Nchifukwa Wuli Fumbu Lenili Ndakukhumbika?

Pambula kuswera yapa, gulu linyaki la ŵanthu wo aleka kugomezga Chiuta, akulipira ndalama kuti aŵalembe mazu pa chikwangwani ngakuti: “Kumbi muwona kuti Chiuta ngwakukhumbika cha? Ŵanthu mamiliyoni nganandi awona viyo.” Viwoneke limu kuti ŵanthu ŵenaŵa, awona kuti Chiuta ngwakukhumbika cha.

Pe so ŵanthu anandi wo akamba kuti agomezga Chiuta kweni pakusankha vinthu achita nge kuti Chiuta kulivi. Salvatore Fisichella, mura wa mabishopu nga chisopa cha Aroma wangukamba za ŵanthu a muchisopa chaki kuti: “Asani ŵanthu angawona vo tichita, palivi yo wangaziŵa kuti ndisi Akhristu chifukwa vo tichita viyanana ŵaka ndi vo achita ŵanthu wo aleka kugomezga Chiuta.”

Ŵanthu anyaki mbakutangwanika ukongwa ndipu aŵanaŵanaku cha zaku Chiuta. Yiwu awona kuti we kutali ndipu palivi cho wangaŵawovya pa umoyu wawu. Kanandi, ŵanthu aviyo akumbuka Chiuta asani akumana ndi masuzgu pamwenga akhumba chinthu chinyaki nge mo ŵanthu achitiya ndi wanchitu wawu.

Ŵanthu anyaki agwiriskiya nchitu cha vo asambira ku chisopa chawu, panyaki awona kuti vambula kukhumbika. Mwakuyeruzgiyapu, ŵanthu 76 pa ŵanthu 100 a mu chisopa cha Aroma ku Germany, awona kuti kusomphorana nkhwamampha. Ivi vipambana ndi vo asambira mu chisopa chawu kweniso vo Bayibolo lisambiza. (1 Ŵakorinte 6:18; Ŵahebere 13:4) Mbuneneska kuti mbachisopa cha Aroma pe cha wo achita venivi, pe so ŵanthu avisopa vinandi wo ativigwiriskiya nchitu cha vo asambira. Alongozgi avisopa vinandi adandawula kuti ŵanthu ŵawu achita vinthu nge “ŵanthu ambula kugomezga Chiuta.”

Vakuyeruzgiyapu venivi, vichitiska kuti paje fumbu lakuti: Kumbi tikhumbika nadi Chiuta? Nkhani iyi njifya cha, yikukonkhoskeka kakwamba m’machaputala ngakwamba nga m’Bayibolo. Kuti tisaniyi kwamuka kwa fumbu lenili, tiyeni tikambiskani nkhani zinyaki zo ze m’Bayibolo, m’buku la Chiyambo.