Kumbi Angelu Aheni Aliku?

Hinya, aliku. Kumbi akutuliya pani? Kumbukani kuti Chiuta wakulenga angelu ndi wanangwa wakusankha. Pati pajumpha nyengu yimanavi kutuliya po Adamu ndi Eva angulengeke, mungelu munyaki wangugwirisiya ntchitu uheni wanangwa waki wakusankha ndipu wanguchitisa kuti ŵanthu agarukiyi Chiuta. Iyu wangunyenga Adamu ndi Eva ndipu angugarukiya Chiuta. (Chiyambo 3:1-7; Chivumbuzi 12:9) Bayibolu likamba cha zina lo mungelu mwenuyu wenga nalu pakwamba kweniso udindu wo wenga nawu wechendagaruki. Kweni wati wagaruka, Bayibolu likumudana kuti Satana kung’anamuwa kuti “Wakususka” ndipuso kuti Dyaboli kung’anamuwa kuti “Waboza.”—Mateyu 4:8-11.

Ndi Satana pe cha yo wangugarukiya Chiuta. Mu nyengu yaku Nowa, angelu anyaki wo chiŵerengeru chawu chiziŵika cha, “anguleka malu ngawu ngakwenere,” mu banja laku Chiuta. Yiwu angutuwa kuchanya ndi kuja ndi maliŵavu nga ŵanthu kuti achitengi vinthu viheni. Angelu yaŵa angwamba kugonana ndi anthukazi, kweni Yehova wakuŵalenga kuti achitengi venivi cha.—Yuda 6; Chiyambo 6:1-4; 1 Petro 3:19, 20.

Kumbi ndi vinthu wuli vo vikuchitikiya angelu yaŵa? Chiuta wati wazisa chigumula kuti watuzgepu vinthu viheni pacharu, angelu yaŵa anguvwala maliŵavu ngauzimu ndikuwere so kuchanya. Kweni Chiuta wanguŵazomerezga cha angelu ambula kuvwiya yaŵa kuti awere so ku “malu ngawu ngakwambiliya.” M’malu mwaki, wakuŵasunga ku “malu nga mdima” ngo ngadanika kuti Tatalasi. (Yuda 6; 2 Petro 2:4) Chifukwa cha vakusankha vawu, angelu yaŵa wo aziŵika kuti viŵanda alamulika ndi Satana Dyaboli yo ndi “mura wa viŵanda,” kweniso yo “watijisanduska kuŵa mungelu wa ukweru.”—Mateyu 12:24; 2 Ŵakorinte 11:14.

Bayibolu lisambiza kuti Ufumu waku Chiuta wo ndi boma lakuchanya, ukujalikisika mu 1914.a Ufumu uwu wati wajalikisika, Satana ndi angelu ŵaki angudikisika kuchanya ndi kuponyeka pacharu chapasi. Vinthu viheni kweniso ureŵi wo wawanda ukongwa pacharu chapasi, mbukaboni wakuti yiwu ŵe ndi mtima wakuweze kweniso wakukhumba wakunanga vinthu.—Chivumbuzi 12:9-12.

Chinanga kuti ve viyo, vinthu viheni vo vichitika pacharu kweniso viwawa, vilongo kuti ulamuliru wankhaza waku Satana ndi viŵanda vaki wepafupi kumala. Pambula kuswera yapa, angelu aheni ŵenaŵa atuzgikengepu. Asani Ufumu waku Chiuta wazilamuliya charu chapasi cha paradayisu kwa vyaka 1,000, angelu aheni yaŵa azamufwatulika kwa kanyengu kamanavi kuti azilandizgi ŵanthu kakumaliya. Pavuli paki, azamubayika ndipu azamuŵaku so cha.—Mateyu 25:41; Chivumbuzi 20:1-3, 7-10.