6 Kumbi Pempheru Lingawovya Nadi?

KUMBI pempheru lingatiwovya wuli? Bayibolu lilongo kuti ateŵeti akugomezgeka aku Chiuta ayanduwa ukongwa chifukwa cha mapempheru ngawu. (Luka 22:40; Yakobe 5:13) Pempheru lingatiwovya kuti tije akukho mwauzimu, tije ndi maŵanaŵanu ngamampha ndipuso kuti tije ndi liŵavu lanthazi. Kumbi vingachitika wuli venivi?

Tiyeruzgiyi kuti mwana winu wapaskika mphasu. Kumbi mungamukambiya kuti wangakambanga chechosi cha chikulu watijivwa mumtima waki kuti wawonga? Pamwenga mungamukambiya kuti wakambi kuti yewu? Asani tikamba vo ve mumtima, tiŵanaŵaniyapu ndipuso titivichita mwanthazi. Kumbi venivi ndivu vichitika so asani tikambiskana ndi Chiuta? Hinya! Wonani vakuwoniyapu ivi.

Mapempheru ngakuwonga. Asani tiwonga Awusefwi akuchanya chifukwa cha vinthu vamampha vo atichitiya, tiŵika maŵanaŵanu ngidu ngosi pa vitumbiku vidu. Venivi vingachitiska kuti tiwongengi ukongwa, tikondwengi kweniso tiwonengi vinthu mwakwenere.—Afilipi 4:6.

Chakuwoniyapu: Yesu wangulongo kuwonga chifukwa cha mo Awisi amukiyanga mapempheru ngaki.—Yohane 11:41.

Mapempheru ngakupempha Chiuta kuti watigowoke. Asani tipempha Chiuta kuti watigowoke, tija ndi njuŵi yanthazi, tilongo mtima wakulapa ndipuso tilongo kuti tizomereza kuti ubudi ntchinthu chakofya ukongwa. Kweniso tituvwa umampha mumtima chifukwa chakuziŵa kuti tagowokereka.

Chakuwoniyapu: Davidi wangupemphera kuti walongo kuti walapa ndipuso we ndi chitima.—Salimo 51.

Mapempheru ngakupempha ulongozgi ndipuso zeru. Kupempha Yehova kuti watilongozgi ndipuso kuti watipasi zeru kuti tisankhi umampha vinthu, kungatiwovya kuti tije akujiyuyuwa. Kungatikumbusa so kuti isi te akupereŵere ndipuso kungatiwovya kuti tiŵagomezgengi ukongwa Awusefwi akuchanya.—Nthanthi 3:5, 6.

Chakuwoniyapu: Solomoni wangujiyuyuwa ndipu wangupempha ulongozgi kweniso zeru kuti walamuliyi umampha Ayisirayeli.—1 Mafumu 3:5-12.

Mapempheru ngo tipemphera asani takumana ndi suzgu. Asani tamupunguliya Yehova vo ve mumtima mwidu pa nyengu yo takumana ndi suzgu, tituvwa umampha mumtima ndipuso titamba kuthemba iyu mumalu mwakujithemba taŵeni.—Salimo 62:8.

Chakuwoniyapu: Fumu Asa yingupemphera yati yawofyezeka ndi murwani wakofya ukongwa.—2 Mbiri 14:11.

Mapempheru ngo tipemphere ŵanthu anyaki. Mapempheru ngaviyo ngatitiwovya kuti tileki kuja akujiyanja kweni kuti tije alisungu ndipuso tiŵanaŵaniyengi anyidu.

Chakuwoniyapu: Yesu wangupemphere akusambira ŵaki.—Yohane 17:9-17.

Mapempheru ngakuthamika Chiuta. Asani tithamika Yehova chifukwa cha ntchitu zaki zanthazi ndipuso mijalidu yaki, titamba kumutumbika ukongwa. Mapempheru ngenanga ngangatiwovya so kuti tije pa ubwezi wakukho ndi Chiuta.

Chakuwoniyapu: Davidi wanguthamika Chiuta chifukwa cha vinthu vo wakulenga.—Salimo 8.

Kweniso asani tipemphera tisaniya “chimangu chaku Chiuta cho chiluska kuziŵa vinthu kosi.” (Afilipi 4:7) Kusaniya chimangu mucharu chinu cha masuzgu nkhwakusuzga ukongwa. Chimangu chititiwovya kuti tije ndi liŵavu lanthazi. (Nthanthi 14:30) Kweni kumbi venivi vichitika waka chifukwa cha phamphu lidu? Pamwenga pe chinthu chinyaki so chakukhumbika cho chitovya?