Ŵanthu 10 Amakhati Anguchizgika Kweni Munthu Yumoza Wangulongo Kuwonga

Yesu wangutuwaku ku Betaniya ndipu wanguluta ku tawuni ya Efurayemu yo yenga kunkhondi chakuvuma kwa Yerusalemu. Iyu wanguchita ivi kuti watondekeski Mphara Yikulu Yamilandu yo yakhumbanga kumubaya. Iyu limoza ndi akusambira ŵaki anguja kwenuku ko kwenga kutali ndi arwani ŵaki. (Yohane 11:54) Kweni chifukwa chakuti Phwandu la Pasika wa mu 33 C.E. lenga pafupi kuchitika, Yesu wangujalisaku cha kwenuku. Iyu wanguselere chakunkhondi ndipu wangujumpha muchigaŵa cha Samariya ndi Galileya. Ulendu wenuwu wenga wakumaliya kuluta kuchigaŵa cha Galileya.

Yesu wati wayamba ŵaka ulendu wenuwu, wangukumana ndi ŵanthu 10 wo ŵenga ndi makhati wachijumpha mumuzi unyaki. Nyengu zinyaki matenda nga makhati ngachitiska kuti munthu waryikengi viŵalu nge makutu, vikumbu vakumanja kweniso vakumalundi. (Maŵerengedu 12:10-12) Dangu laku Chiuta lakambanga kuti munthu yo we ndi makhati wakhumbikanga kuja kwakuyija kweniso wakhumbikanga kudaniriza kuti, “Wakufipiskika, wakufipiskika!” kuti ŵanthu aleki kuza kufupi ndi iyu.—Ŵalevi 13:45, 46.

Mwaliŵiliŵi, ŵanthu wo ŵenga ndi makhati anguja patali ndi Yesu ndipu adanirizanga kuti: “Yesu, Msambizi, tichitiyeni lisungu!” Yesu wati waŵawona wanguŵakambiya kuti: “Lutani mukajilongo kwa asembi.” (Luka 17:13, 14) Vo Yesu wanguchita vingulongo kuti watumbikanga Dangu laku Chiuta. Dangu lakambanga kuti asembi ndiwu ŵenga ndi udindu wakukamba kuti munthu yo wenga ndi makhati wachizgika. Asani achita viyo, munthu yo wajanga wakuzomerezeka kuchija limoza ndi ŵanthu anyaki.—Ŵalevi 13:9-17.

Ŵanthu 10 wo atamanga makhati ŵenga ndi chivwanu kuti Yesu we ndi nthazi zakuchitiya vakuziziswa. Mwaviyo, yiwu angusoka kuti akawonani ndi asembi chinanga kuti pa nyengu iyi ŵenga ŵechendachizgiki. Ŵe munthowa, anguchizgika chifukwa chakuti ŵenga ndi chivwanu mwaku Yesu. Yiwu angwamba kuwona kuti makhati ngawu ngamala kweniso angwamba kujivwa kuti achizgika!

Pa ŵanthu 10 wo anguchizgika, 9 angulutiriza ulendu wawu kuti akajilongo kwa asembi kweni yumoza wanguwerere. Munthu uyu wenga Msamariya ndipu wanguwerere kuti wakapenji Yesu. Ntchifukwa wuli wapenjanga Yesu? Iyu wakhumbanga kumuwonga ukongwa Yesu chifukwa cha vo wangumuchitiya. Mwaviyo, munthu mwenuyu wangwamba ‘kukankhuska Chiuta mwakudaniriza,’ chifukwa wanguziŵa kuti ndi Chiuta yo wangumuchizga. (Luka 17:15) Wati wakumana ndi Yesu, munthu yo wanguchizgika wangugwada ndipu wanguwonga Yesu.

Pavuli paki, Yesu wangufumba ŵanthu wo ŵenga pafupi ndi iyu kuti: “Asi ŵanthu wosi 10 atoweseka? Nanga anyaki 9 ŵe pani? Kumbi walipu munyaki yo wawerere kuti wakankhuski Chiuta, kupatuwaku munthu uyu wamtundu unyaki?” Pavuli paki, Yesu wangukambiya Msamariya mwenuyu kuti: “Soka, lutanga; chivwanu chaku chakuchizga.”—Luka 17:17-19.

Wati wachizga ŵanthu 10 wo ŵenga ndi makhati, Yesu wangulongo kuti Yehova Chiuta ndiyu wamuwovyanga. Munthu yumoza pa ŵanthu 10 wo anguchizgika, wenga so ndi mwaŵi wakuzisaniya umoyu wamuyaya. Mazuŵa nganu, Chiuta wachizga ŵanthu mwakuziziswa cha. Kweni asani te ndi chivwanu mwaku Yesu tazamusaniya umoyu wamuyaya. Kumbi tilongo kuti tiwonga mwaŵi wo tenawu wakuzilonde umoyu wamuyaya nge po Msamariya mwenuyu wanguchitiya?