Fundu za Ufumu​—Kupenja Urunji Waku Chiuta

TIYERUZGIYI kuti musoske janja munthu yo muja nayu pafupi. Ndipu muziŵa kuti nyengu zosi iyu wawona ndipuso wakwaskika ndi vo imwi pamoza ndi banja linu muchita. Nayu watikusoskiyani janja ndipu watikudanani. Pavuli paki wakamba kuti: “Ndikhumba kukufumbani. Nchifukwa wuli mwa ŵanthu imwi mupambana ukongwa ndi tanyinu?” Imwi mutimufumba kuti: “Mung’anamuwanji?” Iyu wamuka kuti: “Asi, ndimwi Akaboni aku Yehova? Palivi yo wayanana namwi. Muyanana cha ndi visopa vinyaki chifukwa mukondwere maholidi cha ndipu muchitaku cha ndali pamwenga nkhondu. Palivi yo wakweŵa foja m’tchalitchi linu. Ndipu banja linu nalu liwoneka kuti litende fundu zapachanya ukongwa. Nchinthu wuli cho chitikupambaniskani viyo ndi ŵanthu anyaki wosi?”

Imwi muziŵa kuti vosi vo wafumba vichitika chifukwa chakuti tiwusika ndi Ufumu waku Chiuta. Nge Fumu, Yesu watititowesa nyengu zosi. Iyu watitiwovya kuti tilondongi chakuwoniyapu chaki, mwaviyo, tipambana ndi ŵanthu a m’charu chiheni ichi. M’chigaŵa ichi, tiwonengi mo Ufumu waku Mesiya utovye ŵanthu aku Chiuta kuti aje akutowa mwauzimu, aje ndi mijalidu yamampha, kweniso kuti achitengi vinthu mwakukoliyana nge gulu, ndipu venivi vitovya kuti Yehova wakankhuskiki.