Sambizani Ŵana Ŵinu Kuti Aje Ateŵeti
1. Kumbi lemba la Sumu 148:12, 13 lichiska apapi Achikhristu kuchitanji?
1 Yehova wapempha ŵana kuti amuthamikengi. (Sumu 148:12, 13) Mwaviyo, apapi Achikhristu achita vinandi kuluska waka kusambiza ŵana ŵawu uneneska wa m’Bayibolo ndi marangu ngaku Chiuta nga majalidu ngamampha. Yiwu atiŵasambiza so kuti aje ateŵeti a uthenga wamampha. Kumbi angachita wuli kuti alutirizgi kuchita venivi?
2. Kumbi chakuwoniyapu chamampha cha apapi chingawovya wuli ŵana ŵawu?
2 Jani Chakuwoniyapu Chamampha: Mweruzgi Gideoni wangukambiya ŵanthu ŵaki 300 kuti: “Ndilereskeni ndipu muchit kwakukozgana.” (Ŵeru. 7:17) Mwakawi, ŵana awona ndi kulondo vo apapi ŵawu achita. Da munyaki wagwira nchitu usiku, kweni asani wawe pa Chisulu ndi mulenji, m’malu mwakuchigona iyu wato ŵana ŵaki ndi kuluta nawu mu uteŵeti chinanga wuli waja kuti wavuka ukongwa. M’malu mwakuchita kuŵakambiya, iyu watiŵasambiza kutuliya pa vo wachita, kuti uteŵeti ngwakukhumbika kuwuŵika pa malu ngakwamba. (Mate. 6:33) Kumbi ŵana ŵinu atikuwonani kuti mukondwa asani musopa mu nthowa zakupambanapambana, nge kuromba, kuŵerenga Bayibolo, kumuka pa maunganu ndi kupharazga? Mbuneneska kuti mungakwanisa cha kuchita vosi ndendende. Kweni asani ŵana ŵinu awona phamphu linu pa kuteŵete Yehova, yiwu akhumbisiskengi kuvwiya asani mutiŵasambiza kuti asopengi Yehova.—Mara. 6:6, 7; Ŵaro. 2:21, 22.
3. Kumbi apapi atenere kuwovya ŵana ŵawu kuti aje ndi vilatu wuli vauzimu ndi kuvifiska?
3 Wovyani Ŵana Ŵinu Kuluta Panthazi: Apapi avuka cha kusambiza ŵana ŵaŵu kwenda, kulongoro, kuvwala ndipuso kuchita vinthu vinyaki. Asani ŵana akuwa, atamba kusankha vakuchita paumoyu wawu. Ndipu asani apapi mbakhristu, atovya so ŵana ŵawu kuja ndi vilatu vauzimu ndipuso kufiska vilatu vo mwakukoliyana ndi msinkhu kweniso zeru zawu. (1 Ŵako. 9:26) Kumbi mutiŵasambiza ŵana ŵinu kuti anozgekiyengi ŵija kumuka pa maunganu ndipuso kunozgeke nkhani zawu za mu Sukulu ya Uteŵeti Waku Chiuta? (Sumu 35:18) Kumbi mutiŵasambiza kuti agwirengeku nchitu mu vigaŵa vakupambanapambana va uteŵeti? Kumbi mutiŵachiska kuti aje ndi chilatu chakuti abatiziki ndi kuja ateŵeti a nyengu zosi? Kumbi mutesesa kuŵawovya kuti achezgengi ndi apharazgi alikondwa ndipuso aphamphu ndi chilatu chakuti achiskikengi?—Ntha. 13:20.
4. Kumbi ŵana awovyeka wuli asani ŵe ndi apapi wo atamba kuŵasambiza mu uteŵeti ŵeche anamana?
4 Wakulemba sumu wangukamba kuti: “A Chiuta mwandisambiza kutuwa ku wanamana wangu ndipu mpaka sonu ndeche kutaula nchitu zinu zakuziziswa.” (Sumu 71:17) Yambani kusambiza ŵana ŵinu ŵeche anamana kuti aje ateŵeti. Vinthu vauzimu vo mutiŵawovya kuti achitengi ŵeche anamana, vazakuŵawovya asani akuwa!—Ntha. 22:6.