Malayizgu nga Ufumu​—Kusintha Vinthu Vosi Kuti Vije Vifya

TIYERUZGIYI kuti mwapawuwa chipasu chakutowa m’chimiti. Mwechendachiŵiki m’sokola, mutichinuska dankha ndipu chinunkhira umampha ukongwa. Mwayamba kali kugwira nchitu yeniyi kweni mwechendavuki. Anyinamwi ŵe pachimiti cho che pafupi ndipu agwira nchitu mwalikondwa uku acheza ndi ŵanthu anyaki a m’banja linu kweniso anyinu wo mutovyana nawu kupawuwa vipasu venivi. Awoneka aŵisi nge mo ŵenge imwi mweche anamana. Muvwana cha kuti munguŵawona achikota m’charu chakali cho sonu kulivi. Mukumbuka kuti munguŵawona mo angusuzgikiya ndi matenda, munguŵako pajanja achifwa ndipuso munguliya ukongwa kumasanu pa nyifwa yawu. Kweni sonu, yiwu ndi anyaki so anandi wo angufwa mwenawu limoza ndipu awoneka anthazi!

Tiziŵa kuti nyengu yaviyo iyi yituza. Tisimikizga kuti yizengi nadi chifukwa malayizgu ngaku Chiuta ngosi ngatuwa paŵaka cha. M’chigaŵa ichi tiwonengi mo malayizgu nganyaki nga Ufumu ngafiskikiyengi pambula kuswera yapa nkhondu ya Aramagedoni yechendayambi. Tiwonengi so mo malayizgu nganyaki ngakukondweska ngazamufiskikiya pavuli pa nkhondu yeniyi. Tazamukondwa ukongwa pa nyengu yo Ufumu waku Chiuta wazamuwusiya charu chosi ndi kusintha vinthu vosi kuti vije vifya!