Kalata Yakutuliya ku Wupu Wakulongozga
Akwanjiwa Akaboni aku Yehova anyidu:
Te ndi mwaŵi ukulu ukongwa wa kuziŵika ndi zina la Fumu ya Chilengedu Chosi Yehova. Zina ili ndamuyaya, ndipuso palivi lo liyanana nalu. Yehova ndiyu wakutipaska zina lenili ndipu tikwamba kuziŵika ukongwa ndi zina lapade lenili kutuliya mu chaka cha 1931. (Yesa. 43:10) Nchinthu chakunyadisa ukongwa kuziŵika ndi zina lakuti Akaboni aku Yehova.
Diabolo walutirizga mbwenu kwesesa kufipisa zina laku Chiuta. Iyu wachitisa mitundu ya ŵanthu kukana zina laku Yehova. Babiloni Mukuru, yo wamiya ufumu wa pacharu chosi wa chisopa chaboza, watinkha zina laku Chiuta ndipu walituzgamu mu Mabayibolo nganandi. Mwakupambana ndi Babiloni, Yesu wangukweza zina la Awiski mwakuliŵika pakwamba mu rombu laki la kuyeruzgiyapu lo wangusambiza akulondo ŵaki. Iyu wanguti: “Imwe rombani viyo: ‘Awusefwe mwaŵakuchanya, lipatulike zina linu’ ” (Mate. 6:9) Pavuli paki, mu rombu laki lakutuwa pasi pa mtima lakuluta kwa Awiski wangukamba kuti: ‘Zina linu ndalisumuwa ku ŵanthu wo mwandipaska kutuliya mu charu’ (Yoha. 17:6) Chifukwa chakuti tikhumba kulondo chakuwoniyapu chamampha chaku Yesu, te akusimikizga ukongwa kuluska kali kumemeza zina laku Yehova ndi nthazi zidu zosi pa charu chosi.
Lemba la chaka chamala lakuti: “Kwachisimikizgiya evangeli” likutichiska kuti tifiski mwakukwana uteŵeti widu. (Machi. 20:24) Tikayika cha kuti Yehova wangutumbika ukongwa phamphu lidu mu chaka chamala cha uteŵeti. Pa charu chosi chapasi ŵanthu anguchitiya ukaboni ukulu za kukankhuskika ndi kutumbikika kwa zina laku Yehova. Apharazgi angufika chiŵerengeru chapachanya chakukwana 7,313,173, ndipu yiwu angugwira nawu nchitu yakupharazga ndi kusambizga ŵanthu wosi akukhumbisiska kuziŵa, wo apenja nthowa yakumalisiya masuzgu nganandi ngo akumana nangu zuŵa lelosi. Ŵanthu akukwana 18,168,323 angusanirika pa chikumbusu cha nyifwa yaku Khristu ndipu chiŵerengeru ichi chilongo kuti peche ŵanthu anandi wo angadana pa zina laku Yehova umarilu wa mgonezu wunu wechendafiki.
Asani Yehova weche kuzomerezga, tirutirizgengi kupharazga uthenga wamampha wa Ufumu mwa kugwiriskiya nchitu nthowa yeyosi kuti tifikiyi ŵanthu a m’chigaŵa chidu. (Mate. 24:14; Marko 13:10) Kaya mbupharazgi wakhomu ndi khomu, wa mu msewu, wa m’makalata, wa patelefoni ndipuso wa mwamwaŵi, titenele kuyesesa kuziŵikiska zina laku Yehova ndi chilatu chaki ku ŵanthu anandi wo tingafiska.
Te ndi chigomezgu chosi chakuti pambula kuswera yapa, Yehova wachitengepu kanthu kuti watowesi zina laki. (Ezek. 36:23) Nyengu yakuti ŵanthu akufipisa zina laku Yehova atuzgikepu, yaŵandika ukongwa. Lazamukuŵa zuŵa lakukondwesa ukongwa kwa ateŵeti aku Yehova wosi akugomezgeka wo aziŵikisa zina laki ndi kukweza muwusu waki.
Chanju chaku Yehova pakuphwere ŵanthu ŵaki chinguwoneke ukongwa pa maunganu nga Chigaŵa ndi nga Vyaru ngo ngenga ndi mutu wakuti: “Khalani Maso” ngo nganguchitika mu chaka cha 2009 kuzunguliya pafupifupi charu chosi chapasi. Maunganu yanga ngenga ndi vakuchitika vapade mu mbiri yosi ya gulu laku Chiuta vo vingutichiska kuti tiwoni kukhumbika kwa kukhazga zuŵa laku Yehova.—Marko 13:37; 1 Ŵatesa. 5:1, 2, 4.
Kukamba uneneska, Yehova ngwamampha kwaku isi ndipu wazaza mitima yidu ndi likondwa. Iyu watitigoneka mu uteka wa chipozwa ndipu watitilongozge ku maji ngamampha.—Sumu 23:1, 2; 100:2, 5.
Simikizgani kuti Yehova walutirizgengi kukutumbikani asani murutirizgengi kutangwamika mu uteŵeti wa Ufumu mu myezi ya kunthazi
Londiyani moni wachanju Chachikhristu cha ubali wa pacharu chosi,
Ndisi abali ŵinu,
Wupu Wakulongozga wa Akaboni aku Yehova