Kumbi Mungachita Nawu Uteŵeti Pazuŵa la Sabata Lelosi?
1. Kumbi tisambiranjipu pa vo Paulo ndi anyaki wo wayendanga nawu anguchita ku Filipi?
1 Zuŵa la Sabata ndilu Ayuda anandi ku Filipi apumuwanga. Paulo ndi anyaki wo wayendanga nawu angusere mu msumba wo paulendu wawu unyaki wa umishonale. Palivi yo watingi waŵasuskengi asani nawu angupumuwa pa uteŵeti wawu pazuŵa lo. Kweni chifukwa chakuti aziŵanga kuti Ayuda apemphera kubwalu kwa msumba pazuŵa ili, yiwu angusaniriyapu mwaŵi wakuti aŵapharazgiyi. Paulo ndi anyaki wo wenga nawu, angukondwa ukongwa kuti Ludiya [Lidia] wanguvwiya ndipu wosi a munyumba yaki angubatizika. (Machi. 16:13-15) Chifukwa chakuti anandi mazuŵa nganu apumuwa pazuŵa la Sabata, tiyeni tiligwiriskiyi nchitu zuŵa lenili kuŵapharazgiya.
2. Kumbi ndi masuzgu wuli ngo ŵanthu aku Yehova angumalana nangu kuti alutirizgi kupharazga pazuŵa la Sabata?
2 Angulimbana Nawu Kuti Aleki Kupharazga Pazuŵa la Sabata: Mu chaka cha 1927, ŵanthu aku Yehova anguchiskika kuti agwiriskiyengi nchitu nyengu yinyaki pa zuŵa la Sabata lelosi kuchita uteŵeti. Ivi vinguchitiska kuti ŵanthu ayambi kuŵayukiya. Ŵanthu anandi m’charu cha United States angumangika chifukwa cha kuphwanya marangu Ngakusunga Sabata, kutimbanyiza chimangu ndipuso kuguliska malonda kwambula kuzomerezeka. Kweni ŵanthu aku Yehova anguleka cha kupharazga. Mu vyaka va m’ma 1930, angupanga manozgeru ngakupharazga “mwakugaŵana timagulu” ndipu apharazgi a mipingu yapafupi akumananga pamoza kuti apharazgi ndi kumaliza chigaŵa cho apaskika. Panyengu yo aŵamangiyanga, kwasanirikanga apharazgi anandi mwakuti ŵaraŵara a boma asoŵanga chakuchita. Kumbi mulongo kuwonga chifukwa cha kujipereka ko abali yaŵa anguchita, mwakugwira nawu nchitu yakupharazga pazuŵa la Sabata kwambula munthu wakutisuzga?
3. Kumbi nchinthu wuli cho chilongo kuti zuŵa la Sabata ndamampha ukongwa kuchita uteŵeti wakumunda?
3 Zuŵa Lamampha Ukongwa Lakupharazgiya: Ŵanthu anandi pazuŵa la Sabata agwira nchitu cha ndipu asanirika panyumba. Kanandi apumuwa waka. Ŵanthu wo aluta ku matchalitchi angakhumbisiska kuti tikambiskani nawu vakukwaskana ndi Chiuta pazuŵa ili. Asani tichita mawunganu pazuŵa la Sabata, tija kuti tavwala kali umampha nge mo tatingi tivwaliyengi pakuluta mu uteŵeti, mwaviyo talekiyanji kupanga manozgeru ngakuchita uteŵeti wakumunda techendayambi pamwenga asani tamaliza waka mawunganu? Munganozge limu chakurya chinu asani nkhwakwenere.
4. Kumbi ndi likondwa wuli lo tingasaniya asani tingachita uteŵeti pazuŵa la Sabata?
4 Asani tingagwiriskiya nchitu nyengu yinyaki ya zuŵa la Sabata pakuchita uteŵeti, tiŵengi nayu mbwenu nyengu yakuti tingapumuwa. Kupumuwa kwidu kusazgiyengepu so likondwa lo tingaŵa nalu chifukwa chakuti tachita uteŵeti wakupaturika. (Ntha. 19:23) Tikhoza kuja ndi likondwa lakuti tasaniya munthu wange Ludiya!