VO AKUŴERENGA AFUMBA
Kumbi “chikoli” ndi “chidindu” cho Mkhristu weyosi wakusankhika walonde kwaku Chiuta ndi vinthu wuli?—2 Ŵakor. 1:21, 22.
Kali, pa makalata aŵikangapu chidindu pakukhumba kusimikiziya kuti kalata yo njaunenesa
Chikoli: Mwakukoliyana ndi vo buku linyaki likamba, mazu nga Chigiriki ngo akungafwatuliya kuti “chikoli” pa lemba la 2 Ŵakorinte 1:22 ngang’anamuwa ndalama zimanavi zo munthu waperekaku asani wagula chinthu. Pa lemba la 2 Ŵakorinte 5:1-5 pakamba kuti Akhristu akusankhika alonde ndalama zosi zo zingujaku pamwenga kuti mphotu yawu pa nyengu yo avwaliya liŵavu lambula kuvunda. Mphotu iyi yisazapu umoyu wambula kumala kuchanya.—1 Ŵakor. 15:48-54.
Mu Chigiriki cha mazuŵa nganu, mazu yanga ngang’anamuwa mpheti yo munthu wavwalika munthukazi asani wamujaliya. Chakuyeruziyapu ichi ntchakwenere ku ŵanthu wo amuja muwolu waku Khristu.—2 Ŵakor. 11:2; Chiv. 21:2, 9.
Chidindu: Kuvuli uku, ŵanthu agwirisiyanga ntchitu chidindu nge ukaboni wakuti chinthu ntchawu pamwenga akoliyana navu. Kwa Akhristu akusankhika, yiwu “adindika” ndi mzimu wakupaturika kuti mbaku Chiuta. (Ŵaef. 1:13, 14) Kweni adindika chidindu ichi kakumaliya asani kwaja kamanavi kuti afwi pamwenga asani chisuzgu chikulu chaja kamanavi kuti chiyambi.—Ŵaef. 4:30; Chiv. 7:2-4.