Tumbikani Yehova ndi Chuma Chinu—Chigaŵa Chachiŵi
1 Muchigaŵa chakwamba cha mutu wakuti “Tumbikani Yehova ndi Chuma Chinu,” tingukambiskana za bokosi la vakupereka va Nchitu ya Pacharu Chosi. (Mate. 24:14) M’chigaŵa chachiŵi ichi, tikambiskanengi nchitu ya bokosi lo lidanika kuti, “Zopereka za Mpingo.” Kumbi bokosi lenili litenere kugwiriskikiya nchitu wuli?
2 Bokosi la Zopereka za Mpingo: Tigwiriskiya nchitu ndalama za m’bokosi la “Zopereka za Mpingo” kuti tiwovyi mpingu widu. Nge po muziŵiya, muvigaŵa vinyaki mpingu ukhumbika kulipira magesi ndi maji, kunozga vinthu vo vanangika pa Nyumba ya Ufumu, kuphwere wakuwonere dera asani wafika pa mpingu ndipuso kuwovya pa vakusoŵa va dera asani pakhumbika kuchita viyo. Ŵerengani 2 Mikoka 34:8-11.
3 Kusazgiyapu pa fundu zo takambiskana, tigwiriskiya so nchitu ndalama za m’bokosi lenili asani tikhumba kupereka ndalama za Nyumba ya Ufumu yo tigwiriskiya nchitu. Mu vyaka va pambula kuswera yapa, ndalama zinandi zagwiriskikiya nchitu pakuzenge Nyumba za Ufumu zinandi mu Malawi. Kumbi tiwonga cha mo Yehova waphwere vakusoŵa vidu vauzimu kuziya mu gulu laki? Asani tikhumba kulongo kuwonga mwaŵi wakugwiriskiya nchitu Nyumba yidu ya Ufumu, tingaponya ndalama mu bokosi lenili. Mwaviyo, mwezi wewosi wa May, mpingu utenere kukambiskana so ndalama zo ungapereka, kulongo kuwonga Nyumba ya Ufumu yo ugwiriskiya nchitu. M’pharazgi weyosi wapemphekengi kuti walembi pa pepala ndalama zo wawona kuti wangapereka mwezi wewosi. Ivi vitenere kuchitika mwakulongozgeka ndi wupu wa ŵara. Ndalama zo mwakoliyanaku kuti muperekengi zitenere kukoliyanaku ndi ndalama zo mpingu ungafiska kupereka. M’pharazgi weyosi watenere kuyesesa kupereka ndalama zo wakulayizga kuti waperekengi mwezi wewosi mwakulingana ndi po vinthu vilili paumoyu waki.—1 Ŵako. 16:1, 2; 2 Ŵako. 9:7.
4 Kusazgiyapu pa vinthu vo takonkhoskapu kali, kamoza pa chaka tipereka ndalama za inshulansi ya Nyumba ya Ufumu zo ziwovya asani vinthu vinyaki vanangika chifukwa cha ankhungu pamwenga masoka ngachilengedu nge kutola ndi kusapaliya kwa maji. Manozgeru yanga ngadanika kuti, Manozgeru Ngakovya Nyumba za Ufumu (Kingdom Hall Assistance Arrangement). Mpingu ndiwu upereka ndalama zenizi. Mwaviyo, ndalama zo ziperekeka ku thumba ili zitenere kutuliya kuthumba la mpingu.
[Mafumbu]
1. Kumbi bokosi lachiŵi lidanika kuti wuli?
2. Kumbi bokosi ili ligwira nchitu wuli?
3. Konkhoskani mo tingalongole kuti tiwonga Nyumba ya Ufumu yo tigwiriskiya nchitu.
4. Kumbi pe manozgeru wuli ngakovya pa Nyumba za Ufumu?