CHIVUMBUZI KWAKU YOHANE

1 Chivumbuzi* chakuperekeka ndi Yesu Khristu, cho Chiuta wangumupaska+ kuti walongo akapolu ŵaki+ vinthu vo vitenere kuchitika pambula kuswera. Yesu wangutuma mungelu waki ndipu wangupereka chivumbuzi cho kwaku Yohane kapolu waki+ kuporote mwa mungelu yo. Iyu wangupereka chivumbuzi cho mwakugwiriskiya ntchitu vinthu vo vimiya vinthu vinyaki. 2 Yohane wanguchitiya ukaboni mazu ngo Chiuta wangupereka kweniso ukaboni wo Yesu Khristu wangupereka. Iyu wanguchitiya ukaboni vinthu vosi vo wanguwona. 3 Ngwakukondwa munthu yo waŵerenga mwakukweza, kweniso mbakukondwa ŵanthu wo atuvwa mazu nga uchimi uwu ndipuso wo asunga vinthu vo vikulembeka mwenimo,+ pakuti nyengu yakuŵikika ye pafupi.

4 Ini Yohane ndilembe mipingu 7+ yo ye muchigaŵa cha Asia kuti:

Muŵi ndi wezi ukulu kweniso chimangu vakutuliya kwaku “Yo waliku, yo wengaku ndipuso yo watuza,”+ kweniso vakutuliya ku mizimu 7+ yo ye panthazi pa mpandu waki waufumu, 5 ndipuso vakutuliya kwaku Yesu Khristu, “Kaboni Wakugomezgeka,”+ “Wakwamba kuwaku kutuliya ku nyifwa,”+ “Wakulamuliya wa mafumu nga pacharu chapasi.”+

Kwaku iyu yo watitiyanja+ ndipuso yo wakutifwatuwa ku maubudi ngidu ndi ndopa zaki,+ 6 ndipu wakutipanga kuŵa mafumu*+ kweniso asembi+ aku Chiuta waki ndipuso Awisi, kwaku iyu kuŵi unkhankhu kweniso nthazi kwamuyaya. Ame.

7 Awonani! Watuza ndi mitambu,+ jisu lelosi lazakumuwona, ndipu wo angumugwaza nawu azakumuwona; mafuku ngosi nga pacharu chapasi ngazakujipuma pachifuŵa mwachitima chifukwa chaku iyu.+ Hinya, Ame.

8 Yehova* Chiuta wakamba kuti: “Ini ndini Alefa ndi Omega,*+ Yo waliku, yo wengaku ndipuso yo watuza, Wanthazizosi.”+

9 Ini Yohane, mubali winu kweniso wakusangana namwi mu masuzgu,+ mu ufumu+ ndipuso mu kukunthiyapu+ mwakukoliyana ndi Yesu,+ ndenga pachirwa* cha Patimo chifukwa cha kukamba vakukwaskana ndi Chiuta kweniso chifukwa cha kupereka ukaboni wakukwaskana ndi Yesu. 10 Mwa mzimu, ndingusanirika kuti nde mu zuŵa la Ambuya, ndipu ndinguvwa mazu nganthazi nge kuliya kwa mbata* kuvuli kwangu. 11 Mazu ngo ngakambanga kuti: “Vo uwona, uvilembi mumpukutu ndi kuvitumiza ku mipingu 7 iyi: wa ku Efeso,+ wa ku Simuna,+ wa ku Pegamo,+ wa ku Tiyatira,+ wa ku Sade,+ wa ku Filadefiya+ ndipuso wa ku Lawodikaya.”+

12 Ndingung’anamuka kuti ndiwoni yo walongoronga nani, ndipu ndati ndang’anamuka, ndinguwona vakuŵikapu nyali 7 vagolidi.+ 13 Pakati pa vakuŵikapu nyali penga munthu munyaki nge mwana wa munthu,+ yo wanguvwala chakuvwala chakufika mumaphazi, ndipu wanguvwala so bandi lagolidi kuzunguliza nganga yaki. 14 Kweniso, mutu waki ndi sisi laki venga vituŵa nge weya wa mbereri wakuti tuu, nge sinoo,* ndipu masu ngaki ngenga nge mulipu wa motu.+ 15 Maphazi ngaki ngagabukanga nge mkuŵa wamampha ukongwa+ pa nyengu yo usongonoreka mung’anju, ndipu mazu ngaki ngavwikanga nge kupoma kwa maji nganandi. 16 Mujanja laki lamaryi mwenga nyenyezi 7,+ ndipu mumulomu mwaki mwatuwanga lipanga lakuthwa,+ litali, lawuyi kosikosi ndipu chisku chaki chenga nge lumwi lo laŵala ukongwa.+ 17 Ndati ndamuwona, ndinguwa pamaphazi ngaki nge kuti ndafwa.

Ndipu iyu wanguŵika janja laki lamaryi paku ini ndi kukamba kuti: “Ungawopanga cha. Ndini Wakwamba+ ndi Wakumaliya,+ 18 ndipuso wamoyu.+ Ndingufwa,+ kweni awona! nde wamoyu muyaya mpaka muyaya.+ Nde ndi maki nga nyifwa kweniso nga Dindi.*+ 19 Mwaviyo, lemba vinthu vo wawona, vinthu vo vilipu ndipuso vinthu vo vichitikengi pavuli paki. 20 Pa nkhani ya chisisi chakupaturika cha nyenyezi 7 zo wawona mujanja langu lamaryi kweniso vakuŵikapu nyali 7 vagolidi: Nyenyezi 7 zimiya angelu a mipingu 7, ndipu vakuŵikapu nyali 7 vimiya mipingu 7.+

2 “Mungelu+ wa mpingu wa ku Efeso+ umulembe kuti: Ivi ndivu wakamba yo wakoleze nyenyezi 7 kujanja laki lamaryi ndipuso yo watenda pakati pa vakuŵikapu nyali 7 vagolidi:+ 2 ‘Ndiziŵa ntchitu zaku, phamphu laku, kweniso kukunthiyapu kwaku. Ndiziŵa so kuti ungaŵalekere cha ŵanthu aheni, ndipuso kuti unguyesa ŵanthu wo akamba kuti mbakutumika,+ penipo mbakutumika cha, ndipu ungusaniya kuti mbaboza. 3 Ulongo so kuti ukunthiyapu, kweniso wazizipizga chifukwa cha zina langu+ ndipu wavuka cha.+ 4 Kweni nditikususka chifukwa chakuti waleka chanju cho wenga nachu pakwamba.

5 “‘Mwaviyo, kumbuka mo wenge wechendawi ndipu ulapi+ ndi kuchita ntchitu zo wachitanga pakwamba. Asani uleka kulapa,+ ndizengi kwaku yiwi ndipu ndazamutuzgapu chakuŵikapu nyali chaku+ pamalu ngaki. 6 Kweni pe chinthu chimoza cho uchita umampha: utinkha ntchitu za kagulu kakugaruka kaku Nikolasi+ zo ini nani nditinkha. 7 Yo we ndi gutu wavwi vo mzimu ukambiya mipingu:+ Yo wapunda+ ndazakumuzomereza kurya va muchimiti cha umoyu,+ chenicho che mu paradayisu waku Chiuta.’

8 “Ndipu mungelu wa mpingu wa ku Simuna umulembe kuti: Ivi ndivu wakamba ‘Wakwamba ndi Wakumaliya,’+ yo wangufwa ndi kuja so ndi umoyu:+ 9 ‘Ndiziŵa masuzgu ngaku ndi ukavu waku, kweni ndiwi wakukhupuka,+ ndipu ndiziŵa so kunyoza kwa ŵanthu wo atijidana kuti Mbayuda penipo Mbayuda cha, mumalu mwaki yiwu ndi sinagogi waku Satana.+ 10 Leka kopa masuzgu ngo we pafupi kukumana nangu.+ Awona! Dyaboli walutirizgengi kuponya anyaki aku yimwi mujeri kuti muyeseki mwakukwana, ndipu mwazamusuzgika kwa mazuŵa 10. Longo kuti ndiwi wakugomezgeka mpaka nyifwa, ndipu ini ndazakukupaska chisoti* cha umoyu.+ 11 Yo we ndi gutu wavwi+ vo mzimu ukambiya mipingu: Yo wapunda,+ nyifwa yachiŵi yazakumukwaska cha.’+

12 “Mungelu wa mpingu wa ku Pegamo umulembe kuti: Ivi ndivu wakamba yo we ndi lipanga lakuthwa, litali, lawuyi kosikosi:+ 13 ‘Ndiziŵa ko uja. Uja ko kwe mpandu waufumu waku Satana; kweni ukolesa zina langu,+ ndipu ungukana cha kuti uvwana mwaku ini+ chinanga ndi mu mazuŵa ngaku Antipasi, kaboni wangu wakugomezgeka,+ yo wakubayikiya+ pafupi ndi yimwi, kweniko kuja Satana.

14 “‘Kweni nde ndi vinthu vimanavi vo nditikususka. Kweniko, we ndi ŵanthu anyaki wo akolesa chisambizu chaku Balamu,+ yo wangusambiza Balaki+ kuti waŵikiyi Ayisirayeli chinthu chakuguŵiska, kuti aryi vinthu vakuperekeka sembi kwa angoza kweniso kuti achiti ureŵi.*+ 15 We so ndi ŵanthu anyaki wo akolesa chisambizu cha kagulu kakugaruka kaku Nikolasi.+ 16 Mwaviyo ulapi. Asani uleka kulapa, ndizengi kwaku yiwi mwaliŵi ndipu ndazamuchita nkhondu ndi ŵanthu ŵenaŵa mwakugwiriskiya ntchitu lipanga litali la mumulomu mwangu.+

17 “‘Yo we ndi gutu wavwi vo mzimu ukambiya mipingu:+ Yo wapunda+ ndazakumupaska nganyaki mwa mana ngakubisika,+ ndazakumupaska so mwa utuŵa, ndipu pamwa wenuwu pakulembeka zina lifya lo palivi munthu yo watiliziŵa, kupatuwaku munthu yo walonde mwa wo.’

18 “Mungelu wa mpingu wa ku Tiyatira+ umulembe kuti: Ivi ndivu wakamba Mwana waku Chiuta, yo masu ngaki nge nge mulipu wa motu+ ndipuso yo maphazi ngaki nge nge mkuŵa wamampha ukongwa:+ 19 ‘Ndiziŵa ntchitu zaku, chanju chaku, chivwanu chaku, uteŵeti waku ndi kukunthiyapu kwaku. Ndiziŵa so kuti ntchitu zaku zasonu ziluska zo unguchita pakwamba.

20 “‘Kweni nditikususka chifukwa chakuti ulekere munthukazi yuwa Yezebeli,+ yo watijidana kuti ndi mchimi ndipu wasambiza ndi kulandizga akapolu ŵangu kuti achitengi ureŵi,*+ kweniso kuti aryengi vinthu vakuperekeka sembi kwa angoza. 21 Ndipu ndingumupaska nyengu yakuti walapi, kweni wakhumba cha kulapa ureŵi* waki. 22 Awona! Ndaja kamanavi, ndimuchitiskengi kuti watami ukongwa,* ndipu wo achita nayu chigololu ndiŵaponyengi mu suzgu yikulu asani aleka kulapa ntchitu zakuyanana ndi zaki. 23 Ndibayengi ŵana ŵaki ndi mulili wakubaya, kuti mipingu yosi yiziŵi kuti ini ndini ndifufuza maŵanaŵanu ngamukatikati* kweniso mitima, ndipu weyosi waku yimwi ndimupaskengi mwakukoliyana ndi ntchitu zaki.+

24 “‘Kweni mwanyaki mosi yimwi muja ku Tiyatira, yimwi muleka kulondo chisambizu chenichi, kweniso muleka kuziŵa vo vidanika kuti “vinthu vandimba vaku Satana,”+ nditikukambiyani kuti: Nditikupingizani mphingu yinyaki so cha. 25 Chinanga kuti ve viyo, kolesani vo mwe navu mpaka po ndiziyengi.+ 26 Ndipu yo wapunda ndi kulondo ntchitu zangu mpaka pakumaliya, ndazakumupaska mazaza pa mitundu ya ŵanthu,+ 27 ndipu wazamukhwema* ŵanthu ndi nthonga yachisulu,+ kuti azisweki vibanthuvibanthu nge viyaŵi vadongu, nge mo nani ndalonde kutuliya kwa Ada. 28 Ndipu ndazakumupaska thondu.+ 29 Yo we ndi gutu wavwi vo mzimu ukambiya mipingu.’

3 “Mungelu wa mpingu wa ku Sade umulembe kuti: Ivi ndivu wakamba yo we ndi mizimu 7 yaku Chiuta+ kweniso nyenyezi 7:+ ‘Ndiziŵa ntchitu zaku, kuti we ndi mbiri yakuti* ndiwi wamoyu, penipo ndiwi wakufwa.+ 2 Ja masu+ ndipu tchinthisa vinthu vakujaku vo venga pafupi kufwa, chifukwa ndasaniya kuti ntchitu zaku zachitika mwakukwana* cha pa masu paku Chiuta wangu. 3 Mwaviyo, lutirizga kukumbuka vo ungulonde ndi vo unguvwa, ndipu lutirizga kuvisunga kweniso ulapi.+ Nadi panu, asani waleka kuja masu, ndizengi nge munkhungu,+ ndipu ora lo ndiziyengi kwaku yiwi wazakuliziŵa cha chinanga nkhamanavi.+

4 “‘Kweni we ndi ŵanthu amanavi* mu Sade wo akufipiska cha vakuvwala vawu,+ ndipu azamukwenda ndi ini avwala vakuvwala vituŵa,+ chifukwa mbakwenere. 5 Mwaviyo, yo wapunda,+ wazamuvwalikika vakuvwala vituŵa,+ ndipu ndazamusisita cha zina laki mubuku la umoyu,+ kweni ndazamuzomereza zina laki pa masu pa Ada ndi pa masu pa angelu.+ 6 Yo we ndi gutu wavwi vo mzimu ukambiya mipingu.’

7 “Mungelu wa mpingu wa ku Filadefiya umulembe kuti: Ivi ndivu wakamba mtuŵa,+ yo ndi muneneska,+ yo we ndi ki waku Davidi,+ yo wajula kuti paŵevi wakujala, ndipuso yo wajala kuti paŵevi wakujula: 8 ‘Ndiziŵa ntchitu zaku. Awona! Ndakujuliya khomu panthazi paku,+ lo palivi yo wangajala. Ndiziŵa kuti we ndi nthazi zimana, ndipuso kuti ungusunga mazu ngangu kweniso ungulongo kuti ndiwi wakugomezgeka ku zina langu. 9 Awona! Ŵanthu akutuliya musinagogi waku Satana wo akamba kuti Mbayuda, penipo Mbayuda cha,+ kweni apusika, awona! ndazakuŵachitiska kuti azi kwaku yiwi ndi kujikama pamaphazi ngaku,* ndipuso ndazakuŵachitiska kuti aziŵi kuti ndakuyanja. 10 Chifukwa chakuti ungusunga mazu ngakukwaskana ndi kukunthiyapu kwangu,*+ ndazakukusunga mu ora lakuyeseka,+ lenilo lituza pacharu chosi chapasi, kuziyesa ŵanthu wo aja pacharu chapasi. 11 Ndituza mwaliŵi,+ lutirizga kukolesa vo we navu, kuti paŵevi munthu wakuphanga chisoti* chaku.+

12 “‘Yo wapunda, ndazakumuchitiska kuti waje chipilala munyumba yakusopiyamu yaku Chiuta wangu, ndipu wazamutuwamu so cha, ndipuso paku iyu ndazamulembapu zina laku Chiuta wangu+ ndi zina la tawuni yaku Chiuta wangu, Yerusalemu Mufya+ yo wasika kutuwa kuchanya kwaku Chiuta wangu, ndipuso zina langu lifya.+ 13 Yo we ndi gutu wavwi vo mzimu ukambiya mipingu.’

14 “Mungelu wa mpingu wa ku Lawodikaya+ umulembe kuti: Ivi ndivu wakamba Ame,+ kaboni+ wakugomezgeka kweniso muneneska,+ wakwamba kulengeka ndi Chiuta:+ 15 ‘Ndiziŵa ntchitu zaku kuti ndiwi wakuzizira cha pamwenga wakotcha. Mphanyi wenga wakuzizira pamwenga wakotcha. 16 Sonu pakuti ndiwi wakuluputuka, ndipu ndiwi wakotcha cha+ pamwenga wakuzizira,+ ndikuwukuwengi mumulomu mwangu. 17 Chifukwa chakuti ukamba kuti, “Nde wakukhupuka,+ ndasaniya chuma chinandi ndipu ndisoŵa kanthu cha,” kweni uziŵa cha kuti ndiwi wakusuzgika, wakuchitiska lisungu, mukavu, wachibulumutiya ndipuso wankhuli, 18 nditikulunguchizga kuti uguli kwaku ini golidi wakuyengetulika ndi motu kuti ukhupuki, uguli so vakuvwala vituŵa kuti uvwali ndipuso kuti uleki kuchita soni asani ungawoneka we nkhuli,+ kweniso uguli munkhwala wa mumasu+ ndipu upaki kuti uyambi kuwona.+

19 “‘Ŵanthu wosi wo nditiŵayanja, nditiŵachenya+ kweniso kuŵalanga. Mwaviyo, chita phamphu ndipuso ulapi.+ 20 Awona! Ndama pakhomu ndipu ndigong’oska. Weyosi yo wavwa mazu ngangu ndi kujula khomu, ndazamusere munyumba yaki ndi kuryiya nayu limoza chakurya chamazulu. 21 Yo wapunda,+ ndazakumuzomereza kuti waje nani limoza pampandu wangu waufumu,+ nge mo nani ndingupundiya ndi kujaliya limoza ndi Ada pampandu wawu waufumu.+ 22 Yo we ndi gutu wavwi vo mzimu ukambiya mipingu.’”

4 Pavuli paki ndingulereska, ndipu awonani! ndinguwona khomu lakujulika kuchanya, ndipu mazu ngakwamba ngo ndinguvwa ngachilongoro nani ngavwikanga nge kuliya kwa mbata.* Mazu ngo ngenga ngakuti: “Kwere kunu, ndipu ndikulongongi vinthu vo vitenere kuchitika.” 2 Pavuli paki, ndingwamba kulongozgeka ndi nthazi ya mzimu nyengu yeniyo, ndipu awonani! ndinguwona mpandu waufumu wo wenga pamalu ngaki kuchanya ndipu pampandu wo panguja munthu munyaki.+ 3 Yo wanguja pampandu waufumu wo, wawonekanga nge mwa wa jasipa+ ndipuso nge mwa wa sadiyasi.* Kuzunguliya mpandu waufumu wo, penga chiŵingavuwa chakuwoneka nge mwa wa emeradi.+

4 Kuzunguliya mpandu waufumu wo, penga mipandu yaufumu 24, ndipu ndinguwona ŵara 24 aja pamipandu yo.+ Yiwu anguvwala vakuvwala vituŵa ndipuso visoti vaufumu vagolidi kumutu kwawu. 5 Kumpandu waufumu wo, kwang’animanga malimphezi,+ kwavwikanga mazu ndipuso kwagululusanga;+ ndipu penga so nyali 7 za motu zo zakoliyanga panthazi pa mpandu waufumu. Nyali zenizi zimiya mizimu 7 yaku Chiuta.+ 6 Panthazi pa mpandu wo, penga chinthu chinyaki chakuwoneka nge nyanja ya nge gilasi,+ cho chenga nge mwa wa kulusitalo.

Pakati pa mpandu waufumu kweniso kuzunguliya mpandu wo, penga vamoyu vinayi+ vo venga ndi masu liŵavu losi kunthazi ndi kuvuli. 7 Chamoyu chakwamba chenga nge nkharamu,+ chamoyu chachiŵi chenga nge tholi* linthulumi,+ chamoyu chachitatu+ chenga ndi chisku cha nge cha munthu,+ ndipu chamoyu chachinayi chenga nge nombu yo yiphululuka.+ 8 Vamoyu vinayi vo, chechosi chenga ndi mapapa 6; venga ndi masu liŵavu losi mpaka kusi kwa mapapa.+ Ndipu msana ndi usiku vikamba kuti: “Mtuŵa, mtuŵa, mtuŵa ndi Yehova*+ Chiuta, Wanthazizosi, yo wengaku, yo waliku ndipuso yo watuza.”+

9 Asani vamoyu vikankhuska, kutumbika ndi kuwonga Yo waja pampandu waufumu, Yo waliku muyaya mpaka muyaya,+ 10 ŵara 24+ ajikama ndi kusindama panthazi paku Yo waja pampandu waufumu ndi kusopa Yo waliku muyaya mpaka muyaya, ndipu aponya visoti vawu panthazi pa mpandu waufumu ndi kukamba kuti: 11 “Ndimwi wakwenere Yehova* Chiuta widu kulonde unkhankhu,+ ulemu+ ndipuso nthazi,+ chifukwa mukulenga vinthu vosi,+ ndipu chifukwa cha khumbu linu vikuŵaku kweniso vikulengeka.”

5 Ndipu ndinguwona mpukutu wakulembeka mukati ndi kubwalu, kujanja lamaryi laku Yo wanguja pampandu waufumu.+ Mpukutu wo ungumatika ukongwa ndi vidindu 7. 2 Sonu ndinguwona mungelu wanthazi ukongwa wachipharazga mwakudaniriza kuti: “Kumbi ndiyani yo ngwakwenere kujula mpukutu uwu ndi kulamatuwa vidindu vaki?” 3 Kweni pengavi yo wangufiska kujula mpukutu wo pamwenga kuwonamu, kwali nkhuchanya pamwenga pacharu chapasi pamwenga kusi kwa charu chapasi. 4 Ndinguliya ukongwa chifukwa chakuti pengavi yo wenga wakwenere kujula mpukutu wo pamwenga kuwonamu. 5 Kweni yumoza wa ŵara wangundikambiya kuti: “Leka kuliya. Awona! Nkharamu ya fuku laku Yuda,+ yo ndi msisi+ waku Davidi,+ yapunda+ kuti yijuli mpukutu wo ndipuso kuti yilamatuwi vidindu vaki 7.”

6 Ndipu ndinguwona mwana wa mbereri wama pakati pa mpandu waufumu, pakati pa vamoyu vinayi ndipuso pakati pa ŵara.+ Mwana wa mbereri yo,+ wawonekanga nge kuti wabayika+ ndipu wenga ndi masengwi 7 ndi masu 7, ndipu masu ngamiya mizimu 7 yaku Chiuta+ yo yatumika pacharu chosi chapasi. 7 Nyengu yeniyo, Mwanawambereri wanguza ndipu wanguto mpukutu wo wenga kujanja lamaryi laku Yo wanguja pampandu waufumu.+ 8 Wati wato mpukutu wo, vamoyu vinayi ndipuso ŵara 24+ angujikama ndi kusindama panthazi pa Mwanawambereri, ndipu weyosi waku yiwu wenga ndi bangu* kweniso mbali yabakuli yagolidi yo yinguzaza ndi vakununkhira. (Vakununkhira vimiya mapempheru nga akupaturika.)+ 9 Ndipu yiwu ambanga sumu yifya,+ kuti: “Ndimwi akwenere kuto mpukutu ndi kulamatuwa vidindu vaki pakuti mungubayika ndipu ndi ndopa zinu mukuguliya Chiuta ŵanthu+ akutuliya mu fuku lelosi, lilimi lelosi,* mtundu wewosi ndipuso charu chechosi,+ 10 mukuŵapanga kuŵa mafumu+ kweniso asembi aku Chiuta widu+ ndipu azamulamuliya charu chapasi nge mafumu.”+

11 Sonu ndinguwona ndipuso ndinguvwa mazu nga angelu anandi wo anguzunguliya mpandu waufumu, vamoyu ndipuso ŵara, ndipu chiŵerengeru chawu chenga ma 10,000 tayimuzi ma 10,000 kweniso masawuzandimasawuzandi,+ 12 ndipu akambanga mwakudaniriza kuti: “Mwanawambereri yo wangubayika+ ngwakwenere kulonde mazaza, chuma, zeru, nthazi, ulemu, unkhankhu ndi vitumbiku.”+

13 Ndipu ndinguvwa chakulengeka chechosi cha kuchanya, cha pacharu chapasi, cha kusi kwa charu chapasi,+ cha munyanja, ndi vinthu vosi vo ve mwenimo vichikamba kuti: “Kwaku Yo waja pampandu waufumu+ ndipuso ku Mwanawambereri,+ kuŵi vitumbiku, ulemu, unkhankhu+ ndi nthazi muyaya mpaka muyaya.”+ 14 Vamoyu vinayi vo, vakambanga kuti: “Ame!” Ŵara angujikama ndi kusindama ndipu angusopa.

6 Sonu ndinguwona Mwanawambereri+ wachilamatuwa chimoza mwa vidindu 7,+ ndipu ndinguvwa chimoza mwa vamoyu vinayi+ chichidaniriza ndi mazu ngo ngavwikanga nge limphezi, kuti: “Zanga!” 2 Ndipu awonani! ndinguwona hachi yituŵa.+ Yo wangukwerapu wenga ndi uta ndipuso wangupaskika chisoti cha ufumu.+ Iyu wanguluta kuchithereska ndi kuchimaliza kuthereska kwaki.+

3 Wati walamatuwa chidindu chachiŵi, ndinguvwa chamoyu chachiŵi+ chichikamba kuti: “Zanga!” 4 Ndipu kunguza hachi yinyaki yiyera. Yo wangukwerapu wanguzomerezeka kutuzgapu chimangu pacharu chapasi kuti ŵanthu abayani ndipu wangupaskika lipanga likulu.+

5 Wati walamatuwa chidindu chachitatu,+ ndinguvwa chamoyu chachitatu+ chichikamba kuti: “Zanga!” Ndipu awonani! ndinguwona hachi yifipa. Yo wangukwerapu wenga ndi sikelu mujanja laki. 6 Sonu ndinguvwa vo vavwikanga nge mazu kutuliya pakati pa vamoyu vinayi. Mazu ngo ngenga ngakuti: “Tirigu wakukwana mwesu umoza wa kwati* mtengu waki ndi dinari*+ yimoza, ndipu balire wakukwana miyesu yitatu ya kwati mtengu waki ndi dinari yimoza. Mafuta nga maolivi ndi vinyu kuvinanga cha.”+

7 Wati walamatuwa chidindu chachinayi, ndinguvwa mazu nga chamoyu chachinayi+ chichikamba kuti: “Zanga!” 8 Ndipu awonani! ndinguwona hachi yakuti mbuu ndipu yo wangukwerapu zina laki lenga Nyifwa. Ndipu Dindi* wamulondonga pafupi. Yiwu angupaskika mazaza pa chigaŵa chachinayi cha charu chapasi, kuti abayi ŵanthu ndi lipanga litali, nja,+ mulili wakubaya kweniso vinyama vakofya va pacharu chapasi.+

9 Wati walamatuwa chidindu chachinkhondi, kusi kwa guŵa la sembi+ ndinguwonaku maumoyu*+ nga ŵanthu wo angubayika chifukwa cha mazu ngaku Chiuta ndipuso chifukwa cha ukaboni wo angupereka.+ 10 Yiwu angudaniriza ndi mazu nganthazi kuti: “Yimwi Ambuya Fumu Yikulu, mtuŵa ndipuso muneneska,+ kumbi mulindizgengi mpaka zuŵanji kuti mupereki cheruzgu ndipuso kuti muweze nduzga pa ŵanthu wo aja pacharu chapasi chifukwa cha ndopa zidu?”+ 11 Ndipu weyosi waku yiwu wangupaskika mkhanju utuŵa+ ndipuso anguŵakambiya kuti apumuweku kwa kanyengu kamanavi, mpaka po chakwaniya chiŵerengeru cha akapolu anyawu kweniso cha abali ŵawu wo ŵenga pafupi kubayika nge yiwu.+

12 Ndingumuwona wachilamatuwa chidindu cha 6, ndipu kunguchitika chidilirisi chikulu; lumwi lingusambuka lifipa nge chigudulu chakupangika ndi weya,* kweniso mwezi wosi wenga nge ndopa,+ 13 ndipu nyenyezi zakuchanya zingumbotoke pacharu chapasi, nge mo vipasu vambula kufya va chimiti cha mkuyu vimbotoke pasi asani chimiti cho chasukunyisika ndi mphepu yanthazi. 14 Ndipu kuchanya kungukungunuka nge mpukutu wo uzingika,+ phiri lelosi kweniso chirwa* chechosi vingutuzgikapu pamalu ngaki.+ 15 Pavuli paki, mafumu nga pacharu chapasi, ŵanthu a maudindu, ŵaraŵara ŵa asilikali, akukhupuka, ŵanthu anthazi, kapolu weyosi ndipuso mwanangwa weyosi, angubisama mumphanji kweniso pakati pa majalawi nga mumapiri.+ 16 Ndipu akambiyanga mapiri kweniso majalawi kuti: “Tiwiyeni+ ndi kutibisa ku chisku chaku Yo waja pampandu waufumu+ ndipuso ku ukali wa Mwanawambereri,+ 17 pakuti zuŵa likulu la ukali wawu lafika,+ ndipu ndiyani yo wangamaku?”+

7 Pavuli paki, ndinguwona angelu anayi wo anguma mumakona nganayi nga charu chapasi. Yiwu angukolesa mphepu zinayi za charu chapasi kuti mphepu yileki kuputiya pacharu chapasi, panyanja pamwenga pachimiti chechosi. 2 Ndinguwona so mungelu munyaki wachikwera kutuliya ko kutuliya lumwi* ndipu wenga ndi chidindu chaku Chiuta wamoyu. Mungelu yo, wangudaniriziya angelu anayi wo anguzomerezeka kuti anangi charu chapasi ndi nyanja. 3 Iyu wangudaniriza kuti: “Mungananganga cha charu chapasi, nyanja pamwenga vimiti, mpaka po tadindiya+ akapolu aku Chiuta widu pavisku vawu.”+

4 Ndipu ndinguvwa chiŵerengeru cha ŵanthu wo angudindika chidindu. Ŵanthu wo, ŵengapu 144,000+ ndipu angutuliya mu mafuku ngosi nga ŵana aku Isirayeli:+

9 Pavuli paki, awonani! ndinguwona mzinda ukulu wa ŵanthu wo pengavi munthu yo wangufiska kuwuŵerenga. Ŵanthu wo atuliyanga mu mitundu yosi, mu mafuku ngosi, mu ŵanthu wosi ndipuso mu malilimi ngosi.*+ Yiwu anguma panthazi pa mpandu waufumu ndi panthazi pa Mwanawambereri, avwala mikhanju yituŵa;+ ndipu ŵenga ndi mani nga vimiti va kantchindi mumanja mwawu.+ 10 Ndipu adanirizanga ukongwa kuti: “Utaski widu watuliya kwaku Chiuta widu mweniyo waja pampandu waufumu+ kweniso ku Mwanawambereri.”+

11 Angelu wosi anguma mwakuzunguliya mpandu waufumu, ŵara+ kweniso vamoyu vinayi, ndipu yiwu angujikama ndi kusindama mpaka visku vawu pasi panthazi pa mpandu waufumu ndi kusopa Chiuta. 12 Yiwu akambanga kuti: “Ame! Chiuta widu wazeru, wakwenere kuwongeka, wanthazi ndipuso yo wachita vinthu vikulu, wathamikiki, wakankhuskiki kweniso wapaskiki ulemu muyaya mpaka muyaya.+ Ame.”

13 Pavuli paki, yumoza mwa ŵara wangundifumba kuti: “Kumbi yaŵa avwala mikhanju yituŵa+ mbayani ndipu akutuliya pani?” 14 Nyengu yeniyo, ndingumukambiya kuti: “Ambuya, yimwi ndimwi muziŵa.” Iyu wangundikambiya kuti: “Yaŵa mbeniwo atuwa mu chisuzgu chikulu,+ ndipu achapa mikhanju yawu ndi kuyitowesa kuŵa yituŵa mundopa za Mwanawambereri.+ 15 Ndichu chifukwa chaki ŵe panthazi pa mpandu waufumu waku Chiuta, ndipu atimuchitiya uteŵeti wakupaturika msana ndi usiku munyumba yaki yakusopiyamu. Ndipu Mweniyo waja pampandu waufumu+ wazamutandawuliya chihema chaki paku yiwu.+ 16 Yiwu azamukuvwa so nja cha pamwenga nyota, ndipu lumwi lazakuŵawotcha cha kweniso azamukufya cha ndi chifundizi,+ 17 chifukwa Mwanawambereri+ yo we pakati pa mpandu waufumu, wazakuŵaliska+ ndi kuŵalongozge ku akasupi a maji nga umoyu.+ Ndipu Chiuta wazamuleska masozi ngosi mumasu mwawu.”+

8 Wati+ walamatuwa chidindu cha 7,+ kuchanya kunguyiyima kwa pafufupi hafu ya ora. 2 Pavuli paki, ndinguwona angelu 7+ ama pa masu paku Chiuta, ndipu angupaskika mbata* 7.

3 Mungelu munyaki yo wangukoleze chiyaŵi chagolidi chakuwotchiyamu vakununkhira, wanguza ndi kuma pafupi ndi guŵa la sembi,+ ndipu wangupaskika vakununkhira vinandi+ kuti waviwotchi paguŵa la sembi lagolidi+ lo lenga panthazi pa mpandu waufumu, uku akupaturika wosi apemphera. 4 Josi la vakununkhira lakutuliya mujanja la mungelu kweniso mapempheru nga akupaturika,+ vingukwera pa masu paku Chiuta. 5 Kweni nyengu yeniyo, mungelu wanguto chiyaŵi chakuwotchiyamu vakununkhira ndi kuzazamu unyaki mwa motu wa paguŵa la sembi, ndipu wanguchiponya pacharu chapasi. Ndipu kungugululusa, kunguvwika mazu, kungung’anima malimphezi+ kweniso kunguchita chidilirisi. 6 Ndipu angelu 7 wo ŵenga ndi mbata 7,+ angunozgeka kumba mbata zo.

7 Mungelu wakwamba wangumba mbata yaki. Kwenga matalala ndi motu vakusazgana ndi ndopa ndipu vinguponyeka pacharu chapasi.+ Chimoza mwa vigaŵa vitatu va charu chapasi chinguwotcheka, chimoza mwa vigaŵa vitatu va vimiti chinguwotcheka, ndipuso vakume vosi vakubiriŵira vinguwotcheka.+

8 Mungelu wachiŵi wangumba mbata yaki. Ndipu chinthu chinyaki chikulu cha nge phiri likulu lakukole motu, chinguponyeka munyanja.+ Chimoza mwa vigaŵa vitatu va nyanja chingusambuka ndopa;+ 9 ndipu chimoza mwa vigaŵa vitatu va vinthu vamoyu va munyanja chingufwa,+ ndipuso chimoza mwa vigaŵa vitatu va sitima chingusweka.

10 Mungelu wachitatu wangumba mbata yaki. Ndipu nyenyezi yikulu yakukole nge nyali, yingumbotoka kutuliya kuchanya, yinguwa pa chimoza mwa vigaŵa vitatu va misinji ndipuso pa akasupi a maji.+ 11 Nyenyezi yo, yidanika kuti Kamiti Kakuŵaŵa. Chimoza mwa vigaŵa vitatu va maji chinguŵaŵa, ndipu ŵanthu anandi angufwa chifukwa cha maji ngo, pakuti ngangusambuka ngakuŵaŵa.+

12 Mungelu wachinayi wangumba mbata yaki. Chimoza mwa vigaŵa vitatu va lumwi, chimoza mwa vigaŵa vitatu va mwezi ndipuso chimoza mwa vigaŵa vitatu va nyenyezi, vingupumika,+ kuti chimoza mwa vigaŵa vawu vitatu chichiti mdima+ ndipuso kuti chimoza mwa vigaŵa vitatu va msana chileki kulonde ukweru, usiku nawu so viyo.

13 Ndipu ndinguwona ndi kuvwa nombu yo yaphululukanga mude yichikamba mwakudaniriza kuti: “Soka, soka, soka+ kwaku wo aja pacharu chapasi chifukwa cha mazu nga mbata zakujaku za angelu atatu wo ŵe pafupi kumba mbata zawu!”+

9 Mungelu wachinkhondi wangumba mbata yaki.+ Ndinguwona nyenyezi yo yingumbotoke pacharu chapasi kutuwa kuchanya, ndipu yingupaskika* ki wa pakhomu la chizenji.+ 2 Nyenyezi yo, yingujula* khomu la chizenji ndipu josi lingukwera kutuwa pakhomu lo, nge josi la mung’anju yikulu. Lumwi ndi mphepu vinguchita mdima+ chifukwa cha josi lo latuwanga pakhomu la chizenji cho. 3 Mujosi lo mungutuwa azombi, wo angusere mucharu+ ndipu angupaskika mazaza ngakuyanana ndi mazaza nga vipiriri va pacharu chapasi. 4 Azombi wo, angukambirika kuti angananganga cha vakume va pacharu chapasi, pamwenga vakume vakubiriŵira pamwenga vimiti, kweni anangi ŵanthu ŵija wo alivi chidindu chaku Chiuta pavisku vawu.+

5 Ndipu azombi wo, anguzomerezeka cha kubaya ŵanthu wo, kweni anguzomerezeka kuti aŵatombozgi kwa myezi yinkhondi, ndipu anguŵatombozga nge mo chipiriri chitombozge+ asani chaluma munthu. 6 Mu mazuŵa ngeningo, ŵanthu azamupenja nyifwa kweni azakuyisaniya cha, azamukhumbisiska kuti afwi, kweni nyifwa yazakuŵathaŵa.

7 Azombi wo, awonekanga nge mahachi ngo nganozgeke nkhondu;+ pamitu yawu penga tinthu takuwoneka nge tivisoti taufumu tagolidi, ndipu visku vawu vawonekanga nge visku va ŵanthu, 8 ŵenga ndi sisi nge la anthukazi. Minyu ngawu ngenga nge nga nkharamu,+ 9 ndipu ŵenga ndi vapachifuŵa nge vapachifuŵa vachisulu. Chiwawa cha mapapa ngawu chenga nge chiwawa cha magaleta ngo ngatchimbiriya ku nkhondu, ngo ngaguzika ndi mahachi.+ 10 Ŵe so ndi michiya yo ye ndi maliwozga; ndipu kumichiya yawu ndiku kwe mazaza ngakupweteke ŵanthu kwa myezi yinkhondi.+ 11 Azombi yaŵa ŵe ndi fumu yeniyo ndi mungelu wa chizenji.+ Mu Chiheberi zina laki ndi Abadoni,* kweni mu Chigiriki zina laki ndi Apoliyoni.*

12 Soka lakwamba lajumphapu. Awonani! Masoka nganyaki ngaŵi+ ngatuza pavuli pa vinthu venivi.

13 Mungelu wa 6+ wangumba mbata yaki.+ Ndipu ndinguvwa mazu ngamoza kutuliya mumasengwi nga guŵa la sembi lagolidi,+ lo lenga panthazi paku Chiuta. 14 Mazu ngo, ngakambiyanga mungelu wa 6 mweniyo wenga ndi mbata kuti: “Fwatuwa angelu anayi wo amangika kumsinji ukulu wa Yufureti.”+ 15 Ndipu angelu anayi, wo anozgekereseke ora, zuŵa, mwezi kweniso chaka, angufwatulika kuti abayi chimoza mwa vigaŵa vitatu va ŵanthu.

16 Chiŵerengeru cha asilikali akukwera pamahachi a gulu lankhondu chenga 200 miliyoni; chenichi ndichu chiŵerengeru chawu cho ndinguvwa. 17 Ndipu mahachi ndi akukwerapu ŵaki, vo ndinguwona mu chiwona cho, vawonekanga viyo: Akukwera pamahachi anguvwala vapachifuŵa viyera nge motu, vabuluu nge mwa wa hayasifi kweniso vantcheti nge sulufule. Mitu ya mahachi ngo yawonekanga nge mitu ya nkharamu,+ ndipu mumulomu mwawu mwatuwanga motu, josi ndi sulufule. 18 Ndipu chimoza mwa vigaŵa vitatu va ŵanthu, chingubayika ndi milili yitatu iyi, motu, josi ndi sulufule vo vingutuwa mumulomu mwawu. 19 Pakuti mazaza nga mahachi yanga nge mumulomu mwawu ndipuso ku michiya yawu, chifukwa michiya yawu ye nge njoka ndipu ye ndi mitu. Michiya yeniyi ndiyu ngapweteke ŵanthu.

20 Kweni ŵanthu anyaki wosi wo anguleka kubayika ndi milili yeniyi, angulapa cha ntchitu za manja ngawu; anguleka cha kusopa viŵanda ndi angoza agolidi, asiliva, amkuŵa, amwa kweniso achimiti, wo angawona cha, angavwa cha ndipuso angayenda cha.+ 21 Ndipu angulapa cha ntchitu zawu za kubaya ŵanthu, kuchita vamizimu, ureŵi* kweniso unkhungu.

10 Ndipu ndinguwona mungelu munyaki wanthazi wachisika kutuwa kuchanya. Iyu wanguvwala mtambu* ndipu kumutu kwaki kwenga chiŵingavuwa. Chisku chaki chenga nge lumwi,+ ndipu malundi* ngaki ngenga nge vipilala vamotu. 2 Kujanja laki kwenga kampukutu kamana kakuzunguluwa. Iyu wangukanda phazi lamaryi panyanja, lamazge pamtunda. 3 Ndipu wangudaniriza ukongwa nge nkharamu yo yikoroma.+ Wati wadaniriza, mazu 7 ngakugululusa+ ngangulongoro.

4 Sonu mazu 7 ngakugululusa ngati ngalongoro, ndakhumbanga kulemba, kweni ndinguvwa mazu kuchanya+ ngakuti: “Sunga chisisi cha* vinthu vo mazu 7 ngakugululusa ngalongoro, ndipu ungavilembanga cha.” 5 Mungelu yo ndinguwona kuti wakanda panyanja ndi pamtunda, wangusoske muchanya janja laki lamaryi, 6 ndipu wangulapizgiya paku Mweniyo waliku ndi umoyu muyaya mpaka muyaya,+ yo wakulenga kuchanya ndi vinthu vosi vo ve kweniko, charu chapasi ndi vinthu vosi vo ve mwenimo, kweniso nyanja ndi vinthu vosi vo ve mwenimo.+ Iyu wangulapizga kuti: “Paŵengi so kuswera cha. 7 Kweni mu mazuŵa ngo mungelu wa 7+ wazamuja kamanavi kumba mbata yaki,+ chisisi chakupaturika+ cho Chiuta wakuchipharazga nge uthenga wamampha kwa akapolu ŵaki achimi,+ chazamufiskika nadi.”

8 Ndipu ndinguvwa mazu ngakutuliya kuchanya+ ngachilongoro so nani kuti: “Luta ukato mpukutu wakuzunguluwa wo we kujanja la mungelu yo wakanda panyanja ndi pamtunda.”+ 9 Ndinguluta ku mungelu yo, ndipu ndingumukambiya kuti wandipaski kampukutu kamana. Iyu wangundikambiya kuti: “To, uryi,+ ndipu kakuŵaŵengi mumoyu, kweni mumulomu mwaku kanong’omiyengi nge uchi.” 10 Ndinguto kampukutu ko kujanja la mungelu ndi kukarya,+ ndipu mumulomu mwangu kanong’omiyanga nge uchi,+ kweni ndati ndakarya, mumoyu mwangu munguŵaŵa. 11 Ndipu angundikambiya kuti: “Utenere kukamba so uchimi wakukwaskana ndi ŵanthu akupambanapambana, mitundu, malilimi* ndipuso mafumu nganandi.”

11 Sonu ndingupaskika deti la nge nthonga*+ ndipu wangundikambiya kuti: “Soka ndipu pima malu ngakupaturika nga nyumba yakusopiyamu yaku Chiuta, guŵa la sembi ndipuso ŵanthu wo asopa munyumba yo. 2 Kweni balaza lo le kubwalu kwa malu ngakupaturika nga nyumba yakusopiyamu, ulileki, ungalipimanga cha, chifukwa laperekeka ku ŵanthu amitundu yinyaki, ndipu azamukandakanda tawuni yakupaturika+ kwa myezi 42.+ 3 Ndazamuchitiska kuti akaboni ŵangu ŵaŵi akambi uchimi kwa mazuŵa 1,260 avwala vigudulu.” 4 Vimiti viŵi va maolivi+ kweniso vakuŵikapu nyali viŵi,+ vimiya akaboni ŵenaŵa ndipu yiwu ama panthazi pa Mbuya wa charu chapasi.+

5 Asani munthu wakhumba kuŵapweteka, mumulomu mwawu mutuwa motu ndipu utotcha arwani ŵawu. Munthu weyosi yo wakhumba kuŵapweteka watenere kubayika viyo. 6 Yiwu ŵe ndi mazaza ngakujala kuchanya*+ kuti vuwa yileki kuwa+ mu mazuŵa ngo akambiya uchimi, ndipuso ŵe ndi mazaza ngakusambusa maji kuja ndopa,+ kweniso kupweteka charu ndi mulili wamtundu wewosi kananandi ŵaka nge mo yiwu akhumbiya.

7 Asani azimaliza kupereka ukaboni wawu, chinyama chakofya cho chatuwa muchizenji, chazamuchita nawu nkhondu, chazakuŵathereska ndi kuŵabaya.+ 8 Ndipu mathupi ngawu ngazamuja mumsewu ukulu wa mutawuni yikulu, yo mwakuyeruzgiya yidanika kuti Sodomu ndi Ijipiti, ko Ambuyawu nawu angubayikiya pachimiti. 9 Ndipu wo atuliya mu ŵanthu akupambanapambana, mu mafuku, mu malilimi* ndipuso mu mitundu, azamulereska mathupi ngawu kwa mazuŵa ngatatu ndi hafu,+ ndipu azamuzomereza cha kuti mathupi ngawu ngaŵikiki mumuwunda. 10 Wo aja pacharu chapasi azamusekere chifukwa cha nyifwa yawu ndipu azamukondwa ukongwa kweniso azamutumiziyana mphasu, pakuti achimi ŵaŵi ŵenaŵa, atombozganga ŵanthu wo aja pacharu chapasi.

11 Mazuŵa ngatatu ndi hafu ngati ngamala, mzimu wa umoyu wakutuliya kwaku Chiuta ungusere mwaku yiwu,+ anguma wima ndipu ŵanthu wo anguŵawona angutenthema ukongwa. 12 Anguvwa mazu ngakudaniriza kutuliya kuchanya ngachiŵakambiya kuti: “Zani kunu.” Yiwu angukwere kuchanya mumitambu, ndipu arwani ŵawu anguŵawona.* 13 Mu ora lenilo, kunguchitika chidilirisi chikulu ndipu chimoza mwa vigaŵa 10 va tawuni, chinguwa. Ŵanthu 7,000 angubayika ndi chidilirisi. Kweni anyaki wosi, anguchita mantha ndipu angupereka unkhankhu kwaku Chiuta wakuchanya.

14 Soka lachiŵi+ lajumphapu. Awonani! Soka lachitatu lituza mwaliŵi.

15 Mungelu wa 7 wangumba mbata yaki.+ Kuchanya kunguvwika mazu ngakudaniriza kuti: “Ufumu wa charu chapasi waŵa Ufumu wa Ambuyafwi+ ndipuso waku Khristu wawu,+ ndipu yiwu azamulamuliya nge fumu muyaya mpaka muyaya.”+

16 Sonu ŵara 24+ wo anguja mumipandu yawu yaufumu panthazi paku Chiuta, angujikama ndi kusindama mpaka visku vawu pasi, ndipu angusopa Chiuta. 17 Yiwu akambanga kuti: “Titikuwongani Yehova* Chiuta Wanthazizosi, yo waliku,+ ndipuso yo wengaku, chifukwa mwato nthazi zinu zikulu ndipu mwayamba kulamuliya nge fumu.+ 18 Kweni mitundu yingukwiya, ndipu ukali winu unguza, ndipuso nyengu yakuŵikika yingukwana yakuti akufwa ayeruzgiki, kweniso nyengu yakupereke mphotu+ kwa akapolu ŵinu achimi,+ kwa akupaturika, kwaku wo atopa zina linu, amana ndi ŵara, kweniso nyengu yakunangiya wo ananga charu chapasi.”+

19 Ndipu kuchanya, malu ngakupaturika nga nyumba yakusopiyamu yaku Chiuta ngangujulika, bokosi la phanganu laki linguwoneka mumalu ngaki ngakupaturika nga nyumba yakusopiyamu.+ Ndipu kungung’anima malimphezi, kunguvwika mazu, kungugululusa, kunguchitika chidilirisi ndipuso kwenga matalala ngakulu.

12 Pavuli paki, kuchanya kunguwoneka chisimikizu chikulu: Munthukazi+ wanguvwala lumwi, kusi kwa maphazi ngaki kwenga mwezi, kweniso kumutu kwaki kwenga chisoti chaufumu cho chenga ndi nyenyezi 12. 2 Munthukazi yo wenga ndi nthumbu. Ndipu waliyanga chifukwa chakuti wavwanga urwirwi kweniso kuŵaŵa kwa pa nyengu ya kubala.

3 Kuchanya kunguwoneka so chisimikizu chinyaki. Awonani! Kunguwoneka chinjoka chikulu chiyera ukongwa nge motu,+ cha mitu 7, masengwi 10 ndipu kumitu yaki kwenga visoti vaufumu 7. 4 Muchiya waki waguzanga chimoza mwa vigaŵa vitatu va nyenyezi+ zakuchanya. Chinguponya nyenyezi zo pacharu chapasi.+ Chinjoka cho chingulutirizga kuma panthazi pa munthukazi+ yo wenga pafupi kubala, kuti asani wabala, chimezi mwana waki.

5 Munthukazi yo, wangubala mwana munthulumi, mnyamata,+ yo wazamulongozga mitundu yosi ya ŵanthu ndi nthonga yachisulu.+ Ndipu mwana waki wangukwamphulikiya kwaku Chiuta kweniso kumpandu waki waufumu. 6 Munthukazi yo, wanguthaŵiya kuchipululu ko we ndi malu ngo Chiuta wakumunozge ndipuso ko akumuryisiyanga kwa mazuŵa 1,260.+

7 Ndipu kuchanya kungubuka nkhondu: Mikayeli*+ limoza ndi angelu ŵaki anguchita nkhondu ndi chinjoka, ndipu chinjoka limoza ndi angelu ŵaki anguchita nkhondu 8 kweni angupunda cha,* ndipu malu ngawu ngangusanirika so cha kuchanya. 9 Mwaviyo, chinjoka chikulu+ chinguponyeka pasi, njoka yakali ukongwa+ yo yidanika kuti Dyaboli+ kweniso Satana,+ mweniyo walandizga charu chosi chapasi;+ wanguponyeka pacharu chapasi+ ndipu angelu ŵaki nawu anguponyeke nayu limoza. 10 Ndinguvwa mazu ngakudaniriza kutuliya kuchanya. Mazu ngo ngenga ngakuti:

“Sonu utaski,+ nthazi, Ufumu waku Chiuta widu+ ndi mazaza ngaku Khristu waki vafika, chifukwa waponyeka pasi wakumba mulandu abali ŵidu, yo watiŵamba milandu yaboza pa masu paku Chiuta widu msana ndi usiku!+ 11 Yiwu angumuthereska+ chifukwa cha ndopa za Mwanawambereri+ ndipuso chifukwa cha mazu nga ukaboni wawu,+ kweniso ŵenga akunozgeka kupereka umoyu+ wawu, mpaka kufwa. 12 Pa chifukwa chenichi, kondwani yimwi machanya ndipuso yimwi muja mwenimo! Soka charu chapasi ndi nyanja,+ chifukwa Dyaboli wasikiya kwaku yimwi. Iyu we ndi ukali ukulu, pakuti waziŵa kuti waja ndi kanyengu kamanavi.”+

13 Sonu chinjoka chati chawona kuti chaponyeka pacharu chapasi,+ chingutombozga munthukazi+ yo wangubala mwana munthulumi. 14 Kweni munthukazi uyu wangupaskika mapapa ngaŵi nga nombu yikulu,+ kuti waphululukiyi kuchipululu kumalu ngaki, kweniko waryisikengi kwa nyengu, zinyengu ndi hafu ya nyengu,*+ kutali ndi chinjoka.+

15 Ndipu chinjoka cho chingufunya maji nge msinji kutuliya mumulomu mwaki, chingufunya maji ngo muvuli mwa munthukazi yo kuti chimubizgi ndi msinji. 16 Kweni charu chinguwovya munthukazi yo, chingujula mulomu waki ndi kumeza msinji wo chinjoka chingufunya kutuliya mumulomu mwaki. 17 Sonu chinjoka chingumukwiyiya munthukazi yo ndipu chinguluta kuchichita nkhondu ndi akujaku a mphapu* yaki,+ wo asunga marangu ngaku Chiuta ndipuso wo agwira ntchitu yakupereka ukaboni wakukwaskana ndi Yesu.+

13 Sonu chinjoka cho, chinguma pamchenga mumphepeti mwa nyanja.

Ndipu ndinguwona chinyama chakofya+ chichituwa munyanja.+ Chenga ndi masengwi 10 kweniso mitu 7, ndipu pamasengwi ngaki penga visoti vaufumu 10, kweni pamitu yaki penga mazina ngakunyoza Chiuta. 2 Sonu chinyama chakofya cho ndinguwona chenga nge nyalubwi, maphazi ngaki ngenga nge nga nyama ya biyere,* ndipu mulomu waki wenga nge wa nkharamu. Chinjoka+ chingupereka nthazi zaki, mpandu waki waufumu ndipuso mazaza ngakulu ku chinyama chakofya cho.+

3 Ndinguwona kuti mutu waki umoza wawonekanga nge kuti wapwetekeka ukongwa, kweni chilonda chaki cho chatingi chifwengi nachu chingupo,+ ndipu ŵanthu wosi pacharu chapasi angulondo chinyama chakofya chifukwa chakuti angumalika nachu. 4 Yiwu angusopa chinjoka chifukwa chakuti chingupereka nthazi ku chinyama chakofya, ndipuso angusopa chinyama chakofya cho, mwakukamba kuti: “Ndiyani yo wangayanana ndi chinyama chakofya, kweniso ndiyani yo wangachita nachu nkhondu?” 5 Chingupaskika mulomu wakulongoro vinthu vikuluvikulu kweniso vakunyoza, ndipu chingupaskika mazaza ngakuchitiya vinthu kwa myezi 42.+ 6 Chingujula mulomu waki ndi mazu ngakunyoza+ Chiuta kuti chinyozi zina laki, malu ngaki ngakujapu, chinanga ndi wo aja kuchanya.+ 7 Ndipu chinguzomerezeka kuti chichiti nkhondu ndi akupaturika ndipuso kuti chiŵathereski.+ Chingupaskika so mazaza pa mafuku ngosi, ŵanthu wosi, malilimi ngosi* kweniso mitundu yosi. 8 Ndipu wosi wo aja pacharu chapasi azakuchisopa. Kutuliya po charu chikujalikiskikiya, mazina nga ŵanthu ŵenaŵa ngakulembeka cha mumpukutu wa umoyu+ wa Mwanawambereri yo wangubayika.+

9 Munthu weyosi yo we ndi gutu, wavwi.+ 10 Munthu weyosi yo ngwakwenere kutoleke ku ukapolu, wazamutoleke ku ukapolu. Munthu weyosi yo wazamubaya ndi lipanga,* watenere kuzibayika ndi lipanga.+ Yapa ndipu akupaturika+ akhumbika kukunthiyapu+ ndipuso kuŵa ndi chivwanu.+

11 Pavuli paki, ndinguwona chinyama chakofya chinyaki chichituwa mucharu. Chenga ndi masengwi ngaŵi nge nga mwana wa mbereri, kweni chingwamba kulongoro nge chinjoka.+ 12 Chinyama cho, chilamuliya ndi mazaza ngosi nga chinyama chakofya chakwamba,+ pa masu pa chinyama chakofya chakwamba cho. Ndipu chichitiska kuti charu ndipuso wo ajamu asopi chinyama chakofya chakwamba, cho chenga ndi chilonda cho chatingi chifwengi nachu, kweni chingupo.+ 13 Ndipu chichita visimikizu vikulu, mpaka kudana motu kutuwa kuchanya kuwa pacharu chapasi ŵanthu achiwona.

14 Chilandizga ŵanthu wo aja pacharu chapasi chifukwa cha visimikizu vo chikuzomerezeka kuti chichiti pa masu pa chinyama chakofya chakwamba. Chikambiya so ŵanthu wo aja pacharu chapasi kuti apangi chikozgu+ cha chinyama chakofya cho chenga ndi chilonda cha lipanga kweni chikuchira.+ 15 Ndipu chinguzomerezeka kupereka mvuchi* ku chikozgu cha chinyama chakofya, kuti chikozgu cha chinyama chakofya chilongoro ndi kubayisa ŵanthu wosi wo akana kusopa chikozgu cha chinyama chakofya cho.

16 Chichichizga ŵanthu wosi, amana ndi ŵara, akukhupuka ndi akavu, anangwa ndi akapolu, kuti adindiki chidindu pajanja lawu lamaryi pamwenga pavisku vawu,+ 17 ndipuso kuti paŵevi wakugula pamwenga wakugulisa kupatuwaku munthu yo we ndi chidindu, zina+ la chinyama chakofya pamwenga nambala ya zina laki.+ 18 Yapa ndipu pakhumbika zeru: Yo ngwakuwamu waŵerengese nambala ya chinyama chakofya, pakuti ndi nambala ya munthu, ndipu nambala yaki ndi 666.+

14 Ndipu awonani! ndinguwona Mwanawambereri+ wama pa Phiri la Ziyoni,+ ndipu wenga limoza ndi ŵanthu 144,000,+ wo akulembeka zina laki ndi zina la Awisi+ pavisku vawu. 2 Ndinguvwa chiwawa kutuliya kuchanya nge chiwawa cha kupoma kwa maji nganandi ndipuso nge chiwawa cha kugululusa. Chiwawa cho ndinguvwa chenga nge chiwawa cha ŵanthu akumba, wo atumba mwakugwiriskiya ntchitu mabangu* ngawu. 3 Yiwu atumba sumu yo yivwika nge sumu yifya+ panthazi pa mpandu waufumu, panthazi pa vamoyu vinayi+ ndipuso panthazi pa ŵara,+ ndipu palivi yo wangufiska kusambira sumu yeniyi, kupatuwaku ŵanthu 144,000,+ wo akugulika kutuliya pacharu chapasi. 4 Yiwu mbanthu wo akujifipiska cha ndi anthukazi ndipu mbamwali.+ Yiwu mbanthu wo alutirizga kulondo Mwanawambereri kwekosi ko waluta.+ Akugulika+ kutuliya mu ŵanthu, nge vipasu vakwamba+ kwaku Chiuta ndipuso ku Mwanawambereri. 5 Ndipu mumulomu mwawu mukusanirikapu boza cha; yiwu alivi kalema.+

6 Ndipu ndinguwona mungelu munyaki wachiphululuka mude. Iyu wenga ndi uthenga wamampha wamuyaya, wakuti wapharazgi ku ŵanthu wo aja pacharu chapasi, ku mtundu wewosi, fuku lelosi, lilimi lelosi* ndipuso ku ŵanthu wosi.+ 7 Iyu wakambanga mwakudaniriza kuti: “Wopani Chiuta ndi kumupaska unkhankhu, chifukwa ora lakuti wapereki cheruzgu lafika.+ Mwaviyo, sopani Yo wakupanga kuchanya, charu chapasi, nyanja+ ndipuso akasupi a maji.”

8 Mungelu munyaki wachiŵi wangumulondo ndi kukamba kuti: “Wawa! Babiloni Mukulu+ wawa,+ munthukazi yo wangumwisa mitundu yosi ya ŵanthu vinyu wa khumbiru la* ureŵi waki!”*+

9 Mungelu munyaki wachitatu wanguŵalondo wachikamba mwakudaniriza kuti: “Munthu weyosi yo wasopa chinyama chakofya+ ndi chikozgu chaki, ndipu wadindika chidindu pachisku chaki pamwenga pajanja laki,+ 10 wazamukumwa vinyu wambula kusongono wa ukali waku Chiuta yo wapungulikiya mukapu ya ukali Waki,+ ndipu wazamutombozgeka ndi motu kweniso sulufule+ pa masu pa angelu akupaturika ndipuso pa masu pa Mwanawambereri. 11 Ndipu josi la kutombozgeka kwawu likwera muyaya mpaka muyaya.+ Wosi wo asopa chinyama chakofya, chikozgu chaki, kweniso wo adindika chidindu cha zina laki,+ apumuwa cha msana ndi usiku. 12 Yapa ndipu akupaturika,+ wo asunga marangu ngaku Chiuta ndi kukolesa chivwanu chawu+ mwaku Yesu, akhumbika kukunthiyapu.”

13 Ndipu ndinguvwa mazu ngakutuliya kuchanya ngakuti, “Lemba kuti: Mbakukondwa ŵanthu wo atufwa mwakukoliyana ndi Ambuya,+ kwamba sonu mpaka munthazi. Mzimu ukamba kuti, yiwu apumuwi ku ntchitu zawu, pakuti vinthu vo akuchita, vilutiya nawu limoza.”

14 Ndipu awonani! ndinguwona mtambu utuŵa, ndipu munthu munyaki wa nge mwana wa munthu+ wanguja pamtambu wo. Iyu wanguvwala chisoti chaufumu chagolidi kumutu kwaki ndipuso wenga ndi chisenga chawuyi kujanja laki.

15 Mungelu munyaki wangutuwa mumalu ngakupaturika nga nyumba yakusopiyamu ndipu wadaniriziyanga yo wanguja pamtambu kuti: “To chisenga chaku ndipu yamba kuvuna, chifukwa chakuti ora lakuvuniya lafika, pakuti vakukolola va pacharu chapasi vacha ukongwa.”+ 16 Yo wanguja pamtambu wanguponya chisenga chaki pacharu chapasi, ndipu charu chapasi chinguvunika.

17 Ndipu mungelu munyaki so wangutuwa mumalu ngakupaturika nga nyumba yakusopiyamu ngo nge kuchanya. Nayu wenga ndi chisenga.

18 Mungelu munyaki so wangutuwa ku guŵa la sembi. Iyu wenga ndi mazaza pa motu. Ndipu wangudaniriziya yo wenga ndi chisenga chawuyi kuti: “To chisenga chaku chawuyi ndipu uwunjiki makhoroza nga mphereska za pacharu chapasi, pakuti mphereska zaki zafya.”+ 19 Mungelu yo, wanguponya chisenga chaki pacharu chapasi ndi kuwunjika mphereska za pacharu chapasi, ndipu wanguziponya pamalu ngakulu ngakukandiyapu mphereska nga ukali waku Chiuta.+ 20 Mphereska zo zingukandikakandika pamalu ngakukandiyapu mphereska ngo ngenga kubwalu kwa tawuni, ndipu pamalu ngo pangutuwa ndopa zinandi zo zingukwera mpaka kufika kumulomu kwa mahachi, ndipu zingwenda mtunda wa makilomita pafufupi 296.*

15 Ndipu ndinguwona chisimikizu chinyaki kuchanya, chenga chikulu ndipuso chakuziziswa. Chisimikizu cho, chenga angelu 7+ wo ŵenga ndi milili 7. Yeniyi ndi milili yakumaliya, chifukwa ukali waku Chiuta umalengi mwakugwiriskiya ntchitu milili yeniyi.+

2 Ndinguwona chinthu chinyaki cha nge nyanja yagilasi+ yakusazgana ndi motu, ndipu wo anguthereska+ chinyama chakofya, chikozgu chaki+ ndipuso nambala ya zina laki,+ anguma pafupi ndi nyanja ya gilasi akoleze mabangu ngaku Chiuta. 3 Yiwu ambanga sumu yaku Mozesi,+ kapolu waku Chiuta ndipuso sumu ya Mwanawambereri,+ kuti:

“Ntchitu zinu zikulu ndipuso zakuziziswa,+ Yehova* Chiuta, Wanthazizosi.+ Nthowa zinu zaurunji ndipuso zauneneska,+ Fumu yamuyaya.+ 4 Ndiyani yo walekengi kopa yimwi Yehova* ndipuso yo walekengi kukankhuska zina linu? Chifukwa ndimwi pe wakugomezgeka.+ Pakuti mitundu yosi ya ŵanthu yizengi kuzisopa pa masu pinu,+ chifukwa chakuti marangu nginu ngaurunji, ngavumbulika.”

5 Pavuli paki, ndinguwona kuti malu ngakupaturika nga chihema cha ukaboni,+ ngajulika kuchanya,+ 6 ndipu angelu 7 wo ŵenga ndi milili 7,+ angutuwa mumalu ngakupaturika, yiwu anguvwala vakuvwala vakutowa kweniso vakuŵala, ndipuso anguvwala mabandi ngagolidi kuzunguliya nganga zawu. 7 Chimoza mwa vamoyu vinayi, chingupereka mbali zabakuli 7 zagolidi kwa angelu 7, zakuzaza ndi ukali waku Chiuta,+ mweniyo ngwamoyu muyaya mpaka muyaya. 8 Ndipu malu ngakupaturika nganguzaza josi chifukwa cha unkhankhu waku Chiuta+ ndipuso chifukwa cha nthazi zaki, ndipu pengavi yo wangufiska kusere mumalu ngakupaturika mpaka po milili 7+ ya angelu 7, yingumaliya.

16 Sonu ndinguvwa mazu ngakudaniriza kutuliya mumalu ngakupaturika+ ngachikambiya angelu 7 kuti: “Lutani ndipu mukapunguliyi pacharu chapasi mbali zabakuli 7 za ukali waku Chiuta.”+

2 Mungelu wakwamba wanguluta kuchipunguliya mbali yaki pacharu chapasi.+ Ndipu vilonda vakuŵaŵa kweniso vakunyeka+ vingupweteka ŵanthu wo ŵenga ndi chidindu cha chinyama chakofya+ ndipuso wo asopanga chikozgu chaki.+

3 Mungelu wachiŵi wangupunguliya mbali yaki munyanja.+ Maji ngakusambuka ndopa+ nge za munthu wakufwa, ndipu chamoyu chechosi chingufwa, hinya, vinthu vosi munyanja vingufwa.+

4 Mungelu wachitatu wangupunguliya mbali yaki mumisinji kweniso mu akasupi a maji.+ Ndipu vosi vingusambuka ndopa.+ 5 Ndinguvwa mungelu yo wenga pachanya pa maji wachikamba kuti: “Yimwi, Yo waliku ndipuso yo wengaku,+ wakugomezgeka,+ ndimwi murunji, pakuti mwapereka vyeruzgu venivi,+ 6 chifukwa chakuti yiwu angudira ndopa za akupaturika kweniso za achimi,+ ndipu mwaŵapaska ndopa kuti amwi;+ mbakwenere nadi kumwa ndopa zo.”+ 7 Ndinguvwa guŵa la sembi* lichikamba kuti: “Yehova* Chiuta, Wanthazizosi,+ vyeruzgu vinu vauneneska ndipuso vaurunji.”+

8 Mungelu wachinayi wangupunguliya mbali yaki palumwi,+ ndipu lumwi linguzomerezeka kuti liwotchi ŵanthu ndi motu. 9 Ndipu ŵanthu angufya ndi chifundizi chikulu, kweni angunyoza zina laku Chiuta yo we ndi mazaza pa milili yosi yeniyi, ndipu angulapa cha kweniso angumukankhuska cha.

10 Mungelu wachinkhondi wangupunguliya mbali yaki pampandu waufumu wa chinyama chakofya. Ufumu waki unguchita mdima,+ ndipu ŵanthu angwamba kujilumaluma malilimi chifukwa cha urwirwi wo avwanga, 11 kweni yiwu angunyoza Chiuta wakuchanya chifukwa cha maurwirwi ngawu kweniso vilonda vawu, ndipu angulapa cha ntchitu zawu.

12 Mungelu wa 6 wangupunguliya mbali yaki pamsinji ukulu wa Yufureti,+ ndipu maji ngaki nganguphwa+ kuti paŵi nthowa yakujumphapu mafumu+ ngakutuliya ko kutuliya lumwi.*

13 Ndipu ndinguwona mazu ngakukambirika ngatatu ngaukazuzi,* ngo ngawonekanga nge amuchuwa, ngachituliya mumulomu mwa chinjoka,+ mumulomu mwa chinyama chakofya kweniso mumulomu mwa mchimi waboza. 14 Ngenanga ndi mazu ngakukambirika ndi viŵanda ndipu ngachita vakuziziswa,+ ndipuso ngaluta ku mafumu nga pacharu chosi chapasi, kuti ngaŵawunganisiyi ku nkhondu+ ya zuŵa likulu laku Chiuta Wanthazizosi.+

15 “Awonani! Ndituza nge munkhungu.+ Ngwakukondwa yo walutirizga kuja masu+ ndipuso yo walutirizga kuvwala vakuvwala vaki vakubwalu, kuti waleki kwenda nkhuli kweniso kuti ŵanthu aleki kuwona vinthu vaki vakuchitiska soni.”+

16 Ndipu mazu ngakukambirika ngo, nganguŵawunganisiya kumalu ngo mu Chiheberi ngadanika kuti Aramagedoni.*+

17 Mungelu wa 7 wangupunguliya mbali yaki mumphepu. Venivi vati vachitika, kunguvwika mazu ngakudaniriza kutuliya mumalu ngakupaturika,+ kumpandu waufumu, ngakuti: “Vachitika!” 18 Ndipu kungung’anima malimphezi, kunguvwika mazu ndipuso kungugululusa, kweniso kunguchitika chidilirisi chikulu ukongwa chakuti chechendachitikepu kutuliya po ŵanthu akujaliyapu pacharu chapasi.+ Chidilirisi cho, chenga chanthazi ndipuso chikulu ukongwa. 19 Tawuni yikulu+ yingugaŵikana patatu, ndipu matawuni nga vyaru vosi nganguwa. Ndipu Babiloni Mukulu+ wangukumbukika pa masu paku Chiuta, kuti wapaskiki kapu ya vinyu wa ukali waki ukulu.+ 20 Ndipuso chirwa* chechosi chinguthaŵa, ndipu mapiri ngangusanirika cha.+ 21 Mya yikuluyikulu ya matalala yinguwiya ŵanthu kutuwa kuchanya.+ Mwa wewosi wenga uzitu pafufupi makilogilamu 20.* Ndipu ŵanthu angunyoza Chiuta chifukwa cha mulili wa matalala,+ pakuti mulili wo wenga ukulu ukongwa.

17 Yumoza mwa angelu 7 wo ŵenga ndi mbali zabakuli 7,+ wanguza ndipu wangundikambiya kuti: “Iza kunu, ndikulongo cheruzgu cha huli likulu, lo laja pamaji nganandi,+ 2 lo mafumu nga charu chapasi nganguchita nalu ureŵi.*+ Ndipu ŵanthu wo aja pacharu chapasi, anguloŵe ndi vinyu wa ureŵi* waki.”+

3 Mu nthazi ya mzimu, mungelu yo wangunditole kuchipululu. Ndipu ndinguwona munthukazi yo wanguja pachinyama chakofya chiyera ukongwa, cho chinguzaza ndi mazina ngakunyoza Chiuta. Chinyama cho, chenga ndi mitu 7 kweniso masengwi 10. 4 Munthukazi yo, wanguvwala vakuvwala vamtundu wapepo+ kweniso viyera ukongwa, ndipu wangudyoŵeka ndi golidi, mya yakuzirwa ndipuso ngali.*+ Iyu wenga ndi kapu yagolidi kujanja laki, yakuzaza ndi vinthu vakuseruska kweniso ukazuzi wa ureŵi* waki. 5 Pachisku chaki pangulembeka zina lachisisi lakuti: “Babiloni Mukulu, nyinawu wa mahuli+ kweniso wa vinthu vakuseruska va pacharu chapasi.”+ 6 Ndipu ndinguwona kuti munthukazi mwenuyu wanguloŵe ndi ndopa za akupaturika kweniso ndi ndopa za akaboni aku Yesu.+

Ndati ndamuwona, ndinguzizwa ukongwa. 7 Sonu mungelu wangundikambiya kuti: “Ntchifukwa wuli unguzizwa? Ndikukambiyengi chisisi cha munthukazi yo+ ndipuso cha chinyama chakofya cho chamupinga, cho che ndi mitu 7 kweniso masengwi 10:+ 8 Chinyama chakofya cho unguwona, chengaku, kweni palivi ndipuso chaja kamanavi kutuwa muchizenji,+ ndipu chiluta ku pharanyiku. Ŵanthu wo aja pacharu chapasi, ŵeniwo mazina ngawu ngakulembeka cha mumpukutu wa umoyu+ kutuliya po charu chikujalikiskikiya, azamuzizwa asani aziwona chinyama chakofya cho chengaku, kweni palivi ndipu chiŵengeku.

9 “Yapa pakhumbika kuwamu ndipuso zeru: Mitu 7+ yimiya mapiri 7 ngo munthukazi waja pachanya paki. 10 Ndipu pe mafumu 7: Ngankhondi ngawa, umoza ulipu, unyaki wechendazi; kweni asani waza, utenere kujapu kwa kanyengu kamanavi. 11 Ndipu chinyama chakofya cho chengapu kweni palivi,+ ndichu so fumu ya 8. Kweni yituliya mu mafumu 7 ndipu yilutengi ku pharanyiku.

12 “Masengwi 10 ngo unguwona ngamiya mafumu 10 ngo ngechendalonde ufumu, kweni yingu ngazamulonde mazaza kuti ngazilamuliyi nge mafumu limoza ndi chinyama chakofya kwa ora limoza. 13 Masengwi ngenanga nge ndi maŵanaŵanu ngamoza ndipu ngazamupereka nthazi zaki kweniso mazaza ngaki ku chinyama chakofya. 14 Masengwi ngenanga ngazamuchita nkhondu ndi Mwanawambereri,+ kweni chifukwa chakuti Mwanawambereri ndi Mbuya wa ambuya ndipuso Fumu ya mafumu,+ wazakungathereska.+ Ndipu wo we nawu limoza, wo akudanika ndi kusankhika kweniso wo mbakugomezgeka, nawu azamuthereske nayu limoza.”+

15 Iyu wangundikambiya kuti: “Maji ngo unguwona, ngeningo huli lajapu, ngamiya ŵanthu akupambanapambana, magulu nga ŵanthu, mitundu ndipuso malilimi.*+ 16 Ndipu masengwi 10+ ngo unguwona ndipuso chinyama chakofya,+ vazamutinkha huli lo,+ ndipu vazakulisakaza ndi kulileka le nkhuli. Vazamukurya mnofu waki ndi kuliwotche limu ndi motu.+ 17 Pakuti Chiuta waŵika venivi mumitima yawu kuti ngachiti vo iyu waŵanaŵana,+ kuti ngafiski maŵanaŵanu ngawu ngamoza mwakupereka ufumu wawu ku chinyama chakofya,+ mpaka po mazu ngaku Chiuta ngafiskikiya. 18 Ndipu munthukazi yo+ unguwona wamiya tawuni yikulu yo yilamuliya mafumu nga charu chapasi.”

18 Pavuli paki, ndinguwona mungelu munyaki wachisika kutuliya kuchanya. Iyu wenga ndi mazaza ngakulu, ndipu charu chapasi chinguŵala chifukwa cha unkhankhu waki. 2 Iyu wangudaniriza mwanthazi kuti: “Wawa! Babiloni Mukulu wawa,+ ndipu wasambuka malu ngakujamu viŵanda kweniso malu ngakubisamamu mizimu yosi yaunyakazi* ndi viyuni vosi vaunyakazi ndipuso vakutinkhika!+ 3 Pakuti mitundu yosi ya ŵanthu yaloŵe chifukwa cha vinyu wa khumbiru la* ureŵi waki,+ ndipu mafumu nga pacharu chapasi ngachita nayu ureŵi*+ ndipu amalonda* a pacharu chapasi akhupuka kutuliya mu nthazi ya chuma chaki cho wakusaniya mwambula soni.”

4 Ndipu ndinguvwa mazu nganyaki kutuliya kuchanya ngakuti: “Tuwaniku kwaku iyu, mwaŵanthu ŵangu,+ asani mukhumba cha kusangana nayu maubudi ngaki, ndipuso asani mukhumba cha kulondiyaku yinyaki mwa milili yaki.+ 5 Pakuti maubudi ngaki ngawunjikana mpaka kuchanya,+ ndipu Chiuta wakumbuka ntchitu zaki zambula urunji.*+ 6 Muweziyeni nge mo wanguchitiya ndi anyaki,+ muweziyeni maulendu ngaŵi vinthu vo wachita;+ vo wasazga mukapu,+ nayu mumusazgiyi maulendu ngaŵi.+ 7 Nge mo wajikankhuskiyanga yija kweniso mo wajaliyanga ndi chuma chaki mwambula soni, namwi so mumutombozgi ndi kumulirisa mwakuyanana. Pakuti mumtima mwaki wakamba kuti: ‘Nde fumukazi, nde choko cha, ndipu ndazamuliyapu cha.’+ 8 Ndichu chifukwa chaki mu zuŵa limoza, milili yaki yizengi, ndipu milili yaki ndi iyi: nyifwa, kuliya ndipuso nja. Kweniso wazamuwotcheke limu ndi motu,+ chifukwa chakuti Yehova* Chiuta, yo wamuyeruzga, ngwanthazi.+

9 “Ndipu mafumu nga pacharu chapasi ngo nganguchita nayu ureŵi* ndi kuryiya nayu limoza chuma chaki cho wachisaniyanga mwambula soni, ngazakumuliya ndi kujipuma pachifuŵa ngachiwona josi la kufya kwaki. 10 Yingu ngazamukuma patali chifukwa cha mantha ngachiwona kutombozgeka kwaki ndipu ngazamukamba kuti: ‘Kotu ama, kotu ama, yiwi Babiloni tawuni yikulu+ kweniso yakukho, pakuti cheruzgu chaku chafika mu ora limoza!’

11 “Amalonda a pacharu chapasi nawu atenje ndi kumuliya, pakuti palivi so munthu yo wangagula katundu wawu yosi, 12 katundu wawu yosi wagolidi, wasiliva, mya yakuzirwa, ngali,* vakuvwala vamampha ukongwa, vakuvwala vamtundu wapepo, vakuvwala vasiliki, vakuvwala viyera ukongwa; ndipuso chinthu chechosi chakupangika kutuliya ku vimiti vakununkhira, mtundu wewosi wa chinthu chakupangika kutuliya ku minyanga ya njovu kweniso vinthu vakutuliya ku vimiti vakuzirwa, mkuŵa, chisulu ndipuso mabo; 13 sinamoni, vakununkhirisiya chakurya vakutuliya ku India, vakununkhira, mafuta ngakununkhira, libani, vinyu, mafuta nga maolivi, ufwa wamampha, tirigu, ng’ombi, mbereri, mahachi, ngolu, akapolu ndipuso maumoyu nga ŵanthu. 14 Kukamba uneneska, vipasu vamampha vo waviyanjanga vatuwaku kwaku yiwi, ndipu vakurya vosi vamampha kweniso vinthu vamampha vamala mwaku yiwi, vazamusanirika so cha.

15 “Amalonda wo agulisanga vinthu venivi, wo wanguŵakhupusa, azamukuma patali chifukwa cha mantha achiwona kutombozgeka kwaki ndipu azamutenje ndi kuliya. 16 Yiwu azamukamba kuti: ‘Kotu ama, kotu ama, tawuni yikulu, yakuvwalikika vakuvwala vamampha ukongwa, vakuvwala vamtundu wapepo ndipuso viyera ukongwa, kweniso yakudyoŵeka ndi vakutowese vagolidi, mya yakuzirwa ndi ngali,*+ 17 pakuti chuma chinandi chenichi chanangika mu ora limoza!’

“Ndipu wakuwonere sitima weyosi, wakwenda panyanja weyosi, akugwira ntchitu musitima, ndipuso ŵanthu wo athemba nyanja pa umoyu wawu, anguma patali 18 ndipu adanirizanga achiwona josi la kufya kwaki ndi kukamba kuti: ‘Ndi tawuni niyi yo yiyanana ndi tawuni yikulu?’ 19 Yiwu ajidiliyanga fuvu kumutu kwawu achidaniriza, kutenje ndi kuliya ndipu akambanga kuti: ‘Kotu ama, kotu ama, tawuni yikulu, yeniyo yinguchitiska kuti ŵanthu wosi wo ŵenga ndi sitima panyanja akhupuki chifukwa cha chuma chaki, pakuti yabwangandulika mu ora limoza!’+

20 “Kuchanya ko, kondwani chifukwa chaku iyu.+ Yimwi akupaturika,+ akutumika kweniso achimi namwi kondwani. Pakuti Chiuta wapereka cheruzgu chaki paku iyu chifukwa chaku yimwi!”+

21 Ndipu mungelu wanthazi wangunyamuwa chimwa cha nge chimwa chikulu chakupere, wanguchiponya munyanja ndi kukamba kuti: “Viyo ndimu tawuni yikulu ya Babiloni yazamuponyeke pasi liŵiliŵi, ndipu yazamusanirika so cha.+ 22 Ndipu mazu nga akumba wo atumba mwakugwiriskiya ntchitu bangu,* nga akumba anyaki, nga akumba fyoliru ndipuso nga akumba mbata,* ngazamuvwika so cha mwaku yiwi. Munthu weyosi walusu wazamusanirika so cha mwaku yiwi, kweniso chiwawa cha mwa wakupere chazamuvwika so cha mwaku yiwi. 23 Ukweru wa nyali wazamuŵala so cha mwaku yiwi, ndipu mazu nga munthulumi mweneku wa nthengwa kweniso nga mwali, ngazamuvwika so cha mwaku yiwi; pakuti amalonda ŵaku ŵenga ŵanthu akuzirwa ukongwa mucharu, ndipu ungulandizga mitundu yosi ya ŵanthu ndi vamizimu vo wachitanga.+ 24 Kukamba uneneska, mwaku iyu mungusanirika ndopa za achimi, za akupaturika+ ndipuso za ŵanthu wosi wo akubayika pacharu chapasi.”+

19 Pavuli paki, ndinguvwa mazu ngakulu nge nga chigulu cha ŵanthu kutuliya kuchanya. Yiwu akambanga kuti: “Thamikani Ya!*+ Utaski, unkhankhu ndi nthazi, vaku Chiuta widu, 2 chifukwa vyeruzgu vaki vauneneska kweniso vaurunji.+ Pakuti wapereka cheruzgu pa huli likulu lo likunanga charu chapasi ndi ureŵi* waki, kweniso waweze nduzga chifukwa cha ndopa za akapolu ŵaki zo ze mu manja mwa huli lo.”*+ 3 Ndipu nyengu yeniyo, angukamba kachiŵi kuti: “Thamikani Ya!*+ Josi lakutuliya ku huli lo lilutirizga kukwera muyaya mpaka muyaya.”+

4 Ndipu ŵara 24+ ndi vamoyu vinayi+ anguwa pasi ndi kusopa Chiuta mweniyo waja pampandu waufumu. Yiwu angukamba kuti: “Ame! Thamikani Ya!”*+

5 Kumpandu waufumu kungutuwa so mazu ngakuti: “Lutirizgani kuthamika Chiuta widu, yimwi mosi akapolu ŵaki,+ yimwi mutimuwopa, amana ndi ŵara.”+

6 Ndipu ndinguvwa mazu nge nga chigulu chikulu cha ŵanthu, nge nga kupoma kwa maji nganandi kweniso nge mazu ngakulu ngakugululusa. Yiwu angukamba kuti: “Thamikani Ya!*+ chifukwa Yehova* Chiuta widu Wanthazizosi+ wayamba kulamuliya nge fumu!+ 7 Tiyeni tikondwi ndi kusekere ukongwa ndipuso timukankhuski chifukwa zowala za Mwanawambereri zafika kweniso muwolu waki wanozgeka kali. 8 Ndipu munthukazi yo, wanguzomerezeka kuvwala vakuvwala vakuŵala, vakutowa kweniso vamampha ukongwa, pakuti vakuvwala vamampha vimiya ntchitu zaurunji za akupaturika.”+

9 Ndipu wangundikambiya kuti, “Lemba kuti: Mbakukondwa wo adanika ku chakurya chamazulu cha zowala za Mwanawambereri.”+ Wangundikambiya so kuti: “Yanga ndi mazu ngauneneska ngaku Chiuta.” 10 Wati wakamba venivi, ndinguwa panthazi pa maphazi ngaki kuti ndimusopi. Kweni iyu wangundikambiya kuti: “Phwere! Ungachitanga viyo cha!+ Nani nde kapolu munyaku ŵaka ndipuso nde kapolu munyawu wa abali ŵaku wo ŵe ndi ntchitu yakupereka ukaboni wakukwaskana ndi Yesu.+ Sopa Chiuta!+ Pakuti uchimi ukukambirika chifukwa cha ukaboni wakukwaskana ndi Yesu.”+

11 Kuchanya kungujulika, ndipu awonani! ndinguwona hachi yituŵa.+ Ndipu yo wangukwera pahachi yo, wadanika kuti Wakugomezgeka+ kweniso Muneneska,+ ndipu wayeruzga ndi kuchita nkhondu mwaurunji.+ 12 Masu ngaki nge nge mulipu wa motu,+ ndipu pamutu waki pe visoti vaufumu vinandi. We ndi zina lakulembeka, lo palivi yo watiliziŵa kweni iyu pe. 13 Iyu wavwala chakuvwala chakubwalu cho chanthonyezeka* ndopa, ndipu wadanika zina lakuti Mazu+ ngaku Chiuta. 14 Magulu ngankhondu nga kuchanya nangu ngamulondonga pamahachi ngatuŵa, ndipu nganguvwala vakuvwala vituŵa, vakutowa kweniso vamampha ukongwa. 15 Mumulomu mwaki mutuwa lipanga lakuthwa,+ litali lo wakhumba kubayiya mitundu ya ŵanthu, ndipu wazakuŵakhwema* ndi nthonga yachisulu.+ Iyu wakandakanda pamalu ngakukandiyapu mphereska nga ukali waku Chiuta Wanthazizosi.+ 16 Pachakuvwala chaki chakubwalu, pachiŵa chaki, pakulembeka zina lakuti, Fumu ya mafumu kweniso Mbuya wa ambuya.+

17 Ndinguwona so mungelu wama pa lumwi, ndipu wangudaniriza ukongwa ndi kukambiya viyuni vosi vo viphululuka mude kuti: “Zani kunu, wunganani pamoza ku phwandu likulu la chakurya chamazulu chaku Chiuta,+ 18 kuti muziryi minofu ya mafumu, minofu ya ŵara ŵa asilikali, minofu ya ŵanthu anthazi,+ minofu ya mahachi ndi ya akukwerapu ŵaki,+ minofu ya ŵanthu wosi, ya anangwa ndi ya akapolu ndipuso ya amana ndi ya ŵara.”

19 Ndipu ndinguwona chinyama chakofya, mafumu nga charu chapasi ndi magulu nga asilikali ŵawu, awungana pamoza kuti achiti nkhondu ndi yo wakwera pahachi, limoza ndi gulu la asilikali ŵaki.+ 20 Chinyama chakofya chingukoleka limoza ndi mchimi waboza+ yo wachitanga visimikizu pa masu paki, vo wakulandizga navu wosi wo akulonde chidindu cha chinyama chakofya+ kweniso wosi wo asopa chikozgu chaki.+ Chinyama chakofya ndi mchimi waboza, vinguponyeka munyanja yamotu yakukole ndi sulufule, veche vamoyu.+ 21 Kweni anyaki wosi angubayika ndi lipanga litali lo lingutuwa mumulomu mwaku yo wangukwera pahachi.+ Ndipu viyuni vosi vinguguta minofu yawu.+

20 Ndipu ndinguwona mungelu wachisika kutuliya kuchanya. Iyu wenga ndi ki wa chizenji+ kweniso chisimbi chikulu kujanja laki. 2 Mungelu yo wanguko chinjoka,+ njoka yakali ukongwa,+ yo ndi Dyaboli+ kweniso Satana,+ ndipu wangumumanga kwa vyaka 1,000. 3 Wangumuponya muchizenji+ ndipu wangujalapu ndi kudindapu chidindu, kuti waleki kulandizga mitundu ya ŵanthu, mpaka po vyaka 1,000 vamaliya. Pavuli paki watenere kufwatulika kwa kanyengu kamanavi.+

4 Ndinguwona mipandu yaufumu, ndipu wo angujapu angupaskika mazaza ngakuyeruzga. Ndinguwona maumoyu* nga ŵanthu wo angubayika* chifukwa cha kupereka ukaboni wakukwaskana ndi Yesu ndipuso chifukwa cha kukamba vakukwaskana ndi Chiuta. Ndinguwona so ŵanthu wo akusopapu cha chinyama chakofya pamwenga chikozgu chaki, kweniso wo akulondiyapu cha chidindu pachisku chawu ndi pajanja lawu.+ Yiwu anguja so ndi umoyu, ndipu angulamuliya nge mafumu limoza ndi Khristu+ kwa vyaka 1,000. 5 (Akufwa anyaki wosi+ anguja ndi umoyu cha mpaka po vyaka 1,000 vingumaliya.) Chenichi ntchiyuka chakwamba.+ 6 Ngwakukondwa kweniso ngwakupaturika weyosi yo wayuskika pa chiyuka chakwamba;+ nyifwa yachiŵi+ yilivi mazaza+ pa ŵanthu ŵenaŵa. Kweni azamuja asembi+ aku Chiuta ndipuso aku Khristu, ndipu azamulamuliya nge mafumu limoza ndi iyu kwa vyaka 1,000.+

7 Asani vyaka 1,000 vazimala ŵaka, Satana wazamufwatulika mujeri laki, 8 ndipu wazamuluta kuchilandizga mitundu ya ŵanthu mumakona nganayi nga charu chapasi. Mitundu iyi ndi Gogi ndipuso Magogi, ndipu wazakuyiwunganisiya ku nkhondu. Chiŵerengeru chawu che nge mchenga wa kunyanja. 9 Yiwu angumbininikiya pacharu chosi chapasi ndi kuzunguliya msasa wa akupaturika ndipuso tawuni yakwanjiwa. Kweni motu ungusika kutuliya kuchanya ndi kuŵawotcha.+ 10 Ndipu Dyaboli yo waŵalandizganga, wanguponyeka munyanja ya motu ndi sulufule, mo mwe kali chinyama chakofya+ kweniso mchimi waboza;+ ndipu azamutombozgeka* msana ndi usiku muyaya mpaka muyaya.

11 Ndinguwona mpandu waufumu ukulu utuŵa ndipuso Yo wanguja pampandu wo.+ Charu chapasi ndi kuchanya vinguthaŵa pa masu paki,+ ndipu malu ngawu ngangusanirika so cha. 12 Ndipu ndinguwona akufwa ŵara ndi amana, ama pa masu pa mpandu waufumu, ndipu mipukutu yingujulika. Kweni mpukutu unyaki ungujulika; wenuwu ndi mpukutu waumoyu.+ Akufwa anguyeruzgika mwakugwiriskiya ntchitu vinthu vo vikulembeka mumpukutu wo, mwakukoliyana ndi ntchitu zawu.+ 13 Nyanja yingupereka akufwa wo ŵenga mwenimo, nyifwa ndi Dindi* vingupereka akufwa wo ŵenga mwenimo, ndipu weyosi wanguyeruzgika mwakukoliyana ndi ntchitu zaki.+ 14 Ndipu nyifwa ndi Dindi* vinguponyeka munyanja ya motu.+ Nyanja ya motu+ yimiya nyifwa yachiŵi.+ 15 Kweniso, weyosi yo zina laki lingulembeka cha mubuku la umoyu,+ wanguponyeka munyanja ya motu.+

21 Ndinguwona kuchanya kufya ndi charu chapasi chifya;+ pakuti kuchanya kwakali ndi charu chapasi chakali vatuwapu,+ ndipu kulivi so nyanja.+ 2 Ndinguwona so tawuni yakupaturika yo ndi Yerusalemu Mufya, yichisika kutuwa kuchanya kwaku Chiuta,+ ndipu yingunozgeka nge mwali yo amuvwalika kuti wakalonde mulumu waki.+ 3 Pavuli paki, ndinguvwa mazu nganthazi kutuliya kumpandu waufumu ngakuti: “Awonani! Hema laku Chiuta le pakati pa ŵanthu. Iyu wajengi nawu ndipu yiwu aŵengi ŵanthu ŵaki. Ndipu Chiuta iyu mweneku waŵengi nawu.+ 4 Iyu wazamuleska masozi ngosi mumasu mwawu,+ ndipu nyifwa yazamuŵaku so cha.+ Kwazamuŵavi kuliya, kukuta pamwenga urwirwi.+ Vinthu vakali vatuwapu.”

5 Ndipu Yo wanguja pampandu waufumu+ wangukamba kuti: “Awonani! Ndipanga vinthu vosi kuŵa vifya.”+ Wangukamba so kuti: “Lemba, pakuti mazu yanga ngakugomezgeka* ndipuso ngauneneska.” 6 Ndipu wangundikambiya kuti: “Ngafiskika! Ini ndini Alefa ndi Omega,* chiyambi ndi umaliru.+ Weyosi yo we ndi nyota ndimupaskengi maji ngakutuliya mukasupi wa maji nga umoyu kwawezi.+ 7 Munthu weyosi yo wapunda, wazamuhara vinthu venivi, ini ndazamukuŵa Chiuta waki, ndipu iyu wazamukuŵa mwana wangu. 8 Kweni ŵanthu amantha, ambula chivwanu,+ akufipiskika chifukwa cha vakuchita vawu vaunyakazi, akubaya ŵanthu,+ akuchita ureŵi,*+ akuchita vamizimu, akusopa angoza kweniso ŵanthu wosi aboza,+ chigaŵa chawu chazamuja munyanja yakukole motu kweniso sulufule.+ Nyanja yeniyi yimiya nyifwa yachiŵi.”+

9 Yumoza mwa angelu 7 wo ŵenga ndi mbali zabakuli 7 zakuzaza ndi milili 7 yakumaliya,+ wanguza ndipu wangundikambiya kuti: “Iza kunu, ndikulongo mwali, muwolu wa Mwanawambereri.”+ 10 Sonu mu nthazi ya mzimu, wangunditole paphiri likulu kweniso litali, ndipu wangundilongo tawuni yakupaturika ya Yerusalemu yichisika kutuwa kuchanya kwaku Chiuta,+ 11 ndipu yenga ndi unkhankhu waku Chiuta.+ Yajedukanga nge mwa wakuzirwa ukongwa, nge mwa wa jasipa wakuŵala ukongwa nge gilasi lakulangala.+ 12 Tawuni yo yenga ndi mpanda ukulu kweniso utali. Yenga ndi mageti 12 ndipu pamageti ngo penga angelu 12. Pamageti ngo pangulembeka mazina nga mafuku 12 nga ŵana aku Isirayeli. 13 Kuvuma kwaki kwenga mageti ngatatu, kunkhondi* ngatatu, kumwera ngatatu ndipu kuzambwi kwenga so ngatatu.+ 14 Mpanda wa tawuni yo, wenga so ndi mya 12 ya fawundeshoni. Pamya yeniyi, pangulembeka mazina 12 nga akutumika 12+ a Mwanawambereri.

15 Sonu yo walongoronga nani wangukoleze deti lakupimiya lagolidi, kuti wapimiyi tawuni ndi mageti ngaki kweniso mpanda waki.+ 16 Tawuni yo, njakuyanana vigaŵa vosi vinayi, ndipu mu utali ndi mu usani njakuyanana. Wangupima tawuni ndi deti lo ndipu utali waki wenga makilomita pafufupi 2,220;* yenga so yakuyanana mu utali, mu usani ndipuso kutuwa pasi kufika pachanya. 17 Wangupima so mpanda waki ndipu wenga pafufupi mamita 64* mwakukoliyana ndi mwesu wa munthu, ndipu mwesu wenuwu ndiwu mungelu wangupimiya. 18 Mpanda wo ungupangika ndi mya ya jasipa,+ ndipu tawuni yo yenga yagolidi chayiyu wakuŵala nge gilasi. 19 Mafawundeshoni nga mpanda wa tawuni yo, ngangudyoŵeka ndi mya yakuzirwa ya mitundu yakupambanapambana. Fawundeshoni yakwamba yenga ya jasipa, yachiŵi safiro, yachitatu kasedone, yachinayi emeradi, 20 yachinkhondi sadonekisi, ya 6 sadiyasi, ya 7 kurusolayiti, ya 8 berilo, ya 9 topazi, ya 10 kurusopurezi, ya 11 hayasifi ndipu ya 12 amefisiti. 21 Mageti 12 nga tawuni yo ngangupangika ndi ngali* 12; geti lelosi lingupangika ndi ngali yimoza. Msewu ukulu wa mutawuni yo, wenga wagolidi chayiyu, wakulangala nge gilasi.

22 Mutawuni yeniyi ndinguwonamu nyumba yakusopiyamu cha, chifukwa Yehova* Chiuta Wanthazizosi+ ndiyu nyumba yakusopiyamu ya tawuni yo, ndipu Mwanawambereri nayu so viyo. 23 Ndipu tawuni iyi yakhumbikanga lumwi cha pamwenga mwezi kuti viyiŵaliyi, chifukwa unkhankhu waku Chiuta ndiwu wambulikanga pa tawuni yo+ ndipu Mwanawambereri ndiyu wenga nyali yaki.+ 24 Mitundu ya ŵanthu yazamukwenda mwakugwiriskiya ntchitu ukweru wa tawuni yo,+ kweniso mafumu nga charu chapasi ngazamukuza mwenumu ndi unkhankhu wawu. 25 Mageti ngaki ngazamujalika cha ndi msana pakuti kwazamuŵavi usiku.+ 26 Pakuti azamukuza ndi unkhankhu ndipuso ulemu wa mitundu ya ŵanthu mutawuni yeniyi.+ 27 Kweni chinthu chechosi chakufipiskika ndipuso munthu weyosi yo wachita vinthu vaunyakazi kweniso vachinyengu, wazamuseremu cha mutawuni iyi.+ Ŵanthu ŵija wo akulembeka mumpukutu waumoyu wa Mwanawambereri, ndiwu azamuseremu.+

22 Ndipu iyu wangundilongo msinji wa maji nga umoyu,+ wo wenga wakulangala nge gilasi. Msinji wo wayendanga kutuliya kumpandu waufumu waku Chiuta kweniso wa Mwanawambereri+ 2 ndipu wasikiyanga pakati pa msewu ukulu wa tawuni yo. Kusirya ndi sirya la msinji wo, kwenga vimiti va umoyu vakupasa vipasu maulendu 12, ndipu vapasanga mwezi wewosi. Mani nga vimiti vo, ngenga ngakuchizgiya mitundu ya ŵanthu.+

3 Ndipu kwazamuŵavi so thembu lelosi. Kweni mpandu waufumu waku Chiuta ndipuso wa Mwanawambereri,+ wazamuja mutawuni yo, ndipu akapolu ŵaki azakumuchitiya uteŵeti wakupaturika. 4 Yiwu azamuwona chisku chaki+ ndipu zina laki lazamukuŵa pavisku vawu.+ 5 Kwazamuŵavi so usiku,+ ndipu ukweru wa nyali pamwenga wa lumwi wazamukhumbika so cha, pakuti Yehova* Chiuta wazakuŵaŵaliya,+ ndipu azamulamuliya nge mafumu muyaya mpaka muyaya.+

6 Iyu wangundikambiya kuti: “Mazu yanga ngakugomezgeka* ndipuso ngauneneska;+ ndipu Yehova* Chiuta yo wangulongoro kuporote mwa achimi,+ watuma mungelu waki kuti walongo akapolu ŵaki vinthu vo vitenere kuchitika pambula kuswera. 7 Awona! Ndituza mwaliŵi.+ Ngwakukondwa munthu weyosi yo wasunga mazu nga uchimi ngo nge mumpukutu uwu.”+

8 Ini Yohane, ndini ndavwanga ndi kuwona vinthu venivi. Ndati ndavwa ndi kuviwona, ndinguwa pamaphazi nga mungelu yo wandilongonga vinthu venivi kuti ndimusopi. 9 Kweni iyu wangundikambiya kuti: “Phwere! Ungachitanga viyo cha! Nani nde kapolu munyaku ŵaka, ndipuso nde kapolu munyawu wa abali ŵaku achimi, kweniso kapolu munyawu waku wosi wo asunga mazu nga mumpukutu uwu. Sopa Chiuta.”+

10 Wangundikambiya so kuti: “Ungasunganga chisisi cha pa* mazu nga uchimi nga mumpukutu uwu, pakuti nyengu yakuŵikika ye pafupi. 11 Munthu wambula urunji walutirizgi kuchita vinthu mwambula urunji, waunyakazi walutirizgi kuchita vinthu vaunyakazi, kweni murunji walutirizgi kuchita vinthu mwaurunji ndipu wakupaturika walutirizgi kuŵa wakupaturika.

12 “‘Awona! Ndituza mwaliŵi, ndipu nde ndi mphotu yo ndazamupereka kwaku weyosi mwakukoliyana ndi ntchitu zaki.+ 13 Ini ndini Alefa ndi Omega,*+ wakwamba ndi wakumaliya, chiyambi ndi umaliru. 14 Mbakukondwa wo achapa mikhanju yawu,+ kuti aŵi ndi mazaza ngakulutiya kuvimiti va umoyu+ ndipuso kuti akasere mutawuni yo kuporote pamageti ngaki.+ 15 Kubwalu kwe agalu,* ndipuso kwe ŵanthu wo achita vamizimu, wo achita ureŵi,* akubaya ŵanthu, akusopa angoza ndipuso weyosi yo watanja kukamba boza ndi kuchita vinthu mwachinyengu.’+

16 “‘Ini Yesu, ndingutuma mungelu wangu kuti wapereki ukaboni wakukwaskana ndi vinthu venivi kwaku yimwi, chifukwa cha mipingu. Ini ndini msisi ndipuso mphapu yaku Davidi,+ kweniso ndini nyenyezi ya mlenji yakuŵala ukongwa.’”+

17 Ndipu mzimu ndi mwali+ alutirizga kukamba kuti, “Iza kunu!” ndipu weyosi yo watuvwa wakambi kuti, “Iza kunu!” ndipu weyosi yo we ndi nyota wazi;+ weyosi yo wakhumba, wamwi maji nga umoyu kwawezi.+

18 “Ndipereka ukaboni kwaku weyosi yo watuvwa mazu nga uchimi nga mumpukutu uwu: Munthu weyosi yo wasazgiyapu pa vinthu ivi,+ Chiuta wazakumusazgiyapu milili yo yalembeka mumpukutu uwu;+ 19 ndipuso munthu weyosi yo watuzgamu kanthu kekosi mu mazu nga mumpukutu uwu wa uchimi, Chiuta wazamutuzgaku chigaŵa chaki ku vimiti va umoyu+ kweniso mutawuni yakupaturika,+ vinthu vo valembeka mumpukutu uwu.

20 “Yo wapereka ukaboni wa vinthu venivi wakamba kuti, ‘Hinya, ndituza mwaliŵi.’”+

“Ame! Zani, Ambuya Yesu.”

21 Wezi ukulu wa Ambuya Yesu uŵi ndi akupaturika.