KALATA YAKULUTA KWAKU TITO

1 Ini Paulo, kapolu waku Chiuta kweniso wakutumika waku Yesu Khristu, mwakukoliyana ndi chivwanu cha akusankhika aku Chiuta ndipuso kuwuziŵa umampha uneneska wo ukoliyana ndi kujipereka kwaku Chiuta, 2 ko kuŵapu chifukwa cha chilindizga cha umoyu wamuyaya+ wo Chiuta yo wangapusika cha+ wakulayizga kali ukongwa; 3 kweni mu nyengu yaki, wanguziŵikisa mazu ngaki kuporote mu ntchitu yakupharazga yo ndikupaskika+ mwakukoliyana ndi dangu la Mtaski widu, Chiuta; 4 ndilembe Tito, mwana wangu chayiyu mwakukoliyana ndi chivwanu cho te nachu, kuti:

Wezi ukulu kweniso chimangu vakutuliya kwaku Chiuta, Ada ndipuso Khristu Yesu Mtaski widu, viŵi nawi.

5 Ndingukuleka mu Kirete kuti unozgi vinthu vo vingunangika* ndipuso kuti uŵiki ŵara mumatawuni ngakupambanapambana nge mo ndikukulamuliya kuti: 6 mura watenere kuja* wambula kafukwa, munthulumi wa munthukazi yumoza, yo we ndi ŵana akugomezga wo alivi mijalidu yabwekabweka pamwenga ŵana ambula kugaruka.+ 7 Pakuti nge mteŵeti waku Chiuta, wakuwonere wakhumbika kuja wambula kafukwa, wakuvwa vaki pe cha,+ wambula kukwiya liŵi,+ wakuloŵe cha, wandewu cha, wakusaniya phindu mwauryarya cha chifukwa cha mbunu, 8 kweni waje wakulonde alendu,+ wakwanja vinthu vamampha, wakuŵanaŵana umampha,*+ murunji, wakugomezgeka,+ wakujiko,+ 9 wakukolesa mazu ngakugomezgeka* wachisambiza umampha+ kuti wachiski ŵanthu ndi chisambizu chamampha*+ kweniso kuchenya+ wo asuska.

10 Pakuti pe ŵanthu anandi akugaruka, akulongoro vinthu vambula phindu kweniso akunyenga, ukongwa wo angangamiya dangu la kudumulika.+ 11 Ŵanthu ŵenaŵa akhumbika kuŵajala milomu chifukwa alutirizga kulandizga mabanja ngosi, mwakusambiza vinthu vo atenere cha kusambiza ndi chilatu chakuti asaniyi phindu mwauryarya. 12 Munyaki wa ŵanthu ŵenaŵa yo ndi mchimi wawu, wangukamba kuti: “Ŵanthu a ku Kirete mbaboza, ŵe nge vinyama vakofya vamudondu, mbalesi kweniso mbankharyi.”

13 Ukaboni uwu ngwauneneska. Pa chifukwa chenichi, lutirizga kuŵachenya ukongwa kuti aje ndi chivwanu chanthazi, 14 kuti aleki kuvwisiya nthanu za Ayuda ndipuso marangu nga ŵanthu wo aleka uneneska. 15 Vinthu vosi vakutowa ku ŵanthu akutowa,+ kweni ku ŵanthu akufipiskika ndipuso ambula chivwanu, palivi chinthu chakutowa, pakuti maŵanaŵanu ngawu ndi njuŵi zawu, vakufipiskika.+ 16 Pa masu pa ŵanthu, azomera kuti aziŵa Chiuta kweni atimukana ndi ntchitu zawu,+ chifukwa mbakukazuzgika, mbambula kuvwiya ndipuso mbakuzomerezeka cha kuchita ntchitu yeyosi yamampha.

2 Kweni yiwi, lutirizga kulongoro vinthu vo vikoliyana ndi chisambizu chamampha.*+ 2 Anthulumi arara achitengi vinthu mwambula kujumpha mwesu, angachitanga vinthu nge ŵana cha, aŵanaŵanengi umampha kweniso aje ndi chivwanu chanthazi, aje ndi chanju chikulu kweniso akunthiyengepu ukongwa. 3 Anthukazi arara nawu aje ndi jalidu lakwenere ŵanthu akupaturika, angaŵanga akukamba vinthu viheni va anyawu cha, angaŵanga akapolu a vinyu munandi cha, kweni aje asambizi a vinthu vamampha, 4 kuti alunguchizgi* anthukazi achisungwana kuti ayanjengi alumu ŵawu, ayanjengi ŵana ŵawu, 5 aŵanaŵanengi umampha, aje akutowa, agwirengi ntchitu zapakhomu,* aje amampha ndipuso ajithereskengi kwa alumu ŵawu,+ kuti mazu ngaku Chiuta ngaleki kunyozeka.

6 Mwakuyanana ŵaka, lutirizga kuchiska anyamata kuti aŵanaŵanengi umampha,+ 7 ndipuso uje chakuwoniyapu pa ntchitu zamampha mu nthowa yeyosi. Usambizengi cho ntchakupaturika* ndi mtima wosi,+ 8 ugwiriskiyengi ntchitu mazu ngamampha* ngo ngangasuskika cha,+ kuti wo asuska alengeseki ndipuso aŵevi chakukamba chiheni chakukwaskana ndi isi.+ 9 Akapolu ajithereskengi kwa ambuyawu mu vinthu vosi.+ Ayesesengi kuŵakondwesa ndipu angasuskananga nawu cha, 10 angaŵabiyanga cha+ kweni alongo kuti mbakugomezgeka ukongwa ndi chilatu chakuti adyoŵesi mu nthowa yeyosi chisambizu chaku Chiuta Mtaski widu.+

11 Pakuti wezi ukulu waku Chiuta wawoneke ndipu wawovya kuti ŵanthu amitundu yosi ataskiki.+ 12 Utitisambiza kuti tikanengi kuja ndi mijalidu yambula kopa Chiuta kweniso makhumbiru nga charu,+ ndipuso kuti tijengi ndi maŵanaŵanu ngamampha, tichitengi urunji ndipuso tijengi akujipereka kwaku Chiuta mu nyengu yinu,*+ 13 tichikhaza chilindizga chakukondwesa+ kweniso kuwoneke mwaunkhankhu kwaku Chiuta mukulu ndipuso kwa Mtaski widu, Yesu Khristu, 14 yo wakujipereka chifukwa chaku isi,+ kuti watifwatuwi*+ ku mtundu wewosi wa kuleka kuvwiya marangu ndipuso kuti wajitowese ŵanthu wo ntchuma chaki chapade, aphamphu pa ntchitu zamampha.+

15 Lutirizga kulongoro vinthu venivi, kuchiska ndipuso kuchenya ndi mazaza ngosi.+ Ungazomerezanga cha kuti ŵanthu akudelerengi.

3 Lutirizga kuŵakumbusa kuti ajithereskengi ndipuso avwiyengi maboma kweniso amazaza,+ kuti so ajengi akunozgeka kuchita ntchitu yeyosi yamampha, 2 angalongoronga mwachimwaza cha kwaku weyosi, aleki kupindana, kweni aje akoloŵa,+ alongongi kuti mbakuzika ku ŵanthu wosi.+ 3 Pakuti nasi kali tenga ambula zeru, ambula kuvwiya, akulandizgika, akapolu a makhumbiru kweniso a vakukondwesa vakupambanapambana, talutirizganga kuchita vinthu viheni kweniso sanji, tenga akukazuzgika ndipuso tatinkhananga.

4 Kweni wezi waku Chiuta Mtaski widu,+ ndipuso chanju chaki ku ŵanthu, vati vawoneke 5 (chifukwa cha ntchitu zaurunji zo tinguchita cha,+ kweni chifukwa cha lisungu laki),+ wakutitaska mwakutisambisa ndipu ivi vikutitole ku umoyu+ kweniso vititiwovya kuja ŵafya kuporote mu mzimu wakupaturika.+ 6 Wakutipunguliya mwakuzara* mzimu wenuwu kuporote mwaku Yesu Khristu, Mtaski widu,+ 7 kuti pavuli pakudanika arunji kuporote mu wezi waki ukulu,+ tije akuhara+ mwakukoliyana ndi chilindizga cha umoyu wamuyaya.+

8 Mazu ngenanga ngakugomezgeka ndipu ndikhumba kuti yiwi ulutirizgi kudidimizga vinthu venivi, kuti ŵanthu wo agomezga Chiuta, alutirizgi kuŵika maŵanaŵanu ngawu ngosi pa ntchitu zamampha. Vinthu venivi vamampha ndipuso vakovya ku ŵanthu.

9 Kweni ungachitangaku cha suskanu zakupusa, kukumba mikoka, kupindana ndi kuyambana pa Dangu,* pakuti venivi vambula phindu kweniso vaŵaka.+ 10 Munthu yo wachiska timagulu takugaruka,+ umukani+ pavuli pakuti wamutcheŵeska kakwamba ndipuso kachiŵi,+ 11 pakuziŵa kuti munthu waviyo watuwapu pa nthowa, wabuda ndipuso watijisuska.

12 Asani ndatuma Atema pamwenga Tukiko+ kwaku yiwi, uyesesi kuti uzi kwaku ini ku Nikopoli, chifukwa ndiku ndaŵanaŵana kuti nkhaje mu chipwepwi. 13 Uwonesesi kuti Zenasi yo watiliziŵa umampha Dangu* ndipuso Apolo, waŵapaska vosi vakukhumbika kuti aleki kusoŵa kanthu pa ulendu wawu.+ 14 Kweni ŵanthu ŵidu nawu asambiri kulutirizga kuchita ntchitu zamampha kuti awovyengi asani pakhumbika chovyu chaliŵi,+ ndi chilatu chakuti aleki kuja ambula kubala vipasu.+

15 Ŵanthu wosi wo ŵe ndi ini atikutawuzga. Tawuzga ŵanthu wo atitiyanja kweniso wo ŵe mu chivwanu.

Wezi ukulu uŵi namwi mosi.