Kugwadiya Mbendera, Kuvota Ndipuso Kugwira Nchitu Zinyaki za Boma

Kugwadiya mbendera. Akaboni aku Yehova awona kuti kugwadiya mbendera yo kanandi ŵanthu atiyigwadiya achimba sumu ya fuku, nkhusopa ndipu ŵanthu wo achita viyo aŵanaŵana kuti angataskika ndi charu pamwenga alongozgi ŵawu m’malu mwakuthemba Chiuta. (Yesaya 43:11; 1 Ŵakorinte 10:14; 1 Yohane 5:21) Yumoza mwa alongozgi ŵenaŵa wenga Nebukadanezara, yo wenga Fumu ya ku Babiloni. Iyu wangumika Chikozgu chikulu ndi chilatu chakuti ŵanthu awoni kuti ufumu waki ngwakuzirwa ukongwa ndipuso kuti iyu ngwakujipereka pa nkhani ya kusopa. Mwaviyo, wangukambiya ŵanthu wosi wo waŵawusanga kuti achigwadiyi sumu yichimbika. Kweni anyamata achiheberi atatu, Shadreke, Mesheke ndi Abedenego angukana kugwadiya chikozgu cho chinanga kuti atingi abayikengi.​—Danyele chaputala 3.

Carlton Hayes yo walemba mabuku ngambiri wakulemba kuti: Mazuŵa nganu ŵanthu “asopa mbendera. Yiwu azuwa visoti asani ajumphiska mbendera, anyaki alemba ndakatulu kweniso ŵana atumba sumu zakutumbika mbendera yo.” Ŵanthu wo atanja ukongwa charu chawu aja ndi maholidi nge kukumbuka ŵanthu wo akufwiya charu cho, kutumbika ŵanthu wo atiŵawona kuti mbatuŵa mtima ndipuso kuluta ku malu ngo aŵanaŵana kuti asani alutaku marombu ngawu ngavwika kwaku Chiuta. Pa chakuchitika chinyaki ku Brazil, mura wa asilikali wangukamba kuti: “Mbendera yitumbikika ukongwa ndipuso yisopeka . . . nge mo achitiya ndi munthu yo wakufwiya charu chaki.” Ndipu buku linyaki lingukamba kuti “mbendera njakupaturika nge mphinjika.”​—The Encyclopedia Americana.

Buku lo likukamba so kuti, “sumu ya fuku yilongo kuti ŵanthu atanja charu chawu ndipu kanandi apempha Chiuta kuti waŵalongozgi ndi kuŵavikiriya ndipuso kuvikiriya ŵanthu wo awusa.” Mwaviyo, ateŵeti aku Yehova anangiska cha asani akamba kuti midawuku yakulongo kuti munthu watanja charu chaki nge kugwadiya mbendera ndi kumba sumu ya fuku yikoliyana ndi chisopa. Pa nkhani yakukwaskana ndi ŵana ŵa Akaboni aku Yehova wo akana kugwadiya mbendera m’masukulu nga ku America ndipuso akana kulapizga kuti ajengi akugomezgeka ku charu chawu, buku linyaki likukamba kuti: “Khoti Likulu Ukongwa laja lichisimikizgiya pa mirandu yakupambanapambana kuti midawuku yeniyi nja visopa.”​—The American Character.

Chinanga kuti ŵanthu aku Yehova achitaku cha midawuku yosi yo awona kuti yileka kukoliyana ndi Malemba, yiwu awona kuti ŵanthu wo achita midawuku yeniyi ndi wangangwa wawu. Yiwu aziŵa kuti mbendera yimiya charu kweniso kuti maboma ngo ngawusa ndingu “mitufu yira,” yo yiteŵete nge “mteŵeti waku Chiuta.” (Ŵaroma 13:1-4) Akaboni aku Yehova avwiya ulongozgi wakuti arombiyengi “akaronga ndi wosi ŵaraŵara” ndi chilatu chakuti ‘aje ndi umoyu wakuzika ndi wakudeka mu uwopa Chiuta wosi ndi uziza [kuŵanaŵana umampha].’​—1 Timote 2:2.

Kuvota pa visankhu va ndali. Akhristu auneneska atumbika wanangwa wakuvota wo ŵanthu ŵenawu. Yiwu akanizga ŵanthu cha kuvota, ndipu avwiya ŵanthu wo asankhika. Kweni yiwu achitaku cha ndali. (Mateyu 22:21; 1 Petro 3:16) Kumbi Mkhristu wangachita wuli asani m’charu cho waja mwe dangu lakuti weyosi watenere kuvota pamwenga asani ŵanthu wo aleka kuvota atiŵayukiya? Kukumbuka kuti Shadreke, Mesheke ndi Abedenego anguluta mpaka kuchifika ku chidika cha Dura, kungawovya Mkhristu yo wakumana ndi suzgu yaviyo kusankha kuluta kumalu ngakuvote asani njuŵi yaki yitimuzomerezga. Kweni asani wasere m’kachipinda kakuvote watenere kuphwere ukongwa kuti waleki kuchitaku ndali. Iyu watenere kukumbuka fundu 6 izi:

1. Akusambira aku Yesu ‘mbacharu cha.’​—Yohane 15:19.

2. Akhristu amiya Khristu ndi Ufumu waki.​—Yohane 18:36; 2 Ŵakorinte 5:20.

3. Akhristu agomezga vakuyanana ndipu atanjana nge mo Yesu wachitiyanga.​—1 Ŵakorinte 1:10; Ŵakolose 3:14.

4. Ŵanthu wo asankha mulongozgi nawuso aja ndi mlandu chifukwa cha vo iyu wachita. Wonani fundu zo zisanirika m’Malemba yanga: 1 Samuele 8:5, 10-18; 1 Timote 5:22.

5. Yehova wanguwona kuti Ayisraele amukana chifukwa akhumbanga kuti munthu ndiyu waŵalongozgengi.​—1 Samuele 8:7.

6. Akhristu atenere kuja ndi wanangwa asani akambiya ŵanthu a vipani vosi Ufumu waku Chiuta chifukwa yiwu amiya Yehova.​—Mateyu 24:14; 28:19, 20; Ŵahebere 10:35.

Kugwira nchitu zinyaki za boma. M’vyaru vinyaki, boma lijalikiska dangu lakuti ŵanthu wo akana kugwira nchitu ya usilikali apaskiki nchitu zinyaki kwa kanyengu. Asani takumana ndi suzgu yaviyo titenere kuromba ndipuso kukambiskana ndi Mkhristu wakukhwima mwauzimu ndipu pavuli paki titenere kusankha mwakukoliyana ndi njuŵi yidu.​—Nthanthi 2:1-5; Ŵafilipi 4:5.

Mazu ngaku Chiuta ngatitikambiya kuti, ‘mujithereski ku ŵara, ku mitufu, kuvwiya ŵeruzgi, kuŵa akurongosoleke nchitu yosi yamampha, . . . akoroŵa.’ (Tito 3:1, 2) Mwaviyo, tingajifumba kuti: ‘Kumbi kugwira nchitu yeniyi kundichitiskengi kuti ndichiteku ndali pamwenga ndikoliyani ndi chisopa chaboza?’ (Mika 4:3, 5; 2 Ŵakorinte 6:16, 17) ‘Kumbi kugwira nchitu yeniyi kunditimbanyizgengi pamwenga kunditondekeska kufiska maudindu nganyaki ngachikhristu?’ (Mateyu 28:19, 20; Ŵaefesu 6:4; Ŵahebere 10:24, 25) Mungajifumba so kuti: Kumbi nchitu yeniyi yindipaskengi nyengu yakuchitiya vinthu vauzimu nge kuchita uteŵeti wa nyengu zosi?’​—Ŵahebere 6:11, 12.

Asani Mkhristu wasankha kuti wagwirengi nchitu yo wapaskika m’malu mwakuluta ku jeri, Akhristu anyaki atenere cha kumuyeruzga chifukwa cha vo wasankha. (Ŵaroma 14:10) Kweniso asani Mkhristu munyaki wawona kuti wangagwira cha nchitu zaviyo, Akhristu anyaki atenere cha kususka vo iyu wasankha.​—1 Ŵakorinte 10:29; 2 Ŵakorinte 1:24.