Kugulisa Malonda pa Unganu wa Chigaŵa

¹ Po Unganu widu Wachigaŵa wa mutu wakuti ‘Lutirizgani Kuja Pafupi ndi Yehova!’ we pafupi, tawona kuti nkhwamampha kukukumbuskani vinthu vimanavi vakukwasana ndi jalidu lidu pa maunganu ngenanga. Malipoti nga maunganu ngo ngachitikapu kuvuli ngalongo kuti abali atuwangapu pa malu nga unganu kuti akaguli vakurya ku ŵanthu wo agulisa vakurya mphepeti mwa msewu ndipuso ku malestilanti ngo nge pafupi ndi malu nga unganu pamwenga kuŵagula vinthu unganu we mukati. Kweniso abali anyaki asanirika kuti aturya vakurya unganu we mukati. Kuchita venivi nkhuŵavi ulemu.

² Ku malu nganyaki ŵanthu wo agulisa vakurya mphepeti mwa msewu akhumba kuti aŵapasengi malu ngakuyalapu malonda ngawu pa malu nga unganu kuti agulisengi ku ŵanthu wo ŵaza pa unganu widu. Kuzomereza ivi kuchitika, kungachitisa kuti ŵanthu akubwalu asereriyepu ndi kutimbanyiza chimangu cho chiŵapu pa maunganu ngidu.

³ Pamaunganu nganyaki, abali asanilika kuti akambiskana nkhani zamlonda pa malu nga unganu. Yiwu apinga malonda ngawu nge: Mijuŵa, mboholi zakubika ndi zambula kubika, vigawu, mpunga, mandazi, vitumbuwa, matochi, mphangwi ndi vinyaki va viyo ndi chilatu chakuti akagulisengi kwa Akhristu anyawu. Kuchita venivi nkhwambula kwenere. Tikhumbika cha kuchita chechosi chakukwasana ndi malonda pamwenga kuchiska malonda pa malu nga unganu. Kuchita vinthu vaviyo kukoliyanaku cha ndi chilatu chidu cha M’malemba cho tiunganiyana pamoza.​—⁠Ŵahe. 10:​24, 25.

⁴ Tikhumbika Kuchita Vinthu Mwakuphwere: Vingaŵa umampha kuti weyosi yo wamusanirika pa Unganu wa Chigaŵa wa chaka chinu wakuti, ‘Lutirizgani Kuja Pafupi ndi Yehova!’ wakumbukiyi fundu izi: Abali ndi azichi angapinganga cha malonda ngawu kuti akagulisengi pa unganu wa chigaŵa. Abali ndi azichi kweniso ŵanthu wosi akunweka atenere cha kuchigula vakurya ku ŵanthu akugulisa malonda pa malu nga unganu chifukwa nchachiziŵikiyevi kuti ŵanthu anyaki amugulisa malonda ngakupambanapambana. Tikhumbika kulutirizga kuja ŵanthu achanda ndipuso adongosolu, mwaviyo tingazizomerezanga cha kuti amalonda azijengi pafupi ndi malu nga unganu. Asani abali akhumba vinthu vinyaki, atenere kuchigula ku msika pamwenga ku sitolu unganu wechendayambi pamwenga asani wamala. Abali wo alonde alendu atenere kuŵakambiya mwaulemu ŵanthu wo agulisa malonda kuti atuwepu pa malu ngakusopiyapu. Asani akhumba kuyala malonda ngawu atenere kuchiyala kutali ndi malu nga unganu.

⁵ Te ndi likondwa likuru ukongwa kuti Maunganu ngidu nga Chigaŵa nga mutu wakuti ‘Lutirizgani Kuja Pafupi ndi Yehova!’ nge pafupi kwamba. Tosi titenere kuwonesesa kuti tanozgeke kuti tizisanirikepu pa mazuŵa ngosi nga unganu wenuwu kuti tizikondwi ndi phwandu lauzimu lo Yehova watinozge kuziya mu gulu laki. Kuchita viyo kwazakutiwovya kuti tije ‘akwenere kuchita nchitu yosi yamampha’ kunthazi.​—⁠2 Timo. 3:⁠17.