.+

2 Mufwiyengepu kupemphera,+ ndipuso lutirizgani kuja masu pa nkhani yakupemphera kweniso muwongengi.+ 3 Pa nyengu yeniyo pe, nasi so mutipempheriyengi+ kuti Chiuta watijuliyi khomu kuti tipharazgi mazu, ndi chilatu chakuti tikambi va chisisi chakupaturika chakukwaskana ndi Khristu cho ndajaliya mujeri,+ 4 kweniso kuti ndichipharazgi mwakuvwika umampha nge mo nditenere kupharazgiya.

5 Lutirizgani kwenda mwazeru ku ŵanthu akubwalu, ndipu nyengu yinu muyigwiriskiyengi ntchitu mwakwenere.*+ 6 Mazu nginu ngaŵengi ngakunoza nyengu zosi, nge kuti mwadaku mche,+ kuti muziŵi mo mungamukiya munthu weyosi.+

7 Tukiko+ mubali wangu wakwanjiwa, mteŵeti wakugomezgeka kweniso kapolu munyangu mwa Ambuya, wakukonkhoskiyeningi vosi vakukwaskana ndi ini. 8 Nditimutuma kwaku yimwi kuti muziŵi mo tiliri ndipuso kuti wazipembuzgi mitima yinu. 9 Iyu watuza ndi Onesimo,+ mubali wangu wakugomezgeka kweniso wakwanjiwa, mweniyo ngwakutuliya pakati pinu. Yiwu azakukukonkhoskiyani vinthu vosi vo vichitika kunu.

10 Kapolu munyangu Arisitako,+ watikutawuzgani, Mariko+ musiŵani waku Baranaba nayu so watikutawuzgani (mweniyo mungulonde ulongozgi wakuti mumulondere umampha+ asani waza kwaku yimwi), 11 kweniso Yesu yo wadanika kuti Yusito. Yaŵa mbanyaki mwa ŵanthu akudumulika. Ŵenaŵa pe ndiwu antchitu anyangu chifukwa cha Ufumu waku Chiuta, ndipu atindichiska* ukongwa. 12 Epafura+ yo wakutuliya pakati pinu, kapolu waku Khristu Yesu, watikutawuzgani. Nyengu zosi iyu wafwiyapu kukupempheriyani, kuti pakumaliya muje akukhwima kweniso akusimikiza ukongwa mu khumbu losi laku Chiuta. 13 Pakuti nditimuchitiya ukaboni kuti wangujipereka ukongwa chifukwa chaku yimwi kweniso chifukwa chaku wo ŵe ku Lawodikaya ndi ku Herapoli.

14 Luka+ dokotala wakwanjiwa, watikutawuzgani, Demasi nayu so watikutawuzgani.+ 15 Mundipereke moni kwa abali wo ŵe ku Lawodikaya, kwaku Nifa kweniso ku mpingu wo uwungana kunyumba ya munthukazi mwenuyu.+ 16 Ndipu asani kalata iyi yaŵerengeka pakati pinu, nozgani vakuti yikaŵerengeki so+ ku mpingu wa ku Lawodikaya ndipuso kuti namwi muziŵerengi ya ku Lawodikaya. 17 Ndipuso Arikipo+ mumukambiyi kuti: “Uphwere uteŵeti wo ukupaskika mwa Ambuya, kuti uwufiski.”

18 Londiyani moni wangu wo ndachita kulemba ndija ini Paulo.+ Lutirizgani kukumbuka simbi zangu za ukayidi.+ Wezi ukulu uŵi namwi.