NKHANI YA PAPEJI LAKWAMBA | ŴANTHU ANANDI AKHUMBA CHA KUJA AKUGOMEZEKA
Ŵanthu Anandi Akhumba Cha Kuja Akugomezeka
Hitoshi wagwiranga ntchitu yakusunga ndalama ku Kampani yinyaki yakulemba ŵanthu ntchitu ku Japan. Pa nyengu yo waŵerengesiyanga ndalama, bwana waki wangumukambiya kuti wapereki lipoti laboza. Hitoshi wangukambiya bwana waki kuti njuŵi yaki yimusuzgengi ukongwa asani wangapereka lipoti laboza. Bwana waki wangumuwofyeza kuti asani wakana ntchitu yimalengi ndipu yingumala nadi.
Pati pajumpha myezi, Hitoshi wangwamba kukayikiya kuti wasaniyengi so ntchitu yinyaki. Wati waluta kuchichita ma intavyu ku kampani yinyaki, Hitoshi wanguŵakambiya kuti wakhumba cha kugwira ntchitu zachinyengu. Yo wamuchitisanga ma intavyu wangukamba kuti: “Ndazizwa nawi ukongwa!” Abali ŵaki ndi abwezi ŵaki amuchiskanga kuti walutirizgi kuja wakugomezgeka. Kweni Hitoshi wangwamba kuwona kuti wakhumbika cha kuja wakugomezeka. Iyu wangukamba kuti, “Ndiwona nge kuti ndinanga ukongwa kuja wakugomezeka.”
Vo vinguchitikiya Hitoshi vilongo kuti ŵanthu anandi awona kuti kugomezgeka nkhwakukhumbika cha. Kweni kugomezeka nkhwakukhumbika ukongwa pa nkhani ya bizinesi. Munthukazi munyaki wa ku South Africa wangukamba kuti, “Ndigwira ntchitu ndi ŵanthu ambula kugomezeka ndipu kanandi atindichichizga kuti ndichitengi vo yiwu achita.”
Nthowa yinyaki yo ŵanthu alongore kuti mbambula kugomezeka nkhukamba boza. M’vyaka vakuvuli Robert S. Feldman wangusaniya kuti ŵanthu 60 pa ŵanthu 100 ŵewosi arara akamba boza chinanga kuti angalongoro ndi munthu kwa nyengu yimanavi. Iyu wangukamba kuti, “Ndinguzizwa ukongwa kuwona kuti ŵanthu anandi akamba boza. Ndaziŵanga cha kuti ŵanthu anandi akamba boza!” Chinanga kuti ŵanthu anandi akwiya ukongwa asani munthu waŵakambiya boza, kweni nawu atanja so kukamba boza.
Kumbi nchifukwa wuli ŵanthu anandi akamba boza, agomezeka cha kweniso atuba? Kumbi nchinthu wuli cho chichitika chifukwa cha kuleka kugomezeka kwa ŵanthu? Kumbi tingachita wuli kuti tilutirizi kuja akugomezeka?