Tiperekengi Malipoti Ngidu nga Uteŵeti Wakumunda Mwaliŵi Ndipuso Mwauneneska
1. Kumbi tituvwa wuli asani talonde malipoti ngakukondweska nga uteŵeti wakumunda?
1 Tosi tikondwa ukongwa asani tavwa vinthu vamampha vo vichitika pa nchitu yakupharazga uthenga wa Ufumu. (Wonani Nthanthi 25:25.) Petro wati wakamba nkhani yakukondweska pa Pentekoste, ‘ŵanthu pafufupi 3,000 angusazgikiyaku.’ (Machi. 2:41) Pati pajumpha waka nyengu yimanavi chiŵerengeru ichi chingukuwa kufika ‘pafufupi 5,000.’ (Machi. 4:4) Kuvwa malipoti yanga chenga chinthu chakukondweska ukongwa kwa Akhristu a m’nyengu ya akutumika. Ndimu so tichitiya asani tavwa malipoti ngakukondweska mazuŵa nganu.
2. Kumbi titenere kuchitanji kuti malipoti ngasazgiki mwauneneska?
2 Tikondwa ukongwa asani tavwa vinthu vakukondweska vo abali ŵidu akumana navu pakupharazga uthenga wamampha pa charu chosi chapasi. Mupharazgi weyosi wa Ufumu watenere kupereka malipoti mwaliŵi chifukwa chakuti mwezi wa August ngwakumaliya mu chaka cha uteŵeti ndipu pakhumbika nyengu kweniso kwesesa kuti malipoti ngosi ngasazgiki pamoza. Kumbi mutesesa kupereka malipoti nginu mwaliŵi mwezi wewosi?
3. Kumbi malipoti ngauneneska ngatovya wuli gulu laku Yehova kweniso isi?
3 Tikondwa ukongwa asani tituvwa malipoti ngakuti nchitu yidu yiluta panthazi. Kweniso, malipoti ngatovya kuti gulu liziŵengi mo nchitu ya pacharu chosi chapasi yilutiya panthazi. Vitovya so kuti gulu liziŵengi ko kukhumbika chovyu chikulu pamwenga mtundu ndi unandi wa mabuku ngakukhumbika. Mu mpingu wewosi ŵara agwiriskiya nchitu malipoti nga uteŵeti wakumunda kuti aziŵi vo atenere kusintha. Malipoti ngamampha ngakondweska ndipuso ngachiska tosi kuti tiwoni po tikhumbika kusintha mu uteŵeti widu.
4. Kumbi ndi vinthu wuli vo mupharazgi weyosi ndipuso ŵara mu mpingu angachita ndi chilatu chakuti awonesesi kuti lipoti la uteŵeti wakumunda litumizika ku ofesi ya nthambi mwezi wewosi?
4 Apharazgi wosi atenere kuziŵa udindu wawu wakupereka malipoti nga uteŵeti wakumunda mwaliŵi mwezi wewosi. Mupharazgi weyosi wangaponya malipoti ngaki mu bokosi pa Nyumba ya Ufumu asani wakhumba pamwenga asani wangafiska cha kupaska wakuwonere kagulu ka uteŵeti wakumunda. Asani mwezi wamala mlembi, watenere kutuzgamu malipoti ngosi mubokosi. Wakuwonere kagulu ka uteŵeti wakumunda wawonesesengi kuti malipoti ngosi nga kagulu kaki ngaperekeka mwaliŵi kwa mlembi. Mupharazgi ndipuso mpayiniya weyosi watenere kuyesesa kupereka malipoti mwaliŵi kukumaliya kwa mwezi wewosi. Chifukwa chakuti ŵara ŵe masu kuti awovyi weyosi yo watondeka kuluta mu uteŵeti wakumunda mwakujalikiskika, akuwonere timagulu ta uteŵeti wakumunda angakumbuska ŵanthu kuti apereki lipoti la utiŵeti pa unganu wakumaliya mwezi wewosi pamwenga nyengu yinyaki yakwenere.
5. Kumbi mupharazgi weyosi wangawovya wuli kuti lipoti lijengi launeneska, nanga timafomu takulembapu Lipoti la Uteŵeti Wakumunda (S-4) tingatiwovya wuli?
5 Kumbi Apharazgi Angawovya Wuli Kuti Lipoti Lijengi Launeneska? Kuti malipoti ngaje ngauneneska, mutenere kupereka maora ngamphumphu pe ku mpingu, yija yo wangapereka malipoti ngambula kukwana ora ndi mupharazgi yo wakuzomerezgeka ndi Komiti ya Uteŵeti ya Mpingu kuti waperekengi maminiti 15 chifukwa chakutama pamwenga masuzgu nganyaki nga liŵavu. Asani mupharazgi we ndi lipoti lambula kukwana ora wangalisunga ndikuzilisazga ndi la mwezi unyaki. Tingachita umampha kulemba nyengu yo tapharazgiya, mabuku ngo tagaŵiya, ndi maulendu ngakuweriyaku ngo tapanga nyengu yeyosi yo tasere mu uteŵeti wakumunda. Pavuli paki asani tasazga vosi pakumaliya pa mwezi, tichitengi kubomosa cha vo tachita mu uteŵeti wakumunda. Timafomu takulembapu Lipoti la Uteŵeti Wakumunda (S-4) to tisanirika ku mpingu tingatiwovya kuti tisungengi umampha lipoti lidu.
6. Kumbi ndi nampha po tingaŵerengese ulendu wakuweriyaku?
6 Kumbi ndi Nampha po Tingaŵerengese Ulendu Wakuweriyaku? Kuti tiŵerengese ulendu wakuweliyaku, titenere kukumana so ndi munthu yo tingukambiskana nayu ulendu wakwamba. Tingaŵerengese ulendu wakuweliyaku ndipuso nyengu yo taja mu uteŵeti asani tipereka magazini ku ŵanthu wo titiŵapaska nyengu zosi, asani tipharazga kachiŵi ku munthu yo tingukambiskana nayu pa foni, pamwenga asani tilembe kalata munthu munyaki yo tikumupharazgiyapu kali. Tingaŵerenga ulendu wakuweriyaku nyengu yeyosi po tachitiska sambiru la Bayibolo. Chiŵerengeru chosi pamoza cha masambiru nga Bayibolo ngo tachitiska mu mwezi wo chitenere kulembeka pa kabokosi kakwenere ko ke kumaryi kwa fomu yakulembapu Lipoti la Uteŵeti Wakumunda (S-4).
7. Kumbi nchinthu wuli cho chichitika asani munthu walondo ndondomeku ya gulu ndi mtima wosi?
7 Mupharazgi weyosi yo walondo ndi mtima wosi ndondomeku ya gulu yo takonkhoska, wangaja ndi likondwa chifukwa chakuziŵa kuti wawovya kuti lipoti la pacharu chosi chapasi la Akaboni aku Yehova lije launeneska. (Yeruzgiyani ndi Ezekiele 9:11.) Tiyeni tosi tiperekengi lipoti la uteŵeti wakumunda mwauneneska ndipuso pa nyengu yaki!