Kachilembu Kamana ka Chihebere ko Katitiwovya Kuti Tilekengi Kukayika

Kumbi titenere kugomezga kuti vosi vo Chiuta wakulayizga vazamufiskika nadi? Yesu wakayikanga cha, ndipu vo wasambizanga vinguwovya wo amuvwisiyanga kuti nawu alekengi kukayika. Ŵanaŵaniyani chakuyeruzgiyapu cho iyu wangukamba pa Upharazgi waki wa pa Phiri cho chikulembeka pa Mateyu 5:18. Iyu wanguti: “Nditikuneneskiyani kuti kuchanya ndi charu chapasi vingatuwapu kwambula kusuzga, kweni kachigaŵa ka lemba la mu Dangu kangatuwamu cha mpaka po vinthu vosi vafiskikiya.”

Pa vilembu vosi va Chihebere, kachilembu ko kaziŵika kuti yod (י), ndiku kachilembu kamana ukongwa. Kachilembu kenaka ndiku kakwamba pa vilembu vinayi va Chihebere vo vimiya zina lakupaturika laku Chiuta lakuti Yehova.a Alembi ndi Afarisi, awonanga kuti mazu ngosi nga mu Dangu lo Chiuta wangupasa Mosese ngenga ngakukhumbika ukongwa ndipu venivi vasazgangapu “kachigaŵa ka lemba” pamwenga kuti chilembu chechosi.

Yesu wangukamba kuti ntchinthu chipusu ukongwa kuti kuchanya ndi charu chapasi vituwepu, kuphara kuti vinthu vimanavimana vo Dangu laku Mosese likamba vileki kufiskika. Kweni Malemba ngatitisimikiziya kuti kuchanya ndi charu chapasi vazamujaku mpaka muyaya. (Sumu 78:69) Mwaviyo, vo Yesu wangukamba visimikiziya kuti vingachitika cha kuti vinthu vimanavimana vo ve mu Dangu laku Mosese vileki kufiskika.

Kumbi Yehova waŵanaŵaniya so vinthu vimanavimana? Hinya. Ŵanaŵaniyani fundu iyi: Chiuta wangukambiya Ayisraele kuti akhumbikanga cha kufyo chiwanga chechosi cha mbereri ya Phaska. (Chituwa 12:46) Fundu yeniyi yingawoneka nge kuti njimana. Kumbi yiwu achiziŵanga chifukwa cho akhumbikiyanga cha kufyo chiwanga chechosi cha mbereri ya Phaska? Atenere kuti aziŵanga cha. Kweni Yehova Chiuta waziŵanga kuti venivi vamiyanga vo vazichitikiyanga Mesiya kunthazi. Pengavi chiwanga chechosi chaku Mesiya cho chingufyoleka pa nyengu yo wangubayika pa chimiti chakutombozgekiyapu.—Sumu 34:20; Yohane 19:31-33, 36.

Kumbi tisambiranji pa vo Yesu wangukamba? Titenere cha kukayika kuti malayizgu ngosi ngaku Yehova Chiuta ngazamufiskika chinanga kuti nganyaki ngangawoneka kuti ngamanangamana. Kachilembu kamana ukongwa ka Chihebere katitiwovya kuti tilekengi kukayika!