Kalata Yakutuliya ku Wupu Wakulongozga
Akwanjiwa Akaboni aku Yehova Anyidu:
Te akukondwa ukongwa kukulembiyani imwi ateŵeti aku Yehova akwanjiwa ndipuso akugomezgeka, akujumpha 7 miliyoni sonu. Nchachiziŵikiyevi kuti asani mwakumana ndi Mkhristu munyinu wakutuliya ku charu chinyaki, mulongorana chanju chapade ukongwa. (Yoha. 13:34, 35) Asani mwe ndi mwaŵi wakuti mungaŵerenga Yearbook ya 2012, muvwengi nkhani zakukondweska ukongwa zakukwaskana ndi chivwanu kweniso kugomezgeka kwa abali ndi azichi ŵinu mu vyaru vakupambanapambana ndipu zikuwovyeningi kuwona chanju chapade chenichi.
Malipoti ngakutuliya mu vyaru vakupambanapambana ngalongo kuti mwanandi aku imwi muwona kuti Kusopa kwa Pabanja nkhwakukhumbika ukongwa. Imwi mwe ndi ŵana anamana, mwayesesa kugwiriskiya nchitu nthowa zakuwovye ŵana ŵinu kuti ayendengi munthowa yamampha. (Ŵaefe. 6:4) Mabanja ngatanjana ukongwa chifukwa cha vinthu vauzimu vo asambira kuziya mu pulogilamu yeniyi. (Ŵaefe. 5:28-33) Mbuneneska nadi kuti weyosi pakuyija ndipuso mabanja ngayanduwa ukongwa ndi manozgeru ngenanga chifukwa asambira Mazu ngaku Chiuta mwakufikapu.—Yos. 1:8, 9.
Titikuŵanaŵaniyani ukongwa mosi imwi mwataya akwanjiwa ŵinu ndipuso vinthu vakupambanapambana chifukwa cha masuzgu ngachilengedu ngo ngachitika pambula kuswera yapa. Tiwonga so ukongwa wosi wo angujipereka mwaliŵi kugwira nawu nchitu yakovya ŵanthu wo angukumana ndi masuzgu pa nyengu iyi. (Machi. 11:28-30; Ŵaga. 6:9, 10) Ndipuso, mumpingu wewosi, anyaki aku yimwi muwona abali ŵidu wo akhumbika chovyu chakuliŵavu ndipu mutesesa kuŵawovya mwachisisi. Nge Dorka wa munyengu ya akutumika, mwe akuzara ndi ‘milimu yamampha ndi vawanangwa va lisungu.’ (Machi. 9:36) Ziŵani kuti Yehova wawona vo muchita ndipu wazakukuweziyanipu.—Mate. 6:3, 4.
Mu vyaru vinyaki, wanangwa winu ukandirizgika ndi ŵanthu wo apanga marangu ndi chilatu chakuti ‘ayambisengi masuzgu mwakugwiriskiya nchitu dangu lo apanga.’ (Sumu 94:20-22) Mutesesa kukunthiyapu chifukwa chakuti muziŵa kuti ndivu Yesu wangukambiya limu, kweniso muthemba Yehova kuti ndiyu chakubisamamu chinu. (Yoha. 15:19, 20) Ziŵani so kuti nyengu zosi titikuzumbuwani mu marombu ngidu po namwi so mulutirizga ‘kumuka yosi yo watikufumbani chifukwa cha chigomezgu chinu.’—1 Pet. 3:13-15.
Titikuwongani ukongwa mosi akukwana mamiliyoni nganandi imwi mutesesa kuja atuŵa chaka ndi chaka chinanga kuti nyengu zosi Satana walimbana namwi, kuti muchitengi vinthu viheni ndipuso wagwiriskiya nchitu nthowa zaki zakubisika kuti mijalidu yiheni iyi yiluti panthazi. Pa nyengu yo mijalidu ya charu ichi yisintha ukongwa, imwi ‘muja ŵanthazi mu Mbuya, ndi mu likongonu la ukhomi waki.’ (Ŵaefe. 6:10) ‘Mwavwala vidya vosi vaku Chiuta’ ndipu mutesesa kulimbana ndi ‘mauryarya ngaku Diabolo yo.’ (Ŵaefe. 6:11, 12). Kumbukani kuti Yehova wagwiriskiya nchitu chakuwoniyapu chinu kuti wamuki Satana yo watumunyoza!—Ntha. 27:11.
Tingukondwa ukongwa kuvwa kuti ŵanthu wo anguwungana pa Chikumbusku cha nyifwa ya Ambuya mu chaka cha 2011, angukwana 19,374,737. Kuti pasaniriki chiŵerengeru chikulu viyo ichi, nchifukwa chakuti imwi namwi munguyesesa kuzomerezga pemphu lakuti muchiti upayiniya wakovya m’mwezi wa April chaka chamala. Ŵanthu mamiliyoni nganandi pacharu chapasi anguvwa mazu ngakuthamika Yehova ngakutuliya kwa Akaboni ŵaki akugomezgeka. (Ŵaro. 10:18) Kaya mwenga yumoza wa ŵanthu 2,657,377 wo anguchita upayiniya wakovya m’mwezi uwu pamwenga munguyesesa kusazgiyaku uteŵeti winu, tingukondwa namwi ukongwa mosi chifukwa chakujipereka ndipuso phamphu linu pa nchitu iyi.—Sumu 110:3; Ŵako. 3:23.
Chaka chamala ŵanthu 263,131 angujipatuliya kwaku Yehova. Tiwonga ukongwa Yehova kweniso mosi chifukwa chakugwira nasi nchitu yakudana so ŵanthu anyaki kuti: “ ‘Zanga!’ Ndipu mweniyo watuvwa waneni, ‘Zanga!’ Ndipu mweniyo ngwanyota wazi: yo ngwakukhumba waronde kwawezi maji nga umoyu.” (Chivu. 22:17) Ukongwa kutuliya pa unganu wachigaŵa wa chaka cha 2011, po tingusambiriya vigaŵa vakupambanapambana va Ufumu wo Chiuta wajalikiska, tikamba ndi nthazi kuti, ‘Ufumu waku Chiuta uzi!’ Mwakuchiskika ndi mazu ngaku Yesu ngakutisimikizgiya ngakuti, “Inya nthuza ruŵi,” tikoliyanaku ndi wakutumika Yohane kuti, “Ameni. Zaningi, Ambuya Yesu.”—Chiv. 22:20.
Po mukhazga chakuchitika chakukondweska ichi, ziŵani kuti titikuyanjani ukongwa mosi abali ŵidu ndi azichi chifukwa chakuti mutesesa kwanja Yehova “mu nchitu ndi mu uneneska”!—1 Yoha. 3:18.
Ndisi abali ŵinu,
Wupu Wakulongozga wa Akaboni aku Yehova