Mwana Wasukulu Wamala Zeru
Peter watondeka kujalikisika pampandu chifukwa watimbanyizika maŵanaŵanu. Ivi veviyo chifukwa chakuti msambizi wawu munthukazi yo watimutumbika ukongwa wayamba kuŵasambiza chisambizu chinyaki chachilendu. Iyu watiŵasambiza vo Charles Darwin wakulemba kuti vamoyu vikuchita kusambuka kutuliya ku vinthu vinyaki. Wakamba so kuti venivi vikuwovya kuti aleki kugomezga vinthu vaboza. Msambizi uyu wapempha ŵana asukulu kuti weyosi wakambi vo wagomezga pa nkhani yeniyi.
Peter wamala zeru. Apapi ŵaki akumusambiza kuti Chiuta ndiyu wakulenga vinthu vosi vo ve pacharu kusazgapu vinthu vamoyu. Akumusambiza kuti nkhani yo Bayibolu likamba kuti Chiuta ndiyu wakulenga vinthu njauneneska, kweni chisambizu chakuti vinthu vikuchita kusambuka ndi nthanu waka kweniso palivi ukaboni wakuvwika. Apapi ŵaki kweniso asambizi ŵaki wosi atimukhumbiya vamampha. Kumbi Peter wagomezgengi yani penapa?
Ŵana asukulu anandi asambizika venivi pacharu chosi. Kumbi Peter ndipuso ŵana asukulu anyaki akhumbika kuchitanji? Kumbi akhumbika kugomezga waka vo msambizi wawu wakamba ŵechendasaniyi ukaboni pakuŵija? Yiwu akhumbika kusaniya ukaboni wakusimikiziya asani vamoyu vikuchita nadi kusambuka kutuliya ku vinthu vinyaki pamwenga vikuchita kulengeka. Pavuli paki, ndipu angasankha vo awona kuti vauneneska.
Kukamba uneneska, Bayibolu litititcheŵesa kuti tingagomezganga chechosi cha cho munthu wakamba. Likamba kuti: “Munthu wambula kuziŵa vinthu wagomezga mazu ngosi, kweni wakuchenje waŵanaŵaniya mo watende.” (Nthanthi 14:15) Bayibolu lititichiska kuti tigwirisiyengi ntchitu ‘lusu lidu lakuŵanaŵana’ kuti tisaniyengi maukaboni techendagomezgi vo tavwa.—Aroma 12:1, 2.
Kabuku yaka kakupangika kuti kawovyi magulu nga visopa cha ngo ngakhumba kuti ngasambizengi ŵana asukulu kuti vamoyu vikuchita kulengeka. Kweni kavumbuwa vinthu vaboza vo ŵanthu akamba kuti vamoyu vikujaku waka vija ndipuso kuti vo Bayibolu likamba ndi nthanu waka.
Kabuku yaka kakonkhosengi ukongwa selu, pamwenga kuti tinthu timanatimana to tipanga liŵavu la chinthu chechosi chamoyu. Musambirengi so mo maselu ngakupangikiya mwakuziziswa ukongwa. Muyesesi kuŵanaŵaniya so maukaboni nga ŵanthu wo agomezga kuti vamoyu vikuchita kusambuka kutuliya ku vinthu vinyaki ndipu muwoni mwija asani vauneneska.
Mwaviyo, tikhumbika kujifumba kuti, Kumbi vamoyu vikujaku waka vija, pamwenga vikuchita kulengeka? Mutenere kuti mukwamba kali kujifumba fumbu lenili. Kabuku yaka kakonkhosa maukaboni nganyaki ngo ngachitisa kuti ŵanthu anandi agomezgengi kuti vamoyu vikuchita kulengeka.